Cawm tus Poob Zoo Dim: Peb Yeej Ua Tau
Tus Tswv twb muab txhua yam cuab yeej rau peb lawm kom peb yuav tawm mus cawm cov uas tsis muaj siab ntseeg thiab peb cov phooj ywg uas tsis yog mej zeej.
Tus Cawm Seej yeej to taub Nws txoj hauj lwm uas yog los cawm peb Leej Txiv Saum Ntuj Ceeb Tsheej cov me nyuam, rau qhov Nws hais tias:
“Neeg Leej Tub yeej los nrhiav cov neeg uas yuam kev lawm, thiab cawm kom lawv dim. …
“[Rau qhov] nej Leej Txiv tus uas nyob saum ntuj ceeb tsheej yeej tsis xav kom cov me nyuam no,ib tug puas tsuaj li.”1
Kuv niam, Jasmine Bennion Arnold, uas ua siab zoo yeej to taub nws txoj hauj lwm los pab cawm peb Leej Txiv Saum Ntuj Ceeb Tsheej cov yaj uas raug mob los sis ploj lawm, kuj hais txog nws cov me nyuam thiab cov me nyuam xeeb ntxwv. Pog yawg niam tais yawm txiv ua tau tej yam zoo rau lawv cov me nyuam xeeb leej xeeb ntxwv.
Niam ib txwm raug xaiv mus xyuas cov niam tsev uas tab tom muaj teeb meem ntawm lawv txoj kev ntseeg, cov uas tsis tshua muaj siab ntseeg thiab cov uas muaj ib nrab ntawm lawv tsev neeg uas tsis yog mej zeej; tiam sis, nws pab yaj twb yog lwm cov neeg uas tsis muaj leej twg txib nws mus xyuas li. Feem ntau nws tsis yog mus xyuas ib zaug tauj ib hlis xwb, nws tau mloog lus, saib xyuas cov uas muaj mob, thiab txhawb nqa lawv. Ob peb hlis kawg hauv Niam lub neej, nws raug los nyob hauv tsev xwb, ces nws tau siv ntau xuab moos sau tej tsab ntawv rau lawv, qhia nws txoj kev hlub, hais nws zaj lus tim khawv, thiab txhawb nqa cov uas tuaj xyuas nws.
Thaum peb mus cawm lwm tus, Vajtswv muab hwj chim, kev txhawb nqa, thiab koob hmoov rau peb. Thaum Nws txib Mauxes mus cawm haiv neeg Ixayees, Mauxes ntshai, ib yam li peb feem coob ntshai thiab. Mauxes xav tau kev zam cai thaum nws hais tias, “Kuv yeej ib txwm hais lus txhav, … kuv yeej ib txwm hais tsis tau lus zoo thiab nplaig yeej txhav.”2
Tus Tswv hais lus nplij Mauxes siab tias:
“Leej twg yog tus tsim neeg kom muaj qhov ncauj? … kuv yog tus Tswv puas ua tej no?
“Koj cia li mus! Kuv yuav pab koj hais thiab yuav qhia kom koj txawj hais.”3
Ua lwm yam lus hais, tus Tswv qhia Mauxes tias, “Koj yeej ua tau!” Thiab nej puas paub, peb yeej ua tau thiab!
Cia kuv qhia nej txog plaub txoj ntsiab cai uas yuav pab peb txoj kev cawm lwm tus neeg dim.
Txoj Ntsiab Cai thib 1: Peb Yuav Tsum Tsis Txhob Laug lub Sij Hawm Mus Cawm Tib Neeg
Txwj Laug Alejandro Patania, uas thaum ub nyob hauv Pawg Xya Caum, piav zaj dab neeg txog nws tus kwv, Daniel, uas tau nrog nws pab neeg caij nkoj mus nuv ntses. Nyob nyob ces, Daniel tau lus ceeb toom ceev ceev hais tias yuav muaj cua daj cua dub loj heev. Tam sim ntawd, Daniel thiab nws pab neeg tau tig lub nkoj yuav rov mus tsev.
Thaum cua daj cua dub huam loj tuaj, lub cav rau lwm lub nkoj uas mus nuv ntses txawm tuag. Daniel pab neeg ntawd tau khi ib txoj hlua hlau rau lub nkoj uas tuag thiab tau pib cab los tsev. Lawv xa xov hauv vib thab nyub kom xa neeg tuaj pab, vim cua daj cua dub loj heev, lawv xa tau kev pab tas sim ntawd.
Thaum cov neeg uas lawv hlub muaj kev txhawj xeeb tos, cov tub rog ntawm hiav txwv, cov neeg nuv ntses, thiab cov neeg uas tiv thaiv hauv hiav txwv tau sib sab laj seb yuav ua li cas thiaj cawm lawv dim. Ib txhia tau xav sawv kev tam sim ntawd tiam sis lwm cov tau hais kom lawv tos seb yuav ntaus tswv yim li cas. Thaum ntawd cov uas mag qhov cua daj cua dub tseem taij thov kom lawv tuaj pab, cov neeg no tseem sab laj xwb, xav kom sawv daws pom zoo seb yuav ua li cas thiaj pab tau.
