2010–2019
Ngehn Sarawio
April 2016


Ngehn Sarawio

I kasalehda ahi limpoak oh kaping kalahngan ong Sahm Nanleng pwehki kisakis en Ngehn Sarawi, me kin kasalehda Kupwure oh utungkitailda.

Riei ohl oh lih oko, I wia ahi kosoi rahn wet ni ei wia emen soun papah en Kauno oh pil emen pahpa-pahpa kahlap. Ong kumwail oh kadaudokei kempoake kan, I padahk oh wia kadehdepen kisakis kesempwal en Ngehn Sarawio.

I tepkihda ahi pohnese Marain en Krais, me kin kohieng ohl [oh lih] koaros me patohdo nin sampah.1 Kitail koaruhsie kin nsenamwahuki marain sarawi wet. E kin kamarainih mehkoaros oh lella wasa koaros,2 oh kin mweidehng kitail en kasawiada me pwung sang me sapwung.3

Ahpw Ngehn Sarawio weksang Marain en Krais. E wia kesilimen en towe en Koht Sahm, Koht Nah, oh Koht Ngehn Sarawi,, ngehn ehu me kolokol pwukoah sarawi kan, oh ahneki kahrepe ehute ni eh patehng Sahmo oh Nahio.4

Ni atail wia tohn Mwomwohdiso wet, kitail kak pehm me Ngehn Sarawio kin ieiang kitail ansou koaros. Pwehki kapwurpwurdohn prihstuhd en Koht, kitail kin kaduhdudi ni atail kin pepdais pwehn widensang dipatailkan oh katengtengdi en towehla Mwomwohdiso wet. Nan tiahk sarawi wet, kitail kin ale Ngehn Sarawio sang ni pwildien pehkan.5 Kahrehda, kitail kak ale oh wiewia iengen Ngehn Sarawio ni atail tamataman Sounkomouro ansou koaros, kolokol Sapwellime kosonned akan, kelkeluhkihla dipatail kan, oh ni warehng alahle kamadipw sarawi ni Rahn Sarawi.

Ngehn Sarawio kin ketkiheng kitail kaudial pwehn sewesei kitail en kosonehdi iren mour kesempwal akan me pid atail sukuhl, misin kan, doadoahk kan, pwopwoud, serihkan, wasa kitail pahn patehng atail peneinei kan kousonie, oh soahng teikan. Nan mepwukat, Sahm Nanleng kin ketin kasik kitail en doadoahngki atail saledek en pilipil, medewe mwahu mepwukat nan atail lamalam nin duwen padahk en rongamwahuo oh kapakapkihong Ih dahme kitail pilada.

Pein atail kaudiahl me kesempwal, ahpw e wia ehute kisehn doadoahk en Ngehn Sarawio. Iren pwuhk sarawi kan kadehde, Ngehn Sarawi kin pil kadehdeki Sounkomouro.6 E kin padahkiheng kitail mwekid kameleileikan en wehio7 oh kahrehiong kitail koapworopwor laud.8 E kin ketin kahluwai [kitail] en wiewia mwahu … [oh] en kadeik ni pwung.9 E kin ketkiheng ohl [oh lih] koaros … kisakis en [ngehno] … pwe koaros en paiekihda.10 E kin ketkiheng [kitail] marain11 oh audehki [atail] madmadau mehkoaros.12 Pwehki Ngehn Sarawio, kitail kak mwakelekelada13 oh ale mahkpen [dipatailkan].14 Ih me ketin wia “Sounsawaso” me Sounkomouro ketin inoukihong tohnpadahngko.15

I katamanehng kitail koaros me Ngehn Sarawio sohte kin kakaun kitail. Ekei kitail kin sapwungala peki en Ngehn Sarawio kaweid ong kosondi tikitik koaros nan atail mour. Met kin katikala Sapwellime pwukoaho. Ngehn Sarawio kin wauneki saledek en pilipil. E kin kosoi meleilei dohng atail madmadau oh mohngiong kan me pid ire kesempwal akan.16

Ekin wekpeseng atail pepehm kemwekid en Ngehn Sarawio. Sapwellime kemwekid kan kin kak wekpeseng nin duwen ahn emen emen kitail anahn oh mour.

