2010–2019
Te ho’o o te mana autahu’ara’a
Eperera 2016


Te ho’o o te mana autahu’ara’a

’Ua hina’aro ānei tātou ’ia pure, ha’apae i te mā’a, tuatāpapa, ’imi, ha’amori ’e tāvini ’ei tāne nō te Atua, ’ia noa’a ia tātou te mana autahu’ara’a ?

’A ono ’āva’e, i roto i te’āmuira’a rahi nō ’ātopa ra, ’ua paraparau vau i te mau tuahine o te ’Ēkālesia nō ni’a i tā rātou hōpoi’a hanahana ’ei vahine nō te Atua. I teienei, tē hina’aro nei au ’ia paraparau i te mau taea’e nō ni’a i tā rātou hōpoi’a hanahana ’ei tāne nō te Atua. ’Ia tere au nā te ao nei, e māere au i te pūai ’e te maita’i mau o te mau tāne ’e te mau tamaroa o teie nei ’Ēkālesia. E’ita roa atu e nehenehe e tai’o i te mau ’ā’au tei fa’aorahia ’e te mau orara’a tei fa’ateiteihia e’outou. Māuruuru !

I roto i te ’āmuira’a i ma’iri, i fa’ati’a na vau i te ’ohipa teimaha roa tei tupu ’a rave rahi matahiti i teienei, ’ei taote tāpū māfatu, ’aita i noa’a iā’u ’ia fa’aora e piti tuahine iti. ’Ua fāri’i tō rāua metua tāne ’ia fa’ahiti atu ā vau nō ni’a i te ’utuāfare.

E toru tamari’i ma’i puna (congénital) tā Ruth ’e Jimmy Hatfield i fānau. Te tamaiti mātāmua, ’o Jimmy Jr. tei pohe ’aita rā i hope roa te māhuira’a ma’i (diagnostique) i te ravehia. I reira vau i te taera’a mai, tē ’imi ra teie nā metua i te tauturu nō tā rāua nā tamahine e piti, ’o Laural Ann ’e tōna teina Gay Lynn. ’Ua mamae roa tō’u ’ā’au i te pohera’a teie nā tamahine to’opiti i muri mai i te tāpūra’a.1 E nehenehe ihoa ïa e feruri ē, ’ua hu’ahu’a roa ’o Ruth ’e Jimmy i te pae vārua.

Tau matahiti i ma’iri tō’u ’itera’a ē, i vai noa tō rāua ’ino’ino iti rahi iā’u ’e i te ’Ēkālesia. Fātata e ono ’ahuru matahiti tō’u māna’ona’o-noa-ra’a i teie ’ohipa ’e te māuiui o te ’utuāfare Hatfiled. ’Ua tāmata noa vau i te ’imi ’ia farerei ia rāua, ’aita rā i manuia.

I te hō’ē rā pō, i te ’āva’e nō mē i ma’iri, ’ua fa’aara teie nā tamahine i te tahi atu pae o te pāruru iā’u. ’Aita vau i ’ite ’e i fa’aro’o ia rāua i roto i te tino, ’ua ’ite rā vau tei ’ō nei rāua. I roto i te vārua, ’ua fa’aro’o vau i tā rāua tāparura’a. Poto noa te poro’i, e mea pāpū rā : « E te taea’e Nelson, ’aita māua i tā’atihia ! E ti’a ānei ia ’oe ’ia tauturu mai ? » ’Aita i maoro roa, tē fa’aro’o ra vau ’ua pohe tō rāua metua vahine ’e tē ora noa ra te metua tāne ’e te teina tamaroa.

’Ua fa’aitoito te mau tāparura’a a Laural Ann ’e Gay Lynn iā’u, ’e ’ua tāmata fa’ahou atu ra vau i te farerei i tō rāua metua tāne e ora ra ’e tāna tamaiti ’o Shawn. I teie rā taime, ’ua fāri’i rāua e farerei iā’u.

