2010–2019
Cov Thawj Coj Zoo Tshaj Yog cov uas Txawj Raws Qab
2016 April General Conference


Cov Thawj Coj Zoo Tshaj Yog cov uas Txawj Raws Qab

Yuav muaj tej lub sij hawm thaum txoj kev taug mus tom ntej tsaus ntuj, tiam sis cia li coj raws nraim li tus Cawm Seej. Nws paub txoj kev uas yuav tsum taug; muaj tseeb tiag Nws yeej yog txoj kev.

Thaum kuv muaj 12 xyoos, kuv txiv coj kuv mus tua tsiaj pem roob. Wb sawv thaum 3:00 sawv ntxov, tso lub eeb nees rau wb ob tug nees, thiab cia li mus pem roob uas muaj ntoo ntau heev thaum tsaus ntuj. Txawm kuv nyiam mus tua tsiaj nrog kuv txiv los, thaum lub sij hawm ntawd kuv txhawj me ntsis. Kuv yeej ib txwm tsis tau nyob pem cov roob no ua ntej, thiab kuv pom tsis tau txoj kev—yeej pom tsis tau ib yam dab tsi hlo li! Tib qho kuv pom tau tsuas yog kuv txiv lub teeb npiv uas ci me ntsis rau cov ntoo thuv tom hauv ntej. Yuav ua li cas yog kuv tus nees ntog thiab vau—nws puas muaj peev xwm pom kev? Tiam sis muaj ib qho kev xav uas nplij kuv lub siab: “Txiv paub nws mus qhov twg. Yog kuv raws nws qab, txhua yam yuav zoo.”

Thiab txhua yam yeej zoo thiab. Lub hnub tuaj, thiab wb muaj ib hnub zoo kawg. Thaum wb tab tom rov qab mus tsev, kuv txiv taw tes rau ib lub ncov roob zoo nkauj uas yeej loj dua li lwm lub roob. Nws hais tias, “Nyob tid yog Windy Ridge. Yog qhov chaw zoo mus plob heev.” Kuv paub kiag hais tias muaj ib hnub kuv xav rov qab los nce Windy Ridge.

Tej xyoo tom qab ntawd, kuv pheej mloog kuv txiv hais txog Windy Ridge, tiam sis wb yeej tsis tau rov qab mus—mus txog thaum 20 xyoo tom qab nawd, muaj ib hnub kuv hu kuv txiv thiab hais tias, “Cia wb mus rau Windy Ridge mas.” Ces wb tso eeb nees rau wb ob tug nees thiab pib nce roob. Thaum ntawd kuv yeej yog ib tug uas txawj caij nees uas muaj 30 xyoo, tiam sis kuv tseem txhawj xeeb zoo ib yam li thaum kuv yog ib tug tub hluas uas muaj 12 xyoo. Tiam sis kuv txiv paub txoj kev mus, thiab kuv raws nws qab.

Ces thaum kawg wb los txog lub ncov roob Windy Ridge. Cov toj roob hauv pes yeej zoo nkauj kawg, thiab ua rau kuv xav xav rov qab los—tsis yog rau kuv tus kheej, tiam sis xav rov qab los nrog kuv tus poj niam thiab me nyuam. Kuv xav kom lawv saib thiab xav zoo ib yam li kuv tau saib thiab xav.

Tau ntau xyoo, kuv tau muaj cib fim coj kuv cov tub thiab lwm tus tub hluas mus pem roob, ib yam li kuv txiv coj kuv mus. Tej yam no ua rau kuv xav seb kev ua thawj coj txhais li cas—thiab kev raws qab txhais li cas.

Yexus Khetos, tus Thawj Coj Zoo Tshaj thiab tus Txawj Raws Qab Zoo Tshaj

Yog kuv nug nej hais tias, “Leej twg yog tus thawj coj zoo tshaj plaws?”—nej yuav teb li cas? Lus teb yeej yog Yexus Khetos. Nws yog tus uas coj yam ntxwv ntawm txhua txoj kev ua thawj coj zoo.

Tiam sis yog kuv nug nej hais tias, “Leej twg yog tus uas raws qab zoo tshaj plaws?”—nej yeej yuav teb hais tias yog Yexus Khetos puas yog? Nws yog tus thawj coj zoo tshaj plaws vim rau qhov Nws yog tus uas txawj raws qab tshaj plaws—Nws txawj raws Nws Leej Txiv qab, ua txhua yam.

Lub ntiaj teb qhia hais tias cov thawj coj yuav tsum muaj hwj chim heev; tus Tswv qhia hais tias lawv yuav tsum txo hwj chim. Cov thawj coj ntawm lub ntiaj teb tau hwj chim thiab hwj huam los ntawm lawv tej txuj ci thiab nyiaj txiag. Cov thawj coj zoo li Khetos tau hwj chim thiab hwj huam los ntawm kev yaum, los ntawm kev ua siab ntev, los ntawm kev siab mos thiab siab muag, thiab los ntawm kev hlub tiag tiag xwb.1

Raws li Vajtswv pom, cov thawj coj zoo tshaj plaws yeej yog cov uas coj raws nraim li Nws.

