E Ungwento Sanadó di Pordon

Tur loke ku ta di Dios ta inkluí amor, lus, i bèrdat. Sinembargo komo sernan humano nos ta biba den un mundu kaí, tin biaha yen di skuridat i konfushon. No ta bini komo sorpresa ku fayonan lo wòrdu hasí, inhustisia lo pasa, i pikánan lo wòrdu kometé. Komo resultado, no tin niun alma na bida ku lo no, na un momentu dado, ta e víktima di akshon sin kuidou, kondukta doloroso, òf hasta kondukta pekaminoso di un otro hende. Esei ta un kos ku nos tur tin en komun.

Felismente, Dios, den Su amor i miserikòrdia pa Su yunan, a prepará un manera pa yuda nos nabegá e eksperensianan tin biaha turbulento di bida. El a duna un skapamentu pa tur ku ta kai víktima di e delito di otronan. El a siña nos ku nos por pordoná! Ounke nos por ta víktima un biaha, nos no mester ta víktima di dos biaha dor di karga ku e peso di odio,amargura, dolor, resentimentu, òf hasta vengansa. Nos por pordoná, i nos por ta liber!

Hopi aña pasá, ora mi tabata drecha un tranké, un splenter di palu a bai den mi dede. Mi a hasi un intento pober pa saka‘é i mi a pensa di a hasi asina, pero aparentemente no. Segun tempu a pasa, kueru a krese riba e splenter, kreando un bòlòmbònchi riba mi dede. E tabata iritante i tin biaha doloroso.

Añanan despues mi a disidí pa porfin tuma akshon. Tur loke mi a hasi ta hunta ungwento riba e bòlòmbònchi i tap’é ku un gasa. Mi a ripití e proseso aki frekuentemente. Boso no por imaginá mi sorpresa ora ku un dia, ora mi a kita e gasa, e splenter a sali for di mi dede.

E ungwento a suavisá e kueru i krea un salida pa e mes un kos ku a kousa dolor pa asina tantu aña. Una bes ku e splenter a sali, e dede a kura lihé, i te ku awe, no tin evidensia di niun herida.

Na un manera similar, un kurason ku no ta pordoná ta tene na hopi dolor innesesario. Ora nos apliká e ungwento sanadó di e Salbador su Ekspiashon, E lo suavisá nos kurason i yuda nos pa kambia. E por kura e alma heridá(wak Jakob 2:8).

Mi ta kombensí ku mayoria di nos ke pordoná, pero nos ta haña esei difísil pa hasi. Ora nos a eksperensiá un inhustisia, nos por ta lihé pa bisa, “E persona ei a hasi robes. Nan meresé kastigu. Unda hustisia ta?” Nos ta pensa eróneamente kusi nos pordoná, di un òf otro manera hustisia lo no wòrdu hasí i kastigu lo wòrdu evitá.

Esaki simplemente no ta e kaso. Dios lo duna tur un kastigu ku ta honesto, pa miserikòrdia no hòrta hustisia (wak Alma 42:25). Dios ku amor ta sigurá boso i ami pa laga husgamentu pa E; husgamentu ta di Dje i E lo paga. Nos mester laga pas ta ku nos.(D&C 82:23). E profeta Jakob den e buki Mormon tambe a primintí ku Dios “lo konsolá boso den boso aflikshonnan, i e lo defendé boso kousa, i manda hustisia riba esnan ku ta buska boso destrukshon” (Jakob 3:1).

Komo víktima, si nos ta fiel, nos por tin gran konsuelo pa sa ku Dios lo kompensá nos pa kada inhustisia ku nos ta eksperensiá. Elder Joseph B. Wirthlin a bisa:”Señor ta kompensá esnan fiel pa kada pèrdida. ... Kada lágrima di awe eventualmente lo wòrdu duná bèk shen biaha mas ku lágrimanan di goso i gratitut.”¹

Miéntras nos ta purba pordoná otronan, laga nos purba kòrda tambe ku nos tur ta kresiendo spiritualmente, pero nos tur ta na diferente nivel. Miéntras ta fásil pa opservá e kambionan i kresementu den e kurpa físiko, ta difísil pa mira e kresementu den nos spiritu.

Un yabi pa pordoná otronan ta pa purba di mira nan manera Dios ta mira nan. Tin biaha, Dios por habri e kortina i bendishoná nos ku e don pa mira den e kurason, alma, i spiritu di un otro persona ku a ofend’é nos. E bista aki por hasta hiba na un amor abrumador pa e persona ei.

