Unokan Kōmour Jeorļo̧̗k Bōd

Aolep ko an Anij ekitbuuj iakwe, meram, im m̧ool Kiiō āinwōt armej jej mour ilo juon laļ eo elikjab, jet iien obrak kōn marok lep im kaipokpok. Ejjab juon menin bwilōn̄ bwe bōd ko naaj kōm̧m̧ani, kalijōk ļo̧k naaj waļo̧k, im jerawiwi ko naaj kōm̧m̧ani. Āinwōt juon tōprak, ejjeļo̧k juon jetōb emour me ejjamin naaj, ilo juon tōre ak bar juon, erom juon rijorrāān n̄an m̧akūtkūt in jab kea an bar jet, m̧wil kōmettak, ak em̧ool m̧wil jerawiwi. Ej juon men ewōr ippād wōj aolep.

Kanooj kam̧m̧oolol, Anij, kōn iakwe im jouj eo An n̄an ajri ro Nejin, kar kōpooj juon iaļ n̄an jipan̄ kōj jōbwebweik men kein jet iien en̄jaake ļ̗an̄ in mour in. Eaar letok juon iaļ in koo n̄an aolep ro raar ļanotot ilo jerbal nana an ro jet. Eaar katakin kōj bwe jej maron̄ jeorļo̧k bōd! Em̧ool men̄e jamaron̄ erom rijorrāān kar juon iien, jejjab aikuj rijorrāān alen ruo n̄an ineek eddo eo an dike, matōrtōr, metak, kitōtō, ak em̧ool ukōt nana n̄an nana. Jemaron̄ jeorļo̧k bōd, im jemaron̄ in anemkwoj!

Elōn̄ iiō ko remoot ļo̧k, ke kar karpene juon oror, juon m̧ōttan jelba eaar delo̧n̄ ilo addin peiū. Iaar jidik wōt aō kar kajieon̄ joļo̧k jelba eo im kar ļōmņak ebwe aō kar kate eō, bōtaab ealikkar iaar jab. Iien eaar itok im etal, kūl ekar eddōk ioon jelba eo, ejake juon ebbok ilo addin peiū. Eaar kōmatōrtōr im jet iien metak.

Iiō ko tok ālik iaar kālet n̄an āliktata joļo̧k. Men eo dee eo iaar kōm̧m̧ane kapiti ebook eo kōn kūriim im kalbubuik kōn juon teep in kinej. Emakijkij aō kar āliji jekjek in. Kom̧ij jab maron̄ tōmak bwilōn̄ eo aō ke juon raan, ke iaar kōjar ļo̧k teep in kinej eo, jelba eo eaar diwōj tok jān addi in peiū.

Toļaj eo eaar kameoeo kūl eo im ejake juon iaļ in jako jen men eo me eaar kōm̧m̧an metak ium̧win elōn̄ iiō ko. Ke jelba eo eaar jako, addi eo eaar m̧ōkaj an moo, im n̄an rainin, ejjeļo̧k jeno̧k in jabdewōt jorrāān.

Ilo ejja wāween in wōt, juon bōro jab jeorļo̧k bōd ej dāpij metak ko rejjab jem̧ļo̧k. Ne jej kōjerbal unokan kemour eo an Pinmuur eo an Rilo̧mo̧o̧r, Enaaj kemeraik būruwōd im jipan̄ kōj oktak. E emaron̄ kemour jetōb ko rekinejnej (lale Jekab 2:8).

Ij jela bwe elōn̄ iaad rej kōņaan jeorļo̧k bōd, bōtaab jej lo ekanooj in pen n̄an kōm̧m̧ane. N̄e jej ioon kalijōk ļo̧k, emaron̄ m̧ōkaj ad ba, “Armej en eaar kōm̧m̧an bōd. Rej aikuj kaje. Ewi kien eo?” Ej bōd ad im ļōmņak bwe eļan̄n̄ejej jeorļo̧k bōd, ilo juon wāween kien eo ejjamin naaj jerbal im kaje ko renaaj julo̧k.

Ejjab jekjek eo in. Anij enaaj leļo̧k juon kaje eo jokkin wōt juon, bwe tiriam̧o kake emaron̄ ko̧o̧te kien (lale Alma 42:25). Anij eo em̧m̧an eaar kam̧ool n̄an kwe im n̄a: “Door ekajet wōt Ippa, bwe e ej Aō im Inaaj bar ņa wōņāān. [Bōtaab kōtļo̧k] aenōm̧m̧an en pād ippāmi” (K&B 82:23). Bok in Mormon eo rikanaan Jekab barāinwōt kar kallim̗ur bwe Anij “naaj kaenōm̧m̧an kom̧ ilo en̄taan ko ami, im Enaaj akweļap kōn kōttōpar ko ami, im jilkin laļ tak idenoņen n̄an ro rej pukot ko̧kkure eo ami.” (Jekab 3:1).

