Tus Nqi ntawm lub Hwj Chim Pov Thawj Hwj
Peb puas txaus siab thov Vajtswv, yoo mov, kawm ntawv, nrhiav, teev tiam, thiab ua li Vajtswv cov neeg pab lwm tus kom peb thiaj yuav muaj lub hwj chim pov thawj hwj?
Rau hli tas los nyob hauv lub tuam rooj sab laj thaum lub Kaum Hli Ntuj xyoo 2015, kuv tau hais lus rau cov muam ntawm lub Koom Txoos txog lawv lub luag hauj lwm uas los saum ntuj los vim lawv yog Vajtswv cov ntxhais. Tam sim no kuv xav hais lus rau nej cov kwv tij txog nej lub luag hauj lwm uas los saum ntuj los vim nej yog Vajtswv cov tub. Thaum kuv mus thoob plaws lub ntiaj teb no, ua rau kuv xav tsis thoob vim cov txiv neej thiab cov tub hluas ntawm lub Koom Txoos muaj zog thiab siab zoo. Muaj neeg suav tsis txheeb uas nej tau kho lawv lub siab mob thiab pab txhawb nqa lawv lub neej. Ua tsaug!
Nyob hauv lub tuam rooj sab laj tas los, kuv hais txog qhov uas ntau xyoo tas los, thaum kuv yog ib tug kws phais plawv, kuv cawm tsis tau ob tug me nyuam ntxhais. Nkawd txiv tso cai rau kuv, kuv thiaj xav hais ntxiv txog tsev neeg ntawd.
Ruth thiab Jimmy Hatfield peb tug me nyuam raug mob plawv thaum lawv yug los. Tus tub hlob, Jimmy Jr., tuag ua ntej tau paub tseeb nws muaj mob. Kuv ntsib lawv thaum nkawd nrhiav kev pab rau nkawd ob tug ntxhais, Laural Ann thiab nws tus niam hluas, Gay Lynn. Ua rau kuv puas siab thaum ob tug me nyuam ntxhais tas sim neej tom qab phais mob.1 Ruth thiab Jimmy yeej nyuaj siab kawg nkaus.
Thaum sij hawm dhau mus, kuv kawm hais tias nkawd tseem tu siab rau kuv thiab lub Koom Txoos. Tau yuav luag rau caum xyoo, qhov no ua rau kuv nyuaj siab heev thiab kuv pab cov Hatfield nyuaj siab. Kuv twb sim hu lawv ob peb zaug, tiam sis lawv tsis tau xav nrog kuv tham.
Ces, ib hmo thaum lub Tsib Hlis Ntuj, ob tug me nyuam ntxhais uas sab tod ntawm daim ntaub thaiv tau ua rau kuv tsim los. Txawm kuv sab cev nqaij daim tawv tsis tau pom los yog hnov nkawd, kuv yeej paub tias nkawd nyob. Kuv tau hnov nkawd tej lus thov ntawm sab ntsuj plig. Nkawd zaj lus yeej meej thiab tsis ntev: “Tus Nus Nelson, wb tsis tau sib khi rau leej twg! Koj pab wb puas tau?” Tsis ntev tom qab ntawd, kuv kawm tias nkawd niam tau tso lub ntiaj teb no tseg, tiam sis nkawd txiv thiab tus nus tseem muaj txoj sia nyob.
Laural Ann thiab Gay Lynn tej lus thov ua rau kuv ua siab loj, kuv thiaj sim hu dua nkawd txiv, uas kuv kawm tias nyob nrog nws tus tub Shawn. Lub sij hawm no nkawd kam ntsib kuv.
Thaum lub Rau Hli Ntuj, kuv txhos caug rau ntawm Jimmy, uas muaj 88 xyoo tam sim no, thiab hais lus kawg siab rau nws. Kuv hais txog nws ob tug ntxhais tej lus thov thiab qhia nws hais tias kuv yeej yuav txaus siab ua kev cai sib khi rau nws tsev neeg. Kuv kuj piav hais tias nws thiab Shawn yuav tsum siv sij hawm thiab siv zog kom npaj siab thiab ua neeg tsim nyog mus hauv lub tuam tsev, vim nkawd ob leeg yeej tsis tau txais lub vaj txiaj ntsim.
