Te rā’au fa’aora o te fa’a’orera’a hapa

Te mau mea ato’a nō ’ō mai i te Atua tei roto, te here, te māramarama, ’e te parau mau. Tera rā, tātou nei te ta’ata ora, te ora nei tātou i roto i te hō’ē ao hi’a, tei ’ī i te tahi taime i te po’iri ’e te ’āehuehu. E ’ere i te mea maere e ravehia te mau hape, e tupu te mau ’ohipa parau ti’a ’ore, e ravehia te mau hara. E nō te reira, ’aita roa te hō’ē noa a’e vārua ora, i te hō’ē taime ’aore rā i te tahi atu, e ’ore e hāmani-ino-hia na roto i te mau ’ohipa ti’a ’ore a vetahi ’ē, te huru ha’apēpē ’aore rā te huru hara ato’a. Teie te hō’ē ’ohipa tei mauhia e tātou pā’āto’a.

Ma te māuruuru, te Atua, i roto i Tōna here ’e Tōna Aroha nō Tāna mau tamari’i, ’ua fa’aineine i te hō’ē e’a nō te tauturu ia tātou i roto i te reira mau taime fifi tā tātou e fa’aū atu. ’Ua hōro’a mai ’Oia i te hō’ē rave’a nō te fa’aora i tei riro ’ei tîtî i te hāmani-ino-ra’a a vetahi ’ē. ’Ua ha’api’i mai ’Oia, e nehenehe tātou ’ia fa’a’ore i te hapa ! Noa atu o tātou tei hāmani-ino-hia i te hō’ē taime, ’eiaha ra tātou ’ia riro e piti a’e taime ’ei tāpena (victime) i te amora’a i te teiaha o te feume (haine), te fa’a’ino, te māuiui, te riri, ’e ’aore rā te tāho’o. E nehenehe tā tātou e fa’a’ore i te hapa, e ’ia ora ti’amā.

E rave rahi mau matahiti i ma’iri a’e nei, a tāta’i ai au i te hō’ē ’āua, ’ua ’ō te hō’ē hu’a rā’au i roto i tō’u manimani rima. ’Ua tāmata ri’i au i te ’īriti i te reira, ma te mana’o ’ua mātara te reira, ’aita roa ïa. ’Ua tere i te taime, ’ua tupu te ’iri na ni’a i te hu’a rā’au, ma te fa’atupu i te hō’ē pu’u i ni’a i tō’u manimani rima. E ’ere i te mea au roa, i te tahi taime e mea māuiui.

Tau matahiti i muri iho, ’ua fa’a’oti au e rave i te tahi ’ohipa. Tā’u no’a i rave, o te tu’ura’a ïa i te rā’au pata i ni’a i te pu’u ’e ’ia tā’amu. ’Ua na reira noa vau. ’Aita ’outou i ’ite i tō’u hitimahuta i te hō’ē mahana, a ’īriti ai au i te tā’amu, ’ua mātara mai te hu’a rā’au i rāpae i tō’u manimani rima.

’Ua tāmaru te rā’au pata i te ’iri ’e ’ua hāmani i te hō’ē ’e’a ’ia pipiha mai te hu’a rā’au o tei ha’amāuiui e rave rahi matahiti. I te mātarara’a te hu’a rā’au, ’ua ora vitiviti noa tō’u manimani rima, i teie mahana, ’aita roa e ’itehia i te hō’ē noa a’e pēpē.

Hō’ē ā huru, e māuiui tano ’ore noa te hō’ē māfatu o tei ’ore i fa’a’ore i te hapa. ’Ia parai-ana’e-hia te ra’au pata fa’aora o te Tāra’ehara o te Fa’aora, e tāmaru ’Oia i tō tātou māfatu ē, e tauturu ia tātou ’ia taui. E nehenehe Tāna e fa’aora i te ’ā’au i putahia ra. (hi’o Iakoba 2:8)

’Ua pāpū iā’u ē, te hina’aro nei te rahira’a o tātou e fa’a’ore i te hapa, te mana’o nei rā tātou e mea fifi roa ia na reira. ’Ia ’ite ana’e tātou te hō’ē ’ohipa tano ’ore, e mea ohie ’ia parau, « ’ua hape tera ta’ata. Tītauhia ’ia fa’autu’ahia rātou. Tei hea ho’i te ture ? » Te feruri tano ’ore nei rā tātou, mai te peu e fa’a’ore tātou i te hapa, ’aita e tītauhia te ture ē e fa’a’orehia te fa’autu’ara’a.

