Kitail Sewesehla: Kitail Kak Wia Met
Kauno kaunopadahr dipsou kesemwpal koaros ong kitail pwe kitail en kak kohla sowesehda kempoakepahtail me luwet oh saikinte wiahla towe.
Sounkomouro mwangih mehlel Sapwellime pwukoah en kapitala Sapwellimen Samatail Nanlengo serihkan, ni duwen ah masanih:
“Sapwellime Iehroso ketdohr pwehn kak kapitala me salongalahr kan. …
“[Oh] kaidehn kupwuren Sememwail me ket nanleng, me emen irail me tikitik kan en kamkamkihla.”1
Ahi nohno limpoko, Jasmine Bennion Arnold, wehwehki mehlel ah pwukoahn sewesehla oh kapitala sapwellimen Samatail Nanleng sihpw luet oh salongalahr kan, iangahki pein nah serihkan oh nein nah serihkan seri. Ia uwen kesemwpwal en pwukoah me nohno oh pahpa kahlap kan kak wia ong nein neira serihkan seri.
Nohno kin kalapw pwukoahki pwarek oh padahkih irail me arail pwoson kan kin luet,me sohla kin pwaredo sarawi kan oh me wia kisehn peneinei kan; ahpw, mehlel irail me e kin kesemwpwaliki kan iangahki ekei mendahte ah sohte pwukoahki en pwarek irail. E sohte kin pwarek irail pak ehute nan sounpwong ehu, ni ah kin padahk ni meleilei ong me soumwahu kan oh kasalehiong irail ah limpok oh pil kin kakehla irail. Sounpwong kei en imwin ah mour, e luetedi nan ihmw, ih eri kin nting silikou lahng nah aramas ko, ndahng irail ah kin pokepoke irail, oh pil kin wia ah kadehde, kakehla me kin pwaredo kilang kan.
Ni ansou me se kin kohla sawas, Kauno kin ketkidohng kiht manaman, kaopworoapwor oh kin kapai kit da. Ni ansou me mahseniong Moses en kapitala serihn Isreal ko, Moses ahneki masepwehk duwete pali laud en kitail ah kin masepwehk. Moses eri soikala pein ih, oh nda, “I sohte ahneki koaiok, … oh I me kin kosoi wawai, oh pil kin sehsela dahme I pahn kin nda ekei pak.”2
Kauno ahpw Mahseniong Moses:
“ Ihs me wiahda ewen aramas koaros? …kaidehn ngehi ahmw Kaun?
“ Eri, kohla, oh I pahn wia owomw oh padahkihong uhk dahme ke pahn kosoia.” 3
Ni mehlel, Kauno mahsani ong Moses, “ Ke kak wia!” Oh ke pil ese dah, kitail koaros kak!
Mweidohngie ien ehukihwei kosondi pahiou me pahn kak sawas nan atail doadoahk kan.
Kosondi 1: Kitail sohte pahn kin kasau atail pahn kin kohla sawas.
Elder Alejandro Patania, emen Tohn Isiakan en mahso, kosoia soai en rie pwutak tikitiko, Daniel, ni ah iangadahr ienge soun laid ko kohla nansed. Mwurin ansou kis, Daniel alehdi pakair karwaru iou me lapalahn kisinieng ehu kohkohdong irail mwadang. Ansouohte, Daniel oh ienge soun laid wekidek tenge ni wapo.
Ansou me kisiniengo laudlahr, mesihn en ehu sohp limwahrail mehla sohla kak mour. Daniel ih ienge tohn laid ko kadarlahng sohp ohlahu ehu sahl oh tepda uke irail sang nan kahpwal wet. Irail eri eker nan neirail mehn lokaiahu en sawas, ni arail esehier me, kisiniengo pahn pwurehng wukila, udahn re pahn anahne sawas ansou karwaru.
Ni kompokepahrailko ah pwangada kasik irail, weliepen soun kapitala pelien nansed, soun laid, oh navy de sounpei en nansed ko tuhpenehr oh koasone songen wiepe dah me pahn keiou mwahu en kapit irailla. Ekei mentehnoh mweselda ansou karwaru kohiei ahpw pweiek la pwehki arail alehdi rues en awih koasondi. Ah pwihn me tengedier nan kisiniengo, pwangala pek sawas la, weliepen palien sawasko ahpw doula oh kosone, oh songen pwungki pene koasondi me pahn mwahu.
