2010–2019
Tabu Spirit
Epril 2016


Tabu Spirit

Mi talemaot lav mo tangkyu blong mi long Papa long Heven from presen we i Tabu Spirit, we tru long Hem, Hem i stap soemaot tingting blong Hem mo i sapotem yumi.

Ol brata mo sista we mi lavem tumas. Mi toktok long yufala tedei olsem wokman blong Lod, mo tu, olsem wan bigfala bubuman. Long yufala mo long laen blong yufala, mi tijim mo talem testemoni blong mi long saed blong bigfala presen ia we i Tabu Spirit.

Mi stat blong luksave Laet blong Kraes we Hem i givim i go “long evri man mo woman we i kam long wol ia.”1 Yumi evriwan i kasem samting long tabu laet. Hem i “long evri samting mo tru long evri samting,”2 mo i letem yumi blong luksave raet mo rong.3

Be Tabu Spirit i defren long Laet blong Kraes. Hem i nambatri memba blong Godhed, wan spirit we i defren wetem ol tabu responsabiliti, mo i wan long tingting wetem Papa mo Pikinini.4

Olsem ol memba blong Jos, yumi gat eksperiens wetem Tabu Spirit olsem kompanion oltaem. Tru long prishud blong God we i kambak, yumi kasem baptaes andanit long wota blong kam klin aot long ol sin blong yumi, mo afta, yumi kasem konfemesen olsem memba blong Jos. Long odinens ia, yumi kasem presen we i Tabu Spirit taem olgeta we oli holem prishud i putum han antap long hed blong yumi.5 Afta long hemia, yumi save kasem mo holemtaet Tabu Spirit olsem kompanion taem yumi tingbaot oltaem Sevya, stap obei ol komanmen blong Hem, stap sakem ol sin blong yumi, mo stap klin inaf blong tekem sakramen long Sabat dei.

Tabu Spirit i givim revelesen blong yuwan blong helpem yu blong mekem ol bigfala desisen long laef, olsem ol samting olsem edukesen, misin, wok, mared, pikinini, ples we bae yumi stap wetem ol pikinini, mo i go moa. Long ol mata ia, Papa long Heven i wantem luk yumi yusum fridom blong joes blong yumi, stadi long situesen long maen blong yumi folem ol prinsipol blong gospel, mo tekem desisen i go long Hem tru long prea.

Revelesen blong yumiwan i wan mas, be i wan pat nomo blong Tabu Spirit. Olsem skripja i konfemem, Tabu Spirit i stap testifae abaot Sevya mo abaot God Papa.6 Hem i tijim yumi “ol trutok blong kingdom ia we bae oli givim pis”7 mo i mekem yumi gat fulap hop.”8 Hem i “lidim man blong mekem gud … blong yumi mekem stret jajmen.”9 Hem i givim “wan presen tru long Spirit blong God [long evri man mo woman] … blong gud blong evriwan.”10 Hem “givim save”11 mo “mekem [yumi] tingbaot olgeta samting ia bakegen.”12 Tru long Tabu Spirit, bae yumi save “kam tabu”13 mo “kam klin aot long ol sin blong yumi.”14 Hem i “Spirit blong Givhan,” we i “semwan we [Sevya i] bin promesem long ol disaepol blong Hem.”15

Mi talem bakegen long yumi evriwan se Tabu Spirit i no kam blong kontrolem yumi. Sam long yumi i stap askem help blong Tabu Spirit long evri smol desisen long laef blong yumi. Hemia i spolem tabu wok blong Hem. Tabu Spirit i ona long prinsipol blong fridom blong joes. Hem i toktok long maen mo hat blong yumi long kaen fasin long saed blong ol samting we oli impoten.16

Wanwan long yumi i filim Tabu Spirit i lidim tingting blong yumi long defren wei. Toktok blong Hem bae yu filim i bigwan o i smol, folem ol nid mo situesen blong yu.

