2010–2019
Ugma ang Ginoo Mobuhat og Katingalahan diha Kaninyo
Abril 2016


Ugma ang Ginoo Mobuhat og Katingalahan diha Kaninyo

Padayon sa paghigugma. Padayon sa pagpaningkamot. Padayon sa pagsalig. Pagdayon sa pagtuo. Padayon sa paglambo. Ang langit moabiba kaninyo karon, ugma, ug sa kahangturan.

Mga kaigsoonan, duna ba moy ideya—duna ba moy mga nahunahunaan o bisan unsa—kon unsa kadako ang among paghigugma kaninyo? Sulod sa 10 ka oras kamong nagtan-aw, nagtutok sa usa ka nawong niini nga pulpito usa human sa usa, apan sa samang 10 ka oras, naglingkod kami luyo niini nga pulpito nga nagtan-aw, nagtutok kaninyo. Kamo milipay kanamo sa sentro gayud sa among kalag, dinhi man sa 21,000 sulod sa Conference Center, o sa daghan nga naa sulod sa mga meetinghouse ug mga chapel, o sa mga minilyon nga naa sa mga panimalay sa tibuok kalibutan, tingali nagtampusisok libut sa computer screen sa pamilya. Ania kamo, ug anaa kamo, oras matag oras, sa inyong Pang-dominggo nga mga saput, sa inyong pinakamaayo. Nanganta kamo ug nag-ampo. Naminaw kamo ug mituo. Kamo ang milagro niini nga Simbahan. Ug gihigugma namo kamo.

Pagkanindot na usab sa atong kinatibuk-ang komperensya. Napanalanginan gayud kita sa presensya ni Presidente Thomas S. Monson ug sa propetikanhong mga mensahe. President, gihigugma ka namo, nag-ampo kami alang kanimo, salamat, ug labaw sa tanan, kami nagpaluyo kanimo. Nagpasalamat kami nga imo kaming natudloan ug sa talagsaon nimong mga magtatambag ug sa uban pa nga talagsaong mga kalalakin-an ug kababayen-ang mga lider. Atong nadungog ang nindot kaayong musika. Kita giampo gayud ug gipangamuyo nga mosunod sa mga sugo. Tinuod gayud nga nabuhong kaayo kita sa Espiritu sa Ginoo nga ania uban kanato. Makapadasig kaayo ang pagtapos niining semana sa bisan unsa nga paagi.

Karon, may nakita kon nga duha ka problema. Ang usa sa pagkatinuod mao nga ako na lang ang katapusang nagbarug tali ninyo og sa hapit na ninyo makaon nga ice cream nga kanunay ninyong giandam sa pagtapos sa kinatibuk-ang komperensya. Ang laing problema makita niining litrato nga bag-o lang nakong nakuha gikan sa Internet.

Imahe
Dinosaur nga migukod sa mga bata

Mangayo ko’g pasaylo sa tanang bata nga karon nanago, nasalipdan o dili makakita niini, ang tinuod mao nga walay usa nato ang ganahan nga ang ugma, o ang adlaw nga nagsunod niana, moguba sa kanindot sa atong mga gibati niining pagtapus sa semana. Gusto natong gunitan og hugot kadtong mga espirituhanong impresyon ug ang makadasig nga mga pagtulun-an nga atong nadunggan. Apan dili kini kalikayan nga human sa langitnong mga gutlo sa atong kinabuhi, kita, tungod sa panginahanglan, mobalik sa kalibutan, ingnon ta lang sa pagsulti, nga ato na usab nga sagubangon ang mga kahimtang nga dili kaayo maayo.

Gipasidan-an na kita niana ni Pablo sa dihang siya misulat, “Hinumdumi ninyo ang nangaging mga adlaw, sa diha nga, sa nalamdagan na kamo, giantus ninyo ang malisud nga pagpakigbisug sa mga kasakitan.”1 Kanang pakigbatok sa kasakitan human sa paglamdag moabut sa daghang paagi, ug kini moabut kanatong tanan. Sigurado ang kada misyonaryo kinsa nagserbisyo sa dili madugay makaamgo nga ang kinabuhi diha sa misyon dili na gayud sama sa gipanindot nga palibut sa missionary training center. Ingon usab niini ang pagbati natong tanan sa atong pagbiya sa usa ka malinawon nga sesyon sa templo o ilabi na sa pagtapos sa piho nga espirituhanong miting sa sakrament.

