2010–2019
Ang Bugti sa Gahum sa Priesthood
Abril 2016


Ang Bugti sa Gahum sa Priesthood

Andam ba kitang mag-ampo, magpuasa, magtuon, mangita, mosimba, ug magserbisyo isip mga kalalakin-an sa Dios aron makabaton kita nianang matang sa gahum sa priesthood?

Unom ka bulan na ang milabay sa kinatibuk-ang komperensya sa Oktubre 2015, namulong ko ngadto sa mga sister sa Simbahan mahitungod sa ilang balaanong tahas isip mga kababayen-an sa Dios. Karon gusto kong mamulong ninyo mga kaigsoonan mahitungod sa inyong balaanong tahas isip mga kalalakin-an sa Dios. Sa pagbiyahe nako sa kalibutan, nahingangha ko sa kalig-on ug hingpit nga kaayo sa kalalakin-an ug mga batang lalaki niining Simbahan. Dili lang gyud maihap ang gidaghanon sa kasingkasing nga inyong naayo ug sa kinabuhi nga inyong nabayaw. Salamat!

Sa akong mensahe sa miaging komperensya, gisaysay nako ang akong makahugno nga kasinatian daghang katuigan na ang milabay, sa dihang isip usa ka doktor sa kasingkasing, wala nako maluwas ang kinabuhi sa duha ka managsoon nga batang babaye. Uban sa pagtugot sa ilang amahan, gusto nakong maghisgot og dugang pa bahin niana nga pamilya.

Sakit sa kasingkasing ang mitakboy sa tulo ka anak nila ni Ruth ug Jimmy Hatfield. Ang ilang unang anak nga lalaki, si Jimmy Jr., namatay nga walay matino nga diagnosis. Nalambigit ko sa sitwasyon sa dihang ang ginikanan nangayo og tabang alang sa ilang duha ka anak nga babaye, si Laural Ann ug ang iyang manghud, si Gay Lynn. Naguol ko sa dihang ang duha ka batang babaye namatay human sa ilang operasyon.1 Masabut gayud, nga sila si Ruth ug Jimmy nahugno sa espirituhanong paagi.

Paglabay sa panahon, nahibaloan nako nga naghambin sila og kahiubos ngari nako ug sa Simbahan. Hapit sa unom ka dekada, gihasol ko niining sitwasyon ug naguol alang sa pamilyang Hatfield. Gisulayan nako sila pagkontak, wala magmalampuson.

Dayon, usa ka gabii sa miaging Mayo, nakamata ko tungod niadtong duha ka batang babaye gikan sa pikas bahin sa tabil. Bisan kon og dili sa akto nga nakita o nadungog sila, gibati nako ang ilang presensya. Sa espirituhanong paagi, nadungog nako ang ilang pangamuyo. Ang ilang mensahe mubo ug klaro: “Brother Nelson, wala pa mi ma-sealed ni bisan kinsa! Mahimo ba nimo kaming matabangan?” Sa wala madugay human niana, nahibaloan nako nga ang ilang inahan namatay, apan ang ilang amahan ug manghud nga lalaki buhi pa.

Nadasig sa pangamuyo ni Laural Ann ug Gay Lynn, gisulayan na usab nako pagkontak ang ilang amahan, nga akong nahibaloan nga nagpuyo uban sa iyang anak nga si Shawn. Niining higayuna andam na sila nga makigkita nako.

Niadtong Hunyo, miluhod gyud ko sa atubangan ni Jimmy, nga karon 88 anyos na, ug kinasingkasing nga nakig-istorya niya. Naghisgot ko bahin sa pangamuyo sa iyang mga anak nga babaye ug gisultihan siya nga akong dungog nga mopahigayon sa mga ordinansa sa sealing alang sa iyang pamilya. Gipasabut usab nako nga magkinahanglan kini og panahon ug dakong paningkamot sa iyang bahin ug ni Shawn aron maandam ug mahimong takus nga mosulod sa templo, kay walay usa nila nga na-endowed.

