Nakon te Kamaiu: Ti Kona ni Karaoia
Iroun Unimwaane Mervyn B. Arnold
Man te Itingaun
Te Uea e katauraoi bwaai ni kabane aika riai ibukira n nako ni kamaiuiia raoraora ake a mamara aia onimaki ao ake tiaki kain te aro.
Te Tia Kamaiu e ota raoi n Ana mition ni kamaiuiia natin Tamara are i karawa, E katanoata:
“Natin te aomata ba E na kamaiua ae bua. …
“[Ibukin]naba Tamami are i karawa, ngkae e aki tangira maten temanna i buakoia aika uarereke.”1
Tinau ae tangiraki, Jasmine Bennion Arnold, e ota raoi n katabeana ni buokiia ni kamaiuiia ana tiibu Tamara are i karawa ake a ikoaki ke a bua, n reitia ma oin natina ao tibuna. Ai tamaroara katabeakiia ara ikawai tibura ni kona ni kaeti maiuiia tibuia aika ataei.
Tinau e aki toki n anganaki ana mwakuri n kawariia n reireiniia taari aine ake a ikakorakora ma aia onimaki, ake aki roroko ao kain te utu ake ti ngaaia ni kaina te aro n aia utu, e ngae n anne, ana kurubu ake e tabeakiniia n reitaki ma tabeman are akea ae kakawariia. N arona ni kakawari ti aki te taina n te namwakaina, n aron e ongora, kawariia aoraki ao n anganiia te kakorakoraaki. Kabanean tabeua namwakaina inanon maiuna tinau, e tiku ni mwengana, e kabanea aoa ni kororeta nakoia, ni kaota ana tangira, kaota ana koaua, ao kakorakoraiia koraki ake a roko ni kawaria.
Ngkana ti nako ni kamaiu, te Atua e anganiira te mwaaka, te korakora, ao taian kakabwaia. Ngke E tuanga Mote bwa e na kamaiuia tibun Iteraera, Mote e maaku, n aron mwaitira ngaira ake ti maaku. Mote e karautaeka ibukina, ao e taku, “I aki rabakau, … ba I wiremwe n taetae, ao e iremwe naba neweu.”2
Te Uea e kamataata Mote:
“Antai ae e karaoa win te aomata? … tiaki bon Ngai ae Iehova?
“Ma ngaiia ae ko na nako ngkai, ao N na mena i wim, ma n rereiniko am taeka.”3
N taekana, te Uea e tuanga Mote, “Ko kona ni karaoia!” Ao ko ataia bwa tera, ngaia ti konaa!
N na tibwaua aua reirei are e na buokiko n ara mwakuri ni kamaiu.
Reirei 1: Ti Riai n Aki Kawenenakoa Nakora ni Kamaiu
Unimwaane Alejandro Patanía, te Itingaun n te Aono ngkoa, e karakina tarina ae uarereke Daniel, are a nako n akawa n otinako i taari ma ana kaimoa. Imwin te tai, Daniel e karekea te rongorongo ni kauring ae tawe bwa te angibuaka ae korakora e nang roko. N te tai ae waekoa, Daniel ma ana kaimoa a na waekoa n okira te tabo n rooro.
Ngke e a rikirake te angibuaka, intinin tewaana te booti n akawa ae uakaan e aki mwakuri. Daniel ma ana kaimoa a kabaea te keiboro nakon te booti are e aki buti n katikia ni kamaiuia. A kanako rongorongo n te rerio ibukin buokaia, n ataakina bwa, korakoran te angibuaka, a kainanoa te buoka ae waekoa.
Raora aika tangiraki a ingainga n tataninga, taan mwakuri n tararuan te marawa, aia booboti taan akawa, ao tautia i tari a bowi ni iangoa tamaroan te mwakuri ni kamaiu. Tabeman a tangiria n nako ni waekoa ma a tuangaki bwa ana tataninga te babaire. N aroia ake a tiku n te angibuaka a teimatoa ni kainanoa te ibuobuoki, taan tei a reitinako ni bowi, ni kataia n boraraoi iaon te waaki ni kamaiu ae eti.
