Li xninqaleb’ ru aj jolominel a’aneb’ li xninqaleb’ ru aj taaqenel
Wan naq li b’e li wan chiqu chanchan naq q’ojyin ru, a’b’an meekanab’ xtaaqenkili li Kolonel. A’an naxnaw li b’e; relik chi yaal, A’an a’an b’e.
Naq wan chaq we 12 chihab’, lin yuwa’ kinxk’am chi yohok sa’ li k’iche’. Koowakli oxib’ oor re eq’la, kiqakawresiheb’ li qakawaay, ut kootaqe’ chiru xk’iche’il li tzuul chiru li tz’aqal q’ojyin. Junelik kiwulak chiwu li yohok wochb’een lin yuwa’, a’b’an sa’ li hoonal a’an ki’ok b’ayaq inxiw. Maajun sutin sa’eb’ li tzuul a’in ut ink’a’ nak’utun li b’e chiwu—ut maak’a’ chik ajwi’ nak’utun! Ka’ajwi’ nak’utun li ch’ina saqen naxk’am lin yuwa’ ut a’an kixk’utanob’resi b’ayaq li chaj li wan chiqu. Ut wi lin kawaay taat’ane’q—Ma naru ta b’i’ rilb’al b’ar yoo chi xik? A’b’an kik’ojob’aak inch’ool xb’aan li k’a’uxl a’in: “Lin yuwa’ naxnaw b’ar yoo chi xik. Wi nintaaqe, maak’a’ taak’ulmanq.”
Ut maak’a’ kiqak’ul. Timil timil kisaqew li kutan, ut kiqanumsi sa’ komonil jun chaq’al ru kutan. Naq koo’ok chi q’ajk sa’ ochoch, lin yuwa’ kixk’ut chiruq’ li ru’uj jun li chaq’al ru tzuul nak’utun sa’ xyanqeb’ li jun ch’ol chik. “A’an Windy Ridge xk’ab’a’,” chan. “Aran jwal chaab’il li yohok.” Sa’ junpaat, kink’e reetal naq tinwaj raj sutq’iik wi’chik re xik sa’ li tzuul Windy Ridge junaq kutan.
Chiruheb’ li chihab’ chirix a’an, lin yuwa’ rajlal ki’aatinak chirix li tzuul Windy Ridge, a’ut maajun wa koosutq’i chaq aran—toja’ naq sa’ jun kutan, jun may chihab’ chik chirix, kinb’oq lin yuwa’ ut kinye re, “Yo’o sa’ li tzuul Windy.” Kiqakawresiheb’ wi’chik li qakawaay ut kiqatikib’ taqe’k chiru li tzuul. Sa’ li hoonal a’an wan we lajeeb’ xkak’aal chihab’ ut jwal ninnaw xik chirix li kawaay, a’b’an kisach inch’ool naq kiweek’a’ li xiw chanchan naq wan chaq we kab’laju chihab’. A’b’an lin yuwa’ naxnaw li b’e, ut kintaaqe.
Koowulak sa’ xb’een li tzuul Windy. Jwal chaq’al ru chaq li ilok aran, ut kiweek’a naq jwal nawaj q’ajk wi’chik—moko ka’aj ta wi’ laa’in, jo’kan aj b’an wi’ li wixaqil ut eb’ lin kok’al. Kiwaj naq te’reek’a li naweek’a laa’in.
Rik’in xnumikeb’ li chihab’, naab’al sut chik ak xink’ameb’ xb’e lin kok’al ut wankeb’ chik xkomon li saaj winq sa’ xb’een li tzuul, jo’ chanru kixb’aanu lin yuwa’ wik’in. Li na’leb’ a’in nikinxtenq’a xtz’ilb’al rix k’a’ru naraj naxye li jolomink—ut k’a’ru naraj naxye li li taaqenk.