I te ’āva’e tiunu ra, ’ua tūturi roa vau i mua ia Jimmy, 88 matahiti, ’e ’ua paraparau māua i te hōhonu o tō māua ’ā’au. ’Ua parau vau iāna nō te tāparura’a a tāna nā tamahine ma te parau ato’a ē, e faufa’a ta’a ’ē nō’u ’āhani e rave au i te mau ’ōro’a tā’atira’a nō te ’utuāfare. ’Ua parau ato’a vau ia rāua ē, e tītauhia te taime roa ’e tā rāua Shawn tauto’ora’a nō te fa’aineine, ’ia ti’amā rāua nō te tomo i roto i te hiero, inaha ’aita hō’ē o rāua i fāri’i i te ’ōro’a hiero.

E nehenehe roa e fāfā i te Vārua o te Fatu i reira. ’E i te fāri’ira’a Jimmy rāua Shawn i tā’u anira’a, ’oa’oa iti rahi tō’u ! ’Ua ’ohipa rāua ma te itoito ’e tō rāua peresideni titi, te ’episekōpo, nā ha’api’i ’utuāfare ’e te ta’ata fa’atere ’ohipa misiōnare (DMP), nā reira ato’a ’e te mau misiōnare rave tāmau ’e te hō’ē nā misiōnare fa’aipoipo. Ē ’aita i maoro a’enei, nā’u te ha’amaita’ira’a rahi i te tā’atira’a ia Ruth ’e ’o Jimmy ’e tā rāua nā tamari’i e maha. ’Ua ta’i roa māua Wendy ’a pārahi ai māua i roto i te reira ’ōro’a nehenehe roa. Nau ’ā’au tei fa’aorahia i tera ra mahana !

Hōho’a
’O Elder Nelson ’e te tuahine Nelson i te hiero, ’e te ’utuāfare Hatfield

’A feruri ai au i te reira, ’ua fa’ahiahia roa vau ia Jimmy ’e Shawn ’e te mea tā rāua i hina’aro ’ia rave. ’Ua riro roa mai rāua ’ei ’aito nō’u. ’Ahani pa’i e fāri’ihia te hia’ai o tō’u ’ā’au, e hina’aro vau ’ia fa’a’ite mai te mau tāne ’e te tamaroa ato’a o te ’Ēkālesia i te itoito, te pūai ’e te haeha’a mai teie metua tāne ’e teie tamaiti. ’Ua hina’aro roa rāua ’ia fa’a’ore i te hapa ’e ’ia vaiiho i te mau māuiui ’e te mau peu tahito. ’Ua hina’aro roa rāua ’ia auraro i te arata’ira’a a tō rāua feiā fa’atere o te autahu’ara’a, ’ia tāmā ’e ’ia fa’arahihia rāua e te Tāra’ehara a Iesu Mesia. Rāua tāta’itahi tei hina’aro ’ia riro mai ’ei tāne ’o te mau ti’amā i te autahu’ara’a « tei au i te ha’apa’ora’a mo’a roa a’e a te Atua ».2

Te maura’a, ’oia ho’i, te ’amora’a i te teimaha o te mea e mauhia nei. E ti’aturira’a mo’a roa te maura’a i te autahu’ara’a, ’o te mana pūai hope ho’i ’e te ha’amanara’a nā te Atua ra. ’A feruri na : te autahu’ara’a i hōro’ahia mai ia tātou, ’o taua mana iho ïa ’e te ha’amanara’a i hāmani ai te Atua i teie ao ’e te vai atu ra e’ita e nehenehe e tai’o, ’o te fa’atere nei i te ra’i ’e te fenua nei ’e ’o te fa’ateitei atu i Tāna mau tamari’i ha’apa’o.3

’Aita i maoro a’enei, tei te purera’a māua ’o Wendy, tē pārahi hau noa ra te fa’ata’i hāmonia, ineine roa nō te hīmene mātāmua. Tei ni’a tōna mata i te parau ’e tei ni’a te manimani rima i te hāmonia. Ha’amata ihora ’oia i te tāumi i te hāmonia, ’aita hō’ē a’e māniania i mātara mai. Parau marū atu ra vau ia Wendy, « ’Aita e uira ». Tā’u i mana’o, ’oia ho’i, ’ua fa’ataupupu te tahi mea i te uira ’ia tae i te hāmonia.

