Oņāān Kajoor in Priesthood eo
Jej ke m̧ōņōņō in jar, jitlo̧k, ekkatak, pukōt, kabun̄jar, im jerbal āinwōt m̧aan ro an Anij bwe jen maron̄ bōk kain kajoor in priesthood in?
Jiljino allōn̄ ko rem̧ootļo̧k ilo Oktoba 2015 kweilo̧k eo eļap, ikar kōnono n̄an sister ro an Kabun̄ in kōn eddo eo aer ekwojarjar āinwōt kōrā ro nejin Anij. Kiiō ikōņaan kōnono n̄an em̧m̧aan ro rejitōn bōro kōn eddo eo ekwojarjar āinwōt em̧m̧aan ro an Anij. Ilo aō ito itak n̄an laļ in, ij bwilōn̄ kōn kajoor im m̧ōņōņō eo an em̧m̧aan ro im ļaddik ro an Kabun̄ in. Ejjeļo̧k juon wāween n̄an aō bwine lōn̄ in armej ro emōj ami kōmouri im mour ko kom̧ ar ļōn̄aji. Kom̧ em̧m̧ool!
Ennaan eo aō ilo kar kweilo̧k eo ļo̧k, ikar kōnono kōn wāween eo ikar iione im enana elōn̄ iiō ko rem̧ootļo̧k ke, ikar āinwōt juon rim̧wijm̧wij, ikar jab maron̄ lo̧mo̧o̧ren mour ko an ruo leddik ro reddik. Kōn mālim eo an eo jemāer, ikōņaan bwebwenato eļapļo̧k kōn baam̧le in.
Jorrāān in menono ekar waļo̧k jān ke rekar ļo̧tak ekar jelōt ajri rein jilu rekar ļo̧tak n̄an Ruth im Jimmy Hatfield. Ļaddik eo erūtto tata, Jimmy Jr., ekar mej ilo an ejjeļo̧k kam̧ool ke ekar bōke. Ikar jino bōk koņaaō ke jinen im jemān ajri rein rekar pukot jipan̄ kōn leddik ro ruo nejierro, Laura Ann im leddik eo edikļo̧k jatin sister, Gay Lynn. Ikar lukkuun būrom̧ōj ke leddik rein ruo rekar mej ālkin aer kar abōrejen (operations).1 Mour in jetōb eo an Ruth im Jimmy ekar m̧ōjņo̧.
Jān iien n̄an iien, ikar kile bwe rekar dāpij wōt en̄jake in illu ko aer ņae eō im Kabun̄ in. Enan̄in jiln̄uuļ iiō ko, ikar inepata kōn jekjek in im ikar jan̄ im n̄iļaļļal kōn baam̧le in an Hatfields. Ewōr jet iien ko ikar kajjieon̄ in kōm̧anm̧an aō iien ippāer, ak ejjeļo̧k tōprak.
Innām, juon bon̄ Māe eo ļo̧k, leddik rein ruo reddik rej pād iturājet in rōn̄ōļ eo rekar karuj eō. Ikar ļōmņak ikar jab loe ak ron̄ ainikier ilo nememein armej, ikar en̄jake aer pād itūrū. Ilo jetōb, ikar ron̄ aer akweļap. Ennaan eo aer ekar kadu im alikkar: “Brother Nelson, kōm̧ij jan̄in liāp n̄an jabdewōt! Komaron̄ ke jipan̄ kōm̧?” Ejjab etto, ikar ron̄ ke jineer em̧ōj an jako, ak jemāer im ļaddik eo jatier edikļo̧k rej mour wōt.
Ikar peran itok wōt jān akweļap in an Laural Ann im Gay Lynn, ikar kajjieon̄ bwe in tōpar jemāer, eo ikar ron̄ ke ekar jokwe ippān ļaddik eo nejin Shawn. Rekar m̧ōņōņō in ioon n̄a iien in.
Ilo Juun eo, ikar būkwelōlō im̧aan mejān Jimmy, kiiō 88 an iiō, im kar bwebwenato ippān. Ikar kwaļo̧k kōn an leddik ro nejin akweļap im jiron̄ e bwe inaaj m̧ōņōņō in kōm̧m̧ane kōm̧are ak liāpe baam̧le eo an. Ikar barāinwōt kōmeļeļeiki bwe enaaj bōk jidik iien im eļap kijejeto eo an im Shawn bwe ren maron̄ pojak im erreo n̄an deļo̧n̄e tampeļ eo, āinwōt ejjeļo̧k iaero emōj aer kar endowed.
