E Lidernan di Mas Grandi Ta e Siguidónan di Mas Grandi

Si mi ta tin ku puntra bo, “Ken ta e lider di mas grandi ku a yega di biba?--kiko lo bo bisa? E kontesta, di mes, ta JesuCristu, E la duna e ehèmpel perfekto di tur kualidat di liderazgo imaginabel.

Pero kiko si mi puntra bo, “Ken ta e siguidó di mas grandi ku a yega di eksistí?”-e kontesta lo no ta JesuCristu atrobe? E ta e lider mas grandi pasobra E ta e siguidó di mas grandi---E ta sigui Su Tata perfektamente, den tur kos.

Mundu ta siña ku lidernan mester ta poderoso; Señor ta siña ku nan mester ta mansu. Lidernan di mundu ta gana poder i influensia pa medio di nan talento, abilidat, i rikesa. Lidernan manera Cristu ta gana poder i influensia “pa medio di persuashon, longanimidat, gentilesa i mansedumbre, i pa amor sinsero.”¹

Den bista di Señor, e lidernan mas grandi semper ta e siguidónan mas grandi.

Permití mi kompartí dos eksperensia for di mi interakshon resien ku e hombres jovenes di Iglesia ku a siña mi tokante liderazgo i siguimentu.

Resientemente mi kasá i ami a asistí na un reunion sakramental leu for di nos bario. Djis promé ku e reunion a kuminsá, un hóben a aserká mi i puntra mi si mi por yuda repartí e santa sena. Mi a bisé, “klaro ku si.”

Mi a tuma mi asiento huntu ku e otro diákononan i puntra unu ku tabata sinta banda di mi, “Kiko ta mi asignashon?” E la bisa mi pa kuminsá repartí for di parti atras di e kapia den e sekshon mei mei i ku e lo ta na e otro banda den e mesun sekshon, i huntu nos lo kana bin dilanti.

Mi a bisé, “Mi tin hopi tempu sin hasi e kos aki.”

E la respondé, “Esei ta OKÉ. Lo bo ta bon. Mi a sinti meskos ku tempu Mi a kuminsá.”

Mas despues e diákono mas yòn di e quorum, ordená solamente algun siman promé, a duna un diskurso den reunion sakramental. Despues di e reunion, otro diákononan a bai rònt di dje pa bisé kon orguyoso nan tabata di ta su koleganan den quorum.

Miéntras mi tabata ku nan e dia ei, mi a haña sa ku kada siman miembronan di tur e quorum nan di e Saserdosio Aaróniko den e bario ei tabata ekstendé un invitashon na otro hóbennan pa nan ta parti di nan quorumnan.

E hóbennan  aki tur tabata gran lidernan. I klaramente nan tabata tin algun Saserdosio Melchizedek maravioso tras di kortina, mayornan, i otronan ku ta mentor nan den nan debernan. Adultonan ku ta preokupá manera nan ta mira e hóbennan aki no pa loke nan ta pero pa loke nan por bira. Ora nan ta papia ku of tokante di e hóbennan, nan no ta keda pega na nan flakesanan. Pero nan ta enfatisá nan kualidatnan di liderazgo ku nan ta demostrando.

Hóbennan, asin’aki Señor ta mira boso. Mi ta invitá boso pa wak boso mes tambe asina. Lo bai tin tempu den boso bida ku bo lo wòrdu yamá pa guia. Otro biaha, lo spera di boso ku boso ta sigui. Pero mi mensahe na boso awe ta independientemente di boso yamamentu, semper boso ta un lider, i semper boso ta un siguidó. Liderazgo ta un ekspreshon di disípulado--i ta simplemente un asuntu di yuda otro bini serka Cristu, kual ta loke berdadero disípulonan ta hasi. Si bo ta esforsá pa ta un siguidó di Cristu, e ora ei boso por yuda otronan pa siguié i boso tambe por ta lidernan.

Boso abilidatnan pa guia no ta bin for di un personalidat ekstrovertí, abilidatnan motivante, of hasta boso talento pa papia den públiko. E ta bini for di boso kompromiso pa sigui JesuCristu. E ta bin for di boso deseo di ta, manera Abraham a bisa, “Un gran siguidó di rektitut.”² Si boso por hasi esei--hasta si boso no ta perfekto den dje, pero boso ta purba--e ora ei boso taun lider.