Ni imwin rahn akan, kitail inoukihda me soukohp kelehpw me pahn ale kaudiahl me pid Mwomwohdiso unsek sang Ngehn Sarawio. Ekei manokehla met, ni ansou me Aaron oh Miriam song en padahkiheng Moses en dukieng ira. Ahpw Kauno ketin padahkiheng irail oh kitail:

“Ma mie soukohp men rehmwail, Ngehi Kauno pahn kasalehiong irail pein Ngehi. …

“Eri, I kin mahseniong sang ni silangi.”17

Ekei ansou sehdan kin soang kitailki lamalam likamw kei pwe kitail en wiahki me e kohsang Ngehn Sarawio. I kadehde me pwoson ni peikiong kosonned akan oh kolokol atail inou kan pahn pere kitail sang me pahn piti kitail di. Pwehki Ngehn Sarawio, kitail pahn kak kasawiada soukohp likamw kan me kin padahngki kosonned kan en aramas akan.18

Ni atail kin ale Ngehn Sarawio ong pein kitail, kitail anahne tamataman me kitail sohte kak ale en mehteikan kaudial. I ese mwahnakapw men me ndahiong emen peinkapw, “I ouramanda me kohme pahn wia ahi pwoud.’ Peinkapwo medewe koasoaio oh sapeng, “Ansou me I ale ouraman ohte, I pahn kohdo oh kosoiwei.”

Kitail koaros kak ale kasongsong en mweidehng nsenatail en powehdi kaweid sang Ngehn Sarawio. Soukohp Joseph Smith peki rehn Sahm Nanleng en mweidehng ih en kiheng keieun teh 116 en Pwuken Mormon ong Martin Harris. Joseph medewe me e mwahu. Ahpw Ngehn Sarawio sohte kiong ih pepehm me e pwung. Ni imwio Joseph kihla doropwehko. Martin Harris kasalongehla doropwehko. Erein ansou ieu, Kauno ketkihsang en Soukohpo kisakis en kawehweh, oh e wehwehkihla ire kamedek ahpw kesempwal ehu me wekidala mwomwen ah doadoahk kohkohlahte.

Ngehn Sarawio me wia pahson en Kapwurpwurdohu. Me pid en pwutak pwulopwulo wadekada Seims 1:5, Soukohp Joseph kosoia, “Sohte ehu irehn pwuhk sarawi manaman ni eh sair mohngiong en aramas duwehte ire wet eh sair ahio.19 Manaman me Joseph Smith kosoiao patohsang Ngehn Sarawio. Ihmekahrehda, Joseph patohla nan pwungen tuhkeko limwahn imweho oh kelepwidi pwehn peki rehn Koht. Sansal Keieuo me wiawi mwuri wia mehkot kesempwal oh kapwuriamwei. Ahpw ahl me elehda Sahmo oh Nahio en sansalehng aramas patohsang ni kemwekid en Ngehn Sarawio en kapakap.

Ire mehlel kan en rongamwahu kapwurpwurdohu kasansalada sang roporop ni kapakap, oh alahle oh ideidawehn kemwekid kan en Ngehn Sarawio. Medewe karasepe pwukat: kawehwe Pwuken Mormon, kapwurpwurdohn prihstuhd oh tiahk sarawi kan—tepda sang pepdais, oh kokoudahn Mwomwohdisou, pwehn pahngada ekei te. I kadehde me rahn wet, kaudial sang Kauno ong Presidensi Keieu oh Wahnparonko kin patohdo ni soangen mwoahmw sarawi ohte.

Se wia aht kaping ong koaros me idawehn Ngehn Sarawio pwehn ren ale rongamwahu kapwurpwurdohu, tepda rehn en Joseph Smith peneinei kan. Ni mwahnakapw Joseph ah ndahieng ah pahpao duwen ahn Moroni pwaralao reho, ah pahpao pil pein alehdi kamehlelpen mwekido. Mwurinte mwo, Joseph kommoldihsang ah doadoahk en nan mwetuwelo ko oh alehdi kangoang en idawehn ahn tonlengo kaweid.