E ’ere rā mai te reira te huru. E hōro’a te Atua i te hō’ē utu’a tano, ’aita te aroha e haru i tā te parau-ti’a (hi’o Alama 42:25). E pāruru te Atua ma te here ia ’outou ’e iā’u : « A vaiiho atu na i te ha’avāra’a iā’u iho nei, nō te mea nā’u ïa ’e e tāho’o atu ïa vau. Ei hau noa na ’outou » (PH&PF 82:23). I roto i te Buka a Moromona ’ua fafau ato’a mai te peropheta Iakoba e na te Atua « e fa’aherehere mai ia ’outou tō ’outou mau ’ati, e nāna ho’i e tauturu mai ia ’outou, ’e e fa’autu’a mai ia rātou ra, o te tītau i tō ’outou pohe ».(Iakoba 3:1)

’Ei tāpena (victime), mai te mea e ta’ata ha’apa’o tātou, e nehenehe tātou e rave i te hō’ē tāmāhanahana rahi ma te ’ite ē, e fa’aho’ona te Atua ia tātou nō te tā’āto’ara’a o te mau parau ti’a ore tā tātou i ora mai. ’Ua parau o Elder Joseph B. Wirthlin : « E fa’aho’i te Fatu i te mau mea ato’a i ’erehia e te feiā ha’apa’o ra… E te mau roimata ato’a o teie mahana, e fa’aho’ihia mai ïa i te hō’ē mahana hanere a’e taime roimata ’oa’oa ’e te māuruuru ».¹

A tauto’o ai tātou e fa’a’ore i te hapa a vetahi ’ē, e tāmata ato’a tātou e ha’amana’o e, tē rahi rā tātou i te pae vārua, ’aita rā tātou i te hō’ē ā fāito. ’Āre’a e mea ’ōhie ’ia hi’o i te mau tauira’a ’e te tupura’a i roto i te tino tāhuti, e mea fifi rā ia ’ite i te tupura’a i roto i tō tātou vārua.

Te hō’ē tāviri nō te fa’a’ore i te hapa a vētahi ’ē o te tāmatara’a ïa ’ia hi’o ia rātou mai tā te Atua e hi’o nei ia rātou. E nehenehe tā te Atua e vete i te paruai ’e e ha’amaita’i ia tātou i te hōro’a nō te ’ite i roto i te ’ā’au, te vārua o te tahi atu ta’ata o te hāmani ino ia tātou. E hōro’a mai te reira mana’o i te hō’ē here rahi nō te reira ta’ata.

Te ha’api’i nei te mau pāpa’iraa mo’a ia tātou ē, te here o te Atua nō Tāna mau tamari’i e mea mure ore ïa. ’Ua ’ite ’Oia i te ’īra’a o tō rātou huru nō te hāmani maita’i, noa atu te mau ’ohipa o tei tupu i muta’a iho ra. I te hope’ara’a, ’aita e ’enemi taehae roa a’e ’e ’aore rā ’eta’eta o te mau pipi a Iesu Mesia o Saulo nō Tareso. Are’a rā, i te taime hō’ē a fa’a’ite ai te Atua i te māramarama ’e te parau mau ia Paulo, ’aita ’oia ’ei pipi mai iāna hau atu i te fa’aro’o, te ’ana’anatae ’aore rā mata’u ’ore a te Fa’aora. ’Ua riro mai Saulo o te ’Āpōsetolo Paulo. ’Ua hōro’a mai tōna orara’a i te hi’ora’a fa’ahiahia i nahea te Atua ’ia hi’o i te mau ta’ata ’eiaha noa i tō rātou huru i teie nei, mai tei hea rā rātou ’ia riro mai. Te vai nei, i roto i tō tātou orara’a, te mau ta’ata mai ia Saulo o tei ’ī tō rātou huru mai ia Paulo. A ha’amana’o na, nahea tō tātou mau ’utuāfare, tō tātou mau ’oire, ’e te ao nei e nehenehe e taui mai te mea e tāmata pā’āto’a tātou ’ia hi’o ia vetahi ’ē mai ta te Atua e hi’o nei ia tātou ?

