E Espíritu Santu

Mi kerido rumannan, awe mi ta papia komo un siervo di Señor i tambe komo un bisawelo. Na abo i na mi kerido posteridat, mi ta siña i duna testimonio di e don remarkabel di e Espíritu Santu.

Mi ta kuminsá dor di rekonosé e Lus di Cristu, kual ta wòrdu duna na “kada hòmber i muhé ku ta bin den e mundu aki.”¹ Nos tur ta benefisiá di e lus santu aki. E ta den tur i dor di tur kos,”² i e ta permití nos pa distinguí entre bon i malu.³

Pero e Espíritu Santu ta diferente for di e Lus di Cristu. E ta e di tres miembro di e Deidat, un personahe di Espíritu distinto ku responsabilidatnan sagrado, i unu den propósito ku e Tata i e Yu.⁴

Komo miembronan di Iglesia, nos por eksperensha e kompania di e Espíritu Santo kontinuamente. Pa medio di e saserdosio di Dios restourá, nos ta wòrdu batisá dor di inmersion pa remishon di nos pikanan i nos ta wòrdu konfirmá miembronan di E Iglesia di JesuCristu di e Santunan di e Delaster Dianan. Den e ordenansa aki nos ta risibí e don di Espíritu Santo pa medio di imposishon di man di e poseedornan di saserdosio.⁵ Despues, nos por risibí i retené e kompania di e Espíritu Santu pa medio di semper kòrda e Salbador, warda su mandamentunan, arepentí di nos pikanan, i dignamente partisipá di e sakramento riba dia di Sabat.

E Espíritu Santo ta proveé revelashon personal pa yuda nos tuma desishonnan grandi den nos bida tokante kosnan manera edukashon, mishon, karera, matrimonio, yunan, unda nos ke biba ku nos famia, i mas. Den e asuntunan aki, Tata Selestial ta spera ku nos lo usa nos albedrio, studia e situashon den nos mente di akuerdo ku e prinsipionan di evangelio, i trese e desishon serka dje den orashon.

Revelashon personal ta esensial, pero e ta solamente un parti di e obra di e Espíritu Santu. Manera eskrituranan ta bisa, e Espíritu Santu tambe ta testifiká di e Salbador i [di] Dios e Tata.⁶. E ta siña nos “e kosnan di pas di e reino”⁷ i e ta kousa nos pa “biba den speransa.”⁸ E ta guia nos pa hasi bon… i pa husga hustamente.”⁹ E ta duna “na kada hòmber i muhé … e don Spiritual …pa tur por benefisiá di dje.”¹⁰ E ta “duna nos konosementu”¹¹ i “trese tur kos nan nos memoria.”¹² Pa medio di e Espíritu Santu, nos “por wòrdu santifiká.”¹³ i risibí un “remishon pa [nos] pikanan.”¹⁴ E ta e Konsolador, e mesun ku a wòrdu primintí na e disípulonan di e Salbador.”¹⁵

Mi ke rekòrdá nos tur ku e Espíritu Santo no a risibí kontròl riba nos. Algun di nos buska inprudentemente e guia di e Espíritu Santu riba kada desishon chikitu di nos bida. Esaki ta bagatelisá su ròl sagrado. E Espíritu Santo ta honra e prinsipio di albedrio. E ta papia den nos mente i nos kurason suave tokante hopi asuntunan di konsekuensia.¹⁶

Kada un di nos por sinti e influensha di e Espíritu Santo diferente. Su susuronan ta wòrdu sinti den diferente grandi di intensidat di akuerdo ku nos nesesidat individual i sirkunstansia.

Den e delaster dianan aki, nos ta afirmá ku únikamente e profeta por risibí revelashon pa medio di e Espíritu Santo pa hinter e Iglesia. Algun ta lubidá esaki, manera ora Aaron i Miriam a purba na konvensé Moises pa bai di akuerdo ku nan. Pero Señor a siña nan i nos. El a bisa:

“Si tin un profeta bou di boso, Ami, Señor lo mi dun’é di konosé mi mes. …

“Kuné lo mi papia di boka pa boka.”¹⁷

Tin biaha e atversario ta tenta nos ku ideanan falsu pa nos por konfundí ku e Espíritu Santu. Mi ta testifiká ku lealtat den obedesé e mandamentunan i warda nos kombenionan lo protehá nos for di engaño. Pa medio di e Espíritu Santu, nos lo por diserní entre profeta falsu ku ta siña komo doktrina e mandamentunan di hende.”¹⁸

Ora nos ta risibí e inspirashon di e Espíritu Santo pa nos mes, ta sabio pa kòrda ku nos no por risibí revelashon pa otronan. Mi sa di un hòmber hóben ku a bisa un muhé hóben, “Mi tabata tin un soño ku abo lo bira mi kasa.” E muhé hóben a meditá riba e deklarashon aki i a respondé, “Ora mi tin e mesun soño, lo mi regresá i papia ku bo.”

Nos tur por wòrdu tenta pa laga nos deseonan personal surpasá e guia di e Espíritu Santu. E profeta José Smith a roga serka Tata Selestial pa pèrmit pa fia e promé 116 páginanan di e Buki di Mormon na Martin Harris. José a pensa ku lo tabata un bon idea. Den prinsipio e Espíritu Santu no a dun’é sentimentunan ku ta konfirmá. Eventualmente Señor a pèrmití José pa fia e páginanan tòg. Martin Harris a pèrdè nan. Pa un rason, Señor a retirá e don di tradusí di e Profeta, i José la siña un lès doloroso pero valioso ku a moldia sobra di su servisio.

