O Le U’u Faamalolo o le Faamagaloga

O mea uma e a le Atua e aofia ai le alofa, malamalama, ma le upumoni. Ae i le avea ai ma tagata ola ua tatou feola i se lalolagi pau, o nisi taimi ua tumu i le pouliuli ma le fenumiai. E le o se mea e faateia ai le faia o ni mea sese, le le faamasinotonu, ma le faia o ni agasala. O se taunuuga, e leai se agaga o soifua o le a le avea, i se tasi taimi po o se isi, ma tagata ua aafia i faatinoga faatamala a se isi, amioga faatiga, po o se uiga o le agasala. O se tasi na o mea tatou te tutusa uma ai.

E faafetai ai, i le Atua, i Lona alofa ma le alofa mutimutivale i Lana fanau, ua saunia ai se ala e fesoasoani e faatonutonu ai i tatou mai nei aafiaga faigata o le olaga. Ua Ia saunia se alofaga mo i latou uma o e ua avea ma tagata ua aafia i faaletonu a isi. Ua Ia aoao i tatou e mafai ona tatou faamagalo! E tusa lava pe na avea i tatou ma se tagata ua aafia i se taimi, e le tatau ona tatou avea faalua ma se tagata ua aafia i le amoina o le avega o le ita, le fiafia, tiga, inoino, po o le taui ma sui. E mafai ona tatou faamagalo, ma e mafai ona tatou saoloto!

I le tele o tausaga ua mavae, ao o’u lipeaina se pa, sa ulufia lo’u tamatamailima i se fasi laau. Sa ou faia sina taumafaiga e aveese ai le fasi laau ma faapea ua aveese, ae leai. Ao faagasolo le taimi, sa ufitia e le aano le fasi laau, ma patu ai lo’u lima. Sa faalavelave ma tiga i nisi taimi.

I nai tausaga mulimuli ane sa ou fuafua loa e faia i ai se mea. Nao lou niniina lava i ai o se kulimi i le patu ma ufiufi i se kosi. Sa ou faia sooa lenei mea. E le mafai ona e iloaina le faateia o a’u i se tasi aso, ao ou aveesea le kosi, ua aluese le fasi laau mai lo’u lima.

Na faavaivaia e le kulimi le pau ma mafai ai ona aluese lea mea na mafua ai le tiga mo le tele o tausaga. Na aluese loa le fasi laau, sa vave ona pe le lima, ma e oo mai i lenei aso, e leai ma se mea o iloa ai se manu’a.

I se auala talitutusa lava, o se loto lē faamagalo e mafai ona natia ai se tiga e le manaomia. A tatou faaaogaina se ū’u faamalolo o le Togiola a le Faaola, o le a Ia faamaluluina o tatou loto ma fesoasoani ia tatou suia. E mafai ona Ia faamalolo se agaga ua manu’a (tagai Iakopo 2:8).

Ou te iloa o le toatele o i tatou e mananao ia faamagalo, ae e faigata tele lo tatou faia. A tatou lagonaina se tulaga o le le faamasinotonu, e vave ona tatou faapea atu, “E sese lena tagata. E tatau ona faasalaina i latou. O fea o i ai le faamasinotonu?” Tatou te mafaufau ma le sese faapea afai tatou faamagalo atu, atonu o le a le faataunuuina le faamasinotonu ma o le a leai ni faasalaga.

E le o le tulaga lea. O le a faia e le Atua se faasalaga e talafeagai, aua e le mafai e le alofa mutimutivale ona faoa le faamasinotonu (tagai Alema 42:25). Sa faamautinoa mai ma le alofa e le Atua ia te oe ma a’u: “Ia tuu toatasi mai ia te a’u le faamasinoga, aua e a a’u, ma o le a Ou toe totogi atu. [Ae tuu] ia te outou le filemu” (MF&F 82:23). Sa folafola mai foi le perofeta o le Tuisi a Mamona e faapea o le Atua “o le a ia faamafanafanaina outou i o outou puapuaga, ma o le a ia aioia a outou tagi, ma auina ifo faasalaga i luga o i latou o e latou te saili lo outou faafanoga” (Iakopo 3:1).

