Tus Vaj Ntsuj Plig Dawb Huv

Kuv cov kwv tij thiab cov muam uas kuv hlub es, hnub no kuv ua tus Tswv ib tug tub qhe thiab ib tug yawg koob los hais lus rau nej. Rau nej thiab kuv cov xeeb leej xeeb ntxwv, kuv qhia thiab hais lus tim khawv txog lub txiaj ntsim zoo kawg nkaus uas yog tus Vaj Ntsuj Plig Dawb Huv.

Kuv xav pib lees paub tias muaj Yexus Khetos txoj Kev Kaj, uas muab pub rau txhua tus txiv neej thiab poj niam uas los nyob hauv ntiaj teb no.¹ Peb txhua leej txhia tus tau tej yam zoo los ntawm txoj kev kaj dawb huv no. Qhov kaj no nyob hauv txhua tus neeg thiab hauv txhua yam tsav,² thiab nws cia peb paub qhov zoo tawm ntawm qhov phem.³

Tiam sis tus Vaj Ntsuj Plig Dawb Huv yeej txawv Yexus Khetos txoj Kev Kaj. Nws yog tus neeg thib peb ntawm Pawg Vajtswv, yog ib tug ntsuj plig uas muaj nws tej kev lav ris dawb ceev, thiab yeej koom siab nrog Leej Txiv thiab Leej Tub.⁴

Ua cov mej zeej hauv lub Koom Txoos, peb muaj cai tau tus Vaj Ntsuj Plig Dawb Huv los uas peb tus khub tas mus li. Dhau los ntawm Vajtswv lub pov thawj hwj uas raug muab txum tim rov qab los, peb ua kev cai raus dej kom dim peb tej kev txhaum thiab ua kev pom zoo ua mej zeej hauv lub Koom Txoos. Nyob hauv txoj kab ke no lawv tso tes rau saum peb taub hau muab lub txiaj ntsim Vaj Ntsuj Plig Dawb Huv rau peb.⁵ Tom qab ntawd, peb txais tau thiab muaj tus Vaj Ntsuj Plig Dawb Huv uas peb tus khub thaum peb nco txog tus Cawm Seej tsis tu tsis tseg, ua raws li Nws cov lus txib, hloov siab lees txim rau peb tej kev txhaum, thiab ua neeg tsim nyog thaum peb noj lub cim nco txog thaum Hnub Caiv.

Tus Vaj Ntsuj Plig Dawb Huv muab kev tshwm sim rau peb uas pab peb txiav txim txog tej yam tseem ceeb heev hauv peb lub neej zoo li txoj kev kawm ntaub kawm ntawv, kev mus ua tub txib, kev ua hauj lwm, kev sib yuav, kev muaj me nyuam, peb yuav nrog peb tsev neeg nyob qhov twg, thiab tej yam zoo li no. Hais txog tej yam xwm no, Leej Txiv Saum Ntuj Ceeb Tsheej xav kom peb yuav siv peb txoj kev ywj siab xaiv, kawm txog tej kev txiav txim no hauv peb lub paj hlwb raws li txoj moo zoo tej ntsiab cai qhia, ces mam li coj peb txoj kev txiav txim los rau Nws thaum peb thov Vajtswv.

Kev tshwm sim yog ib yam tseem ceeb heev, tiam sis tsuas yog ib qho ntawm tus Vaj Ntsuj Plig Dawb Huv txoj hauj lwm. Raws li cov vaj lug kub qhia, tus Vaj Ntsuj Plig Dawb Huv kuj ua tim khawv txog tus Cawm Seej thiab Vajtswv Leej Txiv.⁶ Nws qhia peb txog tej kev thaj yeeb nyab xeeb hauv lub nceeg vaj⁷ thiab ua rau peb “muaj kev cia siab ntau.”⁸ Nws coj peb mus ua tej yam zoo thiab txiav txim ncaj ncees.⁹ Nws muab ib qho txiaj ntsim ntawm sab ntsuj plig rau txhua tus txiv neej thiab poj niam xwv kom sawv daws yuav tau qhov zoo.¹⁰ Nws “qhia [peb] kev txawj ntse”¹¹ thiab “ua rau [peb] nco qab txog txhua yam tsav.”¹² Dhau ntawm tus Vaj Ntsuj Plig Dawb Huv, peb “yuav ua neeg dawb huv”¹³ thiab yuav txais “kev zam rau peb tej kev txhaum.”¹⁴ Nws yog tus “Nplij Siab,” tib tug uas tau cog lus tseg yuav muab rau tus Cawm Seej cov thwj tim.¹⁵