Thaum peb sib tham tus Tswv tus Ntsuj Plig yeej nyob ntawd. Thiab thaum Jimmy thiab Shawn nkawd ob leeg lees txais tej uas kuv hais, ua rau kuv zoo siab kawg! Nkawd rau siab ua hauj lwm nrog nkawd ceg txheem ntseeg tus thawj tswj hwm, tus npisov, ob tug mus qhia tom tsev, thiab pawg ntseeg qhov chaw tshaj tawm txoj moo zoo tus thawj coj, thiab cov tub txib thiab ib nkawm niam txiv uas ua tub txib. Ces, tsis ntev tas los, nyob hauv lub Tuam Tsev Payson Utah, kuv tau muaj cib fim zoo kawg kom muab Ruth khi rau Jimmy thiab khi nkawd plaub tug me nyuam rau nkawd. Wendy thiab kuv quaj thaum wb koom nrog lawv lub sij hawm ntawd. Hnub ntawd muaj ntau lub siab uas tau kho zoo lawm!
Thaum kuv xav txog qhov no, kuv xav tsis thoob vim Jimmy thiab Shawn txaus siab ua txhua yam nkawd tau ua. Nkawd yeej yog pha-ej rau kuv. Yog tias muaj raws li kuv lub siab nyiam, kuv xav kom txhua tus txiv neej thiab tub hluas nyob hauv lub Koom Txoos no muaj siab loj, muaj dag zog, thiab txo hwj chim npaum li tus txiv tsev thiab nws tus tub no. Nkawd ob leeg txaus siab zam txim thiab tso tej kev tu siab tseg. Nkawd yeej txaus siab ua raws li nkawd cov thawj coj pov thawj hwj hais kom Yexus Khetos txoj Kev Theej Txhoj yuav pab nkawd dawb huv thiab txhawb nqa nkawd. Nkawd ob leeg txaus siab rais los ua ib tug txiv neej uas tsim nyog ris lub pov thawj hwj “raws li tus txheej txheem dawb huv ntawm Vajtswv.”2
Lo lus ris txhais hais tias yus ris ib yam dab tsi hnyav. Yog ib qho dawb huv uas yus ris lub pov thawj hwj, qhov uas yog Vajtswv lub hwj chim thiab txoj cai. Cia li xav txog qhov no: lub pov thawj hwj uas Vajtswv muab rau peb yeej yog tib lub hwj chim thiab txoj cai uas Vajtswv siv kom tsim lub ntiaj teb no thiab lwm lub ntiaj teb uas suav tsis txheeb, Nws siv kom kav lub ntuj thiab lub ntiaj teb, thiab muab Nws cov me nyuam uas mloog lus tsa nto.3
Tsis ntev tas los, Wendy thiab kuv wb nyob hauv kev sib ntsib es tus ntaus organ tab tom yuav pib ntaus zaj nkauj qhuas Vajtswv qhib. Nws saib cov ntawv, thiab nws cov ntiv tes npaj ntaus. Nws pib ntaus, tiam sis tsis muaj dab tsi nrov. Kuv ntxhi lus rau Wendy hais tias, “Tsis muaj hluav taws xob.” Kuv xav tias muaj dab tsi uas thaiv kom lub organ txais tsis tau hluav taws xob.
Cov kwv tij, zoo ib yam li ntawd, kuv ntshai tias muaj txiv neej dhau uas tau txais txoj cai ntawm lub pov thawj hwj tiam sis tsis muaj lub hwj chim ntawm lub pov thawj hwj vim kev txhaum thaiv lub hwj chim ntawd xws li kev ua tub nkeeg, kev tsis ncaj, kev muab hlob, kev coj tsis dawb huv, los sis kev xav txog tej yam ntawm lub ntiaj teb.
Kuv ntshai hais tias muaj cov uas tuav lub pov thawj hwj uas tsis tau ua dab tsi los ua me ntsis xwb kom muaj peev xwm siv Vajtswv lub hwj chim. Kuv txhawj txog cov uas xav txog los yog ua tej yam tsis dawb huv, los sis cov uas saib tsis taus lawv tus poj niam los yog cov me nyuam, lawv thiaj txiav lawv lub hwj chim pov thawj hwj.