Cia kuv qhia nej txog ob zaug thaum kuv nrog cov tub hluas hauv lub Koom Txoos uas tau qhia kuv txog kev coj lwm tus thiab kev raws lwm tus qab.

Peb Txhua Tus Yog Thawj Coj

Tsis ntev tas los kuv tus poj niam thiab kuv wb koom kev sib ntsib txais lub cim nco txog nyob deb ntawm wb pawg ntseeg. Ua ntej kev sib ntsib pib, ib tug tub hluas nug kuv seb kuv puas kam muab lub cim nco txog. Kuv hais tias, “Kuv yeej zoo siab ua li ntawd.”

Kuv zaum nrog lwm tus dikas thiab nug ib tug uas zaum ntawm kuv ib sab hais tias, “Kuv yuav mus qhov twg?” Nws qhia kuv hais tias kuv yuav tsum pib muab rau lawv nram qab chav teev tiam los mus rau hauv nruab nrab thiab nws mam li nyob sab tod, wb yuav ua ib ke es wb mam li mus rau pem hauv ntej.

Kuv hais tias, “Kuv tsis tau ua li no tau ntev lawm.”

Nws teb hais tias, “Tsis ua li cas. Koj yeej ua tau. Thaum kuv pib kuv twb xav zoo ib yam.”

Tom qab ntawd tus dikas hluas tshaj nyob hauv lawv pawg, uas nyuam qhuav tsa ob peb lim tiam dhau los, nws hais lus nyob hauv kev sib ntsib txais lub cim nco txog. Tom qab kev sib ntsib, cov dikas tau tuaj cuag nws nyob ib puag ncig kom qhuas nws.

Thaum kuv nrog lawv tham hnub ntawd, kuv kawm hais tias txhua lub lim tiam cov mej zeej ntawm tej pawg Pov Thawj Hwj Aloos nyob hauv pawg ntseeg ntawd tau mus xyuas lwm tus tub hluas thiab caw lawv los koom nrog lawv pawg.

Cov tub hluas no txhua tus yeej yog thawj coj zoo. Thiab kuv paub tias lawv yeej muaj cov uas tuav lub Pov Thawj Hwj Mekixedes, muaj niam muaj txiv, thiab lwm tus uas pab lawv ua lawv tej luag hauj lwm. Cov neeg laus zoo li no yeej pom tias cov tub hluas no muaj peev xwm rais los ua neeg zoo li cas. Thaum lawv hais lus rau los yog hais lus txog cov tub hluas no, lawv tsis xav txog cov tub hluas tej kev txhaum. Tiam sis, lawv pab cov tub hluas coj cwj pwm zoo li cov thawj coj.

Cov tub hluas, tus Tswv pom nej li no. Kuv xav kom nej pom nej tus kheej zoo li no. Tej lub sij hawm nyob hauv nej lub neej Vajtswv yuav hu kom nej coj lwm tus. Lwm lub sij hawm, nej yuav tsum raws lwm tus qab. Tiam sis kuv xav hais rau nej hnub no hais tias txawm nej ua hauj lwm dab tsi los, nej yeej yog ib tug thawj coj, thiab nej yeej yog ib tug uas raws qab. Kev ua thawj coj yeej yog kev ua ib tug thwj tim—yog kev pab lwm tus los cuag Khetos, qhov ntawd yog qhov uas cov thwj tim tiag tiag ua. Yog nej rau siab coj raws li Khetos, ces nej pab tau lwm tus kom paub coj raws li Nws, thiab nej yeej yog ib tug thawj coj.

Qhov uas nej txawj ua ib tug thawj coj tsis yog los ntawm tus cwj pwm nyiam nrog lwm tus tham, kev txawj ua rau lwm tus mob siab, los sis kev txawj hais lus rau lwm tus. Kev txawj ua ib tug thawj coj yeej los ntawm qhov uas nej cog lus tias nej yuav coj raws li Yexus Khetos. Yog los ntawm nej txoj kev xav ua raws li Aplaham hais tias, ua ib tug coj ncaj ncees.2 Yog nej ua tau li ntawd—txawm nej tsis ua zoo tag nrho, tiam sis nej tseem siv zog ua—ces nej yeej yog ib tug thawj coj.

Kev Siv Pov Thawj Hwj Pab Lwm Tus Yog Kev Ua Thawj Coj

Lwm lub sij hawm, kuv nyob hauv New Zealand mus xyuas ib tug niam tsev uas muaj peb tug me nyuam thiab tsis muaj tus txiv. Tus tub hlob muaj 18 xyoo thiab tau txais lub Pov Thawj Hwj Mekixedes thaum Hnub Sunday tas los. Kuv nug nws seb nws puas tau siv lub pov thawj hwj no. Nws hais tias, “Kuv tsis paub tseeb koj hais li cas.”

Kuv qhia nws hais tias nws muaj txoj cai siv lub pov thawj hwj foom koob hmoov rau lwm tus kom nplij lawv lub siab los sis kho lawv zoo. Kuv saib nws niam, uas tsis tau muaj ib tug uas tuav lub Pov Thawj Hwj Mekixedes nyob nrog nws tau ntev lawm. Kuv hais tias, “Kuv xav tias yuav zoo yog koj foom koob hmoov rau koj niam.”

