O Le Mana o le FaaleAtua

I ni nai masina ao lei maliu le Perofeta o Iosefa Samita, sa ia feiloai atu i Aposetolo e Toasefululua e talanoa e uiga i manaoga silisili na feagai ma le Ekalesia i lena taimi faigata. Sa ia tau atu ia i latou, “E sili atu lo tatou manaomia o le malumalu nai lo se isi lava mea.”¹ E moni, i le asō i nei taimi faigata, e sili atu ona manaomia e i tatou taitoatasi ma o tatou aiga le malumalu nai lo se isi lava mea.

I le taimi o le faapaiaga o se malumalu lata mai nei, sa faagaeetiaina au i le aafiaga atoa. Sa ou fiafia i le fale tatala, e faafeiloai le toatele o tagata asiasi o e na o mai e vaai i le malumalu; o faafiafiaga faaleaganuu faatasi ma le malosi ma le fiafia o le autalavou; ma mulimuli ane o sauniga matagofie o le faapaiaga. Sa matagofie le Agaga. E toatele tagata na faamanuiaina. Ma o le taeao na sosoo ai, sa ma ulufale atu ai ma lou toalua i le faatanoa o le papatisoga e auai i papatisoga mo nisi o o maua lava tuaa. Ina ua ou siiina lou lima e amata le sauniga, sa toetoe a lofituina au i le mana o le Agaga. Sa ou toe iloaina o le mana moni o le malumalu o loo i ai i sauniga.

E pei ona faaalia e le Alii, o le atoaga o le Perisitua Mekisateko o loo maua i totonu o le malumalu ma ona sauniga, “aua o totonu o inā e faauu atu ai ki o le perisitua paia, ina ia outou maua le viiga ma le mamalu.”² “O lea, o ona sauniga, ua faaalia ai le mana o le faale-atua.”³ O lenei folafolaga e mo outou ma o outou aiga.

O lo tatou tiutetauave o le “talia” o lena mana e ofoina mai e lo tatou Tama.⁴ “Aua o ia o lē e taliaina o le a tuu tele atu i ai, le mana lava”:⁵ le mana e maua ai mea uma e mafai ona Ia aumai ma o le a Ia aumai ia i tatou—i le taimi nei ma le faavavau;⁶ le mana e avea ai ma atalii ma afafine o le Atua,⁷ e iloa ai “mana o le lagi”⁸ e tautatala ai i Lona suafa,⁹ ma ia maua le “mana lea o [Lona] Agaga.”¹⁰ O nei mana e avea ma avanoa patino ia i tatou taitoatasi e ala i sauniga ma feagaiga o le malumalu.

Sa vaai Nifae i lo tatou aso i lana faaaliga maoae: “Ma sa oo ina a‘u, vaai a‘u o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele.”¹¹

Sa ou maua le avanoa lata mai nei e auai ai i se fale tatala o le malumalu ma Peresitene Russell M. Nelson ma lona aiga a o ia faapotopotoina i latou i le fata faitaulaga o le faamauga ma faamalamalama atu ia i latou o mea uma tatou te faia i le Ekalesia—fonotaga uma, gaoioiga, lesona, ma auaunaga—e saunia ai i tatou taitoatasi e o mai i le malumalu ma tootutuli i le fata faitaulaga ina ia maua uma faamanuiaga folafolaina a le Tama mo le faavavau.¹²

A o tatou lagonaina faamanuiaga o le malumalu i o tatou lava olaga, e liliu atu o tatou loto i o tatou aiga, o e uma o soifua ma ua maliliu.

Talu ai nei, sa ou molimauina le auai faatasi o se aiga o augatupulaga e tolu i le papatisoga mo o latou tuaa. E oo lava i le tina o le tama o fanau a fanau na auai—e ui sa ia te ia sina fefe e uiga i le alu ifo o ia lava i le vai. A o ia alu ae mai le vai ma opo lona toalua, sa ia te ia loimata o le olioli. Ona papatiso lea e le tamamatua ma le tama le tasi ma le isi ma le toatele o le fanau a fanau. O le a se isi olioli sili atu e mafai e se aiga ona aafia faatasi ai? E i ai i malumalu taitasi se taimi faamuamua faaleaiga e mafai ai e outou o se aiga ona faatulaga le taimi i le potu papatiso.