Ngke a tauraoi raoi kain te kurubu ni kamaiu, te kabanea ni wewete a rang kainanoa buokaia. Korakoran te angibuaka e urua te keiboro imarenan booti ake uowaa, ao ana kaimoa Daniel a manga oki nnoria ngkana a kona ni kamaiuiia raoia n akawa. N tokina, kaibuke ake uowaa a inako ma aia kaimoa, ni ikotaki ma tarin Unimwaane Patanía ae Daniel a mate.
Unimwaane Patanía e kabotaua te kangaanga aio nakon ana kauring te Uea ngke E taku, “Kam [tia] n aki kakorakorai ngkami, … [ke] ao kam aki kaoka are e kakioakinako, … [ke] kam aki ukoukora naba are e bua; … ao N na kainnanoia au nanai nakon [nanon] baim.”4
Unimwaane Patanía e kabwarabwara anne, ngke ngaira ti riai ni barongaaki raoi n ara kauntira, kooram, bootaki, ao riki n arora n tatabemaniira, ti riai n aki kawenenakoa nakora ni kamaiu. N tabetai a mwaiti wiiki n nako mamaroroakinan arora bwa ti na kanga ni buokiia utu ke n tatabemaniia ake a kainanoa te buoka ae onoti. Ti na taraia raoi bwa antai aika a na kawariia ao a na kanga moan kawaraia. N tai aei, tarira ma mwanera ake a bua a teimatoa ni kainano ao n tabetai a wewete ao a bubuti buokaia. Ti riai n aki kawenenakoa.
Reirei 2: Ti Riai n Aki Bwarannano
Beretitenti Thomas S. Monson, are e kanakoa te wewete ae otaraoi nakon te kamaiu, taraaki, “Ara membwa a kainanoa kauringaaia are e aki rang n oimwi ngkana e roko nakoia … kain te aro ake aki roroko … a na kona ni iangoaki bwa karekean te barannano.”5
Ai aron naba mwaitimi, I a tia n tibwaua te euangkerio ma tabeman ake a nang bwabetitoaki ke ni kamwakura aia onimaki, ao tabeman—n aron raraou ae Tim ae tiaki kain te aro ao buna are e aki kakaonimaki, Charlene—e na ana tabeua riki te tai.
E riaon 25 te ririki I mamaroroakina te euangkerio ma Tim ao I kaira Tim ao Charlene nakon kaukan autin te tembora. Tabeman a ira te kamaiu; e ngae n anne, Tim e aki roko ni kaoana are e na kaitibo iai ma mitinare.
Teuana te wiikente I anganaki bwa N na tararua te maungatabu n te titeiki. I tuangiia beretitenti n te titeiki bwa ti na aki mamatam ao n tataro ibukia bwa antai ake ti na kawariia. I miimi ngke e anganai aran raraou ae Tim. Ngke ana bitiobi Tim, te titeiki beretitenti, ao ngai ti karebwerebwe iaon te mataroa, Tim e kaukia, e taraai, e taraa te bitiobi, ao ngkanne e taku, “Bitiobi, I taku bwa ko tuangai ae ko na kaira temanna ae onoti!”
Ngkanne Tim e ngare ao e taku, “Nakomai rin, Merv.” Te kakai e riki n te bong anne. Tim ngkai e a tia ni bwabetitoaki, ao ngaia ao Charlene a tia ni kabaeaki n te Tembora. Ti na aki barannano.
Reirei 3: Ai Korakorara Te Kukurei N Roko Ngkana Ko Uota Kamaiuan Temanna Te tamnei nakon Kristo
N ririki aika bwakanako n te maungatabu ni kabuta, I taekina e kanga José de Souza Marques n ota n ana taeka te Tia Kamaiu “bwa ngkana iai ibuakora e korakora inanon te Tamnei, ti riai n tuangnga ni uota temanna ae mamaara … bwa e na riki ni korakora naba.”6
Tari Marques e kinaia araia ni kabane te naan ibonga n ana kooram ao e ataia bwa Fernando e a bua. E ukoukoria Fernando n ana auti, ngkanne e ukoria n ana auti raraona, ao riki e nako aon te bike.