Nws teb tias, “Kuv tsis paub ua.”

Kuv piav hais tias nws yuav tau tso tes saum nws niam lub taub hau, hais nws lub npe, hais tias nws foom koob hmoov rau nws niam los ntawm lub Pov Thawj Hwj Mekixedes, hais ib yam dab tsi uas tus Ntsuj Plig qhia rau nws lub siab, thiab xaus lus los ntawm Yexus Khetos lub npe.

Ib hnub tom qab, kuv tau txais email los ntawm nws. Nws hais tias: “Hmo no kuv twb foom koob hmoov rau kuv niam. … Kuv txhawj heev thiab xav tias kuv tsis tsim nyog ua, kuv thiaj li thov Vajtswv kom muaj tus Ntsuj Plig nrog nraim kuv, vim kuv foom koob hmoov rau nws tsis tau yog tsis muaj tus Ntsuj Plig. Thaum kuv pib, kuv tsis nco qab txog kuv tus kheej thiab kuv tej kev qaug zog. … Kuv [tsis tau xav tias] kuv yuav hnov tau lub hwj chim ntawm sab ntsuj plig npaum li kuv tau hnov. … Tom qab ntawd ua rau kuv hlub nws heev kuv tswj tsis tau kuv tus kheej, kuv thiaj li khawm kuv niam thiab quaj zoo li ib tug me nyuam mos liab. … Thaum kuv tab tom sau tsab no, [kuv hnov tau] tus Ntsuj Plig [ua rau] kuv thiaj li tsis xav ua txhaum dua. … Kuv nyiam txoj moo zoo no kawg siab kawg ntsws.”3

Qhov uas nej pom ib tug tub hluas zoo li neeg feem coob uas ua tej yam zoo kawg nkaus dhau los ntawm kev siv lub pov thawj hwj pab lwm tus, txawm nws xav tias nws tsis txawj ua tej ntawd puas tshoov nej lub siab? Tsis ntev tas los kuv tau kawm hais tias tus txwj laug no tau txais kev hu mus ua ib tug tub txib thiab yuav mus rau qhov chaw cob qhia cov tub txib thaum lub hlis tom ntej. Kuv ntseeg tias nws yuav coj ntau tus neeg los cuag Khetos vim nws twb kawm coj raws li Khetos thaum nws siv lub pov thawj hwj ua hauj lwm pab lwm tus—pib nyob hauv nws lub tsev, uas nws coj yam ntxwv zoo pab nws tus kwv uas muaj 14 xyoos.

Cov kwv tij, txawm peb tsis paub li no los, tib neeg yeej saib peb—tsev neeg, phooj ywg, thiab lwm tus uas peb tsis paub. Tsis yog peb cov uas tuav lub pov thawj hwj yuav tsum los cuag Khetos xwb; peb lub luag hauj lwm yog kom caw txhua leej txhua tus los cuag Khetos.4 Tsis yog peb yuav txaus siab yog peb tau koob hmoov ntawm sab ntsuj plig peb tus kheej; peb yuav tsum coj cov neeg uas peb hlub kom tau tib co koob hmoov ntawd—thiab vim peb yog Yexus Khetos cov pab coj, peb yuav tsu hlub txhua tus. Tus Cawm Seej txib Petus li cas los Nws yeej txib peb ib yam hais tias: “Thaum [nej] los cuag kuv, [nej] yuav tsum txhawb [nej] cov kwv tij zog.”5

Coj Raws Li tus Txiv Neej ntawm Kalilais

Yuav muaj tej lub sij hawm thaum txoj kev taug mus tom ntej tsaus ntuj, tiam sis cia li coj raws nraim li tus Cawm Seej. Nws paub txoj kev uas yuav tsum taug; muaj tseeb tiag Nws yeej yog txoj kev.6 Yog nej rau siab los cuag Khetos, ces nej haj yam yuav xav pab lwm tus muaj siab xav zoo ib yam li nej. Ib lo lus ntxiv rau txoj kev xav li no yog kev siab hlub, “uas [Leej Txiv] tau muab rau tag nrho cov uas raws qab tiag ntawm nws Leej Tub, Yexus Khetos.”7 Ces nej yuav kawm hais tias thaum nej raws Khetos qab, nej kuj coj lwm tus los cuag Nws, vim raws li Thawj Tswj Hwm Thomas S. Monson hais tias, “Thaum peb raws tus Txiv Neej los ntawm Kalilais qab—tus uas yog tus Tswv Yexus Khetos—lwm tus yuav ua raws li peb lub hwj huam kom ua zoo txawm peb nyob qhov twg, txawm peb muaj hauj lwm dab tsi ua los yog.”8

Kuv ua tim khawv tias nov yog Khetos lub Koom Txoos tseeb. Vajtswv ib tug thawj coj coj peb txoj hau kev, Thawj Tswj Hwm Monson—ib tug thawj coj zoo uas kuj yog ib tug uas coj raws li tus Cawm Seej. Los ntawm Yexus Khetos lub npe, amees.