A o tulalata i lona maliu, sa maua e Peresitene Iosefa F. Samita le faaaliga o le togiolaina o e ua maliliu. Sa ia aoao atu o i latou o e o i ai i le lalolagi o agaga o loo faalagolago atoa i sauniga tatou te mauaina e fai ai ma o latou sui. Ua faitauina le mau, “O e e salamo o e ua oti o le a togiolaina, e ala i le usiusitai i sauniga o le maota o le Atua.”¹³ Tatou te maua sauniga e fai mo o latou sui, ae latou te faia ma tali atu mo feagaiga taitasi e faatatau i sauniga taitasi. E moni lava, tatou te lagonaina i latou ma ua latou silafia atoatoa galuega o loo faataunuuina mo i latou i le malumalu.

O le a la lo tatou tiutetauave patino e tusa ai ma le auai i lenei galuega, i matafaioi uma o ni tagata e malaga atu ma ni tagata faigaluega? Sa aoao mai le Perofeta o Iosefa Samita i le 1840 e faapea “ina ia faataunuuina ai, galuega e tele naua e tatau ona faia, ma mea e faaaogaina o le a manaomia—ma a o tatau ona faavavevave le galuega [e fausia le malumalu] i le amiotonu, e tatau i le Au Paia ona fuaina le taua o nei mea, i o latou mafaufau, … ona laalaa atu ai lea i ona vaega e pei ona manaomia ina ia oo atu ai i latou i le faagaoioia o le galuega; ma faaauupegaina i latou i le lototele, mautinoa o le a latou faia mea uma latou te mafai, ma ia lagonaina lo latou lava naunautai, e peisea’i o le galuega atoa ua na o i latou lava ua faalagolago i ai.”¹⁴

I le tusi o Faaaliga tatou te faitau ai:

“O i latou ia e ua oofu i ofu sisina, o ai ea i latou? po o fea foi na latou o mai ai?

“… O i latou ia o e o mai nai le puapuaga tele, ua ta foi o latou ofu, ma ua faasinasina o latou ofu i le toto o le Tamai Mamoe.

“O le mea lea ua latou i luma ai o le nofoalii o le Atua, ua latou auauna foi ia te ia i lona malumalu i le ao ma le po: o lē tietie foi i le nofoalii e mau ma i latou.”¹⁵

E le mafai ea ona e vaai faalemafaufau ia i latou o ē auauna atu i le malumalu i le asō?

O loo i ai le silia ma le 120,000 o tagata faigaluega i malumalu o loo faagaoioia e 150 i le lalolagi. Ae o loo i ai pea le avanoa mo le toatele atu ia maua lenei aafiaga faafiafiaina. Ina ua faaleoina e Peresitene Gordon B. Hinckley le mataupu o le tele o malumalu laiti i le lalolagi atoa, sa ia aoao mai e faapea “o tagata faigaluega uma lava o tagata lava o le nuu po o le atunuu o loo galulue i isi tofiga i o latou uarota ma siteki.”¹⁶ E masani lava, o tagata faigaluega e valaauina e galulue mo le lua i le tolu tausaga, ma le avanoa e faaumiumi ai le avanoa e galulue ai. E le o faamoemoeina e faapea o le taimi lava e valaauina ai oe, o le a e nofo ai i le umi e te mafaia. E toatele o tagata faigaluega mo se taimi umi e tauaveina lo latou alolofa mo le malumalu ma i latou a o faamaloloina i latou ma mafai ai e isi, tagata faigaluega fou ona auauna atu.

Toeitiiti lava atoa le 100 tausaga talu ai, na aoao mai ai le Aposetolo o John A. Widtsoe: “Tatou te manaomia nisi tagata faigaluega e faataunuu [lenei] galuega matagofie. … Tatou te manaomia nisi tagata sili atu e liliu atu i galuega faalemalumalu, e utu mai soo se vaitauga o le matua. … Ua oo mai le taimi, … i lenei taumafaiga fou e faataunuu galuega o le malumalu, ia aumaia auaunaga malolosi a tagata uma, o vaitausaga uma. … O le galuega faalemalumalu … e tele lona manuia i tagata talavou ma le au malolosi, e pei foi ona manuia ai tagata matutua, o e ua tuuese mai ia i latou le tele o avega o le olaga. E manaomia ona i ai le alii talavou i le malumalu ia faatele atu nai lo lona tama ma lona tamamatua, o e ua mausali ona o aafiaga o le olaga; ma le teine talavou faatoa ulufale mai le olaga, e manaomia le agaga, uunaiga ma le taitaiga e oo mai i le auai i sauniga o le malumalu.”¹⁷