Thaum lawv npaj mus cawm lawv, ib tug neeg hauv nkoj tau hu tuaj. Qhov cua daj cua dub tau ua rau txoj hlua uas rub lub nkoj tu lawm, thiab Daniel pab neeg tab tom mus sim saib lawv cawm puas tau cov neeg nuv ntses ntawd. Thaum kawg ces, ob lub nkoj tau tog mus hauv qab thu dej, thiab lawv sawv daws, kuj suav Txwj Laug Patania tus kwv puav leej tuag tas.
Txwj Laug Patania muab qhov xwm txheej no piv rau tus Tswv lo lus qhuab ntuas uas hais tias: “Nej tsis [tau] ntxiv zog, … [los yog] coj lwm tus uas raug ntiab tawm rov los, … [los yog] nrhiav cov uas poob zoov; … thiab kuv yuav kom [nej] lav ris kuv pab yaj.”4
Txwj Laug Patania piav hais tias, txawm peb yuav tsum sib sau ua ke hauv peb tej pawg sab laj, tej pawg neeg, tej koom haum pab, thiab nyob peb ib leeg xwb los, peb yuav tsum txhob laug sij hawm mus cawm lwm tus neeg kom dim. Tej thaum peb siv ntau lim piam sib tham seb peb yuav ua li cas pab tej yim neeg los sis tej tus neeg uas xav tau kev pab. Peb sib tham seb leej twg yuav tau mus xyuas lawv thiab yuav tsum hais li cas rau lawv. Tab sis mas, peb cov kwv tij thiab cov muam uas poob pheej xav tau thiab tej thaum taij thov kom tau kev pab. Peb yuav tsum txhob laug sij hawm.
Txoj Ntsiab Cai thib 2: Peb Yuav Tsum Tsis Txhob Tso Tseg
Thawj Tswj Hwm Monson, tau hu peb mus pab cawm lwm tus neeg kom dim, tau hais tias, “Yuav tsum qhia peb cov mej zeej tias yeej tsis lig dhau thaum hais txog peb … cov mej zeej uas tsis tshua tuaj lawm … cov uas sawv daws tsis cia siab rau lawm.”5
Zoo li nej feem coob, ib txhia uas kuv qhia txog txoj moo zoo tau los ua kev cai raus dej los sis rov qab tuaj koom peb sai sai, thiab lwm cov—zoo li kuv tus phooj ywg uas tsis yog mej zeej Tim thiab nws tus poj niam uas tsis tshua muaj siab ntseeg, Charlene—yuav siv sij hawm ntau heev.
Rau ntev tshaj 25 xyoos kuv tau qhia Tim txog txoj moo zoo thiab kuv tau coj Tim thiab Charlene mus koom tej kev qhib cov tuam tsev. Lwm cov neeg tau los pab cawm nkawd; tiam sis, Tim tsis kam ua li lawv caw kom nws ntsib cov tub txib.
Muaj ib hnub lawv txib kuv mus tswj xyuas ib ceg txheem ntseeg lub rooj sab laj. Kuv tau thov kom ceg txheem ntseeg tus thawj tswj hwm yuav yoo mov thiab thov Vajtswv seb peb yuav tsum mus xyuas leej twg. Kuv xav tsis thoob thaum nws cev kuv tus phooj ywg Tim lub npe rau kuv. Thaum Tim tus npis sov, ceg txheem ntseeg tus thawj tswj hwm, thiab kuv khob nws lub qhov rooj, Tim qhib plho, ntsia kuv, ntsia tus npis sov, thiab hais tias, “Npisov, kuv xav tias koj twb qhia kuv tias koj yuav coj leej twg tseem ceeb tuaj xyuas kuv!”
Ces Tim luag nrov thiab hais tias, “Merv, cia li los tsev.” Hnub ntawd txawm muaj ib qho txuj ci loj. Nim no Tim twb ua kev cai raus dej lawm, es nws thiab Charlene twb raug khi ua ke hauv lub tuam tsev. Peb yuav tsum txhob tso tseg.
Txoj Ntsiab Cai thiab 3: Nej Yuav Muaj Kev Zoo Siab Npaum Li Cas yog Nej Tsuas Cawm Tau ib tug Neeg Los Cuag Khetos
Ntau xyoo tas los lawm hauv ib lub tuam roob sab laj, kuv tau hais lus qhia seb José de Souza Marques to taub tus Cawm Seej cov lus uas hais tias yog muaj ib tug neeg ntawm nej muaj zog ntawm Leej Ntsuj Plig, kom nws coj ib tug qaug zog nrog nws, kom nws yuav … rais los mus muaj zog thiab.6
Tij Laug Marques paub lub npe rau txhua tus yaj hauv nws pawg pov thawj thiab paub hais tias Fernando tsis nyob ntawd. Nws nrhiav Fernando tom tsev, ces tom ib tug phooj ywg tsev, thiab kuj mus tom tiaj xuab zeb nram hiav txwv.
