N̄an Lo̧mo̧o̧r Eo: Jemaron̄ Kōm̗m̗ane
Irooj ekar kōpooji tok n̄an kōj aolep kein jerbal ko rōkkar n̄an ad etal in lo̗mo̗o̗ren ro m̧ōttad rejāniknik im ro jerad rejjab membōr in Kabun̄ in.
Rilo̗mo̗o̗r eo ekar kanooj mel̗el̗e mijen eo An n̄an lo̗mo̗o̗ren ajri ro nejin Jemādwōj Ilan̄, bwe Ekar kwaļo̧k:
“Nejin armej ej itok lo̧mo̧o̧ren eo ekar jako. …
“ [Bwe] Āindein Jememwōj ej pād i lan̄ E jab kōņaan, bwe juon iaan rein re dik en jako.”1
Jinō eo ej āinwōt juon enjel̗, Jasmine Bennion Arnold, ekanooj jel̗ā eddo eo an n̄an jipan̄ ilo iien lo̗mo̗o̗r eo an rūkinejnej ak jiip ko rejebwābwe nejin Jemādwōj Ilan̄, ekoba ajri ro nejin make im jibūn. Ta juon iaan eddo ko rekabwilōn̄lōn̄ ro jibūd im jim̗m̗aad remaron̄ kōm̗m̗ani ilo mour ko an ajri ro jibwier.
Ekkā̄ aer jitōn̄ jinō bwe en lol̗o̗k im katakin ro rej kōbkōb kōn tōmak ko aer, ro rej jāniknik im baam̧le ko ejjab aolepāer rej membōr; ijowōtke, ro ej loļo̧k er ekoba ro jet me ejjel̗o̗k juon emōj jitōn̄ e bwe en lol̗o̗k er. Ilo tarlepin lol̗o̗k ko an rōkar jab baj juon alen juon allōn̄, ilo an mera an kwaļo̧k n̄an rinan̄inmej ro im lel̗o̗k io̗kwe im kōketak. Ilo jet allōn̄ ko tok alik in an mour, ekar pād wōt m̗weo im̗ōn, im ekar jol̗o̗k el̗ap iien jeje leta n̄an er, kwal̗o̗k iakwe eo an, kwal̗o̗k an kam̗ool, im kautiej ro rej lotoke.
Ilo am etal im lo̗mo̗o̗r, Anij ej letok n̄an kōj kajoor, kōketal, im kōjeraam̗m̗an ko. Ke E kar jiron̄l̗o̗k Moses n̄an lo̗mo̗o̗ren ajri in Israel ro, Moses ekar mijak, āinwōt an lōn̄ iaadwōj rej mijak. Moses ekar jekpen e make, im ba, “I jab wājepdik, … bwe e rum̧wij aō kōnono, im e rum̧wij loō.”2
Irooj eaar ba n̄an Moses:
“Wōn ekar kōm̧anm̧an lo̧n̄iin armej? … E jab N̄a Irooj ke?
““Innām kiiō, kwōn ilo̧k, im Inaaj ilo lo̧n̄iim̧, im naaj katakin eok ta eo kwōnaaj ba.”3
Ilo jejjet, Irooj ekar ba n̄an Moses, “Komaron̄ kōm̗m̗ane!” Im kom̗ jel̗ā ta, barāinwōt kōj jemaron̄!
In karon̄ kom̗ emān pedped in katak ko me naaj jipan̄ ilo ad jerbal in lo̗mo̗o̗r.
Pedped in katak 1: Jen Jab To̧re Maanļo̧k Iien Ad Etal im Lo̧mo̧o̧r
Elder Alejandro Patania, ekar juon Eria Jijlimjuonn̄oul, ekar tilmake bwebwenato in kōn l̗addik eo jatin, Daniel, eo ekar jerak metol̗o̗k im eo̗n̄ōd ippān ro m̗ōttan. Ālkin juon tōre, Daniel ekar bōk juon kakkōl idin̄ bwe juon l̗an̄ el̗ap ekar m̧ōttan jidik ejede. Iien eo wōt, Daniel im ro m̗ōttan rekar jino jibadōkl̗o̗k āne.