Āinwōt rien̄taan ro, eļan̄n̄e jej tiljek,, jemaron̄ in bōk eļap kaenōm̧m̧an ilo jeļā bwe Anij enaaj kōļļā wōņāād kōn kajjojo jorrāān ko jej iooni. Elder Joseph B. Wirthlin ekar katakin: “Irooj ej ņa wōņāān ro retiljek kōn aolep jako. … Kajjojo dānnin kōmjaaļaļ̗ naaj tokālik jepļaak tok jibukwi alen kōn dānnin kōmjaaļaļ ko an lan̄lōn̄ im kam̧m̧oolol.”¹

Ilo ad kajieon̄ jeorļo̧k bōd an ro jet bōd, jān barāinwōt kajieon̄ kememej bwe jej aolep eddōk ļo̧k ilo jetōb, bōtaab jej ilo jon̄ak ko roktak jān doon. Ilo an pidodo n̄an lali oktak ko im eddōk ļo̧k eo ilo ānbwiin in kanniōk, epen n̄an lo eddōk ļo̧k ilo jetōb ko ad.

Juon kii n̄an jeorļo̧k bōd an ro jet bōd ej n̄an kajieon̄ lali āinwōt an Anij kalimjōki. Elōn̄ iien, Anij emaron̄ kōm̧m̧an bwe jān lo im kōjeram̧m̧an kōj kōn menin letok eo n̄an lo bōro eo, ad, im jetōb eo an bar juon armej me eaar kōmetak kōj. Jeļā in emaron̄ em̧ool tōl n̄an juon iakwe eo em̧m̧an n̄an armej jab eo.

Jeje ko rekwojarjar rej katakin kōj bwe ia̗kwe eo an Anij n̄an ajri ro Nejin eweppāņ. Ejeļā maron̄ eo aer n̄an em̧m̧an, jekdo̧o̧n ta mour eo aer m̧okta. Kōn aolep jekjek otemjej, ejjan̄in kar wōr juon rikōjdāt ekakijon̄jon̄ ak nana an rikaļoor ro an Jisōs Kraist jān Saul in Tarsus. Ke Anij eaar kwaļo̧k n̄an Sul meram im m̧ool eo, ejjan̄in kar wōr juon rikaļoor an Kraist eļap an wujlep ļo̧k, laudin̄din̄, ak mijak. Saul eaar erom Rijilōk Paul. Mour eo An ej kwaļo̧k juon waanjon̄o̗k in wāween an Anij kalimjōk armej jab wōt ilo jōkjōk eo kiiō bōtaab barāinwōt ilo jōkjōk eo renaaj erom. Ewōr ippān aolep, ilo mour ko ad, āinwōt-Saul kōn maron̄ eo n̄an āinwōt-Paul. Baj lōmņak m̗ōk kōnwāween baam̧̗le ko ad, jukjuk im pād ko ad, im aolepān laļ̗ in maron̄ oktak n̄e aolepād wōj kar kajieon̄ in lale kajjojo iaad āinwōt an Anij lale kōj?

Ekanooj emakijkij ad kalimjōk ro rej kakkure ilo wāween eo jej kalimjōk juon aiij kileplep—Jej lo wōt itulōn̄ tata im jab ium̧win pedped eo. Jejjab jeļā aolep men rej bōk jikier ilo mour an juon armej. Jejjab jeļā mour eo aer m̧okta; jejjab jeļā apan̄ ko aer; jejjab jeļā metak ko rej ineeki. Ro jeiū im jatū, jouj jab bōd ami meļeļe. N̄an jeorļo̧k bōd ejjab n̄an errā. Jejjab nōbar m̧wiļ nana ak kōtļo̧k bwe juon en nana an kōm̧m̧an n̄an kōj kōnke kōn apan̄ ko, metak ko ak m̧ōjņo̧ ko aer. Bōtaab jej maron̄ bōk eļapļo̧̗k meļeļe im aenōm̧m̧̗an n̄e jej kalimjōk kōn eļapļo̧k kōl̗m̧ānļo̧kjeņ̗.

Ilo m̧̗ool ro edik an rūtto aer jetōb remaron̄ ilo m̧̗ool kōm̧m̧̗ani bōd ko reļļ̗ap—kiiō ejjeļo̧k iaad ej aikuj kōmeļeļeik kōn wōt men ko renana jekar kōm̧m̧̗ani. Anij ej riekajet eo eweppān. Ej lo ium̧win im pedped eo. E ejeļā men otemjej im E ej lo men otemjej (lale 2 Nipai 2:24). E ekar ba, “N̄a, Irooj, naaj jeorļo̧k bōd an eo Inaaj jeorļo̧k an bōd, bōtaab jān kwe emenin aikuj n̄an jeorļo̧̗k an aolep armej bōd” (K&B 64:10).

Kraist E make, ke Ekar jab jejjet aer n̗a ruwōn, innām kaamijak aer kakkure, m̧̗ane, im kōtļo̧k bwe en en̄taan ioon debwāāl, ilo bwe kajjojo iien ej ba, “Jema, jeorļo̧̗k aer bōd; bwe rejaje ta eo ren kōm̧m̧̗ane” (Luk67 23:34).