Hinumdumi nga sa dihang si Moises mikanaog gikan sa iyang talagsaong kasinatian sa Bukid sa Sinai, iyang nakita nga ang iyang katawhan “nanagdaut sa ilang mga kaugalingon” ug “nahisimang sa hinanali.”2 Diha ra gayud sa tiilan sa bukid, nagkapuliki pag-adorno sa gisimba nga bulawan nga baka, sa takna nga ang Ginoo, anaa sa kinatumyan sa bukid, nga nagsulti kang Moises nga, “Dili ka magbaton og laing dios gawas kanako,” ug “Kamo dili magbuhat nganha kaninyo bisan unsa nga kinulit nga larawan.”3 Si Moises wala malipay sa iyang panon sa nahisalaag nga mga Israelita nianang adlawa!

Atol sa Iyang yutan-ong pangalagad, si Jesus midala kang Pedro, Santiago, ug Juan ngadto sa Bukid sa Transpigurasyon, diin, ang kasulatan nag-ingon, “ang iyang nawong midan-ag sama sa adlaw, ug ang iyang sapot miputi sama sa kahayag.”4 Ang langit mibukas, mianhi ang mga karaang propeta, ug ang Dios Amahan namulong.

Human nianang celestial nga kasinatian, unsa man ang nakita ni Jesus sa pagkanaog Niya sa bukid? Una Iyang naabtan ang panaglalis tali sa Iyang mga disipulo ug sa ilang mga kaaway kabahin sa napakyas nga pagpangalagad ngadto sa batang lalaki. Dayon Iyang gisulayan sa pagkombinser ang Napulog Duha—wala molampos, misangpot nga—Siya sa wala madugay dad-on ngadto sa lokal nga mga magmamando kinsa mopatay Kaniya. Dayon dunay mihisgot bahin sa buhis nga bayranan, diini kini direktang gibayaran. Dayon Siya kinahanglang mobadlong sa uban sa kaigsoonan tungod kay sila nanaglantugi kon si kinsa ang labing dako sa Iyang gingharian. Kining tanan miresulta sa usa ka punto nga Siya miingon, “O dili matinuohon nga kaliwatan, … Unsa ba ka taas sa panahon nga gikinahanglan pa sa akong pag-antus kaninyo?”5 May higayon Siya sobra sa kausa sa paghatag niana nga pangutana atol sa Iyang pagpangalagad. Dili ikatingala nga Siya nagtinguha nga mag-inusarang mag-ampo didto ibabaw sa bukid!

Sa kasayuran nga kitang tanan kinahanglang manganaog gikan sa pinakamaayong kasinatian aron sa pag-atubang sa nagkadaiyang kausaban sa kinabuhi, tuguti nga akong itanyag kining pag-awhag samtang tapuson kining kinatibuk-ang komperensya.

Una sa tanan, kon sa umaabut nga mga adlaw dili lang ninyo makita ang mga limitasyon sa inyong palibut apan makita usab ninyo ang mga elemento sa inyong kaugalingong kinabuhi nga wala pa mahaum ngadto sa mga mensahe nga inyong nadunggan niining semanaha, ayaw kaguol ug ayaw paghunong. Ang ebanghelyo, ang Simbahan, ug kining maanindot nga tunga sa tuig nga panagtigum gituyo aron sa paghatag og paglaum ug inspirasyon. Wala kini tuyoa aron kamo mawad-an sa paglaum. Bugtong ang yawa lang, ang kaaway natong tanan, maningkamot sa pagkombinser nato nga ang mga baruganan nga gilatid sa kinatibuk-ang komperensya dili tinuod, nga ang tawo dili gayud molambo, nga wala gayuy usa nga mouswag. Ug nganong si Lucifer mihatag niana nga pamulong? Tungod kay siya nasayud nga siya dili molambo, siya dili mouswag, nga sa mga kalibutan nga walay katapusan siya dili gayud makabaton og usa ka hayag nga kaugmaon. Siya usa ka tawo nga misirable nga ginapos sa mahangturong mga limitasyon, ug gusto usab niya nga kita mahimong misirable. Busa, ayaw padala niana. Pinaagi sa gasa sa Pag-ula ug sa kalig-on sa langit aron sa pagtabang kanato, kita mahimong molambo, ug ang talagsaong butang kalabut sa ebanghelyo mao nga kita magantihan sa pagpaningkamot, bisan kon kita dili kanunayng magmalampuson.

