O Le Tau o le Mana o le Perisitua

I le ono masina talu ai i le konafesi aoao ia Oketopa 2015, sa ou talanoa atu ai i tuafafine o le Ekalesia e uiga i la latou matafaioi paia o ni tamaitai o le Atua. O nei la ou te fia talanoa atu ai ia te outou le usoga e uiga i la outou matafaioi paia o ni alii o le Atua. A o ou femalagaai ai i le lalolagi, ou te maofa lava i le malosi ma le lelei a’ia’i o alii ma taulelea o lenei Ekalesia. E matua le mafaitaulia lava ni loto ua outou faamaloloina ma ni ola ua outou siitiaina. Faafetai lava!

I la’u savali i le konafesi talu ai, sa ou faamatalaina ai lo’u aafiaga faataumaoi i le tele o tausaga talu ai a o avea ai ma se fomai tipitipi, sa le mafai ai ona ou laveaiina ni ola o ni auuso teineiti se toalua. Faatasi ai ma le faatagaga a lo la tama, ou te fia talanoa atili ai e uiga i lena aiga.

O se faamai o le fatu mai le taimi na fanau ai sa aafia ai le fanau e toatolu a Ruth and Jimmy Hatfield. O lo la atalii muamua, o Jimmy Jr., na maliu e aunoa ma se aafiaga na iloaina. Sa ou aafia i lenei tulaga ina ua saili mai e matua se fesoasoani mo le la fanau teine e toalua, o Laural Ann ma lona uso laitiiti, o Gay Lynn. Sa nutimomoia lo’u loto ina ua maliliu uma teineiti i le maea ai o taotoga.¹ E malamalama lava, sa matua lofituina lava faaleagaga Ruth ma Jimmy.

I le aluga o taimi, sa ou iloaina ai sa ia i laua ni lagona ita ia te au ma le Ekalesia. Mo le toetoe lava ono sefulu tausaga, sa mamafatu lava ia te au lenei tulaga ma faanoanoa ai mo le aiga o Hatfields. Sa ou taumafai i le tele o taimi e faia ni fesootaiga ma i la’ua, e aunoa ma le faamanuiaina.

Ona oo lea i le tasi po ia Me talu ai, sa fafaguina au e na teineiti e toalua mai le isi itu o le veli. E ui sa ou lei vaaia pe faalogoina i la’ua i ou lagona faaletino, ae na ou lagonaina lo la faatasi mai. I le tulaga faaleagaga, sa ou lagonaina ai le la aioiga. Sa puupuu lava ma manino le la savali: “Tuagane Nelson, e le i faamauina i ma’ua i se tasi! E mafai ona e fesoasoani mai ia i ma’ua?” E le i pine lena, ae ou iloaina ua maliu lo la tina, ae o loo soifua pea lo la tama ma le tuagane laitiiti.

I le faalototeleina ai i le aioiga a Laural Ann ma Gay Lynn, sa ou toe taumafai ai e faafesootai lo la tama, lea sa ou iloaina sa nonofo faatasi ma lona atalii o Shawn. O le taimi la lea ua la loto ai e feiloai ma a’u.

Ia Iuni, sa ou tootuli moni ai lava i luma o Jimmy, ua 88 nei ona tausaga, ma faia se talanoaga faamaoni lava ma ia. Sa ou talanoa i ai e uiga i aioiga a ona afafine ma tau atu ia te ia o le a faamamaluina lava au e faatino le sauniga o le faamauga mo lona aiga. Sa ou faamalamalama atu foi ia te ia o le a alu se taimi ma le tele o taumafaiga i lana vaega ma le vaega a Shawn e saunia ai ma agavaa e ulufale atu i le malumalu, ona e leai ma se isi o i la’ua ua mauaina faaeega paia.

Sa matua lagonaina le malosi o le Agaga o le Alii i lena feiloaiga atoa. Ma ina ua talia uma e Jimmy ma Shawn la’u ofo, sa matua ova lo’u olioli! Sa la’ua galulue filiga faatasi ma le peresitene o le siteki, epikopo, faiaoga o aiga, ma le taitai misiona, faapea ai foi ma faifeatualai talavou ma se ulugalii matutua faamisiona. Ma e lei leva atu la, i le Malumalu o Payson Iuta, sa ou maua ai le avanoa taua tele e faamau ai Ruth ia Jimmy ma le la fanau e toafa ia i la’ua. Sa ma fetagisi ma Wendy i lena aafiaga mamalu. Sa tele ni loto na faamaloloina i lena aso!

