’A haere e fa’aora : E nehenehe tā tātou ’ia rave i te reira
’Ua hōro’a mai te Fatu i te mau mauha’a ato’a nā tātou nō te haere e fa’aora i tō tātou mau hoa melo paruparu ’e te melo ’ore.
’Ua ta’a maita’i i te Fa’aora Tāna misiōni e haere e fa’aora i te mau tamari’i a tō tātou Metua i te Ao ra, inaha ’ua parau ’Oia :
« I haere mai ho’i te Tamaiti a te ta’ata e ’imi e fa’aora i tei mo’e ra …
« [Inaha] ’oia ato’a tō ’outou Metua i te ao ra, ’aore ïa i hina’aro ē ’ia mo’e te hō’ē i teie nei mau ta’ata ri’i ».1
E merahi tō’u metua vahine, ’o Jasmine Bennion Arnold, tei māramarama maita’i i tāna hōpoi’a ’ia tauturu i te fa’aorara’a o te māmoe pēpē ’e te mo’e a tō tātou Metua i te Ao ra, mai tāna iho mau tamari’i ’e mau mo’otua. ’Auē ïa hōpoi’a fa’ahiahia tā te tupuna metua e nehenehe e ’amo i roto i te orara’a o tā rātou mau mo’otua.
Pinepine tō’u māmā i te tonohia nō te hāhaere i te ta’ata e fifi ra tō rātou fa’aro’o, te mau melo paruparu ’e te mau ’utuāfare ’āfa melo ; teie noa rā, e mau māmoe ’ē ato’a o tāna nana ’aita te ta’ata i tono iāna ’ia hāhaere. I te rahira’a taime, e ’ere tāna mau hāhaerera’a i te hō’ē noa taime i roto i te ’āva’e, inaha ’ua fa’aro’o māmū noa ’oia, ’ua utuutu i te ma’i ’e ’ua fa’aitoito ato’a ho’i ma te here. I te mau ’āva’e hope’a nō māmā, ’ua mau ’oia i te fare, ’e nō reira ’ua pāpa’ipa’i ’oia i te rata ia rātou, nō te fa’a’ite i tōna here, nō te hōro’a i tōna ’itera’a pāpū ’e ’ua fa’ateitei ato’a ia rātou tei haere mai e farerei iāna.
’Ia haere tātou e fa’aora, e hōro’a mai te Atua i te mana, te fa’aitoitora’a ’e te mau ha’amaita’ira’a ia tātou. I te fa’auera’a ’Oia ia Mose ’ia fa’aora i te mau tamari’i nō ’Īserā’ela, ’ua mata’u Mose, mai ia tātou ato’a nei e rave rahi. ’Ua ’ōtohe ri’i Mose ma te parau ē, « e ’ere au i te ta’ata parau… e reo maromaro’ā ’e te maumau tō’u ».2
’Ua tamarū te Fatu i tōna ’ā’au :
« ’O vai tei hōro’a mai i te vaha nō te ta’ata nei ? … E ’ere ānei ’o vau, ’o Iehova ?
« E teienei, e haere ’oe, ’e ’ei pīha’i ato’a iho vau i tō vaha, ’e nā’u e fa’a’ite ia ’oe i te parau ’ia parau ’oe ra ».3
Te aura’a ra, ’ua parau te Fatu ia Mose ē, « E nehenehe tā ’oe ’ia rave i te reira ! » ’E ua ’ite ’outou, e nehenehe ato’a tā tātou !
E hōro’a atu vau e maha parau tumu e tauturu ia tātou i roto i tā tātou mau tauto’ora’a fa’aora.
Parau tumu 1 : ’Eiaha tātou e fa’ataime i te haerera’a e fa’aora
Tē fa’ati’a ra Elder Alejandro Patanía, e Hitu ’Ahuru Area tahito, i te ’ā’amu o tōna teina, ’o Daniel, tei fano i tua nō te haere e tautai ’e tōna mau ta’ata. I te hō’ē taime ’ua fāri’i mai Daniel i te hō’ē parau fa’aara rū nō ni’a i te tahi vero rahi e haere mai ra. ’Aita i ha’amarirau, ’ua tere Daniel ’e tōna mau ta’ata nō te ho’i mai i uta i te uahu.
