Wasa Sarawi me Kopwurupwurdohn Rongamwahu Wiawi
Palmyra wia wasa me Kopwurupwudou wiawie, wasa me kapitien Sahmo pwurehng karongorong kereniong mwurin sounpar riekid.
Sounpar tohto kepoakepahi mwahu men me wia tohn Mwomwohdiso kin song en padahkihongie rongamwahuo ni ah kin kosokosoia peneinei soutuk. Ahpw mwurin ahi iang kohla ni open house en São Paulo Temple nan October 1978, ansou me I pidelong nan perehn katengetengdio, ih ansou me padahk en peneinei soutuk sair ahi mongiong, oh mwurin rahn kei I kapkapakapki I en ese ma Mwomwohdiso mehlel.
I sohte kin perenki sarawi ahpw I tikida rehn nohno pahpa me perenki sarawi oh kilang dahme mwahu sang pelien lamalam kan. Ansouo nan ahi mour, I kin medewe me Koht kupwurki pelien lamalam koaros.
Mwurin ahi pwarala nan tehnpas sarawi ansou me e ritidahn koaros, I kapakapki sang nan ahi pwoson oh koapwoaroapwoarki me Koht pahn sapengie, mehnia me Sapwellime Mwomwohdiso pohn sampah.
Mwurin ahi raparapahki laud, I ahpw alehdi pasapeng sansal. I alehdi luhk en pepdais, me wiawi nan Oakotope 31, 1978, nihpwohng o mwohnte kasarawi en São Paulo Temple.
Ih ansouo me I pehmada me Kauno mwahngih ihs ngehi oh kesempwalkinie pwe en sapeng ahi kapakap.
Mandahn rahno ngehi oh ahi pwoud kohla iang kasarawi en São Paulo Temple.
Se mih mwo, ahpw I sohte nohn ese ia mwomwen ahi pahn paiki ansou mwahuo. Pweidi manda kiht iang kapokon en area ehu.
Se tapiada aht mour nan Mwomwohdiso, oh se diar kempoakepaht mwahu me kin kasamwo kiht nan mour kapw wet.
Kaskuhl ong towe kapw kan me se kin iang rahn sarawih kan kan udahn mwahu. Re kin audehkin kiht marain oh kahrehda aht kin men wihko en mwadangete nek pwe Rahn sarawi sen kak pwurehng ale kakehlail en pali ngehn.
Ngehi oh ahi pwoud udahn kasik ansou me se pahn pidelong nan tehnpas sarawio pwe aht peneinei en katengetengpene ong mour soutuk. Met wiawi mwurin sounpar ehu oh rahn isuh mwurin ahi pepdaiso, me wia ansou kaperen. I pehm duwehte I kak kilang nan mour soutuk ni pei sarawio mwowe oh mwurin katengetengo.
Pwehki ahi kousonehr pali mese en United States sounpar kei ni ahi wia legal immigrants, I ekis esehla kahnihmw kan en wasahu, oh palilaud tikitik.
Pak tohto ansou me I kin wadek de rong duwen dahme wiawi mwohn First Vision ah wiawi, re kin kosoia duwen pokon en aramas kei, oh met I sohte wehwehki.
I tepda kalelapak nan ahi madamadau. Dahme kahrehda Mwomwohdiso kopwurupwurdo nan United States oh kaidehn Brazil de Italy, wasa me ahi peneinei kohsang?
Ia wasa me pokon en aramas kau me re kosoia mih ie, irail me iang taptapiada pelien lamalam oh sawehwehki pelien lamalam kan—koaros wiwiawi wasa me meleilei oh popohl?
I idek rehn aramas tohto ahpw sohte me sapengie. I wadek soahng koaros ni Portuguese oh English ahpw sohte diar mehkot me pahn kameleilei ahi mongiong. Ahpw I pil raparapahkihte.
Nan Oakotope 1984, I iang kapokon lap en Mwomwohdiso nin duwen ahi wia sounsawas nan stake presidensi. Mwurin mwo, I kohla Palmyra, inangih diar pasapeng.
Ni ahi lel mwo, I song en wehweh ki: Dahme kahrehda Kopwurupwurdohu wiawi wasaht, and dahme kahrehda e kapingiping? Ia wasa me aramas kau me ntingdi nan ahn Joseph kadehdehu kohsang ie? Dahme kahrehda irail mih mwo?
Ansouo, pasapeng me keieu wehwe ongie pwehki Constitution en U.S. kiheng irail saledek.
Nimensengo I tepda mwemweitih Grandin Building, wasa me Pwuhk en Mormon prinda ie. I kohla kilang ihmw sarawi meh pahieu me re kosoia, me mihmihte mwo. Ngehi eri kohla nan Sacred Grove, wasa me I kapakap laud.
Sohte me mwomwen moamoahl pohn ahl kan nan kahnihmwo tikitik en Palmyra. Iawasa me pwihn en aramas me Joseph kosoia mie?
Mwurin Souwasao I medewehda I pahn kohla ni ihmwen Peter Whitmer-o, oh ansou me I lel mwo, I kilangada ohl emen me mihmi ni wenihmwtok en ihmwo. Pohnmese inenen marain. I rahnmwahuih oh tepda kalelapak soangen peidek kau.
Ih eri kalelapak rehi, “Miehte ahmw ansou?” I sapengki ei.
E kawewehiengie me Lake Erie oh Lake Ontario oh, ekis keidihla, Hudson River mih nan wasah kau.
