2010–2019
Manaman en Me Sarawi
April 2016


Manaman en Me Sarawi

Ehu ehu tehnpas iei Sapwellimen Koht wasa me sarawi oh nan wasa kiset me iei wasa kitail pahn kak esehla oh wewehkihla duwen manaman en me sarawi kan.

Sounpwong kei mwohn kepilsalehdalahn Soukohp Joseph Smith, e tuong Wahnparon Ehk-Riemeno pwehn koasoaia duwen anahn keieu laud kan en Mwomwohdisou nan ansou apwalo. E ndahieng irail, “Kitail anahne tehnpas sarawio laudsang mehkoaros.”1 Mehlel, nan ansou apwal wet, emenemen kitail oh atail peneinei anahne tehnpas sarawio laudsang mehkoaros.

Ni ehu kapidelong en tehnpas sarawi me apwtehn wiawio, I dahkihla mwekido pwon. I linganiki kalangadahn ihmwo, koasoamw ong me kohdokan pwehn kilang tehnpaso; tiahk en kawahu lingan me me pwulepwul kan wia; kaimwsengkihla kasarawi en kapidelong kan me wiawi. Ngehno mih wasa koaros. Aramas tohto alehdi kapai. Oh mandahn rahno, ngehi oh ahi pwoud pidelong nan wasahn pepdais pwe sen pepdaiski aht pahpa/nohno me melahr akan. Ni ahi kauwada pehi pwehn tapiada tiahk sarawio, manaman en Ngehno kerenieng kipeiehdi pwon. I pwurehng diarada me manaman en tehnpas sarawi pato nan tiahk sarawi kan.

Ihme Kauno kasalehdahr, unseklahn Prihstuhd en Melkisedek kin dierek nan tehnpas sarawi oh nan tiahk sarawi kan, “pwe iet kihkan en prihstuhd sarawi me kasarawiher, pwe ken kak ale wahu oh popohl.”2 “Ihme kahrehda manaman me sarawi kin pato nan tiahk sarawi kan.”3 Inou wet ong komwi oh omwi peneinei.

Atail pwukoa iei en “ale” dahme samatail Koht kin ketkihda.4 “Pwe ong ih me alehier pahn kohieng me laudsang, mehlel manaman”:5 manaman en ale mehkoaros me E kak oh pahn ketkiheng kitail—met oh kohkohlahte;6 manaman en wiahla sapwellimen Koht pwutak oh serepein,7 pwehn ese “manaman en nanleng”8; manaman en kosoi ni Mware9 oh ale “manaman en [Sapwellime] Ngehno.”10 Manaman pwukat kin kodohng emen emen kitail sang ni tiahk sarawi kan oh inou kan en tehnpas sarawio.

Nephi kilangadahr atail ansou nan ah ouramano: “Ngehi, Nephi kilangehr manaman en Sihmpwul en Koht, me mweredieng pohn souleng kan en mwomwohdiso en Sihmpwulo, oh pohn seri en inou en Kauno, me kouson seli ier pohn sampa pwon; oh irail pil kapwatkidahr me pwung oh pil manaman en Koht ni popohl kohwahlap.”11

I ahniki ansou mwahu me keren ni ei iang Presiden Russell M. Nelson oh ah peneinei ni kapidelong en tehnpas sarawi ehu ni eh kapokonirailpene ni mwoahl en katengteng oh kawehweieng irail mehkoaros me kitail kin wia nan Mwomwohdiso—mihting koaros, pirokrahm, kasukuhl oh sahpis—kin wiawih pwehn kaunop kitailda en kohdo nan tehnpas sarawi oh kelepwikihdi ni mwoahlo pwehn ale kapai soutuk kan me Sahmo inoukidahr.12

Ni atail kin pehm kapai kan en tehnpas sarawio nan atail mour kan, atail mohngiong kan kin tamanda atail peneinei kan, me momour oh me melahr.