Tē pūai noa mai ra te vero, ’ino mai nei te mātini o te tahi pahi fātata ia rātou. Tāmau mai nei te ta’ata o Daniel i te niuniu i ni’a i te pahi ’ino nō te tāvere iāna. ’Ua pi’i rātou i te tauturu nā roto i te radio, tē ’ite nei ho’i rātou ē, tē pūai noa mai ra te vero ’e tītau-rū-hia te tauturu.
Tē pe’ape’a noa mai ra te ’utuāfare, ’ua farerei nā ti’a nō te ’ōti’a moana, te tā’atira’a ta’ata rava’ai ’e te nu’u moana nō te fa’aoti i te rāve’a fa’aorara’a maita’i roa a’e. ’Ua hina’aro vetahi ’ia fano atu i reira rā, ’ua parauhia rā ia rātou ’ia tia’i i te fa’anahora’a. ’E tē tāparu noa ra teie nau feiā i roto i te vero i te tauturu, tē farerei noa ra ïa teie mau ti’a ’e ’ua tāmata ’ia tū te mana’o i ni’a i te arata’ira’a tano ’e te fa’anahora’a.
’Ua fa’anahohia a’era te tahi pupu fa’aora, tē tae mai nei te pi’ira’a hope’a i te tauturu. Nō te ’ū’ana roa o te vero, ’ua mutu te niuniu e tā’amu ra i nā pahi, ’e tē hi’o ra te ta’ata o Daniel i te rāve’a nō te fa’aora i teie mau hoa rava’ai nō rātou. I te hope’a, ’ua tomo nā pahi to’opiti ’e ’ua mo’e te mau ta’ata, ē tae noa atu i te taea’e o Elder Patanía, ’o Daniel.
’Ua fa’aau Elder Patanía i teie ’ati i te fa’auera’a a te Fatu ’a nā ’ō ai ’Oia ē, « ’Aore ’outou i fa’a’eta’eta… ’e tei ha’apurarahia ra, ’aore ’outou i fa’aho’i mai… ’aore ho’i ’outou i ’imi i tei mo’e ra… e tītau vau i ta’u nana i tō [’outou] rima ».4
’Ua fa’ata’a Elder Patanía ē, e ti’a ’ia tātou ’ia fa’anahonaho i roto i tā tātou mau ’āpo’ora’a, mau pupu autahu’ara’a, mau pupu tauturu ’e ia tātou iho nei, ’eiaha rā tātou e fa’ataime i te haerera’a e fa’aora. I te tahi taime, e tau hepetoma te ma’iri i te paraparaura’a tātou e nāhea i te tauturu i te mau ’utuāfare ’e te mau ta’ata e hina’aro ta’a ’ē tō rātou. E mātutu tātou ’o vai te ta’ata e hāhaere ia rātou ’e te rēni arata’i nō te rave i te reira. Erā ïa tō tātou nau taea’e ’e tuahine ’e tō rātou mau hina’aro, tē pi’i noa nei ’e tē tāparu noa nei i te tauturu. ’Eiaha roa atu tātou e fa’ataime.
Parau tumu 2 : ’Eiaha roa atu tātou e fa’aru’e
’Ua parau mai te peresideni Thomas S. Monson, ’oia tei fa’ata’i i te pū nō te haerera’a e fa’aora, « Tītauhia ’ia fa’aha’amana’ohia i tō tātou mau melo ē ’aita roa atu i taere roa, ’ia hi’ohia… tō tātou mau melo paruparu… tei mana’ohia ē ’aita e faufa’a ’e e pau te taime ».5
Mai ia ’outou ato’a e rave rahi, ’ua poro vau i te ’evanelia ’e tē vai ra ’ua bāpetizo ’oi’oi mai, ’ua ho’i ’oi’oi mai i te purera’a, tē vai ra rā—mai tō’u hoa melo ’ore ’o Tim ’e tāna vahine melo paruparu, ’o Charlene—e maoro ri’i mai.