Ke l̗an̄ eo ej kajoorl̗o̗k, injin eo an juon waan eo̗n̄ōd epaak ekar bōjrak an jerbal. Daniel im ro m̗ōttan rōkar lukwōj juon to ilo wa eo ejorrāān im aike bwen jab jorrāān. Rōkar retio n̄an kappok jipan̄, rejel̗ā bwe, kōn an kajoorl̗o̗k l̗an̄ eo, rōkar aikuj jipan̄ iien eo em̗ōkajtata.
Ke ro jitōn bōro rej kōttar, ro jān coast guard, doulul in rieo̗n̄ōd ro, im ritarin̗ae ro rekar kweilo̗k n̄an ļōmn̗ake bun̄tōn lo̗mo̗o̗r eo em̗m̗an. Jet rekōn̗aan jino em̗m̗akūt ilo iien eo em̗ōkajtata bōtaab kar jiron̄l̗o̗k er bwe ren kōttare juon karōk. Ke ro ilo l̗an̄ eo ejjab jem̗l̗o̗k aer eowo̗o̗r kōn jipan̄, ejjab jem̗l̗o̗k an rijerbal ro kweilo̗k, kajjieon̄ errā kōn wāween karōk eo ejejjet im juon karōk.
Ke juon kurub in lo̗mo̗o̗r āliktata ekar ejaak, juon kūr ekauwōtata āliktata ekar itok. Kajoor in l̗an̄ eo ekar tūm̗i to ko ikōtaan wa ko ruo, im Daniel im ro m̗ōttan rōkar tōn jepl̗aak n̄an lale el̗an̄n̄e remaron̄ lo̧mo̧o̧ren rieo̗n̄ōd ro m̗ōttāer. Ilo jem̗l̗o̗kin, wa ko jim̗or rōkar rum̗l̗o̗k, ekoba Daniel eo jatin Elder Pantania aolep kar jako.
Elder Patanía ekar keidi jorrāān in n̄an kakkōl ko an Irooj ke E eaar ba, “Kom̗ ar jab kakajoor, … [ak] karo̧o̧ltok ro raar jeplōklōk, … [ak] pukot ro re jako; … im Inaaj lewōj Aō sip ilo [peim̗].”4
Elder Patanía ekar kōmel̗el̗eiki bwe, ilo ad aikuj naaj tōl ilo k̗o̧o̗njel ko ad, doulul ko, ra dik ko, im men̄e āinwōt kajjojo armej, jej jab aikuj karum̗wijl̗o̗k ad etal in lo̗mo̗o̗r. Jet iien ilo elōn̄ wiik ko remootl̗o̗k ilo ad kōnono kōn ewi wāween n̄an jipan̄ baam̗le ko ak ro kajjojo rej pād ilo aikuj. Jen kanooj kōl̗mānl̗o̗kjen̗ kōn wōn ro renaaj lol̗o̗k er im bun̄tōn eo n̄an kōjerbale. Ilo iien in, ro jeid im jatid rejebwābwe ejjab jem̗l̗o̗k aer kūr n̄an jipan̄. Jej jab aikuj karum̗wijl̗o̗k.
Pedped in katak 2: Jej Jab Aikuj Ebbweer
Būreejtōn Manson, eo ekar kōjan̄ ainikien jilel n̄an etal in lo̗mo̗o̗r, kar kūle, “Membōr rein ad aikuj in bar kakeememej er bwe ejjāmin lukkuun rum̗wij n̄e ej itok n̄an … membōr ro ad rejjāniknik … ro remaron̄ in naaj kar ļōmņak kōn juon kōjatdikdik ewaan.”5
Āinwōt elōn̄ iaami, ikar kōnono kake gospel ippān jet iaami m̗ōttan jidik repeptaij ak rejepl̗aaktok, im ro jet—āinwōt an lōn̄ ro rejjab membōr m̗ōttad Tim im kōrā eo ippān ejāniknik, Charlene, ebōk eļapļo̧k iien.