E te mau taea’e, ’ia au i teie hi’ora’a, tē mata’u nei au ē e rave rahi roa tāne tei hōro’ahia te ha’amanara’a autahuʻara’a ’ua ’ere rā te mana autahu’ara’a nō te taupupura’a te mani’ira’a o te mana i te mau hara mai te hupehupe, te parau ti’a ’ore, te te’ote’o, te peu vi’ivi’i ’e ’aore rā te ha’ape’ape’ara’a i te mau mea o teie nei ao.

Tē mata’u nei au ē, ’ua rahi roa ino te feiā e mau nei i te autahu’ara’a tei rave i te pae iti noa, ’e ’aore rā ’aita hō’ē mea i ravehia, nō te fa’arahi i te ’aravihi ’ia mātara mai nō rātou te mau mana o te ra’i. Tē ha’ape’ape’a nei au i te mau pu’era’a ato’a tei vi’ivi’i te mana’o, te ’ā’au ’e te ’ohipa ’e ’aore rā tei fa’a’ino i tā rātou vahine ’e te mau tamari’i, ’e nā roto i te reira tē tāpū nei ia rātou i te mana autahu’ara’a.

Tē mata’u nei au ’e te ’oto nei ho’i au i te rahi roa ino tei tu’u i tō rātou ti’amāra’a ’ia mā’iti i roto i te rima o te ’enemi ’e tē parau nei tā rātou mau ravera’a ē, « ’O tō’u hina’aro te mea hau a’e i te maura’a i te mana o te Fa’aora ’ia ha’amaita’i ia vetahi ’ē ».

Tē mata’u nei au te mau taea’e ē, e ara mai te tahi pu’era’a o tātou i te hō’ē mahana nō te ’ite e aha mau ra te mana i roto i te autahu’ara’a ’ei reira e tātarahapa rahi atu ai ē, ’ua rahi roa tō rātou taime i te ’imira’a i te mana i ni’a i te tahi ’e ’aore rā i roto i te ’ohipa, i te ha’api’ira’a ’ia fa’a’ohipa hope i te mana o te Atua.4 ’Ua ha’api’i te peresideni George Albert Smith ē, « ’aita tātou i ’ō nei nō te ha’apau i te mau hora o te orara’a ’e haere atu ai i te hō’ē ao nō te fa’ateiteira’a ; tei ’ō nei rā tātou nō te fa’aineine ia tātou i terā mahana ’e terā mahana nō te ti’ara’a tā tō tātou Metua e tia’i ra ’ia ’amo tātou ’āraua’e ».5

No te aha ra te hō’ē ta’ata e ha’amāu’a ai i tōna pu’e mahana nō te merēti mā’a pipi6 a Esau, tē ti’aturihia nei ho’i ’oia ’ia fāri’i i te mau ha’amaita’ira’a ato’a nō Aberahama ?7

Tē tāparu rū nei au ia tātou tāta’itahi ’ia ora i te fāito o tā tātou mau faufa’a ta’a ’ē ’ei feiā tei mau i te autahu’ara’a. I te hō’ē mahana i muri nei, ’o te mau tāne ana’e i ha’apa’o maite i tā rātou autahu’ara’a, nā roto i te ’imi-itoito-ra’a ’ia ha’api’ihia mai e te Fatu Iho, rātou te nehenehe e ha’amaita’i, e arata’i, e pāruru, e ha’apūai ’e e fa’aora ia vetahi ’ē. ’O te tāne ana’e tei ’aufau i te ho’o nō te mana autahu’ara’a te nehenehe e fa’atupu mai i te mau semeio nō te ta’ata tāna i here ma te pāruru ato’a i tāna fa’aipoipora’a ’e tōna ’utuāfare, i teienei ’e i roto i te mure ’ore.