’Ua 25 matahiti tō’u paraparau-noa-ra’a ia Tim nō ni’a i te ’evanelia, ’ua ’āfa’i au ia rāua Charlene i te mau ’ōpani ’īriti o te mau hiero. ’Ua ’āmui ato’a mai vetahi nō te fa’aora ; ’āre’a rā, ’ua pāto’i noa mai Tim i te mau anira’a ’ia farerei i te mau misiōnare.
I te hō’ē hope’a hepetoma, ’ua tonohia vau nō te peresideni i te hō’ē ’āmuira’a titi. ’Ua ani au i te peresideni titi ’ia ha’apae i te mā’a ’e ’ia pure nō te ta’ata e hāhaere atu. ’Ua māere rahi roa vau i te hōro’ara’a mai ’oia i te i’oa o tō’u hoa ’o Tim. ’Ua pātōtō mātou te ’episekōpo o Tim, te peresideni titi ’e ’o vau nei i tōna ’ūputa, mātara mai nei te ’ūputa, ’ua hi’o Tim iā’u, hi’o i tōna ’episekōpo ’e ’ua parau atu ra, « ’Episekōpo, ’ua mana’o roa vau ē, ’ua parau mai ’oe e ta’ata ta’a ’ē te haere mai ! »
’Ata ihora Tim ma te parau ē, « ’A tomo mai Merv ». E semeio tei tupu i terā mahana. ’Ua bāpetizohia Tim i teienei, ’e ’ua tā’atihia rāua Charlene i roto i te hiero. ’Eiaha roa atu tātou e fa’aru’e.
Parau tumu 3 : ’Auē ho’i tō ’outou ’oa’oa rahi ’ia arata’i mai ’outou i te hō’ē noa a’e vārua ta’ata
’A rave rahi matahiti i ma’iri, i roto i te ’āmuira’a rahi, ’ua paraparau vau i tā José de Souza Marques i māramarama i teie mau parau a te Fa’aora, « mai te mea e pūai te hō’ē ta’ata i rotopū ia ’outou na i te Vārua ra, ’a tu’u atu iāna ’ia rave ’oia iāna ’o tei paruparu… ’ia riro ato’a ’oia ’ei mea pūai ato’a ».6
’Ua ’ite te taea’e Marques i te i’oa o te mau māmoe ato’a o tōna pupu tahu’a, ’e tē ma’iri ra Fernando. ’Ua tāpapa ’oia nā muri ia Fernando i tōna fare, haere i te fare o tōna hoa ’e i te pae tahatai ato’a.
Tei reira Fernando i te fa’ahe’era’a i ni’a i te moana. ’Aita ’oia i ha’amarirau ’e tomo te pahi mai te ’ā’amu nō Daniel. ’Ua haere ’oia i roto i te miti nō te fa’aora i tāna māmoe mo’e, ma te fa’aho’i iāna i te ’oa’oa o te fare.7
’Ei reira ’oia i te ha’apāpūra’a nā roto i te utuutura’a tāmau ē ’eiaha Fernando ’ia fa’aru’e fa’ahou i te nana.8
E fa’ati’a ri’i atu vau i te mea i tupu nō Fernando mai terā mahana i fa’aorahia ai ’oia, ’e te ’oa’oa i tupu nō te fa’aorara’ahia hō’ē noa a’e māmoe mo’e. ’Ua fa’aipoipo Fernando i tōna hoa here o Maria i roto i te hiero. E 5 tamari’i ’e e 13 mo’otua i teienei, e mea itoito rātou pauroa i roto i te ’Ēkālesia. E rave rahi fēti’i ’e ’utuāfare tei tomo ato’a mai i roto i te ’Ēkālesia. ’Ua ’āmui rātou ’e ’ua hāpono i e tauasini ’e tauasini i’oa tupuna nō te mau ’ōro’a hiero, ’e tē topa noa mai ra te mau ha’amaita’ira’a.
