2010–2019
E Poder di Santidat
April 2016


E Poder di Santidat

Kada tèmpel ta Dios su santu i sagrado kas, i den dje kada un di nos por siña i konosé e podernan di santidat.

Djis un par di luna promé ku e morto di e Profeta Joseph Smith, el a reuní ku e Diesdos Apòstelnan pa papia tokante e gran nesesidatnan ku e Iglesia tabata enfrentá durante e temporada difísil ei. El a bisa nan, “Nos mester di e tèmpel mas ku kualke otro kos.”1 Sigur, awe den e temporada difísil aki, kada un di nos i nos famianan mester di e tèmpel mas ku kualke otro kos.

Durante un dedikashon di tèmpel resien, mi tabata enkantá ku henter e eksperensia. Mi a stima e kas habri, kumindando hopi di e bishitantenan kende a bini pa wak e tèmpel; e selebrashon kultural ku e energia i eksitashon di e hóbennan; siguí pa e seshonnan dedikatorio maravioso. E Spiritu tabata dushi. Hopi hende a wòrdu bendishoná. I despues e siguiente mainta, mi kasa i ami a drenta e pila di boutismo pa partisipá den boutismo pa algun di nos propio antepasadonan. Ora mi a lanta mi man pa kuminsá e ordenansa, mi tabata kasi vensí pa e poder di e Spiritu. Mi a realisá atrobe ku e poder berdadero di e tèmpel ta den e ordenansanan.

Manera Señor a revelá, e plenitut di e Saserdosio Melchizedek ta wòrdu haña den e tèmpel i su ordenansanan, “pasó eiden tin e yabinan di e santu saserdosio ordená, pa asina boso por risibí honor i gloria.”2 “P’esei, den e ordenansanan di dje, e poder di santidat ta wòrdu manifestá.”3 E promesa aki ta pa bo i bo famia.

Nos responsabilidat ta pa “risibí” loke nos Tata ta ofresé.4 “Pasó na esun ku ta risibié lo wòrdu duná mas abundantemente, asta poder”:5 poder pa risibí tur kos ku E por i lo duna nos—awor i pa semper;6 poder pa bira yunan hòmber i muhé di Dios,7 pa konosé e podernan di shelu,”8 pa papia den Su nòmber,9 i pa risibí e poder di [Su] Spiritu.”10 E podernan aki ta bira disponibel personalmente na kada un di nos dor di e ordenansanan i e kombenionan di e tèmpel.

Nefi a mira nos dia den su gran vishon. El a bisa ku el a mira ku e poder di e Lamchi di Dios a baha riba e santunan di e iglesia di e Lamchi, i riba e pueblo di kombenio di Señor, ku a wòrdu plamá riba henter e superfisie di tera; i nan tabata armá ku rektitut i ku e poder di Dios den gran gloria.11

Mi tabatin e privilegio resientemente pa ta den un kas habri di tèmpel ku Presidente Russell M. Nelson i su famia ora el a hala nan huntu rònt e altar di seyamentu i a splika na nan ku kada kos ku nos ta hasi den Iglesia—kada reunion, aktividat, i sirbishi—ta pa prepará kada un di nos pa bini na e tèmpel i bai na rudia na e altar pa risibí tur e Tata su bendishonnan primintí pa eternidat.12

Ora nos ta sinti e bendishonnan di e tèmpel den nos propio bidanan, nos kurasonnan ta bira na nos famianan, tur dos, bibu i morto.

Resientemente, mi a mira un famia di tres generashon partisipá den boutismo huntu pa nan antepasadonan. Asta e abuela a partisipá—aunke e tabatin un tiki miedu di bai bou awa e mes. Ora el a sali for di e awa i a brasa su kasa, e tabatin lágrimanan di goso. E abuelo i tata e ora a boutisá otro i hopi di nan nietonan. Ki goso mas grandi un famia por eksperensia huntu? Kada tèmpel tin un tempu di prioridat pa famia pa laga bo komo famia programá tempu den e boutisterio.

Djis promé ku su morto, Presidente Joseph F. Smith a risibí e vishon di e redenshon di e mortonan. El a siña ku esnan ku ta den e mundu di spiritu ta kompletamente dependiente di e ordenansanan ku nos ta risibí pa nan. E eskritura ta bisa ku e mortonan ku ta repentí lo wòrdu redimí pa e obedensia na e ordenansanan di e kas di Dios.13 Nos ta risibí e ordenansanan pa nan, pero nan ta hasi i wòrdu tene responsabel pa kada kombenio asosiá pa nan den e tèmpel.

Kiko e ora ta nos responsabilidat personal pa ta empleá den e obra aki, tur dos, komo patronnan i komo trahadónan? E Profeta Joseph Smith a siña e Santunan na 1840 ku hopi esfuerso mester wòrdu hasí, i e lo rekirí rekursonan—i pasó e obra [pa traha e tèmpel] mester wòrdu purá den rektitut, e ta bon pa e Santunan konsiderá e importansia di e kosnan aki, den nan mente, … i e ora tuma tal stapnan ku ta nesesario pa kumpli nan; i miéntras nan ta preparando nan mes ku kurashi nan mester resolvé pa hasi tur ku nan por, i sinti nan mes mesun interesá ku si henter e obra ta dependé riba nan so.14

Den e buki di Revelashon nos ta lesa:

“E hendenan bistí na blanku, ken nan ta? i di unda nan ta bini?

“...Esakinan ta esnan ku a pasa den e opreshon grandi. Nan a laba nan pañanan i a hasi nan blanku dor di purifiká nan ku sanger di e Lamchi.