Ni ansou me pwihn en sawas ko onopadahr, lahs en peksawas kohdo mwomwen tihwo. Kisinieng kehlailo kawehlahr sahl me kolpene sohp riau o, eri iengen Daniel soun laid ko mwomwen pahn pwurala kilang pwihn en laid teio. Ni imwilahu, sohp riauo koaros kihrla iangahki towehko koaros, oh pil rien Elder Patania pwutako, Daniel iang mehla.
Elder Patania karasahieng songen kapwal e sapwellimen Kauno kehkehlik ong kitail ni Ah mahsanih: “Mehlel sohte omw koapworopwoar, …[de] kapwurehdo me kohwei dohla kan, …[de] rapahki dahme salongala kan; …oh I ahpw pahn kasalehiong uhk irail.”4
Elder Patania kawehwehda me, ni ansou me kitail pahn kin soandier nan atail pwihn en ehupene de utuht pene kan, quorums, auxillary kan de sang pein emen emen kitail, kitail anahne dehr kapwande kohla sawas. Ekei pak tohtohn wihk kei pahn kin nekilahr ah kitail wie koskosoiahte ia mwomwen atail pahn kohla sewese peneinei de irail sohte lipilip me kin anahne douluhl sawas akan. Kitail kin kapwukoahki isime pahn pwarek irail oh esehda dahme mwahu en pahn wiawi kan. Ni ansouohte, riatail ohl de lih salongalahr kan pahn kin doula nan nantieng pekpeki sawas. Kitail sohte anahne kapwande.
Kosondi 2: Kitail sohte pahn kin uhdisang
President Monson, kasaledahr kitail en kohla oh kapitala, sansalki, “Tohn mwomwohdisoht anahne en kin taman me e saik pwandala ong iengetail … me solah pwuredo iang kitail sarawi kan … me udahn solah arail koapworopwor kan.”5
Duwehte pali laud en kumwail, ekei me I ehukiong duwen rongamwahu et kin mwandangete pepdais la de kehlailda pwuredo, ah ekei—me duwehte kompokepahi Tim me sohte iang tohn mwomwohdisoht oh ah pwoud Charlene me solahr kohdo sarawi, kin ahneki ansou reirei.
E daulihla sounpar 25 I kin songen kosoiahieng Tim duwen mwomwodisoht oh I pil kin wahda Tim ih Charlene kohla ni kasarawihn tehnpas sarawi kan. Ekei kin iang sewese ira, ahpw Tim kin soikala luhk koaros me kohieng en tuwong misineri kan.
Ehu wihkendo I luhkong ien kaunda stake conference. I pekihda rehn stake presideno en kaisihsol oh kapakapki isime se anahne tuhwong. I pwuriamwei ki ah kapahdong ie sin doaropwe me eden kompokepahi Tim. Ni ansou me ngehi, nein Tim pisopo, oh stake presideno letelet ni wenihmwo, Tim ritingada, kilengdohng ie, kilenglahng pisopo, oh nda, “Pisop I leme me ke ndahngie me ke pahn kahrehdo emen aramas kesemwpwal!”
Eri Tim kouruhrda oh nda, “ Pidelongodo, Merv.” Mehkot koapwuriamwei iou wiawi rahno. Tim pepdaislahr met, oh ih Charlene iangehr katengtengdi nan tehnpas sarawi.
Kosondi 3: Ia Uwen Popohl Me Pahn Mih Rehmw Ni Ansou Me Ke Pahn Kahredo Emen Rehn Krais.
Sounpar kei samwalahr I kosoia mwomwen Jose de Souza ah wehwekihla duwen mahsen en Sounkomouro me “ ma mie rehmwail me inenen kehlail ni pali Ngehn, en alehda emen me luet en pwe en kak…pil kehlaila.”6
Riei ohl Marques ese eden tohn mwomohdisoht koaros ienge pwihn en prihs kan diarada me Fernando salsalong, E rapahki Fernando lel nihmweo, lel ni imwen kompokepah men, oh pil lella wasahn mwemweit nansed pohn pihk.
