2010–2019
Paoa we i Olsem Hemia blong God
Epril 2016


Paoa we i Olsem Hemia blong God

Wanwan tempol hem i tabu haos blong God, mo insaed long hem bae wanwan long yumi i lanem mo kam blong save ol paoa we i olsem hemia blong God.

Sam manis bifo ded blong Profet Josef Smith, hem i bin mit wetem olgeta Twelef Aposol blong tokbaot bigfala nid we Jos i stap fesem long had taem ia. Hem i bin talem long olgeta, “Yumi nidim tempol bitim evri nara samting.” 1 I tru, tedei long ol had taem blong yumi, wanwan long yumi mo ol famli blong yumi i nidim tempol bitim evri nara samting.

Long wan tempol dedikesen we i jes pas, mi bin glad tumas blong save gat eksperiens ia. Mi lavem open haos ia, mi talem halo long plante visita we oli kam blong visitim tempol, ol selebresen blong kalja we i soemaot paoa mo glad blong ol yut; folem wetem ol gudfala sesen blong dedikesen. Spirit i bin swit. Plante man oli bin kasem blesing. Afta long nekis moning, waef blong mi mo mi i bin go insaed long pul blong baptaes blong mekem baptaes blong ol bubu blong mifala. Taem mi leftemap han blong mi blong mekem odinens ia, paoa blong spirit kolosap i daonem mi. Mi bin luksave bakegen se stret paoa blong tempol hem i stap long ol odinens.

Olsem we Lod i bin soemaot, fulnes blong Melkesedek Prishud i stap insaed long tempol mo ol odinens blong hem, “from insaed long haos ia, mi odenem man blong kasem ol ki blong tabu prishud, blong yufala i kasem ona mo glori.” 2 “Taswe, ol odinens ia, i gat paoa we i olsem hemia blong God, i kamaot”3 Promes ia hem i blong yu wetem famli blong yu..

Diuti blong yumi hem i blong “akseptem” wanem we Papa i stap givim. 4 “From hem we i akseptem Papa blong mi, i akseptem kingdom blong Papa blong mi, taswe evri samting we Papa blong mi i gat, bambae God Papa i givim long hem, iven paoa: 5 paoa blong kasem evri samting we hem i save givim mo bae i givim—naoia mo blong taem we i no save finis;6 paoa blong kam olsem ol pikinini boe mo pikinini gel blong God7 blong save ol “paoa blong heven,”8 paoa blong toktok long nem blong Hem, 9 mo blong kasem paoa blong Spirit blong [Hem].”10Ol paoa ia i save kam long wanwan long yumi tru long ol odinens mo kavenan blong tempol.

Nifae i bin luk taem blong yumi naoia long bigfala visen blong hem: “Mo i bin happen se mi Nifae, mi bin luk paoablong Smol Sipsip blong God, we i bin kamdaon long ol sent blong Jos blong Smol Sipsip, mo long ol kavenan pipol blong Lod, we i bin seraot olbaot long ful fes blong wol, mo oli blokem olgeta wetem stret fasin mo paoa blong God long bigfala glori.”11

Mi bin kasem wan janis blong stap long wan tempol open haos wetem Presiden Rasel M. Nelson mo famli blong hem taem hem i tekem olgeta i kam tugeta raonem olta blong sil mo eksplenem long olgeta se evri samting we yumi mekem insaed long Jos—evri miting, aktiviti, lesen mo seves—hem i blong rere long wanwan long yumi blong kam long tempol mo nildaon long olta blong kasem ol blesing we Papa i promesem yumi blong taem we i no save finis.12

Taem yumi filim ol blesing blong tempol insaed long ol laef blong yumi, tingting blong yumi bae i tanem i go long ol famli blong yumi, tugeta olgeta we i stap laef yet mo olgeta we i ded finis.