Thaum kawg nws nrhiav tau Fernando caij tej daim txiag hauv hiav txwv. Nws tsis tos thaum lub nkoj tog mus hauv dej, zoo li hauv zaj dab neeg txog Daniel. Nws mus kiag hauv tus dej mus cawm tus yaj uas ploj mus lawm, muaj kev zoo siab coj nws los tsev.7
Ces nws tau mus xyuas Fernando tsis tu tsis tseg kom nws yuav tsis ncaim pab yaj mus ntxiv li lawm.8
Cia kuv qhia nej txij thaum ntawd tau muaj xwm dab tsi rau Fernando uas nws mus cawm thiab xav faib kev zoo siab uas nws tau vim nws mus cawm ib tug yaj uas ploj lawm. Fernando yuav nws tus me hluas nkauj, Maria, hauv lub tuam tsev. Nim no nkawd muaj 5 tug me nyuam thiab 13 tug me nyuam xeeb ntxwv, lawv puav leej muaj siab ntseeg nyob hauv lub Koom Txoos. Lawv coob tug kwv tij thiab lawv tsev neeg kuj tau los zwm rau lub Koom Txoos. Ua ke lawv tau muab ntau txhiab npe rau lawv cov poj koob yawm txwv tso rau lub tuam tsev ua tej kab ke, thiab pheej muaj koob hmoov tas zog.
Tam sim no Fernando ua tus npis sov rau zaum thib peb, thiab nws pheej sim mus cawm tib neeg, ib yam li lawv tuaj cawm nws. Tsis ntev tas los lawm nws hais tias, “nyob hauv peb pawg ntseeg, peb muaj 32 tus tub hluas hauv lub Pov Thawj Hwj Aloos uas tuaj, lawv 21 leej raug kev cawm dim hauv 18 lub hlis tas los no.” Ua cov neeg, tej yim neeg, pawg neeg, koom haum pab, hoob kawm, cov mus qhia thiab xyuas tom tsev, peb muaj cuab kav ua li ntawd tiag!
Txoj Ntsiab Cai thib 4: Txawm Peb Muaj Hnub Nyoog Npaum Li Cas, Peb Txhua tus Raug Hu los Mus Cawm Neeg
Thawj Tswj Hwm Henry B. Eyring tshaj tawm hais tias: “Txawm peb muaj hnub nyoog, los yog peev xwm li cas, ua hauj lwm dab tsi hauv lub Koom Txoos, los sis nyob qhov twg, peb sib koom siab raug hu los pab ua hauj lwm rau [tus Cawm Seej] pab saib xyuas Nws cov me nyuam mus txog thaum Nws rov qab los.”7
Txhua hnub peb cov me nyuam coob zuj zus, peb cov tub thiab ntxhais hluas, cov hluas uas tsis tau yuav poj niam yuav txiv, thiab peb cov mej zeej laus txawm muaj hnub nyoog li cas haj yam los ua raws li tus Cawm Seej caw kom mus pab lwm tus neeg. Ua tsaug rau koj cov tej kev pab ua li no! Cia kuv qhia txog ob peb tug yam ntxwv:
Amy, uas muaj 7 xyoo, caw nws ib tug phooj ywg Arianna thiab nws tsev neeg tuaj koom txoj kev sib ntsib noj lub cim nco txog uas Koom Haum Me Nyuam Yaus ua. Ob peb hlis tom qab ntawd, Arianna thiab nws tsev neeg tau los ua kev cai raus dej.
Allan, ib tug txiv neej hluas, raug kev tshoov siab kom faib lub Koom Txoos tej zaj vidi-aus, Maumoos tej zaj xov, thiab ob peb nqe vaj lug kub rau nws cov phooj ywg hauv tej kev qhauj xov xwm tawm.
Muam Reeves pib faib txoj moo zoo rau txhua tus neeg uas hu tuaj xav muag khoom rau nws.
James caw nws tus phooj ywg Shane uas tsis yog mej zeej tuaj koom lawv thaum nws tus ntxhais ua kev cai raus dej.
Spencer xa Thawj Tswj Hwm Russell M. Nelson zaj lus qhia ntawm lub tuam rooj sab laj mus rau nws tus muam uas tsis tuaj muaj siab ntseeg lawm thiab qhia hais tias, “Nws twb nyeem lawm thiab zoo nkaus li tau qhib nws siab lawm.”
Tus Tswv twb muab txhua yam cuab yeej rau peb lawm kom peb yuav tawm mus cawm cov uas tsis muaj siab ntseeg thiab peb cov phooj ywg uas tsis yog mej zeej. Peb yeej ua tau li no!
Kuv caw nej txhua tus los ua raws li tus Cawm Seej lo lus caw kom mus cawm tib neeg dim. Peb ua tau li no!
Kuv hais lus tim khawv tias Yexus yog tus Tswv Yug Yaj Zoo, tias Nws hlub peb thiab Nws yuav foom koob hmoov rau peb thaum peb mus cawm tib neeg. Kuv paub hais tias Nws muaj sia nyob; kuv paub tseeb li ntawd. Los ntawm Yexus Khetos lub npe, amees.