Li Jesukristo, aj jolominel ut aj taaqenel q’axal wi’chik xnimal ru
Wi tinpatz’ raj eere, “Ani laj jolominel q’axal wi’chik xnimal ru wanjenaq?”—k’a’ru raj teeye? Relik chi yaal, lix sumenkil a’an li Jesukristo. A’an li eetalil tz’aqal re ru rik’in chixjunil li k’a’ru na’ajman re junaq aj jolominel.
A’ut wi tinpatz’ raj eere, “Ani laj taaqenel q’axal wi’chik xnimal ru wanjenq?”—ma ink’a’ raj teesume wi’chik naq a’an li Jesukristo? A’an laj jolominel jwal xnimal ru xb’aan naq A’an laj taaqenel q’axal wi’chik xnimal ru—A’an naxtaaqe lix Yuwa’ chi tz’aqal re ru, sa’ chixjunil li k’a’aq re ru.
Li ruchich’och’ naxk’ut naq eb’ laj jolominel tento naq ninqaqeb’ xwankil; li Qaawa’ naxk’ut naq tento naq tuulanaqeb’. Eb’ laj jolominel re ruchich’och’ neke’xtaw li wankilal rik’in lix nawom, lix seeb’al, ut lix b’ihomal. Laj jolominel jo’ chanru li Kristo neke’xk’ul li wankilal rik’in “q’unb’esink ch’oolej, rik’in li najtil oyb’enink, rik’in li q’unal ch’oolej ut li tuulanil, ut rik’in li rahok chi moko pak’b’il ta.”1
Sa’ rilob’aal li Dios, eb’ laj jolominel q’axal xninaqaleb’ ru, a’aneb’ ajwi’ laj taaqenel q’axal xninqaleb’ ru.
Tinwotz wiib’ li seraq’ chirix lin wanjik rik’ineb’ li saaj winq re li Iglees li xe’xk’ut chiwu chanru jolomink ut taaqenk.
Chixjunilo laa’o aj jolominel
Toje’chaq, li wixaqil ut laa’in xoowulak sa’ jun li ch’utam re li loq’laj wa’ak sa’ jalan chik li teep. Naq maji’ natikla li ch’utam, jun li saaj xnach’o’ wik’in ut xpatz’ we wi naru tintz’aqonq sa’ xjek’inkil li loq’laj wa’ak. Xinye re: “Tinb’aanu chi sa inch’ool.”
Xinchunla chixk’atqeb’ laj tenq’anel ut xinpatz’ re li wan chink’atq, “K’a’ru tinb’aanu?” A’an xye we naq tento tintikib’ jek’ink’ toj chirix, sa’ lix yi li ch’uut ut naq a’an tixtikib’ chixjunpak’al ut chi juntaq’eet tooxik toj chiru.
“Junxil chaq ink’a’ ninb’aanu a’in,” chankin re.
A’an xsume we, “Matk’oxlak. Chaab’il taab’aanu. Xweek’a ajwi’ a’an naq xintikib’.”
Chirix a’an, laj tenq’anel jwal saaj re li ch’uut, k’ojob’anb’il wib’ oxib’ xamaan chaq, xwotz jun li esil sa’ li ch’utam. Chirix li ch’utam, lix komoneb’ laj tenq’anel xe’xsut rix re xyeeb’al re naq jwal saheb’ xch’ool rik’in a’an.
Naq xinwan sa’ xyanqeb’ sa’ li kutan a’an, xintzol naq, rajlal xamaan, eb’ li komon sa’ chixjunileb’ li molam re li Tijonelil re Aaron sa’ li li teep a’an neke’raatina xkomoneb’ li saaj ut neke’xb’oqeb’ sa’ lix molam.
Eb’ li saaj winq a’in, a’aneb’ aj jolominel xninqeb’ ru. Ut ch’olch’o naq jo’kan xb’aan naq wankeb’ laj chaab’il kamol re li Tijonelil re Melkisedek, li na’b’ej yuwa’b’ej, ut xkomoneb’ chik li neke’b’eresin reheb’. Eb’ li komon a’in q’uneb’ xch’ool moko ka’aj ta wi’ neke’ril li saaj chankeb’ ru anajwan, jo’ b’an li chanru te’wulaq. Naq neke’aatinak rikineb’ malaj chirixeb’ a’an, ink’a’ neke’aatinak chirix lix paaltileb’. Neke’aatinak b’an chirix li chaab’ilal neke’xk’ut re li jolomink.