Jetōb eo an Irooj ekar lukkuun kajoor im kar en̄jake ilo aolepān kweilo̧k eo. Im ke Jimmy im Shawn rekar errā kōn kajjitōk eo aō, ikar obrak kōn lan̄lōn̄! Rekar tiljek im jerbal ippān stake būreejtōn eo aer, bisop eo, im rūkaki in loļo̧k m̧ōko eo aer, im ward mijen leader eo, barāinwōt mijenede ro im ruo rūtto rej mijenede. Innām, raan ko ļo̧k, ilo Payson Utah Temple, ikar bōk jeraam̧m̧an ļapļap in n̄an liāpe Ruth im Jimmy im ajri ro nejier emān n̄an erro. Wendy im n̄a kōm̧ro kar jan̄ ke kōm̧ro ej bōk kōņaam̧ro ilo iien in eaiboojoj. Elōn̄ bōro ko rekar mour raan ņe!
Ilo aō kejōkļo̧kjeņ kōn en̄jake in, ikar bwilōn̄ kōn Jimmy im Shawn im kōn ta eo rekar m̧ōņōņō in kōm̧m̧ane. Rekar erom ro rebun̄bun̄ ippa. Eļan̄n̄e imaron̄ kar kōm̧m̧ane juon kōņaan ilo būruwō, inaaj kar kōņaan bwe kajjojo em̧m̧aan im likao ilo Kabun̄ in renaaj kwaļo̧k peran, kajoor, im ettā bōro āinwōt baba in im ļaddik in nejin. Rekar m̧ōņōņō in joļo̧k an ro jet bōd im meļo̧kļo̧k metak ko m̧okta im imminene ko. Rekar m̧ōņōņō in errā im ļoor tōl jān ritōl ro aer ilo priesthood bwe Pinmuur eo an Jisōs Kraist en maron̄ karreo im kōļapļo̧k er. Er kajjojo rekar m̧ōņōņō in erom juon m̧aan eo erreo ej kabwijer priesthood “ilo̧kan laajrak ekwōjarjar tata an Anij.”2
N̄an kabwijer meļeļein n̄an rie eddo eo an men eo ej kabwijere. Menin ej juon lōke ekwojarjar n̄an kabwijer priesthood eo, eo ej kajoor eo ekajoor im mālim an Anij. Ļōmņak kōn menin: priesthood eo kar letok iood ej ejja kajoor im mālim eo Anij ekar kōm̧anm̧an menin im laļ ko rellōn̄, kakien lan̄ ko im laļ in, im kotak ajri ro Nejin repokake.3
Tōre ko rem̧ootļo̧k, Wendy im n̄a kōm̧ro kar pād ilo juon kweilo̧k me riokwōn eo ekar lukkuun m̧ōņōņō im pojak in kōjan̄ al in kōppeļļo̧k eo. Mejān rekar iookļo̧k al eo, addin pein rekar pād ioon kii ko. Ekar jino kajjieon̄ jiped kii ko, ak ekar jab waļo̧k ainikien. Ikar unoojdikdik n̄an Wendy, “Ejjeļo̧k an kajoor.” Ikar kwaļo̧k bwe juon men ekar kabōjrak an itok jarom̧ n̄an okwōn eo.
Ro jeiū im jatū, ilo wāween in, ij mijak bwe elōn̄ em̧m̧aan ro emōj aer bōk mālim in an priesthood eo ak ejjeļo̧k kajoor in priesthood eo ippāer kōnke iaļen kajoor eo emōj kiili kōn wōt jerawiwi ko āinwōt jowan, riab, utiej bōro, m̧wil ko renana, ak obrak im inepata kōn men ko an laļ in.
Ij mijak bwe ebooļ rikabwijer priesthood ro jidik wōt men eo rekar kōm̧m̧ane ak ejjeļo̧k men eņ rekar kōm̧m̧ane n̄an ejaake maron̄ eo aer n̄an deļo̧n̄e kajoor ko an lan̄. Ij inepata kōn aolep ro rej ettonoon kōn ļōmņak ko aer, en̄jake ko, ak m̧akūtkūt ko ak ro rejjab kautiej kōrā ro pāleer ak ajri ro, kōn menin rej m̧wijitiļo̧k kajoor in priesthood eo.
