Te Tabo ae Tabu ibukin Kaokan te Euangkerio

Raoraou ae tamaroa ae kaain te Ekaretia e kataia inanon ririki n reireinai te euangkerio ibukiia utu aika akea tokiia. Tiaki ni karokoa rokou are I ira kaukan Temboran São Paulo n Okitobwa 1978 ao n rin n te ruu ni kabaebae bwa te reirei ibukiia utu aika akea tokiia iai uaana nakoiu, ao inanon boong I tataro ni kan ataia ngkana aei te Ekaretia ae koaua.

I aki rang taua te aro, ma I a tia ni kaikawaaki rake irouia kaaro ake bon kaain te aro, ao I a tia n noora te bwai ae tamaroa n aro ake tabeua. N te tai anne inanon maiu, I taku bwa ni kabane aaro a butimwaeaki iroun te Atua.

Imwiin nakou nakon kaukan te tembora, I ukora te kaeka rinanon te tataro, ni karekea au onimaki ao te onimaki ae koaua bwa te Atua e na kaekaai, are bon Ana Ekaretia iaon te aba.

Imwiin te korakai ae korakora n te tamnei, n te kabane I karekea te kaeka ae itiaki. I kaoaki bwa N na bwabetitoaki. E riki au bwabetito n te kabane n Okitobwa 31, 1978, n te tairiki imwaain te tetere ibukin katabuan Temboran São Paulo.

I nooria bwa te Uea e ataia ao n rangin tabeakinai ngkai E kaekai au tataro.

N te ingabong are imwiina Ngai ma kainnabau ti nako São Paulo n ira te tataro ni katabu ibukin te tembora.

Ti mena ikekei, ma I aki rangin ataia raoi bwa ti na kanga ni kakaitau ibukin te tai ane e kakateke anne. Te bong are imwiina ti ira te maungatabu n te aono.

Ti a tia ni waakina maiura n aroia kaain te Ekaretia, ao ti kuneia raoraora aika tikiraoi are a butimwaaira n te tai are a bitaki iai maiura.

Te kiraati ibukiia aika boou are ti kaea n ara bootaki n te Tabati ni katoa wiiki a kakateke. A kaoniira ma te rabakau ao n anganiira te kantaninga ibukin te wiiki bwa ti na waekoa n nako ngaia n te Tabati ti na karekea riki ae mwaiti ni kamwarakean tamneira.

Ngai ma kainnabau ti ingainga ni kariaria rokora n te tembora ni kabaeira ma ara utu n aki toki. E riki anne teuana te ririki ao itibong te bong imwiina imwiin au bwabetito, are bon te tai ae kakateke. I namakinna bwa I kona n noora ae akea tokina n te bao ni karea imarenan baike a kaoti mai imwaaina ao imwiin te kabaebae.

Te maeka n ae ataaki n te tua i Mataniwin Mainikun te United States ibukin tabeua te ririki, I taraa teutana ni kinai taian aba, ao angiina a uarereke.

Ngke I wareka ke n ongora rongorongon taai ake a riki imwaain te Moan kaotioti, a taekinaki aomata aika mwaiti, ao aei akea nanona nakoiu.

I moanna ni karekei titiraki n au iango. Bukin tera te Ekaretia e riai ni manga kaokaki n te United States ao tiaki i Brazil ke i Itare, abaia au bakatibu?

A mena ia kurubu n aomata ake a taekinaki naake a irekereke ni baike a manga moan mutiakinaki n te aro ao te mangaongao n taian aro—are a bane n riki mai iai n te tabo ae rau ao n aki karongoa?

I titirakiniia aomata aika mwaiti ibukina ma akea kaekaana. I wareki bwaai ni kabane are I kona n te taetae ni Portugal ao ngkanne n te taetae n Imatang ma akea te bwai ae I kunea are e kona iai ni karaua nanou. I reitinako ni ukeuke.

N Okitobwa 1984, I ira te maungatabu ni kabuta n aron ae te kauntira n te beretitentii n te titeiki. Imwiina, I nako n tii ngai nako Palmyra, New York, n ingainga ni karekea te kaeka.

N rokou ikekei, I kataia n oota: Bukin tera Kaokan te Euangkerio e riai ni mena ikai, ao bukin tera e kakiriweea te tamnei? A roko maia aomata akana a taekinaki akanne n ana rongorongo Iotebwa? Bukin tera a mena ikanne?

N te tai anne, te kaeka nakoiu ae iai bukina ibukin ana Karao Tua te U.S e beritanaki ibukin te inaomata.

Te moaningabong I mwananga ni kawara te Kateitei ae Grandin, ike e rinanoaki iai moan bwereetiakin ana Boki Moomon. I a nako n te Buakonikai ae Tabu, ike e bati au tatataro iai.

E kuri n akea te aomata iaon te kawai n te taaun anne ae Palmyra. A mena ia koraki n aomata ake e taekiniia Iotebwa?

Te bwakantaai I baireia bwa N na nakon ana tabo ni man Peter Whitmer, ao ngke I roko ikekei, I kunea te mwaane ni wintoon te kaebin. A takia kanoan matana. I kamauria ao ngkanne I moanna n titiraki n aekan naba titiraki akanne.

Ngkanne e titirakinai, “E reke am tai?” I taku eng.

E kamataata bwa Lakes Erie ao Ontario ao, ae raroa nako mainuku, te Karaanga ae Hudson a mena ni mwakoron te aba anne.

Ni moan te 1800 a baireia bwa a na katea te rawa ibukin te boborau ae e na kakoroaki nanona rinanon mwakoron te aba anne, are e a anaanau riki nakon 300 te maaire (480 te kiromiita) ni karoko n te Karaanga ae Hudson. Bon te bwai ae kamiimi ibukin te tai anne, ao a ti kona n onimakina ana mwakuri te aomata ao mwaakan te man.

