Kajoor eo an Anij

Jejjo̧ allōn̄ m̧okta jen mej eo an Rikanaan Josep Smith, eaar kweilo̧k ippān Jon̄oulruo ro n̄an kōnono kōn aikuj eo eļap tata an Kabun̄ in eaar jelm̧ae ilo tōre jab in ekanooj in pen. Eaar ba n̄an er, “Jej aikuj tampeļ eļap ļo̧k jen jabdewōt men.”¹ Ilo m̧ool, rainin ej tōreen kajjieon̄, kajjojo iaad im baam̧le ko ad jeaikuj tampeļ eļap ļo̧k jen jabdewōt men.

Ilo juon aje in tampeļ jem̧aanļo̧k, eaar ļo̧kjenaō kōn aolepān iien eo. Ij iakwe iien kōppeļo̧k eo, iak-iakwe rilotok ro me raar itok n̄an alooje tampeļ eo; m̧akūtkūt in kōm̧anit eo kōn ikkure ko rekaitoktok lim̧o jen jodikdik ro; ālkin eaar kōm̧m̧an m̧wen̄an in aje eo. Jetōb eo eaar em̧m̧an. Elōn̄ armej raar jeraam̧m̧an. Innām jibbon̄ eo juon, kōrā eo ippa im n̄a kar deļo̧n̄e jikin peptaij eo im bōk kūņam̧ ilo peptaij ko kōn jet iaan rūtto ro am̧ make. Ke ij kajutak peiū im jino kain̄i eo, iaar en̄jake kajoor eo an Jetōb. Iaar bar kile ke kajoor eo em̧ool an tampeļ ej waļo̧k ilo kain̄i ko.

Ilo an Irooj kar kwaļo̧k, bwe tarlep in Priesthood eo an Melkisedek ej waļo̧k ilo tampeļ im kain̄i ko an, “ki ko an priesthood eo ekwōjarjar ej kapit, bwe kom̧in maron̄ bōk utiej im aiboojoj.”² “Kōn menin, kain̄i ko ie, kajoor in āinwōt anij ej waļo̧k.”³ Kallim̧ur in ej n̄an kwe im baam̧le eo am̧.

Jerbal eo ad ej n̄an “bōk” men eo Jemed ej letok.⁴ “Bwe n̄an eo ej bōk naaj leļo̧k ekanooj ļapļo̧k, em̧ool kajoor” :⁵ kajoor n̄an bōk aolep men ko Jema naaj litok n̄an kōj—kiiō im indeeo;⁶ kajoor n̄an erom m̧aan ro im jiron̄ ro nejin Anij,⁷ n̄an jeļā “kajoor ko an lan̄,”⁸ n̄an ekōnono ilo Etan,⁹im n̄an bōk kajoor in Jetōb eo [An].”¹⁰ Kajoor kein rej make waļo̧k tok n̄an kōj kajjojo kōn kain̄i ko im bujen ko ilo tampeļ.

Nipai eaar lo tore in ad ilo juon vison eļap: “Im ālkin men kein, n̄a, Nipai, iaar lo kajoor in Lam an Anij, bwe ekar bun̄ ioon armej in bujen ro an Irooj, ro raar ejjeplo̧klōk ioon aolepān mejān laļ; im raar ro rekwojarjar jān kabun̄ eo an Lam eo, im ioon ko an Irooj, pojak kōn jim̧we im kōn kajoor in Anij ilo aiboojoj eļap.”¹¹

Eaar wōr aō iien em̧m̧an jem̧aanļo̧k n̄an pād ilo juon kōppeļļo̧k an tampeļ ippān Būreejtōn Russell M. Nelson im baam̧le eo an ilo an kar kobaik er ipeļaakin lokatok in liāp eo im kar ba n̄an er bwe aolep men jej kōm̧m̧ani ilo Kabun̄ in—kajjojo kweilo̧k, m̧akūtkūt, katak, im jerbal in jipan̄—ej n̄an kepooj kajjojo iaad n̄an itok n̄an tampeļ im bukwelōlō ilo lokatok eo n̄an bōk aolepān kallim̧ur in kōjeram̧m̧an ko an Jemed kōn mour indeeo.¹²

Ilo ad en̄jake kōjeram̧m̧an ko an tampeļ ilo mour ko ad make, būruwōd ej oktak ļo̧k n̄an baam̧le ko ad, jim̧or ro remour im remej.

Jem̧aanļok, Iaar kam̧ool jilu epepen in baam̧le ko rej bōk kūņaer ilo peptaij ko ippān doon kōn rūtto ro aer make. Aaet bubu eo eaar bōk kūņaan—men̄e ekar wōr jidik mijak n̄an katuļo̧k e ium̧win dān. Ke ej wanlōn̄tak jen dān eo eaar bokwoj ļeo ippān, eaar dānin kōmjaļlaaļ kōn lan̄lōn̄. Eo jim̧m̧an im jemen raar peptaiji doo im elōn̄ iaan ro jibūn. Ta lan̄lōn̄ eo eļap baam̧le in eaar en̄jake ippān doon? Kajjojo tampeļ ewōr juon iien aorōk kōtļo̧k bwe kom̧in āinwōt juon baam̧ļe n̄an jikejuuļ iien peptaij.