Kuv rov qab qhia peb sawv daws tias tus Vaj Ntsuj Plig Dawb Huv tsis yog muab los tswj kav peb. Peb ib txhia ua neeg tsis txawj ntse thaum peb xav tau tus Vaj Ntsuj Plig Dawb Huv txoj kev coj qhia rau tej kev txiav txim me me hauv peb lub neej. Nov ua rau peb saib tsis tau Nws txoj hauj lwm rau nqi pes tsawg. Tus Vaj Ntsuj Plig Dawb Huv saib tau txoj ntsiab cai rau kev ywj siab xaiv rau nqi. Nws maj mam hais lus rau peb sab paj hlwb thiab peb lub siab hais txog tej yam tseem ceeb.¹⁶

Peb txhua tus nyias hnov nyias tej kev xav thaum tus Vaj Ntsuj Plig Dawb Huv muab tej kev tshoov siab. Nws tej kev tshoov siab yuav loj thiab me nyob ntawm seb peb xav tau kev pab li cas thiab tab tom raug xwm txheej li cas.

Nyob hauv lub caij nyoog kawg no, peb lees paub tias tus yaj saub nkaus xwb thiaj txais tau kev tshwm sim dhau ntawm tus Vaj Ntsuj Plig Dawb Huv rau tag nrho lub Koom Txoos. Ib txhia neeg tsis nco qab qhov no, zoo li thaum Aloos thiab Milias sim ntxias Mauxes kom pom zoo rau nkawd txoj kev xav. Tiam sis tus Tswv qhia nkawd thiab peb. Nws hais tias:

“Thaum muaj ib tug cev Vajtswv lus nrog nej nyob, kuv tus Tswv yuav qhia kuv rau nws paub. …

“Kuv thiaj nrog nws tham tim ntsej tim muag.”¹⁷

Tej thaum dab ntxwg nyoog siv tej tswv yim cuav ntxias peb uas ua rau peb xav tias tej ntawd los ntawm tus Vaj Ntsuj Plig Dawb Huv los. Kuv hais lus tim khawv tias thaum peb rau siab ntso ua raws li cov lus txib thiab ceev peb tej kev khi lus ces peb yuav tau kev pov hwm ntawm txoj kev dag ntxias. Dhau ntawm tus Vaj Ntsuj Plig Dawb Huv, peb yuav muaj cuab kav to taub cov yaj saub cuav uas qhia tib neeg tej lus qhuab qhia.¹⁸

Thaum peb txais tus Vaj Ntsuj Plig Dawb Huv rau peb tus kheej, peb yuav tsum nco qab ntsoov tias peb txais tsis tau kev tshwm sim rau lwm tus neeg. Kuv paub txog ib tug txiv neej hluas uas qhia ib tug poj niam hluas hais tias, “Kuv tau ua npau suav hais tias koj yuav tsum ua kuv tus poj niam.” Tus poj niam hluas xav twj ywm ib pliag ces txawm teb hais tias, “Thaum kuv ua npau suav pom tib yam li ntawd ces, kuv mam li los nrog koj tham mog.”

Tej zaum peb txhua tus yuav raug kev ntxias kom peb tej kev xav yuav kov yeej tus Vaj Ntsuj Plig Dawb Huv txoj kev coj qhia. Tus Yaj Saub Yauxej Xamiv tau taij Leej Txiv Saum Ntuj Ceeb Tsheej tso lus rau nws qiv thawj 116 phab ntawv ntawm Phau Ntawv Maumoos rau Martin Harris. Yauxej xav tias yog ib qho tswv yim zoo. Thaum xub thawj tus Vaj Ntsuj Plig Dawb Huv tsis tau pom zoo rau nws. Nyob nyob ces, tus Tswv cia Yauxej qiv cov ntawv. Martin Harris ua rau cov ntawv xiam. Rau ib ntus, tus Tswv tau tshem tus Yaj Saub lub txiaj ntsim rau kev txhais lus tawm, thiab nws kawm paub ib yam tseem ceeb uas tau pauv tag nrho nws tej hauj lwm yav tom ntej.