I le tele o malumalu, o loo faafeiloai ai e peresitene o malumalu ia faifeautalai fou ua valaauina ma ua maua faaeega paia, o alii ma tamaitai talavou, e auauna atu mo na o se taimi puupuu o ni tagata faisauniga a o lei malaga atu i le NAF (MTC). E le gata ina faamanuiaina nei tagata talavou e auauna atu, ae “latou te faaleleia le matagofie ma le agaga mo tagata uma o loo auauna atu i le malumalu.”¹⁸

Sa ou fesili i nisi o alii ma tamaitai talavou o e na auauna atu a o le i malaga atu ma e [na auauna atu] ina ua maea a latou misiona e faasoa mai ni o latou lagona. Sa latou faaaogaina fuaitau e pei o fuaitau nei e faamatala ai o latou aafiaga i le malumalu:

Pe a ou auauna atu i le malumalu…

• Ou te lagona “se lagona o le latalata atili i lou Tama Faalelagi ma le Faaola”;

• Ou te lagona “le filemu ma le fiafia atoatoa”;

• Ou te maua se lagona o le “i ai i le aiga”;

• Ou te maua le “paia, mana, ma le malosi”;

• Ou te lagona “le taua o au feagaiga paia”;

• “Ua avea le malumalu ma se vaega o au”;

• “O na agaga matou te auauna i ai o loo latalata mai i taimi o sauniga”;

• “Ou te maua ai le malosi e faatoilalo ai faaosoosoga”; ma le

• “O le malumalu ua suia ai lou olaga e faavavau.”¹⁹

O le auauna atu i le malumalu o se aafiaga silisili ma mamana mo tagata o vaitausaga uma. E oo lava i nisi o ulugalii faatoa faaipoipo o loo auauna atu faatasi. Na aoao mai Peresitene Nelson, “O le auauna atu faatasi i le malumalu … o se gaoioiga taua lea mo se aiga.”²⁰ I le avea ai o ni tagata faigaluega, e faaopoopo atu i le mauaina o sauniga mo ou tuaa, e mafai foi ona e faatautaia ia sauniga mo i latou.

E pei ona saunoa mai Peresitene Uilifoti Uitilafi:

“O le a se valaauga sili atu e mafai e soo se alii [po o se tamaitai] ona maua i luga o le fogaeleele nai lo le uuina i lona lima [po o ona] lima o le mana ma le pule e agai ai i luma ma faatautaia ia sauniga o le faaolataga? …

“…E avea oe ma se meafaigaluega i aoao o le Atua i le faaolataga o lena agaga. E leai se mea na tuuina atu i le fanauga a tagata e tutusa ma lena mea.”²¹

Sa ia saunoa foi:

“O musumusuga matagofie a le Agaga Paia o le a tuuina atu ia te [outou] ma oa o le Lagi, le fesootaiga a agelu, o le a faaopoopoina mai i lea taimi i lea taimi.”²²

“E matua taua ai lava mea uma e te mafai ma mea ou te mafai ona ositaulagaina [i le aluga] o nai tausaga itiiti o loo tatou faaaluina iinei i la le tino.”²³

Talu ai nei na faamanatu mai i tatou e Peresitene Thomas Monson e faapea “o faamanuiaga o le malumalu e le mafaatauina.”²⁴ “E leai se taulaga e telē naua.”²⁵

O mai i le malumalu. O mai soo. O mai faatasi ma [lou aiga] ma mo lou aiga. O mai, ma fesoasoani i isi e o mai foi.

“O i latou ia o e ua oofu i ofu sisina, o ai ea i latou, po o fea foi na latou o mai ai?” Ou uso e ma tuafafine, o outou o i latou na—o outou o ē ua maua sauniga o le malumalu, o e tausia a outou feagaiga e oo lava i le ositaulagaina; outou o e fesoasoani i o outou aiga e saili ia faamanuiaga o le auaunaga faalemalumalu ma ē o fesoasoani i isi i le ala. Faafetai atu mo la outou auaunaga. Ou te molimau atu o malumalu taitasi o le maota paia ma le mamalu o le Atua, ma o totonu e mafai ona aoao ai i tatou taitoatasi ma iloa ai ia mana o le faaleatua, i le suafa o Iesu Keriso, amene.