’A toru taime atu ra tō Fernando tāvinira’a ’ei ’episekōpo, ’e tē tāmau nei ’oia i te fa’aora i te ta’ata, mai i fa’aorahia ’oia. Teie tāna i parau ’aita i maoro a’enei, « I roto i tā mātou pāroisa, e 32 feiā ’āpī tamaroa nō te autahu’ara’a a Aarona, e 21 tei fa’aorahia i roto i nā ’āva’e 18 i ma’iri ». ’Ei ta’ata ’ōtahi, ’ei ’utuāfare, ’ei pupu autahu’ara’a, ’ei pupu tauturu, ’ei piha ’e ’ei taea’e ’e tuahine hāhaere, e nehenehe tā tātou ’ia rave i te reira !
Parau tumu 4 : Noa atu tō tātou fāito matahiti, tātou pā’āto’a tei pi’ihia ’ia haere e fa’aora
’Ua parau te peresideni Henry B. Eyring, « Noa atu tō tātou matahiti pa’ari, tō tatou ’ite, tō tatou pi’ira’a i roto i te ’Ēkālesia, ’e ’aore rā, tō tātou vāhi nohora’a, ’ua pi’ihia tātou pā’āto’a ’ia rave ’āmui i te ’ohipa no te tauturu [i te Fa’aora] i roto i Ta’na ’auhunera’a vārua ē tae roa atu i te taime e ho’i fa’ahou mai ai ’Oia ».9
I te mau mahana tāta’itahi, tē rahi noa mai ra tā tātou mau tamari’i, te feiā ’āpī, te feiā ’āpī pa’ari ’e te mau melo pa’ari, noa atu te fāito matahiti, ’o te pāhono nei i te ta’ira’a pū a te Fa’arora ’ia haere e fa’aora. Māuruuru nō tā ’outou mau tauto’ora’a. E hōro’a atu vau i te tahi hi’ora’a :
’O Amy, 7 matahiti, tei ani i te hō’ē hoa ia Adriana ’e tōna ’utuāfare ’ia haere mai i te fa’anahora’a purera’a ’ōro’a a te Paraimere. Ma’a ’āva’e noa i muri mai, ’ua bāpetizohia Adrianna ’e tōna ’utuāfare.
’O Allan, e taure’are’a pa’ari, tei fa’auruhia ’ia fa’a’ite i te mau video Mormon Messages, ’e te tahi ’īrava pāpa’ira’a mo’a i tōna mau hoa nā roto i te rāve’a ha’apararera sotiare.
’O te tuahine Reeves tei ha’amata i te fa’a’ite i te ’evanelia i te mau ta’ata ho’oho’o nā ni’a i te niuniu paraparau.
’O James tei ani i tōna hoa melo ’ore ia Shane ’ia haere mai i te bāpetizora’a o tāna tamahine.
’O Spencer tei hāpono i tōna tuahine melo paruparu i te hono nō te a’ora’a a te peresideni Russell M. Nelson ’e tē nā ’ō ra ’oia, « ’Ua tai’o ’oia i te a’ora’a ’e ’ua mātara mai te tahi ha’amāramarama ».
’Ua hōro’a mai te Fatu i te mau mauha’a ato’a nā tātou nō te haere e fa’aora i tō tātou mau hoa melo paruparu ’e te melo ’ore. E nehenehe tā tātou pā’āto’a ’ia rave i te reira !
Tē ani nei au ia ’outou tāta’itahi ’ia pāhono i te pi’ira’a a te Fa’aora ’ia haere e fa’aora. E nehenehe tā tātou ’ia rave i te reira !
Ma te tura rahi, te fa’a’ite pāpū nei au ē, ’ua ’ite au ’o Iesu de Tia’i māmoe maita’i, ’ua here ’Oia ia tātou ’e e ha’amaita’i ’Oia ia tātou ’ia haere tātou e fa’aora. ’Ua ’ite au ē, tē ora nei ’Oia ; ’ua ’ite au i te reira. Nā roto i te i’oa o Iesu Mesia ra, ’āmene.