Ata

O Elder ma Sister Nelson i le malumalu ma le aiga o Hatfield

I le toe mafaufau i ai, ua ou maofa lava ia Jimmy ma Shawn ma le mea na la loto e fai. Ua avea i la’ua ma ni toa ia te a’u. A na mafai ona i ai se moomooga o lo’u loto, o lo’u manao lea i alii taitasi ma alii talavou uma i lenei Ekalesia ia faaalia le lototele, malosi, ma le lotomaualalo e pei o lenei tama ma le atalii. Sa la’ua loto e faamagalo ma faagalo tiga ma mausa ua leva. Sa la’ua loto e gauai atu i le taitaiga mai o la’ua taitai perisitua ina ia mafai ai e le Togiola a Iesu Keriso ona faamamaina ma faalauteleina i la’ua. Sa naunau le tagata lava ia e avea ma se alii e umiaina ma le agavaa le perisitua “e tusa ai ma le faatulagaga sili ona paia a le Atua.”²

O le tauaveina o lona uiga o le lagolagoina o le mamafa o le mea o loo amoina. O se tiutetauave paia le tauaveina o le perisitua, o le mana malosi lea ma le pule a le Atua. Mafaufau i le mea lenei: o le perisitua e faaee mai i o tatou luga o le mana lava lea e tasi ma le pule lea na foafoa ai e le Atua lenei lalolagi ma isi lalolagi e le mafaitaulia, pulea ai lagi ma le lalolagi, ma faaeaina ai Ana fanau usiusitai.³

E lei leva atu, sa ma i ai ma Wendy i se sauniga lea sa malualii ma saunia ai le taokeni e ta le viiga amata. Sa pulatoa atu ona mata i le musika, ma o ona tamatamailima sa i luga o ki. Sa amata ona ia oomiina ki, ae sa leai se leo. Sa ou musumusu atu ia Wendy, “E leai sona mana.” Sa ou manatu e i ai se mea ua taofia le alu atu o le eletise i lena okeni.

Ia Uso e, i se tulaga faapena, ua ou popole ai lava i le toatele naua o alii ua tuu atu i ai le pule o le perisitua ae ua leai se mana o le perisitua ona ua polokaina le mana e agasala e pei o le paie, le faamaoni, faamaualuga, ola le mama, po o le soona faaalu o le taimi i mea a le lalolagi.

Ua ou popole lava i le toatele naua o e umiaina le perisitua ua itiiti ni mea o fai po o le leai foi e atiae ai o latou tomai e maua ai mana o le lagi. Ua ou popole mo i latou uma o e ua le ola mama i o latou mafaufauga, lagona, po o amioga pe ua faalumaina foi o latou taitoalua po o fanau, ma ua motusia ai le mana o le perisitua.

Ua ou popole lava i le toatele naua o e ua lafoai atu ma le faanoanoa lo latou faitalia i le fili ma o loo faapea mai e tusa ma a latou amioga, “E sili atu ia te au le faamalieina o o’u lava manaoga, nai lo le faia o mea e faatatau i le tauaveina o le mana o le Faaola e faamanuia ai isi.”

Ua ou popole lava uso e, o nisi o i tatou atonu e i ai se aso e feala a’e ai i luga ma iloaina po o le a tonu lava le mana o le perisitua ma lagona ai le matua salamo i lo latou faaaluina o le tele o taimi e saili ai malosi e pulea ai isi po o le pulemalosi i le galuega nai lo le aoaoina e faaaoga atoatoa le mana o le Atua.⁴ Sa aoao mai Peresitene Siaosi Alapati Samita e faapea “tatou te le o i ai iinei ia tau lava na o na faapasi taimi ai i lenei olaga ona see atu lea i se tulaga o le faaeaga; ae ua tatou i ai iinei ia faaagavaaina i tatou lava i lea aso ma lea aso mo tofiga ua faamoemoeina i tatou e lo tatou Tama e faatumu i lenei olaga.”⁵

Aisea o le a faamaumauina ai e soo se tagata ma toafimalie ai mo le atasema tunu a Esau⁶ ae ua faatuatuaina o ia i le avanoa e mauaina uma ai faamanuiaga a Aperaamo?⁷

Ou te augani atu ma le faanatinati ia i tatou uma taitoatasi ia ola e tusa ma o tatou avanoa o e umiaina le perisitua. I se aso a sau, ena o alii lava na latou tauaveina ma le manatu mamafa lo latou perisitua, e ala i le saili atu ma le filiga ina ia aoaoina e le Alii lava Ia, o le a mafai ona faamanuiaina, taialaina, puipuia, faamalosia, ma faamaloloina isi. Ua na o se tagata lava na te totogiina le tau mo le mana o le perisitua o le a mafai ona ia aumaia vavega ia i latou e alofa i ai ma tausia lana faaipoipoga ma le aiga i le saogalemu, i le taimi nei ma le faavavau atoa.

O le a la le tau e atiae ai lea mana o le perisitua? O le Aposetolo sinia a le Faaola, o Peteru—le Peteru lava lea na faatasi ma Iakopo ma Ioane ia na faaeeina mai le Perisitua Mekisateko i luga o Iosefa Samita ma Oliva Kaotui⁸—na tautino maia uiga lelei e tatau ona tatou sailia “ina ia tofusia faatasi ai … i le amio Atua.”⁹

Ata

O Peteru, Iakopo, ma Ioane o loo faaee atu le Perisitua Mekisateko.