Nan tepin pahr 1800 irail pilada irail pahn wiahda dahu pwe irail en kak keid loale, dahuo pahn reireikihsang mwail 300 (483 km) lella Hudson River. E wia doadoahk mwahu ong ansou-o, oh ihte me irail kak doadoahngki ahn aramas doadoahk oh ahn mahn kehlail.
Palmyra wia werengen wasa me ekei doadoahko wiawi. Tohn doadoahk ko anahne aramas koahiek, technician kan, peneinei kan, oh kepoakepahrail kan. Tohto aramas tepda keseudo nan dauno sang nan daun teikan, ekei kohsang nan wasa doh ahpw mehlel Ireland, pwe irail en wia dahuo.
Ansouo e wia ansou sarawi oh meleilei ongie pwehki I diarehr wehwehn pwihn en aramaso. Irail wahdo arail tiahk kan oh dahme irail kamehlele kan. Ansou me e kosoia dahme irail kamehlele kan, ahi madamadau marainda oh Koht ritingada mesei kan en palingehn.
Ni ansouohte, I wewehkidahr duwen sapwellimen Koht eripit nan Sapwellime kosondi me e ketin kaunopada wasa me e pahn ketkihdo Joseph Smith, nanwerengen pelien lamalam kan me wie pingiping, pwehki wasahu, nan Cumorah, Pwuhk en Mormon nekinekla mwo.
Wasakiset me Kopwurupwurdohu wiawi ie, wasa me ngihl en Sahmo pwurehng mahsenie kereniong mwurin sounpar riekid, ni ah ketin pwarehng oh mamahseniong Joseph Smith, nan ansou me e kohla nan tuhke kau pwe en kapakap oh rong Koht mahsani “Met iei Sapwellimei. Karonge Ih!”1
Wasahu e udiahl kahlap riau, me marainera oh linganera sohte kak kawehwehda. Ei, Koht pwurehng pwarehng aramas. Rotorot me kipe sampah tepda sansarasang.
Kokohp kan en kopwurupwurdohu tepda wiwiawi. “I ahpw pil kilangada pil emen tohnleng me pipihr nanwerengen nanleng, me weuwa rongamwahu poatopoat ehu me e pahn lohkihong tohn sampah kan, oh ong wehi koaros, oh kadaudok koaros, oh lokaia koaros, oh [aramas koaros].”2
Mwurinte sounpar kei Joseph alehdi rekoht en kokohp kan, inou kan, oh tiahk sarawi kan me soukohp en mahsoko pwilikihdi, met iei Pwuhk en Mormon.
Mwomwohdiso en Sises Krais sohte kak kopwurupwurdo ma sohte rongamwahu me ntingdi nan Pwuhk en Mormon oh wia ehu kadehde en Sises Krais, me iei Sapwellimen Koht, Simpwul en Koht, me kihsang dihp en sampah.
Krais mahsanih ong Sapwellime aramas ko nan Jerusalem:
“Pil mie ekei nei sihpw, me sohte mi nan kehl wet.”3
“Ngehi me silepen sihpw mwahu…, oh I ese nei sihpw kan oh irail pil kin ese ie.”4
Ansou me I mwesel sang imwen Whitmer-o, I sohte taman wia ahi rahn mwahu. Ihte me I taman pilen mesei keredi pohn meseie. Ketipino kihrla ni mesenleng ni ah udahn lingan.
Nan ahi mohngiong ansouo direkihla peren oh popohl mih loaleie. I direkihla kaping.
Met I wehwehki mwahu kahrepe. Kauno pwurehng ketkihdo eripit oh marain.
Ni ahi pwurupwurala imweio, iren pwuhk sarawi kan kin kohkohdo nan ahi madamadau; inou kan me wiawihda ong Pahpa Abram me sang ni wah peneinei kan en sampah pahn kapaikihda.5
Oh pwehki met, tehnpas sarawi kan pahn kokouda pwe manaman sarawio en pwurehng kohieng aramas pohn sampah pwe peneinei kan en kak katengetengpene kohkohlahte, kaidehn lel mehla a irail tohrohr peseng ahpw ehupene kohkohlahte.
“Ni rahn ekei me pahn kohdo, nahnao wasa me sapwellimen Kauno Tehnpas Sarawio kokouda ie, pahn wiahla nahna keieu ile, ilehsang dohl akan koaros. Wehi tohto pahn kin pokondohng [ie].6
Ma kumwail me rongorongie mie amwail kalelapak nan amwail mohngiong, dehr pwangahkihda!
I luke kumwail en idawehn karasaras en Soukohp Joseph Smith me wadek nan Seims 1:5:: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie.”
Dahme wiawi nan Cumorah udahn kesempwal nan Kopwurupwurdohu, nin duwen Joseph Smith alehdi pleitko me Pwuhk en Mormon mih loale. Pwuhk wet sowese kitail karanihla Krais sang pwuhk koaros pohn sampah.7
I kadehdehki me Kauno malipe soukohp kan, ohl keidi sarawi kan, oh soun kaudiahl akan pwe irail en kaweid Sapwellime wehi nan imwin rahn akan oh nan Sapwellime kosondi soutuk me peneinei kan konehng irail en mihpene kohkohlahte. E kesempwaliki Sapwellime serihkan oh sapeng atail kapakap kan.
Pwehki sapwellime limpoak, Sises Krais tomwkihla dipetail kan, oh Ih me wia Sounkomour en sampah. I met me I kadehdehki ni mwaren sarawi en Sises Krais, ahmen.