M̧okta jen mej eo an, Būreejtōn Joseph F. Smith eaar bōk vison in kōn lo̧mo̧o̧ren ro remej. Eaar kwaļo̧k bwe ro rej pād ilo laļ eo an jetōb rej lukkuun pedped ioon kain̄i ko me jej būki ilo etaer. Jeje ko rej ba, “Ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij.”¹³ Jej būki kain̄i ko ilo etaer, ak rej kōm̧m̧an im rej eddoik kajjojo bujen ko rej ekeijeļo̧k ippān kajjojo kain̄i. Ilo mool, ran̄ōl nuknuk eo edik n̄an kōj im m̧ōttan ko rej dedeļo̧k wōt kōn er ilo tampeļ eo.

Innām ta jerbal eo ad make n̄an bōk kūņaad ilo jerbal in, jim̧or patron im rijerbal? Rikanaan Josep Smith eaar kwaļo̧k n̄an Ro Rekwojarjar ilo 1840 eo bwe “jibadbad eo eaikuj kōm̧m̧an, im kōttōpar eo enaaj menin aikuj—im ilo jerbal eo [n̄an kalōk juon tampeļ] eaikuj in m̧ōkaj ilo jim̧we, n̄an ļōn̄aj Ro Rekwojarjar kōn eddo eo eaorōk eo an men kein, ilo kōļmenļo̧kjeņ ko aer, … innām bōk bun̄ten nee ko rekkar n̄an aer jerbale; im kapen er make kōn peran, etale n̄an kōm̧m̧ane aolep men remaron̄e, im en̄jake er make ilo itok limo āinwōt an rijerbal ro pedped ioer make.”¹⁴

Ilo Bok in Revelesōn jej riit:

“Wōn rein rej waļo̧k ilo jarlepju in ro rej ekkōņak liboror mouj? im er rekar itok jān ia?

“… Rein ro raar itok jān en̄taan eļap, im raar kwaļe im kamouj nuknuk ko aer ilo bōtōktōkin Lamb eo.

“Kōn menin rej im̧aan tūroon an Anij, im rej karijer n̄an E raan im bon̄ ilo tampeļ eo An; im Eo ej jijet ioon tūroon Enaaj erlo̧ke m̧ōn kōppād eo An ioer.”¹⁵

Kwojjjab ke loe ilo ļōmņak eo am̧ make ro rej jerbal ilo tampeļ rainin?

Ewōr elōn̄ ļo̧k jen 120,000 rijerbal in kain̄i ro ilo 150 tampeļ ko rej jerbal ipeļaakin laļin. Aaet elōn̄ ļo̧k iien em̧m̧an n̄an idajon̄jon̄ e en̄jake in. Ke Būreejtōn Gordon B. Hinckley eaar kwaļo̧k kōttōpar eo an elōn̄ tampeļ ko reddik ipeļaakin laļin, eaar kwaļo̧k bwe “aolep rijerbal in kain̄i ro naaj ba kajien armej ro me remaron̄ jerbal ilo ward ko aer im stake ko.”¹⁶ Ekkā, an rijerbal ro kūr n̄an jerbal kōn ruo ak jilu iiō ko, kōn dettan in. Ejjab alikar bwe ilo tōre eo kwoj kūr, kwonaaj pād wōt toon wōt am̧ maron̄. Elōn̄ rijerbal in tampeļ ro eto aer jerbal raar kwaļo̧k iakwe eo aer kōn tampeļ ippāer ke rej jijet ļo̧k im kōtļo̧k an ro jet, rijerbal ro rekāāl n̄an jerbal.

Enan̄in 100 iiō ko rem̧ootļo̧k, Rijilōk John A. Widtsoe eaar kwaļo̧k: “Jej aikuj elōn̄ ļo̧k rijerbal ro n̄an kadedeļo̧k jerbal [in] em̧m̧an. … Jej aikuj elōn̄ ļo̧k rioktak ro n̄an tampeļ, aolep iiō. … Tōre in em̧ōj an itok, … ilo em̧akūt in an tampeļ kāāl, n̄an bōk tok jerbal in jipan̄ eo eniknik n̄an aolep armej, jekdo̧o̧n iiō. … Jerbal in tampeļ ej … eļap tokjeņ n̄an ro reddik im reniknik, barāinwōt jabdewōt tōre, ro raar ilo̧k jen er elōn̄ edodo ko an mour. Ļaddik eo eaikuj wōr jikier ilo tampeļ eo aaet eļap jen jim̧m̧a eo im baba eo, ro raar idajon̄jon̄e mour; im leddik ro rej kab itok n̄an mour in, aikuj jetōb, im̧we im tōl n̄an itok n̄an bōk kūņaad ilo kain̄i ko an tampeļ.”¹⁷