E Espíritu Santu ta sentral den e Restourashon. Respekto na un niñes lesando Juan 1:5, e profeta José Smith a konta, “Nunka ningun pasahe di eskritura a bin ku mas poder na e kurason di un hende manera esaki a bin na di mi na e tempu aki.”¹⁹ E poder deskribí dor di José Smith tabata e influensia di e Espíritu Santu. Komo resultado, José a bai den e Arboleda sagrado serka di su kas i bai na rudiá pa puntra Dios. E Promé Vishon ku a sigui tabata berdaderamente transedental i magnífiko. Pero e kaminda pa un bishita den persona di e Tata i e Yu a kuminsá ku un susuro di e Espíritu Santu pa hasi orashon.

E bèrdat revelá di e evangelio restourá a bin pa medio di e patronchi di buska den orashon i despues risibí i sigui e susuro di e Espíritu Santu. Konsiderá e ehèmpelnan aki: tradusí e Buki di Mormon, e restourashon di e saserdosio i su ordenansanan kuminsando ku boutismo i e organisashon di e Iglesia, djis pa nombra algun. Mi ta testifiká awe, ku revelashon di Señor na e Promé Presidensia i e Quorum di Diesdos, ta bin di akuerdo ku e mesun patronchi. Esaki ta e mesun patronchi sagrado ku ta pèrmití revelashon personal.

Nos ta duna honor na tur esnan ku a sigui e Espíritu Santu pa risibí e evangelio restourá, kuminsando ku José Smith su propio famia. Ora José a konta su tata tokante e bishita di Moroni, su tata a risibí e testimonio pa su mes. Inmediatamente José a wòrdu relevá for di su responsabilidatnan den e kunuku i a wòrdu enkurashá pa siguié guia di e angel.

Laga nos komo mayor i lidernan, laga nos hasi meskos. Laga nos enkurashá nos yunan i otronan pa sigui e guia di e Espíritu Santu. Hasiendo esaki, laga nos sigui e ehèmpel di e Espíritu Santu nos mes, guiando pa medio di benignidat, mansedumbre, bondat pasenshi i amor sinsero.²⁰

E Espíritu Santo ta un medio pa Dios su obra, den famianan i hinter e Iglesia. Ku e komprondementu aki, mi mag di kompartí algun ehèmpel personal di e Espíritu Santu den mi propio bida i servisio di Iglesia? Mi ta ofresé nan komo un testigu personal ku e Espíritu Santu ta bendishoná nos tur.

Hopi aña pasa, Hermana Hales i ami a plania pa ta anfitrion di algun di mi kompañeronan di trabou na un sena spesial na mi kas. Na mi kaminda for di mi ofisina, mi ta tin e impreshon di para na kas di un viuda kual mi a siña. Ora mi a bati na e hermana aki su porta e la bisa, “Mi tabata hasiendo orashon pa bo bin.” For di unda e impreshon ei a bin? E Espíritu Santu.

Un bia despues di un enfermedat serio, mi a presidí na un konferensha di estaka. Pa konserva mi energia, mi a plania pa sali for di e kapia inmediatamente despues di e seshon di lidernan di saserdosio. Sin embargo, despues di e invokashon, e Spiritu Santu s bisa, “Unda bo ta bai? Mi tabata inspirá pa duna man na tur hende miéntras nan tabata sali for di e sala. Ora un elder hóben a bin dilanti, mi a wòrdu inspirá pa dun’é un mensahe spesial. E tabata wak abou i mi a warda su wowonan lanta i topa di mi nan, i mi por a bisa, “Hasi orashon na Tata Selestial, skucha e Espíritu Santu, sigui e inspirashon ku bo ta risibí, i tur kos lo bai bon den bo bida.” Despues e presidente di estaka a bisami ku e hóben ei a regresá trempan promé ku su mishon a kaba. E presidente di estaka basá riba un impreshon kla, a primintí e tata di e hóben ku si e trese e yu na e reunion di saserdosio, “Elder Hales lo papia ku n’e.” Dikon m’a stòp pa duna tur hende man? Kiko tabata e fuente di mi konseho? Ta simpel e Espíritu Santu.

Na komienso di 2005 mi a wòrdu guia pa prepará e mensahe di konferensha general tokante parehanan misional. Despues di e konferensha, un hermano a konta: “Miéntras nos tabata skucha konferensia … inmediatamente e Espíritu di Señor a toka mi alma. … No tabata tin ningun eror den e mensahe pa mi i pa mi dushi. Nos ta tin ku sirbi un mishon, i e tempu tabata awor. Ora mi a wak mi kasa, mi a realisá ku e tambe a risibí e mesun impreshon di e Espíritu.”²¹ Kiko a trese e kontesta fuerte i simultáneo aki? E Espíritu Santu.

Na mi propio posteridat i na tur esnan ku ta den zonido di mi bos, mi ta ofresé mi testimonio di e revelashon personal i fuente konstante di guia diario, atvertensia, enkurashamentu, forsa, limpiesa Spiritual, konsuelo, i pas ku a bin na nos famia pa medio di e Espíritu Santu. Pa medio di e Espíritu Santu, nos ta eksperensha “e multitut di Cristu Su piedat”²²i milagernan ku no ta kaba. ²³

Mi ta duna mi testimonio espesial ku e Salbador ta bibu. Mi ta ekspresá mi amor i gratitut na Tata Selestial pa e don di e Espíritu Santu, pa medio di kual E ta revelá Su boluntat i sostené nos den nos bida. Den e nòmber di JesuCristu, amèn.