Ij mijak bwe ebooļ rekar luuji anemkwoj eo aer n̄an rikōjdat eo im rej ba jān wāween m̧akūtkūt ko aer, “Ij kea wōt kōn aō kabun̄ būruwō kōn kōņaan ko aō make jān aō kabwijer kajoor eo an Rilo̧mo̧o̧r eo n̄an kōjeraam̧m̧an ro jet.”
Ij mijak, ro jeiū im jatū, bwe jet iaad remaron̄ juon raan rujļo̧k im kile kajoor ta eo ilo priesthood eo ej im maron̄ jelm̧ae ajļo̧k eļap bwe rekar joļo̧k eļap iien n̄an pukōt kajoor ioon ro jet ak kajoor ilo jerbal ijjello̧k in ekkatak n̄an kōjerbal aolep kajoor eo an Anij.4 Būreejtōn George Albert Smith ekar katakin “jejjab pād ijin n̄an pād bajjōk kōn iien eo ad ilo mour in innām em̧m̧akūtļo̧k n̄an jikin eo ilōn̄tata; ak jej pād ijin n̄an kakarbabe kōj make raan n̄an raan n̄an jerbal ko Jemed Ilan̄ ej kōtmāneik kōj n̄an būki ālkin mour in.”5
Etke jabdewōt em̧m̧aan emaron̄ in kakkure raan ko an im kōm̧m̧an koņ kōn oktan men eo kijen Iso6 n̄e ekar bōk kōn maron̄ in n̄an an bōk aolep kōjeraam̧m̧an ko an Ebream?7
Ij akweļap ippād wōj kajjojo bwe jen mour erreo kōn kōjeraam̧m̧an ko ad āinwōt rikabwijer priesthood ro. Ilo an raan eo ej itok, em̧m̧aan rein wōt ro rekar m̧ool kōn priesthood eo aer, jān tiljek pukōt n̄an aer katak jān Irooj Make, naaj maron̄ jeraam̧m̧an, tōl, kōjparok, kōkajoorļo̧k, im kōmour ro jet. Em̧m̧aan eo wōt eo ekar kōļļāik oņāān kajoor in priesthood eo enaaj maron̄ bōktok kabwilōn̄lōn̄ ko n̄an ro ej iakwe er im kōjparok m̧are eo an im baam̧le eo, kiiō im n̄an indeeo.
Ta oņāān eo n̄an ejaake kain kajoor priesthood in? Rijilōk eo an Rilo̧mo̧o̧r eo, Piter —ejja Piter in eo ekar pād ippān Jemes im Jon ekar leļo̧k ioon Josep Smith im Oliver Cowdery Melkisedek Priesthood eo8—kar kwaļo̧k wāween ko rekkar jej aikuj pukōti n̄an “āinwōt anij ilo m̧wilōmi.”9
Ekar ņaetaer tōmak, wānōk, jeļāļo̧kjeņ, jatōr, kijenmej, āinwōt anij, jouj n̄an doon, iakwe-em̧ool, im tiljek.10 Im jab meļo̧kļo̧k ettā bōro!11 Kōn menin ij kajjitōk, ekōjkan an ro uwaan baam̧le ko ad, ro m̧ōttad, im rijerbal ro m̧ōttad maron̄ ba kwe im n̄a jej ejaake men kein im men in letok ko jet an jetōb?12 Eļan̄n̄e m̧wil kein renaaj kōkōm̧anm̧anļo̧k, enaaj ļapļo̧k kajoor in priesthood eo ad.
Bar wāween rot jemaron̄ in kōļapļo̧k kajoor in priesthood eo? Jej aikuj in jar kōn būruwōd. Mera ad kōnono kōn m̧akūtkūt ko rem̧ootļo̧k im ko rej itok wōt, kiili kōn jet kajjitōk in kōjeraam̧m̧an ko, jejjab maron̄ kōm̧m̧ani kain kōnono rot in ippān Anij ej bōktok kajoor eo ejjeļo̧k jem̧ļokin. Kom̧wij ke m̧ōņōņō in jar n̄an jeļā wāween jar n̄an bōk eļapļo̧k kajoor? Irooj enaaj katakin eok.
Kom̧wij ke m̧ōņōņō in etali jeje ko rekwojarjar im kwojkwoj ion naan ko an Kraist13—n̄an katak ilo tiljek bwe en ļapļo̧k kajoor eo ilo kom̧? Eļan̄n̄e kokōņaan loe an kōrā eo pāleem̧ m̧ōņōņō kake eok, kōm̧m̧an bwe en loe am̧ ekkatak katak ko an Kraist ilo Internet14 ak riiti jeje ko am̧ rekwojarjar!