I te rahira’a o te taime, e hi’o tātou i tei hāmani ino ia tātou mai te mou’a pape to’eto’e pa’ari---E ’ite noa tātou te vāhi i ni’a ’eiaha ra te vāhi hōhonu i raro a’e i te pape. ’Aita tātou i ’ite e aha tei tupu i roto i te orara’a o te hō’ē ta’ata. ’Aita tātou i ’ite i tō rātou huru na mua a’e, ’aita tātou i ’ite i tō rātou mau ’arora’a, ’aita tātou i ’ite i te mau māuiui tā rātou e amo nei, Te mau taea’e ’e te mau tuahine, ‘eiaha e nane‘iri’iri. Te fa’a’orera’a hapa, e ’ere i te tāpirira’a i te mata. ’Aita tātou e fa’ati’a nei i te mau ’ohipa ino ’aore rā e fa’ati’a ia vetahi ē ’ia hāmani ino mai ia tātou nō rātou mau ’arora’a, mau māuiui ’e mau paruparu. E nehenehe rā e noa’a ia tātou i te hō’ē ta’a-maita’i-ra’a ’e te hau a hi’o ai tātou ma te ’ā’ano.

Mea pāpū, rātou o tei pa’ari iti i te pae vārua e nehenehe rātou e rave i te tahi mau hape rahi--- teie nei rā, aita roa hō’ē o tātou e ’itehia na roto noa i te mau ’ohipa ’ino roa tei ravehia e āna. O te Atua te ha’avā maita’i roa a’e. Te ’ite nei ’Oia i roto i te hōhonura’a. ’Ua rave ’Oia ’e ’ua ’ite i te mau mea ato’a. (hi’o 2 Nephi 2:24)’Ua parau ’Oia, « E fa’a’ore au, o te Fatu, i te hara a rātou tā’u i hina’aro i te fa’a’ore atu, ia ’outou rā ’ua tītau-hia atu ra ’outou ’ia fa’a’ore i te hapa a te ta’ata ato’a ».(PH&PF 64:10)

O te Mesia Iho, o tei pari ha’avarehia, o tei tāparahi-ino-hia, o tei ha’apēpēhia, ’e o tei vaiihohia atu i ni’a i te satauro ’ia māuiui, ’ua parau ’Oia i te reira ihoa taime, « e ta’u Metua, e fa’a’ore mai i tā rātou hara, ’aore ho’i rātou i ’ite i tā rātou e rave nei ».(Luka 23:34)

I roto i tō tātou hi’ora’a potopoto, e nehenehe tātou i te tahi taime e ’ite e mea ’ōhie ’ia fa’a’ohipa i te riri ia vetahi ’ē o tei ’ore e rave ’e ’aore rā e feruri nei mai ia tātou te huru. E nehenehe tātou e fa’atupu i te tahi mau huru tano ’ore o te ha’amauhia i ni’a i te reira mau ’ohipa a turu ai tātou i te tahi pupu tu’aro, te ravera’a i te mau mana’o politita ta’a ’ē, ’aore rā tei roto i te mau ha’apa’ora’a fa’aro’o ta’a ’ē.