“P’esei nan ta para dilanti di trono di Dios i ta sirbiÉ di dia i anochi den su tèmpel. Esun ku ta sintá riba e trono, lo biba serka nan i protehá nan.”15

Bo por imaginá bo esnan ku ta sirbi den e tèmpel awendia?

Tin mas ku 120,000 trahadónan di ordenansa den e 150 tèmpelnan operadó rònt mundu. I ainda tin oportunidat pa asta mas tin e eksperensia dushi aki. Ora Presidente Gordon B. Hinckley a anunsiá e konsepto di hopi tèmpelnan chikitu dor henter e mundu, el a siña ku tur e trahadónan di ordenansa lo ta hendenan lokal ku lo sirbi den otro kapasidatnan den nan bario i estakanan.16 Normalmente, trahadónan ta wòrdu yamá pa dos òf tres aña, ku e posibilidat di ekstendé mas ayá. E no ta e intenshon ku una bes bo a wòrdu yamá, bo lo keda mas largu ku bo por. Hopi trahadónan ku a sirbi pa tempu largu ta karga nan amor pa e tèmpel ku nan ora nan ta wòrdu laga bai i laga otro trahadónan nobo sirbi.

Kasi 100 aña pasa, Apòstel John A. Widtsoe a siñá: “Nos mester mas trahadónan pa kumpli [e] obra maravioso [aki]. … Nos mester mas kombersonan na obra di tèmpel, di tur edat. … E tempu a yega, …den e movementu nobo di tèmpel aki, pa trese den sirbishi aktivo tur e hendenan, di tur edat. … Obra di tèmpel ta … di mesun benefisio pa esunnan hóben i esunnan aktivo, ku e ta pa esunnan ansiano, ku a laga atras hopi di e karganan di bida. E hòmber hóben mester su lugá den e tèmpel asta mas ku su tata i su abuelo, kende ta stèdi pa un bida di eksperensia; i e mucha muhé hóben djis drentando bida, mester e spiritu, influensia, i direkshon ku ta bini for di partisipá den e ordenansanan di tèmpel.17

Den hopi tèmpelnan, presidentenan di tèmpel ta bon bini misioneronan nobo yamá i investí, hòmbernan i muhénan hóben, pa sirbi djis pa un korto tempu komo trahadónan di ordenansa promé ku nan ta bai MTC. E hendenan hóben aki no solamente ta bendishoná pa sirbi, pero nan ta mehorá e bunitesa i spiritu pa tur ku ta sirbi den e tèmpel.18

Mi a puntra un number di hòmbernan i muhénan hóben ku a sirbi komo trahadónan di ordenansa promé i despues di nan mishonnan pa kompartí nan sentimentunan. Nan a usa frasenan manera e siguientenan pa deskribí nan eksperensia den e tèmpel:

Ora mi ta sirbi den e tèmpel—

  • Mi ta sinti “un sentido di ta mas serka di mi Tata i mi Salbador”;

  • Mi ta sinti “pas i felisidat kompletu”;

  • Mi tin un sentimentu di “ta na kas”;

  • Mi ta risibí “santidat, poder, i forsa”;

  • Mi ta sinti “e importansia di mi sagrado kombenionan”;

  • “E tèmpel a bira un parti di mi”;

  • “Esnan kende nos ta sirbi ta serka durante e ordenansanan”;

  • “E ta duna mi forsa pa vense tentashonnan”; i

  • “E tèmpel a kambia mi bida pa semper.”19

Sirbiendo den e tèmpel ta un eksperensia riku i poderoso pa hendenan di tur edat. Asta algun parehanan nobo kasá ta sirbiendo huntu. Presidente Nelson a siña ku sirbishi den e tèmpel ta un aktividat sublime pa un famia.20 Komo trahadónan di ordenansa, aserka di risibí ordenansanan pa bo antepasadonan, bo tambe por ofisialisá den ordenansanan pa nan.

Manera Presidente Wilford Woodruff a bisa:

“Ki yamamentu mas grandi por kualke hòmber [òf muhé] tin riba e superfisie di tera ku tene den su mannan e poder i outoridat pa bai dilanti i atministrá den e ordenansanan di salbashon?

“… Bo ta bira un instrumento den e mannan di Dios den e salvashon di e alma ei. No tin nada duná na e muchanan di hòmber ku ta igual ku esei.”21

E tambe a bisa:

“E sususro dushi di e Spiritu Santu lo wòrdu duná na [bo] i e tesoronan di Shelu, e komunion di angelnan, lo wòrdu agregá di tempu pa tempu.”22

“Esaki ta bal tur loke ku abo i ami por sakrifiká [durante] e poko añanan ku nos tin pa ta aki den e karni.”23

Presidente Thomas S. Monson resientemente a kòrda nos ku “e bendishonnan di e tèmpel ta sin preis.”24 “Niun sakrifisio ta muchu grandi.”25

Bini na e tèmpel. Bini hopi bes. Bini ku i pa bo famia. Bini, i yuda otronan pa bini tambe.

“E hendenan bistí na blanku, ken nan ta?” Mi rumannan, boso ta nan—boso ku a risibí e ordenansanan di e tèmpel, ku a warda boso kombenionan asta dor di sakrifisio; boso ku ta yudando boso famia haña e bendishonnan di sirbishi di tèmpel i ku a yuda otronan riba e kaminda. Danki na boso sirbishi. Mi ta testifiká ku kada tèmpel ta Dios Su santu i sagrado kas, i den dje kada un di nos por siña i konosé e podernan di santidat, den e nòmber di JesuCristu, amèn.