Tus Vaj Ntsuj Plig Dawb Huv nyob nruab plawv txoj Kev Muab Txum Tim Rov Qab Los. Hais txog nws txoj kev nyeem phau Yakanpaus 1:5 thaum nws hluas, tus Yaj Saub Yauxej nco qab hais tias, “Yeej tsis muaj dua ib nqes vaj lug kub uas tau muaj hwj chim raug ib tug neeg twg lub siab ntau tshaj nqes no tau raug kuv lub siab thaum ntawd.”¹⁹ Lub hwj chim uas Yauxej Xamiv piav txog no yeej yog tus Vaj Ntsuj Plig Dawb Huv. Vim li ntawd, Yauxej thiaj tau mus hauv ib koog ntoo ze nws tsev thiab tau txhos caug noog Vajtswv. Thawj Zaj Ua Yog Toog Pom uas tshwm los yeej tseem ceeb thiab muaj yeeb koob. Tiam sis qhov uas Leej Txiv thiab Leej Tub tshwm los pom ib tug neeg yeej yog vim muaj tus Vaj Ntsuj Plig Dawb Huv txoj kev tshoov siab kom los thov Vajtswv.

Tej kev tseeb ntawm txoj moo zoo uas raug muab txum tim rov qab los tau los vim muaj txoj kev thov Vajtswv rau qhov xav tshawb nrhiav thiab ces tau txais thiab ua raws li tus Vaj Ntsuj Plig Dawb Huv tej kev tshoov siab. Cia li xav txog tej qhov piv txwv no: kev txhais Phau Ntawv Maumoos, txoj kev muab lub pov thawj hwj thiab tej kab ke txum tim rov qab los, pib muaj kev cai raus dej; kev txhim tsa lub Koom Txoos—tsuas yog ob peb yam xwb. Kuv hais lus tim khawv tias hnub no, muaj kev tshwm sim los ntawm tus Tswv los rau Thawj Pawg Thawj Tswj Hwm thiab Pawg Kaum Ob tug Thwj Tim raws nraim li tib tug qauv dawb ceev no. Nov yog tib tug qauv uas cia peb txais kev tshwm sim rau peb tus kheej.

Peb qhuas txhua tus neeg uas tau ua raws li tus Vaj Ntsuj Plig Dawb Huv qhia los txais yuav txoj moo zoo uas raug muab txum tim rov qab los no, pib nrog Yauxej Xamiv tsev neeg kiag. Thaum Yauxej qhia nws txiv tias Maulaunais tau tuaj xyuas nws, nws txiv tau lus pov thawj rau nws tus kheej tias qhov ntawd muaj tseeb. Tas sim ntawd, nws txawm tso Yauxej mus ntawm nws tej hauj lwm hauv lawv thaj teb thiab tau hais kom nws mus ua raws li tus tim tswv qhia nws lawm.

Cia peb, ua niam txiv thiab cov thawj coj, ua li ntawd thiab. Cia peb yaum peb cov me nyuam thiab lwm tus neeg kom ua raws li tus Vaj Ntsuj Plig Dawb Huv txoj kev coj qhia. Thaum ua li no, cia peb ua raws li tus Vaj Ntsuj Plig Dawb Huv tus yam ntxwv, coj lwm tus siv kev ua siab mos siab muag, txo hwj chim, ua siab zoo, ua siab ntev, thiab muaj kev hlub tshua.²⁰

Tus Vaj Ntsuj Plig Dawb Huv yog tus uas pab khiav Vajtswv txoj hauj lwm hauv tej yim neeg thiab hauv tag nrho lub Koom Txoos. Vim to taub li no, nej puas kam kuv qhia nej txog ob peb qhov yam ntxwv hauv kuv lub neej hais txog tus Vaj Ntsuj Plig Dawb Huv thiab kev ua hauj lwm hauv lub Koom Txoos? Kuv qhia tej no ua ib zaj lus tim khawv tias tus Vaj Ntsuj Plig Dawb Huv yeej foom koob hmoov rau peb txhua tus.

Ntau xyoo tas los lawm, Muam Hales wb tau npaj tos txais wb ib co phooj ywg los noj ib rooj mov hauv wb tsev. Thaum kuv los ntawm kuv hoob kas, kuv tau kev tshoov siab kom nres xyuas ib tug poj ntsuam uas kuv qhia tom tsev. Thaum kuv khob tus muam ntawd lub qhov rooj, nws hais tias, “kuv twb thov Vajtswv kom koj yuav tuaj.” Ces txoj kev tshoov siab ntawd los qhov twg los? Tus Vaj Ntsuj Plig Dawb Huv.