Me keren, I kadehde en ehu peneinei dih-silu arail wiapene arail pepdais kan ong arail pahpa/nohno me melahr kan. Nohno kahlapo pil iang--itarete ah mie ah kahpwal en duhdieng nan pihlo. Ni eh pwarada sang nan pihlo oh pwoalehdi ah pwoudo, pilen meseh kerekihdi ah peren. Pahpa kahlapo oh pahpao eri pepdaisi emenemen ira oh pil ekei neira serihko. Ia uwen kaperen me ehu peneinei kak ahneki pene? Ehu ehu tehnpas sarawi kin kiheng ansou ong peneinei kan pwe ehu ehu peneinei en kak mie arail ansou nan wasahn pepdais.

Mwohnte ah kapelsalehdalao, Presiden Joseph F. Smith alehdi ehu kasansal en doarehla me melahr kan. E padahngki me irail kan me mihmi nan sapwen ngehno kin anahne mehlel tiahk sarawi kan me kitail kin ale pwehki irail. Pwuhk sarawi koasoia, “Me melahr kan me keluhla pahn komourla sang ni arail peikiong tiahk sarawi kan en tehnpas en Koht.”13 Kitail kin ale tiahk sarawi kan pwehki irail, ahpw irail me kin wiahda oh kin pwukoahki ehu ehu inou me patehng ehu ehu tiahk sarawi. Mehlel, irair sarawio me menipinip ong kitail ahpw kin langada douluhl ong irail nan tehnpas sarawi.

Eri dahnge atail pwukoah ni atail pahn wia doadoahk wet, nan atail wia tohn ale sawas oh tohn doadoahk? Soukohp Joseph Smith padahkiong Sounleng kan nan 1840 me “doadoahk lap anahne wiawi, oh dipwisou anahne en mie—oh ni doadoahk en [kawada tehnpas sarawio] anahne kamwadangala ni pwung, Souleng kan anahne teneki mwahu kesempwal en mepwukat nan arail madmadau, … oh koasonehdi dahme konehng wiawi pwehn pweida; oh kapwatahkin irailda eimah, nantiong wia uwen arail kak, oh medewehieng irail en wehwehki me dene irailte me pahn kak kapwaiahda doadoahk wet.”14

Nan pwuken Kaudiahl kitail wadek:

“Ihs irail ko me likou pwetepwet reirei? oh mehnia kei irail?

“… Ih irail me keidier nan kamakam laudo; re kamwakeledahr ar likou kan, oh ntahn Sihmpwulo me re mwakelekelkilahr.

“Ihme re mihmihki mwohn mwoalen Koht, oh kin papah ih ni rahn oh nipwohng nan tehnpese: oh me ketiket nan mwoahlo me pahn kin ketin apwalih irail.”15

Kumwail kak kilang nan amwail madmadau irail kan me wie papah nan tehnpas sarawi rahn wet?

E tohtohsang meh 120,000 me wia tohn doadoahk en tiahk sarawi nan tehnpas sarawi 150 nan sampa. Ahpw mihmiehte anahnepen tohn doadoahk nan wasa mwahu wet. Ni en Presiden Gordon B. Hinckley pakairkihda kokoudahn tehnpas sarawi tikitik kan nan sampa, e medewehieng me “tohn doadoahk en tiahk sarawi koaros pahn wia tohn wasauhte oh pahn mie arail pwukoa nan arail ward oh stake kan.”16 Ihme kin wiawi, tohn doadoahk kan kin malipilipeng en papah ki sounpar riau de siluh, oh kin kak karairailah sang. E sohte koasondi me ni ahmw malipilipehr, komw kak wie doadoahk erein omw kak. Tohto tohn doadoahk wereilahr kan kin pereperenkihte arail doadoahk nan tehnpas sarawi ni arail kin kakommoldi oh mweideng ekei tohn doadoahk kapw en uhd papah.

Kerenieng sounpar 100 samwalahr, Wahnparon John A. Widtsoe padahngki: “Kitail anahne tohn doadoahk tohto pwehn kapwaiahda doadoahk lingan [wet]. … Kitail anahne me tohto en kaweliakapwehng doadoahk en tehnpas sarawi sang dih koaros. … Ansouo lelehr, … nan kemwekid kapw en tehnpas sarawi wet, en wahdohng nan doadoahk wet aramas koaros, sang dih koaros. … Doadoahk en nan tehnpas sarawi… kin katapan ong me pwulopwul oh me ngoahngki oh pwersek, duwehte irail me mah kan me pwilikihdier arail katoutou kan en mour wet. Mwahnakapwo anahne en mih nan tehnpas sarawi laudsang ah pahpao de ah pahpa kahlapo, me tengedier sang ni irair kan en mour, oh peinakapwo ni eh wie kekeirda anahne ngehno, kamarain oh kaweid me kin alahldi sang nan tiahk sarawi kan.”17