E a kunea Fernando ni karebaba i taari. E aki tataninga ni karokoa e a inako te booti, n aron karakinan Daniel. E waekoa n ruonna i taari ni kamaiua ana tiibu are e bua, n uotia nakon te mweenga ni kukurei.7
E kakoaua ngkanne rinanon reitinakon tararuana bwa Fernando e na aki manga kitana te nanai.8
Kariaia bwa N na taekina nakoim tera ae riki ngke Fernando e a tia ni kamaiuaki ao n tibwaua te kukurei are e roko man te kamaiu nakon te tiibu riki ae bua. Fernando e mareaki ma neiere maten nanona, Maria, n te tembora. Iai 5 natiia ao 13 tibuia, ni kabane ngaiia a bane ni kakaonimaki n te Ekaretia. Mwaitiia naba aia koraki ao aia utu a kaina te Ekaretia. Ni kabane ngaiia a uotii araia aia bwakatibu ni karekean te otenanti n te tembora, ao te kakabwaia n teimatoa n roko.
Fernando e bitiobi ngkai ibukin te ka-tenua n tai, ao e reitinako ni kamaiu, n aron ngke e kamaiuaki. E taekinna, “N ara uoote, iai 32 kairake n ataeinimwaane aika matoatoa n te Nakoanibonga ae te Aroniki, 21 ake a kamaiuaki 18 te namwakaina n nako.” N aroia n tatabeman, utu, kooram, bootaki, kiraati, ao tia reirei ni mweenga ao kakawari n reirei, ti kona ni karaoa anne!
Reirei 4: E Aki Taraaki Ara Ririki, Ti Bane Ni Weteaki Nakon te Kamaiu
Beretitenti Henry B. Eyring e Katanoata, “Bwa tera mwaitin ara ririki, konabwaira, weteara n te Ekaretia, ke ara tabo ake ti maeka iai, ti bane n ni katiteuanaaki ni weteakira ni mwakuri n reitaki ni buoka [te Tia Kamaiu] n taia tamneia ni karokoa manga Okina.”9
Ni katoa bong e rikirake irouia natira, ara roronrikirake, ara kairake ni ikawai, ao membwa ake a ikawai n ami roro nako a ongora n ririmwin ana wewete te Tia Kamaiu ae itiaki ni wewete nakon te kamaiu. Kam rabwa ibukin korakoramii! Kariaia N na tibwaua tabeua katooto:
Amy, ana ririki 7, e kaoa raraona ae Arianna ao ana utu nakon ana buroukuraem n te ririki te Buraimwari n tain te toa. Tabeua te namwakaina imwina, Arianna ao ana utu a bwabetitoaki.
Allan, te kairake ni ikawai, e namakina bwa e na tibwaua ana witeo te Ekaretia, ana Rongorongo Moomon, ao kiibu man booki aika tabu ma raraona ni kabane ni kabongana te kanako rongorongo.
Titita Reeves e moana tibwauaan te euangkerio ma tabeman iaon te tareboon ake a tareboniia.
James e kaoa raraona Shane ae tiaki kain te aro nakon ana bwabetito natina te aine.
Spencer e kanakoa te link nakon mwanena ae aki bati ni kakaonimaki n te aro iaon ana marooro Beretitenti Russell M. Nelson n te maungatabu ao e ribootina, “E wareka te reirei, ao iai te kantaninga.”
Te Uea e tia n anganiira bwaai ni mwakuri aika riai ibukira n nakon kamaiuaiia kain te aro ake aki roroko ao raraora ake tiaki kain te aro. Ti kona ni kabane ni karaoi!
I kaoingkami n tatabeman n ririmwiin ana wewete te Tia Kamaiu nakon te kamaiu. Ti kona ni karaoia!
I rang kakoaua bwa I ataia Iesu bon te Tia Kawakin tiibu ae Raoiroi, bwa E tangiriira ao E na kakabwaiaiira ngkana ti nako ni kamaiu. I ataia E maiu; I ataia. N aran Iesu Kristo, amen.