I no long taem i pas, mi bin witnesem tri jeneresen blong wan famli i tekpat tugeta long baptaes blong ol bubu blong olgeta. Iven bubu woman tu i tek pat—nomata we hem i bin fraet blong go andanit long wota. Taem hem i kamaot long wota mo haggem hasban blong hem, wota bong ae i ron wetem glad. Afta bubu man mo papa ia i baptaesem ol narafala wan mo plante apu pikinini. ?Wanem bigfala glad moa wan famli i save eksperiensem tugeta? Wanwan tempol i gat wan taem we oli givim long ol famli blong save kam mekem prokram blong mekem baptaes.

I no long taem bifo ded blong hem, Presiden Josef F. Smit i bin kasem wan visen long fasin blong pemaot sin blong olgeta we oli ded finis. Hem i bin tijim se olgeta we oli stap long spirit wol oli dipen bigwan long odinens we yumi stap mekem long bihaf blong olgeta. Skripja i talem, “Ol dedman we oli sakem sin bae Lod i pemaot olgeta, tru long fasin blong obei long ol odinens blong haos blong God.” 13Yumi mekem ol odinens ia long bihaf blong olgeta be olgeta bae i kasem jajmen from wanwan kavenan we i kam wetem ol odinens ia. I tru, yumi save filim olgeta we i stap long spirit wol be olgeta i save evri samting we yumi mekem blong olgeta insaed long tempol.

?Wanem nao hem i responsabiliti blong wanwan long yumi blong mekem wok ia, tugeta olsem olgeta we blong kasem odinens ia mo olgeta we blong mekem odinens ia? Profet Josef Smit i bin tijim ol Sent long 1840 se “bae oli mas wok had plante, mo bae oli nidim plante samting—mo taem we wok [blong bildim tempol] i mas go hariap long stret mo gud fasin, hem i impoten blong ol Sent oli tingbaot, … from wanem ol samting ia oli impoten, mo afta, …mekem ol stret joes we i impoten mo putum long aksen; mo rere long olgetawan wetem fasin blong no save fraet, blong mekem evri samting we oli save mekem, mo filim intres blong mekem wok ia olsem we evri wok ia i dipen long yuwan nomo.” 14

Insaed long buk blong Revelesen yumi ridim:

“Hemia ol man ia we oli kasem bigfala trabol, we ol man oli spolem olgeta tumas, be naoia oli winim ol trabol ia finis. Oli wasem ol klos blong olgeta finis long blad blong Smol Sipsip ia we i ded blong mekem ol klos ia oli waet.

Mo naoia oli stap stanap long fes blong God we hem i stap sidaon long bigfala jea blong hem, mo long dei, mo long naet, oli stap mekem wosip long hem insaed long haos blong hem:

God hem i King blong olgeta, mo bambae hem i stap wetem olgeta oltaem blong lukaot long olgeta.”15

?Yu save tingbaot long maen blong yu olgeta we oli stap givim seves insaed long tempol tedei?

I gat ova long 120,000 wokman blong tempol long 150 tempol we i open raon long wol. Be i gat janis yet blong plante moa oli save tekpat long gudfala wok ia. Taem Presiden Goden B. Hinkli i anaonsem tingting blong gat plante smol tempol raon long wol, hem i bin tijim se “ol wokman blong tempol bae hem i ol man ples nomo we bae oli save mekem wok ia long ol wod mo stek blong olgeta.” 16Folem fasin we i stap, oli stap givim koling long ol wokman blong tempol blong tu o tri yia nomo, mo i gat janis blong oli save seftem i go moa. I no minim se taem oli givim koling ia long yu bae yu save stap oltaem. Plante wok man blong tempol we oli givim bin seves long taem oli tekem lav ia we oli gat from tempol i go wetem olgeta taem we oli rilis mo givim janis long narafala man blong wok mo givim seves.