Muaj ib zaug, tom qab kuv muaj ib yam kab mob loj, kuv tau coj kav ib ceg txheem ntseeg lub rooj sab laj. Kom txuag tau kuv lub zog, kuv tau npaj siab yuav mus tsev tom qab muaj txoj kev sib ntsib rau cov thawj coj rau lub pov thawj hwj. Tiam sis tom qab thov Vajtswv xaus, tus Vaj Ntsuj Plig Dawb Huv hais rau kuv tias, “Koj tab tom mus dab tsi?” Kuv tau kev tshoov siab kom tuav txhua tus neeg txhais tes thaum lawv tawm ntawm chav tsev ntawd. $Thaum ib tug txwj laug hluas los, kuv tau kev tshoov siab kom qhia ib zaj xov tshwj xeeb rau nws. Nws nyo hau, kuv tos nws ntsia kuv qhov muag, ces kuv thiaj hais rau nws tias, “Thov rau Leej Txiv Saum Ntuj Ceeb Tsheej, mloog tus Vaj Ntsuj Plig Dawb Huv, ua raws li tej kev tshoov siab uas koj txais, ces txhua yam yuav zoo hauv koj lub neej.” Tom qab ntawd ceg txheem ntseeg tus thawj tswj hwm qhia kuv tias tus txiv neej hluas ntawd nyuam qhuav los ntawm nws txoj kev ua tub txib ib nyuag ntxov. Ceg txheem ntseeg tus thawj tswj hwm, tau ib txoj kev tshoov siab lawm nws thiaj tau hais rau tus txiv neej hluas ntawd leej txiv tias yog nws yuav coj nws tus tub los rau lub pov thawj hwj txoj kev sib ntsib no ces, Txwj Laug Hales yeej yuav nrog nws tham. Vim li cas kuv tau nres tuav txhua tus neeg txhais tes? Vim li cas kuv tau nres nrog tus tub hluas tshwj xeeb no tham? Kuv tau lus qhuab ntuas ntawd los qhov twg los? Nws yooj yim heev: tus Vaj Ntsuj Plig Dawb Huv.

Thaum xyoo 2005, kuv tau kev coj qhia hais ib zaj lus hauv lub tuam rooj sab laj uas qhia txog cov khub laus uas mus ua tub txib. Tom qab lub rooj sab laj, ib tug tij laug hais tias: “Thaum peb tab tom mloog lub rooj sab laj … tam sim ntawd tus Tswv tus Ntsuj Plig tau tshoov kuv lub siab. … Yeej xav tsis tau yuam keev hais tias zaj xov ntawd yog rau kuv thiab kuv tus me poj niam. Wb yuav tsum mus ua tub txib, thiab twb txog lub sij hawm lawm. Thaum kuv … ntsia kuv tus poj niam, kuv txawm paub hais tias nws tau txais tib txoj kev tshoov siab los ntawm tus Ntsuj Plig lawm.”²¹ Tau muaj dab tsi kom wb ob leeg tau tib txoj kev tshoov siab? Tus Vaj Ntsuj Plig Dawb Huv.

Xav hais rau kuv cov xeeb leej xeeb ntxwv thiab txhua tus neeg uas hnov kuv suab, kuv qhia kuv zaj lus tim khawv tias yeej muaj kev tshwm sim thiab kev coj qhia, kev ceeb toom, kev txhawb pab, kev ntxiv zog, kev ntxuav yus sab ntsuj plig, kev nplij siab, thiab kev thaj yeeb nyab xeeb tau los rau peb tsev neeg dhau los ntawm tus Vaj Ntsuj Plig Dawb Huv. Dhau ntawm tus Vaj Ntsuj Plig dawb Huv, peb thiaj muaj ntau yam txuj ci loj thiab tseem ceeb²² thiab lwm yam koob hmoov tsis tu tsis tseg.²³

Kuv hais kuv zaj lus tim khawv tias tus Cawm Seej muaj sia nyob. Kuv qhia kuv txoj kev hlub thiab kev ris txiaj rau Leej Txiv Saum Ntuj Ceeb Tsheej vim muaj lub txiaj ntsim ntawm tus Vaj Ntsuj Plig Dawb Huv, uas Nws siv qhia seb Nws siab xav li cas thiab yeej txhawb nqa peb lub neej. Los ntawm Yexus Khetos lub npe, amees.