Mabati gayud ang Espiritu sa Ginoo sa tibuok niana nga panagtagbo. Ug sa dihang ang matag usa nila ni Jimmy ug Shawn midawat sa akong tanyag, hilabihan ang akong kalipay! Makugihon silang nakigtambayayong sa ilang stake president, bishop, mga home teacher, ug ward mission leader, ingon man usab sa batan-ong mga misyonaryo ug managtiayon nga senior missionary. Ug dayon, dili pa kaayo dugay, didto sa Payson Utah Temple, duna koy talagsaong pribilehiyo nga ma-sealed si Ruth ngadto ni Jimmy ug ang ilang upat ka anak ngadto nila. Si Wendy ug ako naghilak samtang miapil mi nianang talagsaong kasinatian. Daghang kasingkasing ang naayo nianang adlawa!

Imahe
Sila si Elder ug Sister Nelson didto sa templo uban sa pamilyang Hatfield

Sa pagpamalandong, nahingangha ko nila ni Jimmy ug Shawn ug sa unsay andam nilang buhaton. Nahimo silang akong mga bayani. Kon duna koy tinguha sa akong kasingkasing, mao kini nga ang matag lalaki ug batan-ong lalaki niininga Simbahan mopakita nianang kaisug, kalig-on, ug kamapainubsanon niining amahan ug anak. Andam sila nga mopasaylo ug hikalimtan ang mga kasakit ug mga gawi. Andam sila nga mopaubos sa giya gikan sa ilang mga lider sa priesthood aron ang Pag-ula ni Jesukristo makahinlo ug makapalambo kanila. Ang matag usa andam nga mahimong lalaki nga takus nga maghupot sa priesthood “nga subay sa labing balaan nga kapunongan sa Dios.”2

Ang paghupot nangahulugan og pagsuporta sa gibug-aton nianang gidala. Usa kini ka sagradong pagsalig ang paghupot sa priesthood, nga mao ang dakong gahum ug awtoridad sa Dios. Hunahunaa kini: ang priesthood nga gitugyan ngari nato mao ang samang gahum ug awtoridad nga pinaagi niini gilalang sa Dios kini ug ang dili maihap nga mga kalibutan, midumala sa kalangitan ug sa yuta, ug mihimaya sa Iyang masulundong mga anak.3

Bag-ohay lang, si Wendy ug ako diha sa usa ka miting diin ang organist nakaporma na ug andam nga motugtog sa pangbukas nga himno. Ang iyang mga mata diha sa musika, ang iyang mga tudlo diha sa mga key. Gisugdan niya pagtuplok ang mga key, apan walay tingog. Mihunghong ko ni Wendy, “Wala manay kuryente.” Naghunahuna ko nga dunay mipugong sa pagsulod sa kuryente ngadto niana nga organ.

Nan, mga kaigsoonan, sa samang paagi, nahadlok ko nga daghan kaayong mga lalaki nga gihatagan og awtoridad sa priesthood apan nagkulang sa gahum sa priesthood tungod kay ang gahum napugngan sa mga sala sama sa katapulan, pagkadili matinuoron, garbo, imoralidad, o kabalaka sa mga butang sa kalibutan.

Nahadlok ko nga daghan kaayong naghupot sa priesthood nga gamay ra o walay gibuhat aron mapalambo ang ilang abilidad nga magamit ang mga gahum sa langit. Nabalaka ko sa tanan nga dili putli og hunahuna, pagbati, o aksyon nga modaut sa ilang asawa o mga anak, sa ingon moputol sa gahum sa priesthood.

Nahadlok ko nga sa subo nga paagi daghan kaayo ang mitahan sa ilang kabubut-on ngadto sa kaaway ug nag-ingon pinaagi sa ilang lihok, “Mas naghunahuna ko sa pagtagbaw sa kaugalingon nakong mga tinguha kay sa paghupot sa gahum sa Manluluwas aron mapanalanginan ang uban.”