Kolosap 100 yia nao i pas, Aposol Jon A. Widso i bin tijim: yumi nidim plante moa wokman blong finisim gudfala wok ia….Yumi nidim plante man moa blong gat wan testemoni long saed blong tempol wok, we oli kam long ol defdefren ej….Naoia hem i taem blong mekem evriwan long ol defdefren ej i kam aktiv blong mekem ol seves ia. …Tempol wok i… save helpem bigwan olgeta we oli yang mo aktiv, i semak long olgeta we oli olfala mo oli bin livim biaen plante hadtaem long laef. Wan yangfala man i nid blong stap insaed long tempol, bitim papa o bubuman blong hem, we oli bin gat plante eksperiens finis long laef, mo wan yang gel we i jes stap gro i kam antap, i nidim spirit, paoa mo daereksen we bae i kam taem hem i stap tek pat long ol tempol odinens.” 17

Long plante tempol, ol tempol presiden oli stap welkamem ol niufala misinari we oli bin kasem endaomen, ol yang man mo woman, blong givim seves blong mekem ol odinens blong wan sot taem bifo oli go long MTS. Ol yangfala ia oli no kasem blesing blong givim seves nomo, be “oli leftemap naesfala spirit ia long evriwan we oli stap givim seves long tempol.”18

Mi bin askem plante yang man mo woman we oli bin stap givim seves bifo mo afta long misen blong olgeta blong serem ol filing blong olgeta. Oli yusum ol toktok olsem blong tokbaot eksperiens blong olgeta insaed long tempol:

Taem mi givim seves insaed long tempol

  • …Mi kasem wan filing se “mi stap kolosap moa long Papa blong mi mo Sevya”;

  • Mi filim “stret pis mo hapines”;

  • … Mi gat wan filing se “mi kam hom”;

  • Mi kasem “tabu fasin, paoa, mo strong”;

  • Mi filim olsem wanem ol tabu kavenan blong mi oli impoten”;

  • “Tempol hem i kam pat blong mi”;

  • “Olgeta we yumi stap mekem seves blong olgeta oli stap kolosap truaot ol odinens”;

  • “I givim mi paoa blong winim ol tes”; mo

  • “Tempol i jenisim laef blong mi foreva.” 19

Seves insaed long tempol hem i givim plante blesing mo hem i wan paoaful eksperiens blong evriwan, yangfala mo olfala. I gat tu, sam mared kapol we oli jes mared oli stap givim seves tugeta. Presiden Nelson i bin tijim se: “Seves insaed long tempol… i wan aktiviti we i save leftemap famli.”20 Olsem ol wokman blong tempol, antap long hemia blong mekem ol odinens blong ol bubu blong yu, yu save kondaktemol odinens ia blong olgeta tu.

Olsem we Presiden Wilfod Wudraf i bin talem:

“?Wanem bigfala koling moa wan man [o woman] i gat long wol ia bitim hemia we blong holem long han blong hem paoa mo atoriti blong go fored mo kondaktem ol odinens blong sevem man?

“…Yu kam olsem wan tul long han blong God blong sevem sol ia. I no gat wan samting moa we oli bin givim long ol pikinini blong man we i semak olsem hemia.”21

Hem i go hed:

“Ol swit kwaet toktok blong Tabu Spirit bae i kam long [yu] mo ol rij samting blong heven, koneksen wetem ol enjel bae i kam sloslo.”22

Hemia i moa bitim wanem yu o mi i save sakrifaesem [long] ol yia we yumi spendem long ples ia long bodi blong mit mo bun.”23

Presiden Tomas S. Monson i jes stap rimaenem yumi se “ol blesing blong tempol i moa gud bitim eni narafala.” 24 “I nogat wan sakrifaes we i bigwan tumas.”25

Kam long tempol. Kam oltaem. Kam wetem mo from famli blong yu. Kam mo helpem ol narawan blong kam tu.

“Ol man ya we oli werem waet klos ia, yu save olgeta?” Ol brata mo sista blong mi, yu nao yu olgeta ia—we yu bin kasem ol tempol odinens, we yu bin sakrifaes long kipim ol kavenan blong yu, yu we yu stap helpem ol famli blong yu blong faenem ol blesing blong tempol seves mo stap helpem ol narawan folem rod ia. Tangkyu from seves blong yu. Mi testifae se wanwan tempol hem i tabu haos blong Hem, mo insaed long hem bae wanwan long yumi i lanem ol paoa blong fasin blong God, long nem blong Jisas Kraes, amen.