Long ol las dei, yumi talem tru se wan profet nomo i save kasem revelesen tru long Tabu Spirit long bihaf blong ful Jos. Sam oli stap fogetem hemia, semmak olsem taem Eron mo Miriam, tufala i traem winim tingting blong Moses blong agri wetem tufala. Be Lod i tijim olgeta mo yumi:

“Sapos i gat wan man we i profet nomo i stap wetem yufala, … mi stap kamtru stret long fes blong hem, …

“Mi toktok wetem hem long ol toktok we i klia we i klia.” 17

Samtaem, enemi i temtem yumi wetem ol giaman tingting blong yumi miksim wetem Tabu Spirit. Mi testifae se blong stap fetful blong stap obei long ol komanmen mo kipim ol kavenan blong yumi, bae i protektem yumi blong oli giaman long yumi. Tru long Tabu Spirit, bae yumi save luksave ol giaman profet we oli stap tijim doktrin blong ol komanmen blong man.18

Mo taem yumi kasem insperesen we i kam long Tabu Spirit we i blong yumiwan, hem i waes blong tingbaot se yumi no save kasem revelesen long bihaf blong ol nara man. Mi save wan yang man we i talem wan yang woman: “Mi gat wan drim se bae yu nao yu waef blong mi.” Yang woman i tingting long toktok ia mo afta i talem: “Taem mi kasem semfala drim ia, bae mi kambak mo toktok long yu.”

Yumi evriwan bae i kasem temtesen blong letem filing blong yumiwan i winim Tabu Spirit. Profet Josef Smit i plis long Papa long Heven blong kasem raet blong givim ol fas 116 pej blong Buk blong Momon i go long Martin Haris. Josef i ting se i wan gud tingting. Long fas taem, Tabu Spirit i no konfemem ol filing ia. Long en, Lod i letem Josef blong givim ol pej oli go. Martin Haris i lusum ol pej ia. Blong wan smol taem, Lod i karemaot presen blong Profet blong save transletem toktok, mo hem i lanem wan strong mo impoten lesen we i lidim seves blong Hem afta.

Tabu Spirit i stamba blong Restoresen. Taem i smol boe, hem i ridim Jemes 1: 5, nao Profet Josef i talem: “I neva gat wan skripja we i kam wetem moa paoa long hat blong man bitim we i bin hapen long tetaem ia.”19 Paoa we Josef Smit i tokbaot i Tabu Spirit we i lidim hem. Long en, Josef i go long bus blong ol tri kolosap long haos blong hem, mo i nildaon blong askem God. Fas Visen we i kam afta i hapen kwik mo i bigwan. Be rod we bae i go kasem visit ia blong Papa mo Pikinini, we Tufala i kamaot tufalawan, i stat wetem toktok blong Tabu Spirit we i talem Josef blong prea.

Ol trutok blong gospel we oli kambak, oli kam tru long wan paten blong askem samting long prea, mo afta, kasem mo folem toktok blong Tabu Spirit. Tingting long ol eksampol ia: transletem Buk blong Momon; kambak blong prishud mo ol odinens blong hem; stat wetem baptaes; oganaesesen blong Jos — mo hemia sam nomo we mi talem. Mi testifae se tedei, revelesen i kam long Lod i go long Fas Presidensi mo Olgeta Twelef, mo hemia i folem semfala tabu rod. Hem i semfala rod ia we i letem revelesen i kam long wanwan man o woman.

Yumi presem evriwan we i bin folem Tabu Spirit blong kasem gospel we i kambak, stat wetem ol stret famli blong Josef Smit. Taem yangfala Josef i talem papa blong hem long visit blong Moronae, papa blong hem i kasem wan konfemesen we i witnes blong hemwan. Stret afta, papa blong Josef i karemaot ol wok blong hem long fam mo leftemap tingting blong hem blong folem daereksen blong enjel.