I le avea ma tagata ua aafia, a tatou faamaoni, e mafai ona tatou maua le toafimalie i le iloaina o le a tauia i tatou e le Atua mo soo se tulaga le sa’o tatou te lagonaina. Sa fai mai Elder Joseph B. Wirthlin: “E tauia e le Alii tagata faamaoni mo soo se puapuaga. … o loimata uma lava i le taimi nei, o le a iu ina toe faafoi mai sautuaselau i loimata o le olioli ma le agaga faafetai.”¹

Pe a tatou taumafai e faamagalo atu i isi, ia tatou taumafai foi ina ia manatua o loo tatou tuputupu ae uma faaleagaga, ae e eseese uma o tatou tulaga. E ui e faigofie le matauina o suiga ma le tuputupu ae i le tino faaletino, ae e faigata ona vaai i le tuputupu ae o o tatou agaga.

O se tasi o ki e faamagalo ai i isi o le taumafai lea e vaai atu ia i latou e pei ona silasila mai le Atua ia i latou. I nisi o taimi, e mafai ona faataga e le Atua i tatou ia vaai ma malamalama i le loto, ma le agaga o se isi tagata lea na faatiga ia i tatou. O lenei malamalamaaga e ono oo atu ai i se alofa lofituina mo lena tagata.

Ua aoao i tatou e tusitusiga paia o le alofa o le Atua mo Ana fanau e atoatoa. Na te silafia o latou gafatia mo le lelei, e ui i o latou talaaga. I faamatalaga uma, atonu na leai se fili sili ona saua pe agaleaga o soo o Iesu Keriso nai lo Saulo o Tasesa. Ae na faaali atu loa e le Atua ia Saulo le malamalama ma le upumoni, na leai se isi soo sili ona tuuto, naunautai, po o le lototoa a le Faaola. Na avea Saulo ma Aposetolo o Paulo. Na tuuina mai e lona olaga se faataitaiga matagofie i le ala e silasila ai le Atua i tagata i le mea o latou i ai ae faapea foi i le mea latou te ono avea ai. O loo i ai uma i o tatou olaga, tagata pei o Saulo ma gafatia faapei o Paulo. E mafai ona e vaai faalemafaufau atu lautele pe faapefea e o tatou aiga, o tatou nuu, ma le lalolagi ona suia pe a tatou taumafai uma e vaai atu i isi e pei ona silasila mai le Atua ia i tatou?

E masani ona tatou vaavaai atu i se tagata solitulafono i le ala tatou te vaai ai i se poloka aisa—na o le tumutumu o tatou iloa atu ae le leiloa le pito i lalo. Tatou te le o iloaina mea uma o tutupu i le olaga o se tagata. Tatou te le o iloa o latou talaaga; tatou te le o iloa a latou tauiviga; tatou te le o iloa tiga o latou tauaveina. Uso e ma tuafafine, faamolemole aua nei faaseseina outou. O le faamagalo atu e le o le ioeina [o ni faatinoga a se tagata]. Tatou te le fetuunaia se uiga leaga po o le faataga o isi e sauaina i tatou ona o a latou tauiviga, tiga, po o vaivaiga. Ae e mafai ona tatou maua se malamalamaaga silisili ma le filemu pe a tatou vaai atu ma se vaaiga lautele.

E moni o i latou o e le malolosi faaleagaga e ono faia ni mea sese ogaoga—ae e le tatau ona i ai se tasi o i tatou ua faailogaina i na o mea sili ona leaga ua tatou faia. O le Atua o le faamasino tonu. Na te silasila i lalo o le tulaga. Na te silafia ma silasila i mea uma (tagai 2 Nifae 2:24). Sa Ia fetalai, “O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” (MF&F 64:10).