Pahpa nohno oh kaun kan anahne wia duwehte mwo. Kitail kangoange neitail serihkan oh mehteikan en kin idawehn kaweid en Ngehn Sarawio. Ni atail wiewia mwo, kitail anahne idawehn karasaras en Ngehn Sarawio me kin kaweid ni meleilei, karakarahk, kadek, kanengamah oh limpoak mehlel.20

Ngehn Sarawio me kin wia piris ong doadoahk en Koht nan peneinei oh nan Mwomwohdiso. Sang ni wehwepene wet, I men ehukihda ekei mwekid kan en Ngehn Sarawi nan pein ahi mour oh ahi papah nan Mwomwohdiso. I ehukida mepwukat ni ahi kadehde me Ngehn Sarawio kin kapaida kitail koaros.

Sounpar kei samwalahro, Sister Hales oh ngehi wia ehu mwengehn soutik ong iengei tohn doadoahk kan ni imwato. Ni ahi kohkohla ni ihmwo, mehkot sairkin ie ien uhdi ni imwen liohdi men me I kin kaskuhli. Ni ahi letelet ni en liho ah wenihmwo, liho nda, “I wie kapakapki ken kohdo.” Ia wasa me mehkoto kohsang ie? Ngehn Sarawi.

Ehu pako, mwurin ehu soumwahu doar, I kaunda ehu stake conference. Pwehn koledi ahi kehl, I pilahnehda ien mwesel mwurinte tiepene en kaunen prihstuhdo. Ahpw mwurin kapakap en ritingedio, mehkot sair ie ien itik pehrail koaros ni arail pahn pidohisang nan pereho. Ni en emen elder pwulopwul aluhdo, mehkot sair ie ien kieng ih padahk tohrohr wet: “Kapakap ong Sahm Nanleng, karonge Ngehn Sarawio, idawehn kemwekid kan me ke kin ale, oh mehkoaros pahn soanamwahu nan ahmw mour.” Mwuri stake presideno ahpw ndahieng ie mwomwen en pwutako ah apwtehn pwuredohsang ah misino. Nin duwen dahme wiawi, stake presideno inoukiongehr en pwutako ah pahpa me ma ohlo wahdo nah pwutako en iang tiepene en prihstuhdo, “Elder Hales pahn kosoieng pwutako,” Dahme kahrehda I uhdi pwehn itik pehrail koaros? Dahme kaweidi ieho? Ngehn Sarawi.

Ni tepin 2005 mehkoat kaweid ie ien padahngki duwen pwopwoud en misineri mahkan nan kapokon lap. Mwurin kapokono, emen ohlo kosoia: “Ni aht rongorong kapokono … Ngehn en Kauno mwadangete sair ahi mohngiongo. … Kapahreko sohte sapwung. Se pahn wia aht misin, oh ansouo iei met. Ni ahi … kilenglang ahi pwoudo, I diarada me liho pil alehier soangen kemwekidohte sang Ngehno.”21 Dahme elehda kemwekid kehlailo eh wiawi nan ansou tehieu? Ngehn Sarawi.

Ong kadaudokei kan oh koaros me wie rongorong ngileikan, I kadehdehki pein ahi kaudial kan oh pwilipwildohn mepwukat rahn koaros kaweid, kangoang, kehlail, ngehn en kamwakel, kansenamwahu, oh meleilei me lelohngehr aht peneinei pwehki Ngehn Sarawio. Pwehki Ngehn Sarawio, se alehier sapwellime kalahngan tohto22 oh manaman kan me sohte kin uhdi.23

I wia ahi kadehde tohrohr me Sounkomouro ieias. I patohwenda ahi tungoal limpoak oh kalahngan ong Sahm Nanleng pwehki kisakis en Ngehn Sarawi, me E kin ketin kasalehkihdo Kupwure oh ketin kolokol atail mour. Ni mwaren Sises Krais, amen.