Nan tehnpas sarawi tohto, presiden en tehnpas kan kin kasamwo me apwtehn malipilipda oh misineri me kapaidahr, mwahnakapw oh peinakapw, en papahki ansou mwotomwot wia tohn doadoahk en tiahk sarawi mwohn arail kohla nan MTC. Me pwulopwul pwukat sohte kin alehte kapai sang arail papah, ahpw “irail kin kalaudehla kaperen en papah nan tehnpas sarawi.”18

I peki rehn ekei irail mwahnakapw oh peinakapw me papahier mwowe oh mwurin arail misin kan en ehukihda arail pepehm. Irail doadoahngki soangen kosoi kan me sansal pah pwehn kawehwehda arail pepehm en doadoahk nan tehnpas sarawi:

Ni ahi papah nan tehnpas sarawio

  • I pehm “ehu pepehm me I karanih Semeio oh Sounkomouro”;

  • I pehm “meleilei oh popohl unsek”;

  • I ahneki pepehm en “ mihmi ni ihmwo”;

  • I alehdi me “sarawi, manaman, oh kehlail”;

  • I pehm “kesempwal en ahi inou sarawi kan;”

  • “Tehnpas sarawio wialahr ehu kisehn paliwereiet”;

  • “Irailko me kitail papah kin kerendo nan ansou en tiahk sarawi kan”;

  • “E kiheng ie kehlail en powehdi kasongsong kan”; oh

  • “Tehnpas sarawio wekidalahr ahi mour.”19

Papah nan tehnpas sarawi wia irair ngenin oh kehlail ong dih en aramas koaros. Mehlel ekei pwopwoud kapw kan kin patpene wie papah. Presiden Nelson padahngkiher me, “Papah nan tehnpas sarawi … wia doadoahk katapan ehu ong ehu peneinei.”20 Ni ahmw wia tohn doadoahk en tiahk sarawi kan, ke sohte kin alehte tiahk sarawi ong ahmw pahpa/nohno kan, ahpw ke kak pil kaweid arail tiahk sarawi kan.

Wilford Woodfuff pil kosoia:

“Soangen malipilip da me laudsang en ohl emen [de lih emen] pohn sampa ni eh koledi nan pehkan manaman oh mweimwei en doula oh patohwanda tiahk sarawi en komour? …

“… Komw wialahr dipwisoun doadoahk en komour ehu ong aramas ni limmen Koht. Sohte mehkot me kohiengehr aramas me pahrekieng met.”21

E pil koasoia:

“Ngihl tikitik kansenamwahuo en Ngehn Sarawi pahn lellehng [uhk] oh kapai lingan kan en Nanleng, ehupene en tohnleng kan, pahn kin kapatapatehng ni ansou kan.”22

“Met wia uwen me komwi oh ngei kak tohnmeteikihla [nan irair] en sounpar mwotomwot kei me kitail ahneki nan mour wet.”23

Presiden Thomas S. Monson ahpwtehn katamanehng kitail me “kapai kan en nan tehnpas sarawi sohte kak pweipweida.”24 “Sohte tohnmetei ehu rasehng.”25

Kohdo ni tehnpas sarawi. Kalapw kohdo. Kohkihdo ahmw peneinei. Kohdo oh sewese mehteikan en pil iang kohdo.

“Ihs irail ko me likou pwetepwet?” Riei ohl oh lih akan, kumwail iei irail—iei kumwail me alehier tiahk sarawi kan nan tehnpas sarawi, me kolokolehr amwail inou kan ki tohnmetei; kumwail me seusewese amwail peneinei kan en diar kapai en papah nan tehnpas sarawi oh me pil sewesedahr mehteikan. Kalahngan en amwail papah. I kadehde me ehu ehu tehnpas sarawi wia Sapwellime wasa, tehnpas sarawi oh iei wasa me kitail kak kaskuhlki oh esehla manaman sarawi kan, ni mwaren Sises Krais, amen.