Kuv ntshai hais tias ntau tus twb tso lawv txoj kev ywj siab xaiv tso tseg rau tus yeeb ncuab thiab hais txog lawv txoj kev coj yeeb yam hais tias, “Kuv xav ua raws li kuv lub siab xav ntau dua li kuv xav ris tus Cawm Seej lub hwj chim kom foom koob hmoov rau lwm tus.”
Cov kwv tij, kuv ntshai hais tias tej zaum muaj ib hnub uas ib txhia yuav tsim los thiab paub kiag tias lub hwj chim ntawm lub pov thawj hwj yog dab tsi tiag tiag thiab lawv yuav nyuaj siab heev vim lawv siv sij hawm nrhiav kom muaj hwj chim kav lwm tus los sis lub hwj chim ntawm lawv txoj hauj lwm ntau dua li lawv tau kawm siv Vajtswv lub hwj chim tag nrho.4 Thawj Tswj Hwm George Albert Smith qhia hais tias, “peb tsis nyob no kom nkim sij hawm ntawm lub neej no ces cia li mus rau kev tsa nto; tiam sis peb nyob no kom qhia txhua hnub hais tias peb tsim nyog ua tej hauj lwm uas peb Leej Txiv xav kom peb ua tom qab lub neej no.”5
Vim li cas ib tug txiv neej yuav nkim nws lub neej thiab txais tau Exaus cov taum liab6 thaum nws yeej muaj peev xwm txais tau tag nrho Anplaham cov koob hmoov?7
Kuv thov kom peb txhua tus yuav ua neej tsim nyog txais cov koob hmoov ntawm cov uas ris lub pov thawj hwj. Yuav muaj ib hnub tsuas yog cov txiv neej uas saib lawv lub pov thawj hwj rau nqi xwb, thaum lawv rau siab nrhiav tus Tswv tej lus qhia, yuav txawj foom koob hmoov, coj, pov hwm, txhawb nqa, thiab kho lwm tus kom zoo. Tsuas yog tus txiv neej uas tau them tus nqi kom tau lub hwj chim pov thawj hwj xwb yuav txawj ua tej txuj ci tseem ceeb pab cov uas nws hlub thiab pov hwm nws tus poj niam thiab tsev neeg, tam sim no thiab nyob mus ib txhis.
Tus nqi kom muaj hwj chim pov thawj hwj li ntawd yog dab tsi? Tus Cawm Seej tus Thwj Tim, Petus, tus Petus uas koom nrog Yakanpaus thiab Yauhas muab lub Pov Thawj Hwj Mekixedes rau Yauxej Xamiv thiab Oliver Cowdery8—hais txog tej cwj pwm uas peb yuav tsum coj kom peb “yuav tau txoj koob hmoov uas zoo kawg nkaus.”9
Nws hais txog kev ntseeg, kev tsim txiaj, kev txawj ntse, kev xyuam xim, kev siab ntev, kev siab zoo li kwv tij ua rau kwv tij, zoo li Vajtswv, kev siab hlub, thiab kev mob siab.10 Thiab cia li nco ntsoov txog kev txo hwj chim!11 Yog li ntawd, peb tsev neeg, phooj ywg, thiab cov uas koom nrog peb ua hauj lwm yuav hais li cas yog tias pb nug lawv seb peb puas ua raws li tej yam no?12 Thaum peb coj tej cwj pwm li no, peb yuav muaj hwj chim pov thawj hwj loj zog.
Peb yuav ua li cas ntxiv kom peb lub hwj chim pov thawj hwj loj dua? Peb yuav tsum thov Vajtswv kawg siab. Qhov uas yus hais txog tej yam uas muaj dhau los thiab thaum yav tom ntej, thiab thov kom tau ob peb yam koob hmoov, yeej tsis yog kev sib tham nrog Vajtswv uas txaus kom muaj hwj chim kav ntev. Nej puas txaus siab thov Vajtswv kom paub thov kom tau hwj chim ntxiv? Tus Tswv yuav qhia nej.
Nej puas txaus siab nyeem hauv vaj lug kub thiab mloog ntsoov Khetos tej lus13—thiab rau siab kawm kom muaj hwj chim ntxiv? Yog nej xav kom nej tus poj niam zoo siab kawg nkaus, cia nws pom koj siv Internet kawm txog Khetos tej lus qhuab qhia14 los sis nyeem nej cov vaj lug kub!