Nahadlok ko, mga kaigsoonan, nga ang pipila nato usa ka adlaw makamata ug makaamgo kon unsa gayud ang gahum sa priesthood ug moatubang sa grabe nga pagbasol nga migahin sila og daghan pang panahon sa pagtinguha og gahum ibabaw sa uban o gahum diha sa trabahoan kay sa pagkat-on sa hingpit nga paggamit sa gahum sa Dios.4 Si Presidente George Albert Smith nagtudlo nga “wala kita dinhi aron lang usikan ang atong panahon niining kinabuhia ug dayon moadto sa kahimtang sa kahimayaan; apan ania kita dinhi aron mohimo sa atong kaugalingon nga takus sa matag adlaw alang sa mga katungdanan nga gilauman sa atong Amahan nga atong buhaton human dinhi.”5

Nganong usikan man sa usa ka tawo ang iyang panahon ug magmantinir sa linuto nga mga liso ni Esau6 kon gisaligan siya sa posibilidad nga makadawat sa tanang panalangin ni Abraham?7

Sa dinaliang paagi mangamuyo ko sa matag usa nato nga magmahimong takus sa atong mga pribilehiyo isip mga naghupot sa priesthood. Sa umaabut nga adlaw, kadtong mga tawo lamang nga seryusong migamit sa ilang priesthood, pinaagi sa makugihong pagtinguha nga matudloan sa Ginoo Mismo, ang makapanalangin, makagiya, makapanalipod, makalig-on, ug makaayo sa uban. Ang usa ka tawo lamang nga mibayad sa bugti sa gahum sa priesthood ang makahimo og mga milagro niadtong iyang gihigugma ug makapabiling luwas sa iyang kaminyoon ug pamilya, karon ug sa tibuok kahangturan.

Unsa may bugti sa pagpalambo sa maong gahum? Ang senior nga Apostol sa Manluluwas, si Pedro—kanang samang Pedro nga kauban nila ni Santiago ug Juan nga mitugyan sa Melchizedek Priesthood ngadto nila ni Joseph Smith ug Oliver Cowdery8—mipahibalo sa mga kinaiya nga kinahanglan natong tinguhaon aron “mangahimo kamong mag-aambit sa diosnong kinaiya.”9

Imahe
Si Pedro, Santiago ug Juan mipahiuli sa Melchizedek Priesthood.

Gihisgutan niya ang pagtuo, hiyas, kahibalo, pagkamapugnganon, pailub, pagkadiosnon, inigsoon nga pagkamabination, gugmang putli, ug kakugi.10 Ug ayaw kalimti ang pagkamapainubsanon!11 Busa mangutana ko, unsa may ikasulti sa mga sakop sa atong pamilya, mga higala, ug mga kauban sa trabaho nga gibuhat ninyo ug nako sa pagpalambo niini ug sa uban pang espirituhanong mga gasa?12 Kon mas mapalambo kadtong mga kinaiya, mas dako ang gahum sa atong priesthood.

Sa unsang paagiha pa man nato madugangan ang atong gahum sa priesthood? Kinahanglan kitang mag-ampo gikan sa atong kasingkasing. Ang matinahurong paghisgot sa nangagi ug sa umaabut nga mga kalihokan, tapuson pinaagi sa pipila ka hangyo alang sa mga panalangin, dili makamugna sa matang sa pakig-istorya sa Dios nga magdala og malungtarong gahum. Andam ba mong mag-ampo aron masayud kon unsaon sa pag-ampo alang sa dugang pa nga gahum? Ang Ginoo motudlo ninyo.

Andam ba mong mosiksik sa mga kasulatan ug magbusog diha sa mga pulong ni Kristo13—nga magtuon sa kinasingkasing nga paagi aron makabaton og dugang pa nga gahum? Kon ganahan mong makita nga malukmay ang kasingkasing sa inyong asawa, patan-awa siya ninyo diha sa Internet nga nagtuon sa doktrina ni Kristo14 o nagbasa sa inyong kasulatan!