Kom̧wij ke m̧ōņōņō in kabun̄jar ilo tampeļ eo aolep iien? Irooj em̧ōņōņō in kōm̧m̧an katak eo an Make ilo m̧weo Imōn ekwojarjar. Ļōmņak ewi jon̄an An naaj m̧ōņōņō n̄e kwoj kajjitōk Ippān n̄an katakin eok kōn priesthood kii ko, mālim eo, im kajoor eo kwoj en̄jake jān kain̄i an Melkisedek Priesthood eo ilo tampeļ.15 Ļōmņake an ļapļo̧k kajoor in priesthood eo enaaj am̧.
Kom̧wij ke m̧ōņōņō in ļoor waanjon̄ak eo an Thomas S. Monson kōn jerbal n̄an ro jet? Ium̧win jon̄oul iiō ko ekar kōm̧m̧ane men ko ekar jab karōk n̄an kōm̧m̧ani, ļoor im̧we ko an Jetōb eo n̄an tōparļo̧k kōjem̧ in m̧weo im̧ōn bar juon innām ron̄jake naan kein āinwōt, “Etke kwojeļā ke ej raan in mej eo an leddik eo nejū in?” ak “Etke kwōjeļā ke ej raan in ļo̧tak eo aō in?” Im, n̄e kom̧ naaj lukkuun kōņaan kajoor an priesthood eo, kom̧ naaj iakwe im kōjparok kōrā eo pāleem̧i, kautiej e im kapilōk eo an.
Kiiō, n̄e aolepān men kein relukkuun eļļap, jouj im ļōmņak kōn ewi jon̄an oktak in kōtaan ko ad ippān kōrā eo pāleer, ajri ro nejid, im rijerbal ro m̧ōttad ilo jikin jerbal eo enaaj erom n̄e kōj jekar inepata kōn an bōk kajoor in priesthood eo ilo ad eddōkļo̧k ilo jikin jerbal ak kōļapļo̧k jon̄an jāān ilo account eo ad ilo bāān̄. N̄e jenaaj ettā im leļo̧k kōj make im̧aan Irooj im kajjitōk Ippān n̄an katakin kōj, Enaaj kwaļo̧k n̄an kōj wāween ad kōļapļo̧k ad bōk kajoor eo An.
Ilo raan kein āliktata, jejeļā bwe enaaj lōn̄ m̧akūtkūt in laļ ilo elōn̄ jikin ko.16 Bōlen juon iaan jikin kein rellōn̄ enaaj ilo kapijuknen ko ad make, ijo ewōr “m̧akūtkūt in laļ ko” kōn en̄jake, jāān, ak jetōb remaron̄ waļo̧k. Kajoor in priesthood eo emaron̄ kalūr lo̧jet ko im joļo̧k kōk ko ilo laļ in. Kajoor in priesthood eo emaron̄ kōmeļak kōļmenļo̧kjeņ ko im kōmour kōk in bōro ko an ro jej iakwe er.
Jej ke m̧ōņōņō in jar, jitlo̧k, ekkatak, pukōt, kabun̄jar, im jerbal āinwōt m̧aan ro an Anij bwe jen maron̄ bōk kain kajoor in priesthood in? Kōnke ruo leddik jidikdik rekar kōņaan in liāp n̄an baam̧le eo aer, jemāer im ļaddik eo jatier rekar m̧ōņōņō in kōļļāik oņāān eo n̄an kabwijer Melkisedek Priesthood eo ekwojarjar.
Ro jeiū im jatū, jekar bōk lōke in ekwojarjar—mālim eo an Anij n̄an kōjeraam̧m̧an ro jet. Kōm̧m̧an bwe kōj kajjojo en jerkak āinwōt m̧aan an Anij kajjojo rekar ekkapit m̧okta n̄an erom—pojak n̄an kabwijer priesthood eo an Anij peran, m̧ōņōņō in kōļļā jabdewōt oņāān ej emenin aikuj n̄an kōļapļo̧k kajoor eo an ilo priesthood eo. Kōn kajoor in, jemaron̄ kōpooj laļ in n̄an Itok eo Kein Karuo an Rilo̧mo̧o̧r eo, Jisōs Kraist. En̄in ej Kabun̄ eo An, ej tōl rainin jān rikanaan eo An, Būreejtōn Thomas S. Monson, eo ij iakwe im rejtake. Ij kamool ilo etan Jisōs Kraist, amen.