Sa ia ta’ua le faatuatua, amio mama, iloa, faapalepale, onosai, amioatua, alofa faauso, alofa mama, ma le filiga.¹⁰ Ae aua nei galo le lotomaualalo!¹¹ O lea ou te fesili ai, o le a se tala a tagata o lou aiga, o uo, ma tagata tou te faigaluega faatasi ia te oe ma a’u i le atiaeina o nei meaalofa ma isi meaalofa faaleagaga?¹² O le faateleina lava o le atiaeina o na uiga lelei, o le faateleina foi lena o lo tatou mana o le perisitua.

O le a se isi mea e mafai ona tatou faateleina ai lo tatou mana i le perisitua? E manaomia ona tatou tatalo mai i o tatou loto. O le talanoaina ma le faaaloalo o gaoioiga ua te’a ma gaoioiga o loo loma, ma faaiuina i ni nai talosaga mo ni faamanuiaga, e le mafai ona tupu ai le ituaiga o talanoaga ma le Atua lea e aumaia le mana tumau. O e loto ea e tatalo ia iloa le auala e tatalo ai mo le mana tumau? O le a aoao oe e le Alii.

O e loto ea e saili i tusitusiga paia ma taumafa i afioga a Keriso¹³—ia suesue ma le naunautai ina ia mafai ai ona maua atili le mana? Afai e te manao ina ia vaaia le liusuavaia o le loto o lou toalua, tuu atu ia ona maua oe i luga o le Initoneti o loo e suesueina le aoaoga faavae a Keriso¹⁴ po o le faitauina foi o au tusitusiga paia!

O e loto ea e tapuai soo i le malumalu? E fiafia le Alii e faia Lana lava aoaoga i totonu o Lona maota paia. Mafaufau i Lona fiafia pe afai e te fesili atu ia te Ia e aoao oe e uiga i ki o le perisitua, le pule, ma le mana a o e mauaina le aafiaga o sauniga o le Perisitua Mekisateko i totonu o le malumalu paia.¹⁵ Mafaufau i le faateleina o le mana o le perisitua lea e mafai ona avea mā oe.

O e loto ea e mulimuli i le faataitaiga a Peresitene Thomas S. Monson o le auauna atu i isi? Mo le tele o tausaga o loo savalia pea le auala umi i le aiga, mulimuli i uunaiga a le Agaga ma taunuu atu i le faitotoa o se tasi ona faalogo atu lea i ni upu e pei o le, “Na faapefea ona e iloaina o nei e faamanatu ai le maliu o lo ma afafine?” po o le “Na faapefea ona e iloaina o lo’u aso fanau?” Ma, afai e te fia manao moni lava i se mana sili atu o le perisitua, o le a e faamemelo ma tausi lou toalua, taliaina uma o ia ma ana fautuaga.

O lenei, afai ua tele naua nei mea, faamolemole mafaufau i le eseesega o a tatou mafutaga ma o tatou taitoalua, fanau, ma uo i le galuega pe afai e tutusa lo tatou popole e uiga i le mauaina o le mana o le perisitua ma lo tatou popole i le alualu i luma i le galuega po o le faateleina o le tupe i a tatou teugatupe i le faletupe. Afai o le a tatou faamaulalo i tatou lava i luma o le Alii ma ole atu ia te Ia e aoao i tatou, o le a Ia faaali mai ia i tatou le auala e faateleina ai lo tatou mauaina o Lona mana.

I nei aso e gata ai, ua tatou iloaina o le a i ai mafuie i nofoaga eseese.¹⁶ Masalo o se tasi o na nofoaga ese o le a i ai i o tatou lava fale, lea atonu o loo tutupu ai ni mafuie faalelagona, faaletupe, pe faaleagaga. E mafai e le mana o le perisitua ona faafilemuina sami sousou ma faaleleia mea ua nutimomoia i le lalolagi. E mafai foi e le mana o le perisitua ona faafilemuina mafaufau ma faamalolo mea ua nutimomoia i loto o i latou tatou te alolofa i ai.

Pe o tatou loto ea e tatalo, anapopogi, suesue, tapuai, ma auauna atu o ni alii o le Atua ina ia mafai ai ona tatou mauaina lena ituaiga o mana o le perisitua? Ona o le naunau o teineiti e toalua ina ia faamauina i lo la aiga, o lea sa naunau ai foi lo la tama ma le tuagane ina ia totogi le tau e umia ai le Perisitua Mekisateko paia.

Ou uso pele, ua tuuina mai ia i tatou se tiutetauave paia—le pule a le Atua e faamanuia ai isi. Tau ina ia tutulai ae i tatou taitoatasi o ni alii ua muaifaauuina i ai i tatou e le Atua ia avea ai—saunia e tauave le perisitua a le Atua ma le lototoa, naunau e totogi soo se tau e manaomia e faateleina ai lona mana i le perisitua. Faatasi ai ma lena mana, e mafai ai ona tatou fesoasoani i le lalolagi mo le Afio Mai Faalua o lo tatou Faaola, o Iesu Keriso. O Lana Ekalesia lenei, ua taitaia e Lana perofeta, o Peresitene Thomas S. Monson, o le ua ou alofa faapelepele i ai ma lagolagoina. Ou te molimau atu ai i le suafa o Iesu Keriso, amene.