Enan̄in elōn̄ jān 25 iiō ko ikar jerbal ippān Tim ilo kōnono kōn gospel im bōk Tim im Charlene n̄an kaloojoj ko an tampel̗. Jet rōkar kobatok ilo iien lo̗mo̗o̗r eo, bōtaab Tim ekar m̧akoko in kōm̧m̧an an iien iioon mijinede ro.
Juon jem̗l̗o̗kin wiik eo kar letok bwe in bōk tōl ilo juon kweilo̗k an stake. Ikar kajjitōk ippān stake būreejtōn eo n̄an jitlo̗k im jar kōn wōn eo kōmij aikuj lol̗o̗k. Ikar ilbōk ke ej letok āt eo etan eo jera Tim. Ke bisop eo an Tim, stake būreejtōn eo, im n̄a kar kōl̗l̗al̗al̗ ilo kōjām eo, Tim ekar kōpel̗l̗o̗ke, kar kalimjōke eō, kar kalimjōk bisop eo, im ba, “Bisop, ikar l̗ōmn̗ak kwonaaj kar ān̄intok juon eo ejenolo̗k!”
Innām Tim ekar ettōn̄ im ba, “Del̗o̗n̄tok, Merv.” Juon kabwilōn̄lōn̄ ekar wal̗o̗k ilo raan eo. Tim ekar kiiō peptaij, im e im Charlene rekar dedel̗o̗k aerro liāp ilo tampel̗. Jej jab aikuj ebbweer.
Pedped in katak 3: Ewi Jon̄an An Naaj L̗ap Am̗ M̗ōn̗ōn̗ō N̄e Kwōj Lo̗mo̗o̗ren Juon Jetōb n̄an Kraist
Elōn̄ iiō ko remootl̗o̗k ilo juon kweilo̧k eļap, ikar kōnono kake ewi wāween an José de Souza Marques mel̗el̗e kōn naan ko an Rilo̗mo̗o̗r bwe “eļan̄n̄e jabdewōt armej ilubwiljimi ekajoor ilo Jetōb eo, kōtļo̧k bwe en bōk ippān e eo em̧ōjņo̧, bwe en maron̄ … kajoor barāinwōt.”6
Brother Marques ekar jel̗ā etan kajjojo sip ilo doulul in pris eo an im kūle bwe Fernando ekar jako. Ekar kappukot Fernando ilo m̗weo im̗ōn, innām ilo m̗we im̗ōn eo jeran, im ekar bar etal n̄an beach eo.
Ekar āliktata loe Fernando ej lōkōr ilo̗jet. Ekar jab abn̗ōn̗ō m̗ae iien eo wa eo erum̗wil̗o̗k, āinwōt kar bwebwenato in Daniel. Iien eo wōt ekar tuwaak n̄an lo̗mo̗o̗ren sip eo an ejebwābwe, bōktok n̄an m̗weo kōn m̗ōn̗ōn̗ō.7
Innām ekar lale bwe en wōnm̗aanl̗o̗k wōt ilo kwal̗o̗k bwe Fernando ejjāmin bar etal jān worwor in.8
In kwal̗o̗k n̄an kom̗ ta eo em̗ōj an bōk jikin jān tōre eo kar lo̗mo̗o̗ren Fernando im n̄an karon̄ kake m̗ōn̗ōn̗ō eo ekar wal̗o̗k ilo kar lo̗mo̗o̗ren juon wōt sip ekar jōbwābwe. Fernando ekar m̗areiki jitōn bōro eo an, Maria, ilo tampel̗ eo. Kiiō ewōr 5 nejierro ajri im 13 jibwierro, aolepāer rej itoklimo ilo Kabun̄ in. Elōn̄ jet nukier im baam̗le ko aer em̗ōj aer kobatok ilo Kabun̄ eo. Ippān doon em̗ōj aer lel̗o̗k taujin etan ro nukier n̄an bōk kain̄i ko an tampel̗, im kōjeram̗m̗an ko ejjel̗o̗k jem̗l̗o̗kin aer itok.