E aha te ho’o nō te noa’a mai te reira mana autahu’ara’a ? Teie tā te ’āpōsetolo matahitapo a te Fa’aora, ’o Petero—taua Petero ra ’e ’o Iakobo ’e ’o Ioane i fa’aho’i i te autahu’ara’a Melehizedeka ia Iosepha Semita ’e Oliver Cowdery8—i parau nō te mau maita’i e ’imi atu ’ia noa’a « te huru Atua i reira ».9

Hōho’a
Tē hōro’a nei Petero, Iakobo ’e Ioane i te Autahu’ara’a a Melehizedeka.

’Ua parau ’oia nō te fa’aro’o, te vi’ivi’i ’ore, te ’ite, te hitahita ’ore, te fa’a’oroma’i, te huru paieti, te aroha taea’e, te ’ā’au aroha ’e te itoito.10 ’Eiaha ato’a e ha’amo’e i te haeha’a i te ’ā’au !11 Nō reira, tē ani nei au, e aha tā te mau melo ’utuāfare, te mau hoa ’e te mau hoa ’ohipa e parau nō ’outou ’e nō’u nei nō ni’a i tā tātou fa’atupura’a i teie ’e te tahi ato’a mau hōro’a pae vārua ?12 Rahi noa atu teie mau huru e fa’atupuhia, rahi noa ato’a atu tō tātou mana autahu’ara’a.

E aha atu ā te nehenehe e fa’arahi i tō tātou mana i roto i te autahu’ara’a ? Tītauhia ’ia pure tātou ma tō tātou ’ā’au. Te fa’ahiti-au-noa-ra’a i te mau ’ohipa i ravehia ’e ’o te tupu mai, ’e te tahi ri’i ato’a mau tītaura’a ha’amaita’ira’a, e ’ere ïa te huru ’āparaura’a ’e te Atua e fa’atae mai i te mana vai maoro. ’Ua hina’aro ānei ’outou ’ia pure nō te ’ite nāhea i te pure nō te mana rahi a’e ? Nā te Fatu e ha’api’i mai ia ’outou.

’Ua hina’aro ānei ’outou ’ia mā’imi i te mau pāpa’ira’a mo’a ’e ’ia ’oa’oa noa i te mau parau a te Mesia13—’ia tuatāpapa pāpū ’ia noa’a mai i te mana rahi atu ? Mai te peu ’ua hina’aro ’outou ’ia putapū te ’ā’au o tā ’outou vahine, ’a haere i ni’a i te ’itenati e tuatāpapa ai i te ha’api’ira’a tumu a te Mesia14 ’e ’aore rā te mau pāpa’ira’a mo’a, ’ia ’ite mai ’ōna ia ’outou.

’Ua hina’aro ānei ’outou ’ia ha’amori tāmau i roto i te hiero ? E mea au roa nā te Fatu ’ia hōro’a i Tāna iho ha’api’ira’a i roto i Tōna fare mo’a. ’A feruri noa a’e i Tōna māuruuru mai te peu e ani ’outou Iāna ’ia ha’api’i mai ia ’outou nō ni’a i te mau tāviri autahu’ara’a, te ha’amanara’a ’e te mana ’a nā roto ai ’outou i te mau ’ōro’a o te autahu’ara’a a Melehizedeka i roto i te hiero mo’a.15 ’A feruri a’e i te tupu-rahi-ra’a o te mana autahu’ara’a nō ’outou.