Nej puas txaus siab mus teev tiam hauv lub tuam tsev? Tus Tswv nyiam qhia Nws tej lus nyob hauv Nws lub tsev dawb huv. Cia li xav seb Nws yuav zoo siab npaum li cas yog nej thov Nws qhia nej txog lub pov thawj hwj cov yuam sij, txoj cai, thiab lub hwj chim thaum nej ua cov kab ke ntawm lub Pov Thawj Hwj Mekixedes nyob hauv lub tuam tsev.15 Cia li xav seb nej lub pov thawj hwj yuav loj npaum li cas.
Nej puas txaus siab ua raws li Thawj Tswj Hwm Thomas S. Monson tus yam ntxwv pab lwm tus? Tau ntau xyoo nws tsis ncaj qha mus tsev, nws cia li ua raws li tus Ntsuj Plig tej kev tshoov siab mus rau lwm tus lub tsev ces nws hnov tej lus xws li, “Ua cas koj ho paub yog hnub uas wb tus ntxhais xiam thaum yav tas los?” los sis “Ua cas koj ho paub yog kuv hnub yug?” Thiab yog nej xav tau lub hwj chim pov thawj hwj ntxiv, nej yuav hlub thiab saib xyuas nej tus poj niam, hlub nws thiab ua raws li nws tej lus qhia.
Yog tias nej xav tias txhua yam no nyuaj heev, thov xav seb peb txoj kev sib raug zoo nrog peb tus poj niam, me nyuam thiab cov uas nrog peb ua hauj lwm yuav zoo li cas yog peb xav txog kev txais lub hwj chim pov thawj hwj npaum li peb xav txog peb txoj hauj lwm los yog peb tus account hauv lub tsev ceev nyiaj. Yog peb txo hwj chim rau tus Tswv thiab thov kom Nws qhia peb, Nws yuav qhia peb kom peb paub yuav ua li cas txais tau Nws lub hwj chim ntxiv.
Nyob hauv lub caij nyoog kawg no, peb paub tias yuav muaj av qeeg nyob ntau qhov chaw.16 Tej zaum ib qho chaw yog nyob hauv peb lub tsev, uas muaj teeb meem ntawm lub siab ntsws, nyiaj txiag, los sis sab ntsuj plig zoo li “av qeeg.” Lub hwj chim pov thawj hwj yeej kho cov hiav txwv kom nyob tus thiab pab kom cov av tsis txhob tawg hauv lub ntiaj teb. Lub hwj chim pov thawj hwj kuj kho tau cov neeg lub siab kom nyob tus thiab pab cov uas peb hlub txoj kev kho siab.
Peb puas txaus siab thov Vajtswv, yoo mov, kawm ntawv, nrhiav, teev tiam, thiab ua li Vajtswv cov neeg pab lwm tus kom peb thiaj yuav muaj lub hwj chim pov thawj hwj li ntawd? Vim ob tug me nyuam ntxhais xav xav ua kev sib khi nrog nkawd tsev neeg, nkawd txiv thiab tus nus txaus siab them tus nqi kom ris tau lub Pov Thawj Hwj Mekixedes uas dawb huv.
Kuv cov kwv tij, Vajtswv tau tso siab rau peb—Nws muab Vajtswv txoj cai rau peb kom foom koob hmoov rau lwm tus. Thov kom peb txhua tus yuav sawv rais los ua Vajtswv cov neeg xws li tau tsa peb ua ntej—cov uas ua siab loj npaj siab ris Vajtswv lub pov thawj hwj, cov uas yeej xav them tus nqi uas yuav tsum them kom muaj hwj chim ntawm lub pov thawj hwj ntxiv. Nrog rau lub hwj chim ntawd, peb yuav pab npaj neeg ntiaj teb rau peb tus Cawm Seej, Yexus Khetos txoj Kev Los Zaum Ob. Nov yog Nws lub Koom Txoos, uas niaj hnub nim no Nws tus yaj saub Thawj Tswj Hwm Thomas S. Monson coj, kuv hlub thiab txhawb nqa nws. Kuv hais lus tim khawv li no los ntawm Yexus Khetos lub npe, amees.