Olsem papa, mama mo lida, bae yumi mekem semmak. Bae yumi leftemap tingting blong ol pikinini blong yumi mo ol narawan blong folem daereksen blong Tabu Spirit. Taem yumi mekem olsem, bae yumi folem eksampol blong Tabu Spirit, lidim man long fasin we i kaen, i no flas, i kwaet, i safa longtaem, mo wetem tru lav.20

Tabu Spirit i wan wei blong mekem wok blong God, long ol famli mo raon long Jos. Wetem andastaning ia, bae mi serem sam eksampol blong mi long saed blong Tabu Spirit long laef blong mi, mo seves long Jos. Mi givim olsem witnes blong mi se Tabu Spirit i blesem yumi evriwan.

Plante yia i pas, Sista Hels mo mi i plan blong invaetem sam wok fren blong mi long wan spesel dina long hom. Taem mi aot long ofis i go hom, mi gat filing blong stop long haos blong wan wido we mi stap tijim hem. Taem mi noknok long doa blong sista, hem i se: “Mi bin stap prea se bae yu kam.” ?Tingting ia i kam long wea? Long Tabu Spirit.

Wan taem, afta wan bigfala sik i kasem mi, mi prisaed long wan stek konfrens. Blong holemtaet paoa blong mi, mi plan blong aot long japel stret afta long prishud lidasip sesen. Be, afta long las prea, Tabu Spirit i talem long mi: “?Yu stap go wea?” Mi kasem insperesen blong sekhan long evriwan taem mi stap aot long rum. Wan yang elda i kam fored, mo tingting i kam blong mi givim spesel mesej ia long hem. Hem i stap lukluk i go daon mo mi wet se hem i lukluk i kam antap blong ae blong hem i luk ae blong mi, nao mi bin save talem: “Prea long Papa long Heven, lisin long Tabu Spirit, folem ol kwaet toktok we yu kasem, mo evri samting bae i oraet long laef blong yu.” Afta long hem, stek presiden i talem se yang man ia i jes kambak bifo misin i finis. Stek presiden, we i bin folem wan klia toktok blong Spirit, i bin promesem papa blong yang man ia, se sapos hem i tekem boe blong hem i kam long prishud miting, bae Elda Hels i toktok long hem. ?From wanem nao mi stop blong sekhan long evriwan? ?From wanem mi stop blong mi toktok long spesel yang man ia? ?Wanem nao stamba blong advaes blong mi? Hem i simpol: Tabu Spirit.

Long stat blong 2005, oli lidim mi blong rere long wan mesej blong Jisas Kraes abaot ol senia misinari kapol. Afta long konfrens, wan brata i talem: “Taem mifala i stap lisin long konfrens, wantaem nomo Spirit blong Lod i tajem sol blong mi. … I no gat mistek long mesej ia we i kam long mi mo swit hat blong mi. Mitufala i mas go long misin, mo naoia. Taem mi luk waef blong mi, mi luksave se, hem tu, i kasem semfala toktok we i kam long Spirit.”21 ?Wanem nao i tekem ansa ia i kam long mitufala long semtaem? Tabu Spirit.

Long famli laen blong mi mo evriwan we i harem saon blong voes blong mi. Mi talem testemoni blong mi long saed blong revelesen blong yumiwan, abaot daereksen we i kam evri dei, abaot woning, toktok blong leftemap tingting, paoa mo fasin blong kam klin long spirit, kamfot mo pis we i kam long famli blong yumi tru long Tabu Spirit. Tru long Tabu Spirit yumi gotru long plante sore mo lav blong Kraes,22 mo ol merikel we oli no stop.23

Mi talem spesel witnes blong mi se Sevya i stap laef. Mi talemaot lav mo tangkyu blong mi long Papa long Heven from presen we i Tabu Spirit, we tru long Hem, Hem i stap soemaot tingting blong Hem mo i sapotem yumi long laef blong yumi. Long nem blong Jisas Kraes, amen.