Na un otro okashon, mi tabata na Nueva Zelandia bishitando un hogar di un mama soltero ku tres yu adolesente. E yu hòmber mas grandi ta tin 18 aña i a risibí e Saserdosio di Melchizedek djis e djadumingu promé. Mi a puntr’é si e tabata por a ehersé su saserdosio kaba. E la bisa, “Mi no sa eksaktamente kiko esaki ta nifiká.”

Mi a bisé ku awor e tin e outoridat di duna bendishon di saserdosio pa konsolá òf pa sana. Mi a wak su mama, ku no tabatin un poseedor di Saserdosio Melchizedek den su banda pa hopi aña. “Mi ta pensa ku lo ta maravioso,” mi a bisa, “si bo por duna bo mama un bendishon.”

El a kontesta, “Mi no sa kon.”

Mi a splika ku e por pone su mannan riba su mama su kabes, bisa su nòmber, bisa ku e ta dun’é un bendishon pa medio di e outoridat di e Saserdosio di Melchizedek, bisa loke e Spiritu ta pone den su mente i kurason, i sera den nòmber di JesuCristu.

Siguiente dia mi a risibí un e-mail di dje. E ta bisa na un parti: “Awe nochi mi a bendishoná mi mama. ...Mi a sinti mi hopi, hopi nervioso i inadekuá, pues Mi a hasi orashon kontinuamente pa sigurá ku mi ta tin e Spiritu ku mi, pasobra mi no por duna un bendishon sin dje. Ora Mi a kuminsá, mi a lubidá mi mes i mi debilidat kompletamente.  … Mi no a spera e poder spiritual i emoshonal inmenso ku mi a sinti.  ... Despues e spiritu di amor a dal mi asina duru ku mi no por a kontené mi emoshonnan, pues Mi a brasa mi mama i a yora manera un beibi.  ... Hasta awor ku mi ta skibi esaki, mi ta sinti e Spiritu asina tantu ku mi no ke hasi piká mas. {nb... Mi ta stima e evangelio aki.”³

No ta inspiradó pa wak kon un hóben aparentemente normal por logra kosnan grandi pa medio di e servisio di saserdosio, hasta ora e ta sinti inadekuá? Resientemente mi a siña ku e hóben elder aki a risibí su yamamentu misional i lo drenta den e sentro di kapasitashon misional e luna benidero. Mi ta kere ku e lo guia hopi alma na Cristu, pasobra el a siña kon pa sigui Cristu den su servisio di saserdosio--kuminsando den su propio hogar, kaminda e ta un ehèmpel di tin un influensha profundo riba su ruman hòmber di 14 aña.

Rumannan, sea boso ta realis’é of no, hendenan ta wak nos--miembronan di nos famia, amigunan, hasta hende straño. Komo poseedó di saserdosio, no ta sufisiente pa bin serka Cristu; ta nos deber pa “invitátur pa bini na Cristu.”⁴ Nos no por ta satisfecho risibiendo bendishonnan spiritual pa nos mes; nos mester guia e hendenan ku nos stima pa haña e mesun bendishonnan--i komo disípulonan di JesuCristu, nos mester stima tur hende. E Salbador su enkargo na Pedro ta mesun enkargo na nos: “Ora boso wòrdu kombertí, fortalesé boso rumannan.”⁵

Lo bai tin tempu ora ku e kaminda dilanti lo mustra skur, pero sigui tras di e Salbador. E konosé e kaminda ; De echo, E tae kaminda.⁶ Mas intensamente boso bin serka Cristu, mas profundo boso lo deseá di yuda otronan eksperenshá loke boso ta eksperensha. Un otro palabra pe e sentimentu aki ta karidat, “kual e Tata a drama riba tur ku ta siguidonan berdadero di Su Yu, JesuCristu.”⁷ E ora ei bo haña ku e solo hecho di sigui Cristu, bo ta guiando otronan na Dje, manera den e palabranan di Presidente Thomas S. Monson, “Ora nos ta sigui e Hòmber di Galileo--hasta Señor JesuCristu--nos influensha personal lo wòrdu sintí pa bon sea unda ku nos ta, of lo ke sea nos yamamentu ta.”⁸

Mi ta testifiká ku esaki ta Cristu su Iglesia berdadero. Nos ta wòrdu guiá pa un profeta di Dios, Presidente Monson--un gran lider ku tambe ta un berdadero siguidó di e Salbador. Den nòmber di JesuCristu, amèn.