O Keriso Lava Ia, sa tuuaia ma le le tonu, fasia, sauaina, ma tuua ia puapuagatia i luga o le satauro, sa ia fetalai i lena lava taimi, “Lo’u Tama e, ia e faamagaloina atu ia te i latou, aua ua latou le iloa le mea ua latou faia” (Luka 23:34).

O le puupuu o la tatou vaai, e faigofie ai mo i tatou i nisi taimi ona atiae ni lagona o le ita agai i isi o e le tutusa amio po o mafaufau pei o tatou. Atonu tatou te fatuina ni uiga faailogalanu e faavae i ni mea e pei o le tauvalaau faamalo atu i ni au taaalo a isi itu, o le eseese o manatu faaupufai, po o le eseese o talitonuga faalelotu.

Sa tuuina mai e Peresitene Russell M. Nelson se fautuaga poto i lana saunoaga, “O avanoa e faalogo ai i isi e ese o latou talitonuga faalelotu ma faalemalo, e faatupuina ai le onosai ma le malamalama.”²

Sa talanoa mai le Tusi a Mamona i se taimi na “amata ona fefete i luga o tagata o le ekalesia i le faamaualuluga o o latou mata, ma … amata ai ona latou inoino, o le tasi i le tasi, ma … sauaina ai i latou o e sa le talitonu e tusa ma o latou lava loto ma filifiliga” (Alema 4:8). Ia tatou manatua e le silasila le Atua i le lanu o le ofutaalo po o le pati faaupufai. Ae, e pei ona tautino mai e Amona, “Ua silasila mai [le Atua] i lalo i le fanauga uma a tagata; ma ua silafia e ia mafaufauga ma faamoemoega uma o le loto” (Alema 18:32). Uso e ma tuafafine, i tauvaga o le olaga, afai tatou te manumalo ai, ia tatou manumalo ma le alofa tunoa. A tatou faiaina, ia tatou faiaina ma le alofa tunoa. Aua afai tatou te feola ma le alofa tunoa i le tasi ma le isi, o lo tatou taui i le aso mulimuli o le alofa tunoa.

E pei lava foi ona avea i tatou uma ma tagata ua aafia i mea sese a isi i se tasi o taimi, o tatou foi o ni tagata faatiga i nisi taimi. Tatou te faia ni mea sese ma manaomia ai le alofa tunoa, alofa mutimutivale, ma le faamagaloga. E tatau ona tatou manatua o le faamagaloga o a tatou lava agasala ma mea sese e fua lea i lo tatou faamagaloina o isi. Sa fetalai le Faaola:

“Aua afai tou te faamagaloina atu tagata i a latou agasala, e faamagaloina foi outou e lo outou Tama o i le lagi:

(Mataio 6:14–15).

Mai mea uma na mafai ona fetalai atu ai le Faaola i le Tatalo a le Alii, lea e matagofie le puupuu, e faagaeetia sa Ia filifili e aofia ai “Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou” (Mataio 6:12; 3 Nifae 13:11).

O le faamagalo atu o le mafuaaga tonu lea na auina mai ai e le Atua Lona Alo, o lea ia tatou olioli ai i Lana taulaga e faamalolo ai i tatou uma. O le Togiola a le Faaola e le mo na o i latou e tatau ona salamo; e mo i latou foi e tatau ona faamagalo atu. Afai o faigata ona e faamagaloina se isi tagata, po o oe lava ia, ole atu i le Atua e fesoasoani ia te oe. O le faamagalo atu o se mataupu faavae mamalu ma faamaloloina

Ou te molimau atu i le alofa faifaipea ma le onosai o le Atua i Ana fanau uma ma e finagalo o Ia ia alolofa le tasi i le isi e pei ona Ia alofa mai ia i tatou (tagai Ioane 15:9, 12). A tatou faia o lea, o le a tatou faaitiitia le pogisa o lenei lalolagi i le mamalu ma le matagofie o Lona malo i le lagi. O le a tatou saoloto. I le suafa o Iesu Keriso, amene.