Ih ahpw diar Fernando melahn dake mehn dak ilok nansedo. E sohte uhdisang lahu pwoht o kihrla, duwehte soai en Daniel o. E mwadangete lus nansedo pwe en kohla sewesehla sihpw salongalahu, kapwurehdo ih oh perenda.7
Ih eri nantihengete sang ni padpadahki Fernando sohte uhdi pwe e deh pwurehng salongasang irail.8
Mweidong ie ien kosoia wei dahme pweida sang mwurin Fernando ah pitlahro oh ehukihwei peren me iangedo kapitala sihpw men o. Fernando pwoudkihla aramas me keiou pokpokehu, Maria, nan tehnpas sarawi. Met ira naineki seri 5[limen] oh nein neira seri 13[ehk silimen], me irail koaros wiahla tohn mwomwohdiso kehlail kei met, Arail peneinei teikan oh pil an arail peneinei teiko peneinei pil iangala mwomwohdisoht. Irail ehupenehr oh kapidolong koadokdok pe rail kid kei eden arail peneinei mehlahr ko oh alehdi tiahk sarawi en nan tehnpas sarawio, oh pil kapai teikan pil kin kohkohdohte.
Fernando met wie sawsawas wia pisop men pak eh siluh, oh e pil kin nantiengete iang sawas kapitala. E apwtehn ehukihda, “ Nan aht wardo, nait pwutak pwulepwul ngoang me 32[siliakan riemen] me kol Prihstud en Aron,meh 21 me apwtehn pitla nan sounpowng 18[eisek waluh] samwalhro.” Ni atail kelehpw, peneinei,pwihn en quorum, pwihn en utuht, soun kaskuhl kan, oh soun pwarala tuwong mehteikan, kitail koaros kak wia!
Koasondi 4: Sohte katepe sounpar me kitail mih loale, Kitail Koaros Lukwerieng en Kohla Sewesehla oh Kapitala
Presiden Henry B. Eyring pakairkihier: “Menda uwen sounpar kitail mih loale, uwen toutou, de atail pwukoah, uwen doh, kitail koaros sang ni ehupene kak lukwerioang en doadoahk pwe en sewese [Sounkomouro] kapitala Sapwellime kan lao lel ah pahn pilehu ketdo.”9
Nan ehu ehu rahn tohtohn neitail seri kan, me pwulopwul kan, me kirupw kan, oh me mah kan ideidawehn Sapwellimen Sounkomouro poahngok en kohdo sowesehda. Kalahngan en amwail nannanti! Kumwail mweidehngie I en ehukihong kumwail karasepeh kan:
Amy sounpar 7, lukeiong emen ienge Arianna oh ah peneinei en iang kohla towehda arail kansansal en Primary me kin wiawi nan pahr koaros ni ansoun sarawi en kamadipw sarawio. Sounpwong kei mwuri, Arianna oh ah peneinei iang pepdaisla.
Allan, pwutak pwulepwul sohte pwopwoud men, ahneki pepehm mwahu en ehukiong kompokepahko kisin kasdohn Sarawi kei sang Mormon message, oh sin iren pwuhk sarawi kei ong kempoakepah kan nan mehn kapehseh kan.
Sister Reeves tepda ehukihong rongamwahuo soun netnet kan me kin koal.
James luke kompokepah, Shane, me sohte wia emen tohn mwomwohdiso ong an nah serepeino pepdaiso.
Spencer kadaralahng rie serepein sohla pwuredo sarawio sin wasa iou nan internet iren an Russell M. Nelson ah padahk ni ehu conference o me kosoia, “Me e wadek padahko, oh koapworopwor miehier.”
Kauno kaunopadahr soahng kan koaros me kitail pahn anahne pwe kitail en kak kohla oh kapitala me solahr perenki kohdo iang sarawi kan oh kompokepahtail kan me sohte wia tohn mwomwohdisoht. Kitail koaros kak wia me!
I luke emen emen kumwail en alehda sapwellimen Sounkomouro luhk en kohla oh kapitala. Kitail kak wia met!
I kadehde wei ni mehlel me I ese me Sises me wia Silepen Sihpw mwahu o, E pokepoke kitail oh pil kin kapai kitail da ni ansou me kitail kin kohla oh iang sawas kapitala. I ese me E ieias; I ese. Ni mwaren Sises Krais, amen.