Ilo elōn̄ tampeļ ko, tampeļ būreejtōn ro rej karuwaineneik mijinede ro rekāāl ej kab m̧ōj aer kūr, ļaddik ro im jiron̄ ro, n̄an jerbal ilo juon iien ekadu āinwōt rijerbal in kain̄i ro m̧okta jen aer etal n̄an MTC. . Rūm̧m̧an ded ren rejjab jeram̧m̧an wōt n̄an jerbal, ak “rej kōļapļo̧k aiboojoj eo im jetōb n̄an aolep ro rej jerbal ilo tampeļ.”¹⁸

Iaar kajjitōk ippān ļaddik ro im jiron̄ ro ro me raar jerbal m̧okta ļo̧k im ālkin mijen ko aer n̄an kwaļo̧k en̄jake ko aer. Raar kōjerbal naan ko āinwōt in ej kōmeļeļe ilaļ kōn en̄jake eo aer kōn tampeļ:

Ke iaar jerbal ilo tampeļ

• … Ij en̄jake “juon epaak ļo̧k n̄an Jema im Rilo̧mo̧o̧r”;

• Ij “lukkuun en̄jake aenōm̧m̧an im m̧ōņōņō”;

• Ewōr juon aō en̄jake kōn “kapijuknen”;

• Ij bōk “kwojarjar, kajoor ļo̧k, im pen ļo̧k”;

• Ij en̄jake “aorōkin bujen ko aō rekwojarjar”;

• “Tampeļ eo eaar erom̧ m̧ōttan mour e aō”;

• Ro me kōm ear jerbal kake er rej epaake doon ilo kain̄i ko”;

• “Ej letok n̄an eō kajoor n̄an anjo̧ ioon kapo ko”; im

• “Tampeļ eaar ukōt mour e aō.”¹⁹

Jerbal ilo tampeļ ej juon kōjeram̧m̧an im en̄jake ekajoor ippān aolep armej. Aaet jet ripālele ro rej kab m̧are rej jerbal ippān doon. Būreejtōn Nelson eaar kwaļo̧k, “Jerbal ilo tampeļ …ej juon m̧akūtkūt eo eaiboojojoj n̄an juon baam̧le.”²⁰ Āinwōt rijerbal in kain̄i ro, ilo kakobaba n̄an būki kain̄i ko n̄an rūtto ro am̧ make, komaron̄ kōm̧m̧ani barāinwōt kain̄i ko n̄an er.

Būreejtōn Wilford Woodruff eaar ba:

“Ta kūr eo eļap jabdewōt em̧m̧aan [ak kōrā] emaron̄ bōke ioon mejen laļ in ijelo̧kin an jibwe pā ko rekajoor im mālim n̄an etal im tōl ilo kain̄i ko an lo̧mo̧o̧r? …

“… Kwoj erom̧ juon kein jerbal ilo pā ko pein Anij ilo lo̧mo̧o̧ren juon jetōb. Ejjeļo̧k juon men kar leļo̧k n̄an ro nejin armej me ejokwon wōt juon.”²¹

Eaar barāinwōt ba:

“Unoojdikdik eo em̧man an Jetōb Kwojarjar naaj lewaj n̄an [eok] im jeram̧m̧an ko an Lan̄, im kōnono an enjeļ raņ, naaj lewaj jen iien n̄an iien.”²²

“En̄in kom̧ aolep aorōk ak imaron̄ in en̄taan jidik [ilo] jejjo̧ iiō ilo ad pād ijin ilo mour wabanban.”²³

Būreejtōn Thomas S. Monson eaar kakeememej kōj bwe ”kōjeram̧m̧an ko an tampeļ ejjeļo̧k wōnāān.”²⁴ “Ejjeļo̧k wūjļepļo̧k en eļapļo̧k.”²⁵

Itok n̄an tampeļ. Itok emakijkij. Itok ippān im kōn baam̧le eo am̧. Itok, im jipan̄ ro jet itok.

“Ta kein rej waļo̧k ilo mouj?” Ro jeiū im jatū, kom, eo kom̧—kar bōk kain̄i ko an tampeļ, ro rej kōjparok bujen ko aer em̧ool kōn wūjļepļo̧k; kom̧ eo kom̧ij jipan̄ baam̧le ko ami lo kōjeram̧m̧an ko an jerbal in tampeļ im ro raar jipan̄ ro jet ilo iaļ in. Kom̧ em̧m̧ool kōn jerbal in jipan̄ eo ami. Ij kam̧ool bwe kajjojo tampeļ ej kwojarjar eo An, m̧weo ekwojarjar im bwe ijeņ kajjojo iaad maron̄ ekkatak im jeļā kajoor in āinwōt anij, ilo etan Jisōs Kraist, amen.