Palmyra bon te tienta ibukin tabeua kateitei akanne. Taan kateitei a kainnanoia aomata ake a konabwai, taan iti, utu, ao raoraoia. Angiina aomata a moanna n roko man taaun aika uakaan ao taabo ake a raroanako, n aron Ireland, ni mwakuria te rawa.

Anne bon te tai ae tabu ao ni kororaoi ibukina n te kabane I a kuneia koraki n aomata. A uota aia katei ao aia koaua. Te mwaane anne ngke e taekina aia koaua, e kaotaaki au iango ao matau n tamnei a kaureaki iroun te Atua.

N te tai anne, I oota e kanga ana anainano te Atua ae Tamara, ni Wanawanana ae moan te korakora, n Ana babaire e a tia ni katauraoa te tabo ni kaira te ataeinimwaane ae Iotebwa Timiti nako iai, ni kaakia ibuakoia aro aika kamangaongao, ibukina ikanne, iaon te Tabuki i Komora, bwaatua aika onoti ibukin ana Boki Moomon a karabaaki iai.

Aei te tabo ibukin Kaokan te Euangkerio, ike e na ongo te aba bwanaan te Tama imwiin kaanian uoua tengaa te ririki inanon te mii ni burabeti ae kamiimi, n taetae nakon te ataei ae Iotebwa Timiti, ngke e nako n te Buakonikai ae Tabu bwa e na tataro ao n ongoraeaki ana tataro: “Bon Natiu aei Ae rineaki i Rou. Kam na ongo i Rouna!”¹

Ikanne e nooria uoman aomata, ake ootaia ao mimitongiia a taboa kabwarabwarakiia. Eng, te Atua e a manga kaotia riki nakon te aomata. Karakon ataakin te euangkerio are e rabuna aon te aba e a moanna ni mauna nako.

Te taetae ni burabeti ni kaineti ma Kaokan te Euangkerio e a moanna ni korobukina: “Ao I nora te anera temanna ba e kibakiba i nukan karawa, ao iai i rouna te euangkerio ae aki totoki ba e na taekinna nakoia ake a maeka i aon te aba, nakoia botanaomata ni kabaneia, ma baronga, ma taian taetae, ma natanaomata.”²

N tabeua ririki aika kimototo, e kairaki Iotebwa nakon rongorongon taian taetae ni burabeti, berita aika tabu, ao otenanti ake a katukaki irouia burabeti ake ngkoa, ana Boki Moomon ae tangiraki iroura.

Ana Ekaretia Iesu Kristo e aki kona ni manga kaokaki n akea te euangkerio ae akea tokina are e kaotaki n ana Boki Moomon bwa kakoauan taekan Iesu Kristo, Natin te Atua, ana Tibu Teteei te Atua, are e uota buren te aonaaba.

E taku Kristo nakoia Ana aomata i Ierutarem:

“Iai riki au tibu tabemwaang, ake tiaki kain te nanai aio.”³

“Boni Ngai te tia kawakin tibu ae raoiroi, ao I ataia au tibu, ao a atai au tibu.”⁴

Ngke I kitana ana tabo ni man Whitmer, I aki uringnga ni kaboo. I ti uringa raninmatau ni waanako iaon ubu. Taai e mena i karawa ao moan te tikiraoi.

Iai te kimwareirei ae moan te korakora inanou ao te rau e kamaraua tamneiu. I kaonaki ma te kakaitau.

I mataata raoi bwa tera bukina. Teuana riki te Uea e a tia n anganai te rabakau ao te oota.

Ni mwanangau n okira mweengau, booki aika a tabu a reitinako n rin inanou: berita ake a karaoaki nakon te Tama Aberaam ake inanon ana kariki bon utu n te aonaaba aika a na kakabwaiaki.⁵

Ao ibukin aei, tembora a na kateaki bwa e aonga te mwaaka ae tabu ni katokaki iaoia aomata teuana riki te tai iaon te aba bwa aonga utu ni kona n ikotaki, tiaki ni karokoa e karaureia nako te mate ma ni ikotaki n aki toki.

“Ao ni bong aikai, ao e na kateimatoaki maungani maneaban Iehova i aon taubukini maunga, e na karietataaki riki nakon tabuki; ao a na bane n ranga botanaomata nako nanona.”⁶

Ngkana ngkoe ae ko ongo irou iai am titiraki inanom, tai bwarannano!

I kaoi ngkami n iriira ana katooto te Burabeti Iotebwa Timiti ngke e wareka Iakobo 1:5, “Ngkana akea ana rabakau temanna i buakomi, ao e na butia te Atua, ae tituaraoi n angangania aomata ni kabaneia n aki nguengureakinia.”

Tera are e riki i Komora bon te mwakoro ae kakawaki ibukin Kaokan te Euangkerio, ngkai Iotebwa Timiti e karekei bwaatua ake inanon ana Boki Moomon. Te boki aei e buokiira ni kaniira riki nakon Kristo nakon taian boki riki tabeua iaon te aba.⁷

I kaota au koaua bwa te Uea e kateirakeia burabeti, taan mamata, ao taan kaotioti ni kaira Ueana ni boong aika kaitira ao bwa inanon ana babaire ae akea tokina utu nanona bwa a na ikotaki n aki toki. E tabeakiniia natina. E kaekai ara tataro.

Ibukin Ana tangira ae moan te korakora, Jesus Christ kamaiuira man ara bure. Boni Ngaia te Tia Kamaiua te aonaaba. I a taekin aikai n aran Iesu Kristo, amen.