Ex saaj, jo’ka’in naq li Qaawa’ nekexril. Nekexinb’oq cherilb’al eerib’ chi jo’kan. Wanq li hoonal sa’ lee yu’am naq b’oqb’ilaqex chi jolomink. Wan chik hoonal sa’ wi’ taa’oyb’eniiq naq textaaqenq. A’b’an li esil nawaj xnumsinkill eere anajwan, a’an naq, a’ yaal k’a’ru lee b’oqb’al, junelik aj jolominelex, ut junelik aj taaqenelex. Li jolomink a’an jun xk’utum li tzolomil—a’an xtenq’ankileb’ li kristiaan chi chalk rik’in li Kristo, a’an li neke’xb’aanu li tz’aqal aj tzolonel. Wi nekeyal eeq’e chixtaaqenkil li Kristo, naru nekek’ut chiruheb’ jalan chanru xtaaqenkil ut naru tex’ok choq’ aj jolominel.
Lee seeb’al chi jolomink moko nachal ta rik’in anihex, lee seeb’al chi kawresink ch’oolej, malaj rik’in lee seeb’al chi aatinak. Nachal b’an rik’in lix k’eekok’ilal eech’ool chixtaaqenkil li Jesukristo. Nachal rik’in li rajom eech’ool chi ok choq’, jo’ kixye laj Abraham, “jun aj taaqenel re li tiikilal.”2 Wi nekeb’aanu a’in—us ta ink’a’ teeb’aanu chi tz’aqal re ru—jo’kan ut, laa’ex aj jolominel.
Li k’anjel re li tijonelil a’an li jolomink
Jun sut chik, wankin chaq Nueva Zelanda rula’aninkil li rochoch jun li na’b’ej naxk’iresiheb’ oxib’ li kok’al xjunes. Li asb’ej wan waqxaqlaju chihab’ re ut xk’ul li Tijonelil re Melkisedek sa’ li domingo xnume’. Xinpatz’ re ma ak yoo chixk’anjelankil li tijonelil. A’an xye, “Ink’a’ mas ninnaw k’a’ru naraj naxye a’an.”
Xinye re naq anajwan wan chik li wankilal rik’in re xk’eeb’al junaq li osob’tesink re li tijonelil re k’ojob’ank ch’oolej malaj re k’irtesink. Xwil lix na’, li naxk’am naab’al chihab’ chi maak’a’ junaq aj k’amol re li Tijonelil re Melkisedek. “Ch’ina-us raj,” chankin re, “wi taak’e junaq rosob’tesinkil laa na’.”
A’an xye, “Ink’a’ ninnaw chanru xb’aanunkil.”
Xinch’olob’ chiru naq tixk’e li ruq’ sa’ xb’een xjolom lix na’, tixye lix k’ab’a’, tixye naq yoo chixk’eeb’al jun li rosob’tesinkil rik’in lix wankilal li Tijonelil re Melkisedek, tixye li k’a’ru tixye li Musiq’ej sa’ xch’ool ut sa’ li raam, ut tixraq li osob’teisnk sa’ xk’ab’a’ li Jesukristo.