Andam ba mong mosimba kanunay diha sa templo? Ganahan ang Ginoo nga mobuhat sa Iyang kaugalingong pagtudlo diha sa Iyang balaan nga balay. Hunahunaa ang Iyang kahimuot kon hangyoon ninyo Siya sa pagtudlo ninyo bahin sa mga yawe, awtoridad, ug gahum sa priesthood samtang masinati ninyo ang mga ordinansa sa Melchizedek Priesthood diha sa templo.15 Hunahunaa ang dugang nga gahum sa priesthood nga mainyo.

Andam ba mong mosunod sa ehemplo ni Presidente Monson sa pagserbisyo sa uban? Sulod sa mga dekada gibuhat niya ang mga butang nga wala niya planoha sa sinugdanan, misunod sa mga pag-aghat sa Espiritu nga moabut sa pultahan sa usa ka tawo ug dayon makadungog sa mga pulong sama sa, “Giunsa nimo pagkasayud nga anibersaryo sa kamatayon sa among anak nga babaye?” o “Giunsa nimo pagkasayud nga birthday nako?” Ug, kon gusto gyud ka og dugang pa nga gahum sa priesthood, higugmaa ug atimana ang imong asawa, nga mohangup niya ug sa iyang tambag.

Karon, kon kining tanan morag sobra ra, palihug ikonsiderar kon unsa kalahi ang atong pakigrelasyon sa atong asawa, mga anak, ug mga kauban sa trabaho kon kita ingon ka nagpakabana bahin sa pagbaton og gahum sa priesthood sama sa paglambo diha sa trabaho o pagpadako sa kantidad sa atong bank account. Kon mapainubsanon lamang kita nga mopresentar sa atong kaugalingon ngadto sa Ginoo ug mohangyo Kaniya nga tudloan kita, Iyang ipakita nato kon unsaon sa pagpalambo sa atong paggamit sa Iyang gahum.

Niining ulahing mga adlaw, nasayud kita nga dunay mga linog sa nagkalain-laing dapit.16 Tingali ang usa niadtong nagkalain-laing dapit anaa sa atong kaugalingong panimalay, diin ang emosyonal, pinansyal, o espiritwal nga “mga linog” mahimong mahitabo. Ang gahum sa priesthood makapakalma sa kadagatan ug makaayo sa mga kadaut sa yuta. Ang gahum sa priesthood makapakalma usab sa hunahuna ug makaayo sa mga kadaut diha sa kasingkasing niadtong atong gihigugma.

Andam ba kitang mag-ampo, magpuasa, magtuon, mangita, mosimba, ug moserbisyo isip mga kalalakin-an sa Dios aron makabaton kita nianang matang sa gahum sa priesthood? Tungod kay duha ka batang babaye ang matinguhaon kaayong ma-sealed ngadto sa ilang pamilya, ang ilang amahan ug igsoong lalaki andam nga mobayad sa bugti sa paghupot sa balaang Melchizedek Priesthood.

Akong minahal nga mga kaigsoonan, gihatagan kita og sagradong pagsalig—ang awtoridad sa Dios sa pagpanalangin sa uban. Unta ang matag usa nato mobarug isip lalaki nga gi-orden nang daan sa Dios—andam nga maisugong maghupot sa priesthood sa Dios, matinguhaong mobayad bisan unsa pay bugti sa gikinahanglan aron madugangan ang iyang gahum diha sa priesthood. Pinaagi niana nga gahum, makatabang kita nga maandam ang kalibutan alang sa Ikaduhang Pag-anhi sa atong Manluluwas, si Jesukristo. Kini ang Iyang Simbahan, nga gipangulohan karon sa Iyang propeta, si Presidente Thomas S. Monson, kinsa akong gimahal pag-ayo ug gi-sustain. Niini ako mopamatuod sa pangalan ni Jesukristo, amen.