Ilo an kadu jetn̄akin ad reim̧aanļo̧k, jet iien jemaron̄ lo bwe epidodo n̄an ejaaki inepata ko ņae ro jet ro rejjab kōm̧m̧̗an ak ļōmņak āinwōt ad kōm̧m̧̗an. Jemaron̄ in ejaak m̧wil ko rejōkkar pedped ioon men kein āinwōt ejaak n̄an jum̧̗ae tiim in iukkure ko, jutak kōn oktak in ļōmņak, ak oktak tōmak ko an kabun̄.

Būreejtōn Russell M. Nelson kar kwaļo̧̗k juon kōkapilōklōk em̧m̧̗an ke ekar ba, “Iien ko rem̧m̧an n̄an ron̄jaki oktak in kabun̄ kein ak oktak in ļōmņak maron̄ kōļapļo̧k m̧ōņōņō in bōk im katak.”²

Bok in Mormon eo ej kōnono kōn juon tōre ke “armej ro ilo kabun̄ eo rōkar jino n̄an naaj kotak lōn̄tak ilo m̧ōņōņō in turin mejāer, im … kar jino n̄an naaj jab kautiej, juon n̗ae ro jet, im … kar jino liakeļo̧k ro rejjab tōmak ekkar n̄an maron̄ ko aer make im ļem̧ōņōņō” (Alma 4:8). Jān aolep kememej bwe Anij ejjab kalimjōk kūlid ak bade in kein eo ad. Ijjelo̧kin, āinwōt an Ammon kar kalikkare, “[Anij] ej kalimjōk laļ̗tak aolep ajri ro nejin armej; im ejel̗ā kajjojo ļōmņak ko im kōttōpar ko an bōro” (Alma 18:32). Ro jeiū im jatū, ilo jiāe ko an mour, eļan̄n̄e jej wiin, jān wiin kōn jouj. Eļan̄n̄e jej luuj, jān luuj kōn jouj. Bwe eļan̄n̄e jej mour kōn jouj n̄an doon, jouj enaaj ad jinekjej ilo raan eo āliktata.

Ejja āinwōt ad aolep rijorrāān n̄an jerbal nana ko an ro jet ilo juon iien ak bar juon, jej barāinwōt jet iien rikakkure. Jej aolep likjab im aikuji jouj, tūriam̧o kake, im jeorļo̧k bōd eo. Jej aikuj kememej bwe jeorļo̧k bōd jān jerawiwi ko ad make im kakkure ko ej jekjek eo pedped ioon jeorļo̧k bōd eo ad n̄an ro jet. Rilo̧mo̧o̧r eaar ba:

“Bwe eļan̄n̄e kom̧ij jeorļo̧k bōd ko an armej, barāinwōt Jememwōj i lan̄ E naaj jeorļo̧k bōd ko ami:

“Bwe eļan̄n̄e kom̗ij jol̗o̗k bōd ko an ro jet n̄ae kom̗, Jemāmi ilan̄ enaaj joļo̧k ami bōd.” (Matu 6:14–15).

Jān aolep men ko Rilo̧mo̧o̧r eo enaaj kar ba ilo Jar eo an Irooj, eo me ekanooj kadu, el̗ap an kabwilōn̄lōn̄ bwe E ekar kaglōt n̄an kobaik “Im joļo̧k am muri ippam̗, āinwōt am joļo̧k muri ko an rojet ippām ” (Matu 6:12; 3 Nipai 13:11).

Jeorļo̧̗k bōd ej unleplep eo Anij ekar jilkin tok Eo Nejin, bwe jen aolep lem̧̗ōn̗ōn̗ō ilo letok in An n̄an kōmour kōj aolep. Pinmuur eo an Rilo̧mo̧o̧r ejjab wōt n̄an ro me rej aikuj ukweļo̧k; ej barāinwōt n̄an ro me rej aikuj n̄an jeorļo̧k bōd. Eļan̄n̄e epen am̗ jeorl̗o̗k bōd ko an ro jet ak bar kwe, kajjitōk ippān Anij bwe en jipan̄ eok. Jeorļo̧̗k bōd ej juon pedped in kemour, aiboojoj. Jejjab aikuj erom rijorrāān ruo alen. Jemaron̄ jeorļo̧k bōd.

Ij kam̧ool kōn iakwe eo an Anij ejjeļo̧k jem̧ļo̧k in im kōmmaanwa n̄an aolep ajri ro Nejin im n̄an kōņ̗aan eo An bwe jān ia̗kwe doon āinwōt An iakwe kōj (lale Jon 15:9, 12). Ilo ad kōm̧m̧an āindein, jenaaj dibuk marok lep eo an laļ in n̄an aiboojoj eo im wōj eo an aelōn̄ in kiin̄ eo An ilo lan̄. Jenaaj anemkwoj. Ilo etan Jisōs Kraist, amen.