’Ua hina’aro ānei ’outou ’ia pe’e i te hi’ora’a o te peresideni Thomas S. Monson nō te tāvinira’a ? ’Ahuru ’e ’ahuru matahiti tōna tipu’ura’a hou ’a ho’i ai i te fare nō te pe’e i te mau muhumuhu a te Vārua, ’ia haere i mua i te ’ūputa o te tahi ta’ata ’e fa’aro’o ai i te parau, « Nāhea ’oe i te ’itera’a ē, e mahana teie i fa’aru’e ai tā māua tamahine ? » ’e ’aore rā « Nāhea ’oe i te ’itera’a ē, e mahana fānaura’a nō’u ? » ’E mai te peu ’ua hina’aro ’outou i te mana autahu’ara’a rahi atu ā, ’a poihere ’e ’a aupuru i tā ’outou vahine, ’a tauahi iāna ’e tāna mau parau a’o.

I teienei, mai te peu ’ua rahi roa teie nō tō ’outou tari’a, ’a feruri i te maita’i e tupu i roto i tō ’outou aura’a ’e tā ’outou vahine, te mau tamari’i ’e te mau hoa ’ohipa mai te peu ’ua ’aifaito tā tātou māna’ona’ora’a i te noa’ara’a te mana autahu’ara’a, ’e te haerera’a i mua i te ’ohipa ’e te fa’arahira’a i tā tātou moni i te fare moni. Mai te peu e ti’a tātou i mua i te aro o te Fatu ma te ha’eha’a, ma te ani Iāna ’ia ha’api’i mai ia tātou, Nāna e fa’a’ite mai nāhea i te ha’amātara rahi atu ā nō tātouTōna mana.

I roto i teie mau mahana hope’a nei, ’ua ’ite tātou e tupu mai te mau ’āueuera’a fenua i te mau vāhi rau.16 Penei a’e te hō’ē o taua mau vāhi ra, ’o tō tātou iho ïa fare i reira e tupu ai te mau ’āueuera’a i te pae mānava, i te pae moni ’e te pae vārua. E nehenehe i te mana autahu’ara’a ’ia tāmarū i te miti ’e fa’a’ore i te ’afāra’a o te fenua. E nehenehe ato’a i te mana autahu’ara’a ’ia tāmarū i te ferurira’a ’e fa’aora i te ’afāfāra’a o te ’ā’au o te ta’ata tā tātou i here.

’Ua hina’aro ānei tātou ’ia pure, ha’apae i te mā’a, tuatāpapa, ’imi, ha’amori ’e tāvini ’ei tāne nō te Atua, ’ia noa’a ia tātou taua huru mana autahu’ara’a ra ? Maoti te hia’ai o terā nā tamahine iti ’ia tā’atihia rāua i tō rāua ’utuāfare, te metua tāne ’e te taea’e i hina’aro ai ’ia ’aufau i te ho’o nō te mau i te autahu’ara’a mo’a a Melehizedeka.

E au mau taea’e here, e ti’aturira’a mo’a tei ni’a ia tātou—te ha’amanara’a a te Atua nō te ha’amaita’i ia vetahi ’ē. ’Ia ti’a tātou tāta’itahi i te fāito o te tāne tā te Atua i fa’atōro’a ātea ia tātou ’ia riro mai—ineine nō te mau itoito i te autahu’ara’a a te Atua, ma te hia’ai ’ia ’aufau i te ho’o nō te fa’arahi i tō tātou mana i roto i te autahu’ara’a, noa atu te ho’o. Nā roto i terā mana tātou e tauturu ai i teie nei ao ’ia fa’aineine nō te Tae-piti-ra’a mai o tō tātou Fa’aora, ’o Iesu Mesia. ’O teie Tāna ’Ēkālesia, tei arata’ihia e Tāna peropheta, te peresideni Thomas S. Monson, ’o tā’u i here rahi ’e ’o tā’u e pāturu rahi nei. Tē fa’a’ite pāpū nei au i te reira i te i’oa o Iesu Mesia, ’āmene.