Fernando ej kiiō jerbal āinwōt bisop jilu alen kiiō, im ejjab jem̧ļo̧k an lo̗mo̗o̗r, ejjel̗o̗k oktak jān an kar lo̗mo̗o̗r. Ekar kwaļo̧k, “Ilo ward eo ad, ewōr 32 likao reniknik ilo Priesthood eo an Aron, 21 iaer kar lo̧mo̧o̧ren er ium̧win 18 allōn̄ ko.” Kōj kajjojo, baam̧le ko, doulul ko, radik ko, kūlaaj ko, im rūkakii in lol̗o̗k mōko an kōrā im em̧m̧aan ro, jemaron̄ kōm̗m̗ane menin!
Pedped in katak 4: Mekarta Jon̄an Ad Rūtto, Em̗ōj Kūr Kōj Aolep N̄an Etal im Lo̧mo̧o̧r
Būreejtōn Henry B. Erying ekar ba, “Jekdo̧o̧n ewi jon̄an rūtto eo ad, jon̄an eo jemaron̄ in kōm̧m̧ane, kūr rot ilo Kabun̄ in, ak jikin eo jej jokwe ie, jej juon wōt kūr n̄an jerbal in n̄an jipan̄ [Rilo̧mo̧o̧r eo] kotak jetōb ro Nejin m̧ae Ej bar jepļaaktok.”9
Kajjojo raan ej elōn̄ļo̧k im lōn̄ļo̧k ajri ro nejid, jodikdik ro ad, rūm̧m̧an ded ro ad, membōr ro rerūtto jān jekdo̧o̧n iiō rot rej eo̧ron̄ kūr eo an Irooj n̄an etal in lo̗mo̗o̗r. Kom̧ em̧ool kōn kijejeto ko ami! In kwaļo̧k n̄an kom̧ jet waanjon̄ak ko:
Amy, 7 an iiō, ekar kūr eo jeran Arianna im baam̗le eo an n̄an būrookraam̧ eo an Būraimere ilo kwojkwoj eo iiō eo. Jet allōn̄ tokālik, Arianna im baam̧le eo an rekar peptaij.
Allan, juon jo̗dikdik, kar en̄jake im̗we n̄an kwal̗o̗k video ko an Kabun̄, Ennaan ko an Mormon, im eoon ko jān jeje ko rekwojarjar n̄an aolepān ro jeran rej kōjerbale social media.
Sister Reeves ekar jino kwaļo̧k gospel in ippān telemarket eo ekar taļboon e.
James ekar karuwaineneik Shane eo jeran n̄an peptaij eo an leddik eo nejin.
Spencer ekar jilkinl̗o̗k n̄an leddik eo jein juon mel̗el̗e n̄an kōnono eo an Būreejtōn Russell M. Nelson ilo kweilo̗k eo im kar kean̄, “Ekar riiti kōnono eo im juon rōn̄ōl ekar pel̗l̗o̗k.”
Irooj ekar lel̗o̗k aolep kein jerbal ko rōkkar n̄an kōj n̄an etal in lo̗mo̗o̗ren ro rōm̗ōl̗o m̗ōttad im ro rejjab mem̗bōr jerad. Jemaron̄ aolep kōm̗m̗ane menin!
Ij karuwaineneik tok kom̧ n̄an eo̧ron̄ kūr eo an Rilo̧mo̧o̧r eo im etal n̄an lo̧mo̧o̧r eo. Jemaron̄ Kōm̗m̗ane!
Ij lukkuun kam̗ool bwe ijel̗ā Jisōs ej juon Rilale Sip Em̗m̗an, bwe E ej io̗kwe kōj im kojeram̗m̗an kōj ilo ad etal in lo̗mo̗o̗r. Ijeļā Ej mour; Ijeļā. Ilo etan Jisōs Kraist, amen.