Sa’ li kutan jun chik, xink’ul jun li esil re li saaj a’an. Jun raqal re li esil a’an naxye: “Anajwan xwosob’tesi lin na’ … Xweek’a b’ayaq lin xiw ut naq maak’a’ ink’ulub’il, jo’kan naq xintijok re naq taawanq li Musiq’ej wik’in, xb’aan naq ink’a’ naru tink’e junaq li osob’tesink wi maak’a’ a’an. Naq xintikib’, xsach sa’ inch’ool anihin ut lix q’unal inmetz’ew. … [Ink’a’ raj nawoyb’eni] li xnimal xwankilal li Musiq’ej li xweek’a. … Chirix a’an, xweek’a chi kaw lix musiq’ej re rahok ut ink’a’ xinru xkuyb’al, jo’kan naq xinq’alu lin na’ ut xinyaab’ak jo’ jun li k’uula’al. … Anajwan, naq yookin chixtz’iib’ankil a’in, [naweek’a] li Musiq’ej [chi us] ut maajun wa chik nawaj maakob’k. … Ninra li evangelio a’in.” 3
Ma ink’a’ naxwaklesi qach’ool chirilb’al chanru naq jun li saaj winq naru xb’aanunkil ninqi k’anjel rik’in li k’anjelak rik’in li tijonelil, us ta nareek’a naq maak’a’ xk’ulub’? Toje’ xinnaw naq li saaj a’an xk’ul jun lix b’oqb’al choq’ misioneer ut taa’ok sa’ li na’jej re kawresink-ib’ sa’ li po chal re. Nink’oxla naq tixk’ameb’ naab’al li aamej rik’in li Kristo xb’aan naq xtzol xtaqenkil li Jesukristo sa’ lix k’anjelankil li tijonelil—rik’in xtikib’ankil sa’ li rochoch, b’ar wi’ li reetalil yoo chixtenq’ankil li riitz’in aj kaalaju chihab’.
Ex was wiitz’in, ma naqak’e reetal malaj ink’a’, wankeb’ li kristiaan li neke’xk’e qeetal—eb’ lix komon li qajunkab’al, li qamiiw, malaj li ani ink’a’ naqanaweb’ ru. Jo’ aj k’amol re li tijonelil, ink’a’ tz’aqal rik’in ka’ajwi’ chalk rik’in li Kristo; li qateneb’ahom a’an “xb’oqb’aleb’ chixjunileb’ chi chalk rik’in li Kristo.”4 Ink’a’ naru tookanaaq ka’ajwi’ rik’in li qosob’tesinkil sa’ musiq’ej; tento taqak’am ajwi’ xb’eheb’ li ani naqara sa’eb’ li osob’tesink a’an—ut, jo’ xtzolom li Jesukristo, tento taqara chixjunileb’. Lix taqlankil li Kolonel re laj Pedro a’an ajwi’ lix qataqlankil laa’o: “Ut laa’at, naq tatsutq’iiq chaq, chakawob’resi xch’ooleb’ laa was aawiitz’in.”5
Chetaaqe li Winq re Galilea
Wan naq li b’e li wan chiqu chanchan naq q’ojyin ru, a’b’an meekanab’ xtaaqenkili li Kolonel. A’an naxnaw li b’e; relik chi yaal, A’an a’an b’e.6 Jo’ chanru nokochal chiru li Kristo, jo’kan ajwi’ naq taak’iiq li qajom re xtenq’ankileb’ li komon chireek’ankil li ak nekereek’a laa’ex. Jun chik li aatin naxch’olob’ li eek’ahom a’an, a’an li tz’aqal rahok, “li naxk’e [li Yuwa’b’ej] sa’ xb’eeneb’ chixjunil li tz’aqal neke’taaqenk re li Jesukristo, li Ralal.”7 Jo’kan ut teek’e reetal naq, rik’in xtaaqenkil li Kristo, yookex ajwi’ chixb’eresinkileb’ jalan rik’in A’an, xb’aan naq, jo’ kixye li Awa’b’ej Thomas S. Monson, “Sa’ xtaaqenkil li Winq re Galilea—a’ li Qaawa’ Jesukristo—li k’a’ru naqab’aanu tixk’ut li ru b’ar wi’ wanqo, a’ yaal k’a’ru li qab’oqb’al.”8
Ninch’olob’ xyaalal naq a’in lix Igleees li Kristo tzaqal yaal. B’eresinb’ilo xb’aan jun lix profeet li Dios, li Awa’b’ej Monson—jun xnimal ru aj jolominel ut aj tz’aqal taaqenel re li Kolonel. Sa’ xk’ab’a’ li Jesukristo, amen.