E skrituranan ta siña nos ku Dios su amor pa Su yunan ta infinito. E konosé nan potensial pa bon, apesar di nan pasado. Di tur relato, no por tabatin un enemigu mas agresivo òf kruel di e siguidonan di JesuCristu ku Saul di Tarsus. Sinembargo ora Dios a mustra Saul lus i bèrdat, no tabatin nunka un disípulo di e Salbador mas deboto, entusiasmá,òf sin miedu. Saul a bira e Apòstel Pablo. Su bida ta ofresé un ehèmpel maravioso kon Dios ta mira hende no solamente manera nan ta awor pero tambe manera nan por bira. Nos tur tin, den nos bida, personanan manera Saul ku potensia manera Pablo. Boso por imaginá kon boso famianan, nos komunidatnan, i e mundu en general por kambia si nos tur purba di mira otro manera Dios ta mira nos?

Muchu biaha nos ta mira e ofensor na e manera ku nos lo mira un seru di eis---nos ta mira solamente e punta i no bou di e superfisio. Nos no sa tur loke ta pasando den un persona su bida. Tampoko nan pasado; nan pruebanan; i e dolornan ku nan ta karga. Rumannan, por fabor no komprondé mi robes. Pordoná no ta kondená. Nos no ta rashonalisá mal kondukta òf pèrmití un hende  pa maltratá nos pa motibudi nan lucha, dolor, òf debilidatnan. Pero nos por haña mas komprenshon i pas ora nos mira ku un perspektiva mas amplio.

Sigur esnan ku ta ménos madurá spiritualmente enbèrdat por hasi fayonan grandi---tòg nos niun no tin ku wòrdu definísolamente pa e kos di mas pió ku nos a yega di hasi. Dios ta e hues perfekto. E ta mira bou dje superfisio. E konosé i ta mira tur kos (wak2  Nefi 2:24). Señor lo pordoná esun ku e ke, pero nos tin ku pordoná tur hende (D&C 64:10).

Cristu Mes, ora El a wòrdu akusá inhustamente, despues ataká, batí, i lagá ta sufri riba e krus, na e mes un momentu ei a bisa, “Tata, pordoná nan; pasobra nan no sa kiko nan ta hasi” (Lukas 23:34).

Den nos miopia, tin biaha nos por haña ta fásil pa desaroyá resentimentu pa otronan ku no ta aktua òf pensa manera nos. Nos por forma aktitut intolerante basá riba kosnan superfisial manera grita kontra un tim oponente, tin diferente opinion polítiko, òf tin diferente kerensia religioso.

Presidente Russell M. Nelson a duna un konseho sabio ora el a bisa,”Oportunidatnan pa skucha na esnan di diverso denominashon religioso òf polítiko por promové toleransia i siñamentu.”²

E Buki di Mormon ta papia di un tempu ora e hendenan di iglesia a kuminsá ta lanta den orguyo, i a kuminsá ta despresiá un na otro, i a kuminsá pèrsigui esnan ku no tabata kere segun nan mes boluntat i plaser (Alma 4:8). Laga nos tur kòrda ku Dios no ta mira na e koló di un hende su blusa òf partido polítiko, òf afiliashon religioso aktual. Enbes, Ammon a deklará ku Dios konosé tur pensamentu i intenshon di e kurason (Alma 18:32). Rumannan, den tur kompetensianan di bida, si nos gana, laga nos gana ku amabilidat. Si nos pèrdè, laga nos pèrdè ku amabilidat. Pasó si nos biba ku amabilidat pa otro, esei lo ta nos rekompensa den e delaster dia.

Meskos ku nos tur ta víktimanan di e delito di otronan na dado momentu, tin biaha nos ta ofensor tambe. Nos tur ta hasi fayo i tin mester di grasia, miserikòrdia, i pordon. Nos mester kòrda ku haña pordon pa nos mes pikánan i ofensanan ta mará na e pordonamentu di otronan. E Salbador a bisa:

“Si boso pordoná hende nan faltanan, boso Tata selestial tambe lo pordoná boso:

“Ma si boso no pordoná otro hende nan faltanan, boso Tata tampoko no ta pordoná boso faltanan” (Mateo 6:14–15).

Di tur e kosnan ku e Salbador por a bisa den e Orashon di Señor, ku ta notablemente kòrtiku, ta interesante ku El a skohe pa inkluí “I pordoná nos nos debenan, meskos ku nos ta pordoná nos debedornan” (Mateo 6:12;3 Nefi 13:11).

Pordon ta e motibu ku Dios a manda Su Yu, pues laga nos gosa den Su sakrifisio pa kura nos tur. E Salbador su Ekspiashon no ta solamente pa esnan ku mester di arepentimentu; e ta tambe pa esnan ku tin ku pordoná. Si boso tin difikultat pa pordoná, pidi Dios pa yuda boso. Pordon ta un prinsipio glorioso i sanadó. Nos no mester ta un víktima dos biaha. Nos por pordoná.

Mi ta testifiká di Dios su amor duradero i pasenshi pa tur Su yunan i pa Su deseo ku nos por stima otro manera E ta stima nos (wak Huan 15:9,12). Ora nos hasi asina, nos lo eliminá e skuridat di e mundu aki den gloria i mahestat di Su reino na shelu. Nos lo ta liber. Den e nòmber di JesuCristu, amèn.