’Ua hōro’a te peresideni Russell M. Nelson i te mana’o arata’i tano a parau ai, « te mau taime tano nō te fa’aro’o i te mau ti’aturira’a ’aore rā politita ta’a ’ē e nehenehe e fa’arahi i te fa’ari’ira’a ’e te ha’api’ira’a ».²

Te fa’a’ite nei te Buka a Moromona i te hō’ē taime i « te mau ta’ata o te ’ēkālesia i te fa’ateiteira’ahia i te te’ote’o o tō rātou ’ā’au, e… te tāhitohito ra rātou te tahi i te tahi, e… te hāmani ino ra i te mau ta’ata tei ’ore i fa’aro’o i tei au i tō rātou iho mana’o ’e tō rātou ihoa hina’aro ».(Alama 4:8) A ha’amana’o na tātou e, ’aita te Atua e hi’o i te huru ū o te piriaro tu’aro ’aore rā te pupu politita ’aore rā te ōra’a atu i roto i te ha’apa’ora’a fa’aro’o i teie taime. Maoti rā, mai tā Amona i fa’ahiti, « e te hi’o mai ra te Atua i te tamari’i a te ta’ata nei, e ’ua ’ite māite ’oia i te mau mana’o ato’a ’e te mau hina’aro ho’i o te ’ā’au nei ».(Alama 18:32) Te mau taea’e ’e te mau tuahine, i roto i te mau tāta’ura’a o te orara’a, mai te mea e upo’oti’a tātou, ia na reira tātou ma te marū. Mai te mea e pau tātou, ia na reira ma te marū. Mai te mea e ora tātou na roto i te marū te tahi ’e te tahi, o te marū tō tātou nei ha’amāururura’a i te mahana hope’a.

Hō’ē ā, e mau tāpena (victime) ana’e tātou i te mau ’ohipa tano ’ore a vetahi ’ē i tera ’e ’aore rā i tera taime, o tātou ato’a i te tahi taime o te hāmani ino. E hara atu tātou ’e e hina’aro tātou i te marū, te aroha ’e te fa’a’orera’a hapa. Tītauhia ia ha’amana’o tātou ē, te fa’a’orera’a i tā tātou hara ’e te mau riri, tei te huru ia o tā tātou fa’a’orera’a i tā vetahi ’ē hapa. Ua parau te Fa’aora :

« ’Ia fa’a’ore ho’i ’outou i tā vetahi ’ē ra hapa, e fa’a’ore ato’a mai tō ’outou Metua i te ao ra i tā ’outou »

« ’Ia ’ore ra ’outou ’ia fa’a’ore i tā vetahi ’ē ra hapa, e ’ore ato’a tō ’outou Metua e fa’a’ore mai i tā ’outou hapa ».(Mataio 6:14–15)

Te tā’āto’ara’a o te mau parau tā te Fa’aora i parau i roto i te pure a te Fatu, e mea poto mau, e mea ta’a ’ē o Tāna i ma’iti e parau « e fa’a’ore mai i tā mātou hara, mai ia mātou ato’a e fa’a’ore i tei hara ia mātou nei ».(Mataio 6:12; 3 Nephi 13:11)

Te fa’a’orera’a hapa o te tumu mau ïa i tono mai ai te Atua i Tāna Tamaiti, nō reira, ’ia ’oa’oa tātou nō tāna ō fa’a’orara’a ia tātou. E ’ere te tāra’ehara no te feiā ana’e e ti’a ’ia tātarahapa ; nō te feiā ato’a o te ti’a ’ia fa’a’ore i te hapa. Mai te mea te fifi nei outou e fa’a’ore i te hapa a vetahi ’ē ’aore rā ’oia ato’a ia ’outou iho, a ani i te Atua ’ia tauturu mai ia ’outou. ’Ua riro te fa’a’orera’a hapa ’ei tumu no te fa’aorara’a hanahana. ’Aita e hina’arohia e piti a’e taime te tāpenara’a (victime). E nehenehe tātou e fa’a’ore i te hapa.

Te fa’a’ite pāpū nei au i te here tu’utu’u ore o te Atua ’e te fa’aoroma’i nō Tāna mau tamari’i ato’a ’e Tōna hina’aro ’ia here tātou te tahi ’e te tahi mai Tāna i here ia tātou (hi’o Ioane 15:9, 12). A na reira ai tātou, e fa’a’ore tātou i te po’iri o teie nei ao na roto i te hanahana ’e te mana o Tōna bāsileia i te ra’i ra. E ora ti’amā tātou. Na roto i te i’oa o Iesu Mesia, amene.