Dihang adunay kontrobersiya sa Simbahan sa una kon si kinsa ang may katungod sa mga panalangin sa langit ug kinsa ang wala, ang Ginoo miingon ni Propeta Joseph Smith, “Sa pagkatinuod Ako moingon nganha kaninyo, [ang mga gasa sa Dios ] gihatag alang sa kaayohan niadto kinsa nahigugma kanako ug naghupot … sa akong mga sugo, ug [alang kanila] nga nagtinguha siya nga nangita sa mao aron sa pagbuhat.”6 Dili ba kitang tanan angayang magmapasalamaton sa gidugang nga probisyon “ug … mangita sa mao aron sa pagbuhat”! Usa kana ka pangluwas sa kinabuhi tungod kay usahay mao ra kanay atong ikatanyag! Kita mobati og kahupayan diha sa kamatuoran nga kon ang Dios moganti lamang sa hingpit nga matinud-anon, wala unta Siya’y daghang lista sa ngalan nga hataganan niya og ganti.

Busa palihug hinumdumi ugma, ug ang tanang mga adlaw human niana, nga ang Ginoo mopanalangin niadtong kinsa gusto nga molambo, kinsa modawat sa mga panginahanglan sa mga sugo ug mosulay aron sa pagpugong kanila, kinsa bililhon sa Kristohanong mga hiyas ug maningkamot sa pag-angkon niini. Kon kamo nasayop niana nga paningkamot, mao usab ang tanan; ang Manluluwas anaa sa pagtabang kaninyo sa pagpadayon. Kon kamo nadagma, pangayoa ang Iyang kalig-on. Motawag sama ni Alma, “O Jesus, … malooy ka kanako.”7 Siya motabang kaninyo nga makabangon. Motabang Siya nga kamo maghinulsol, moayo, sa bisan unsang ayuhunon, ug sa pagpadayon. Sa dili madugay inyong maangkon ang kalampusan nga inyong gitinguha.

“Ingon nga ikaw nagtinguha kanako busa kini mahimo nganha kanimo,” namahayag ang Ginoo.

“… Itugyan ang imong pagsalig diha niana nga Espiritu nga nagtultol sa pagbuhat og maayo—oo, sa paghimo sa makiangayon, sa paglakaw nga mapainubsanon, sa paghukom nga matinud-anon. …

“… [Dayon] bisan unsa nga ikaw nagtinguha kanako [sa] pagkamatarung … ikaw makadawat.8

Ganahan ko niana nga doktrina! Pabalik-balik kini nga nag-ingon nga kita mapanalanginan sa atong tinguha sa pagbuhat og maayo, gani ingon nga kita tinud-anay nga maningkamot sa pagkahimong sama niana. Ug kini nagpahinumdom nga aron kita mokwalipay niana nga mga panalangin, kinahanglan natong sigurohon nga dili nato kini ilimud ngadto sa uban: makiangayon kitang moatubang, patas gayud, kinahanglan mapaubsanon kita, dili magmapahitas-on; mohukom nga matarung, dili magpakaaron ingnon nga tarung.

Akong mga kaigsoonan, ang unang dako nga sugo sa tanang kahangturan mao ang paghigugma sa Dios sa tibuok natong kasingkasing, gahum, hunahuna, ug kusog—mao kana ang una ug dakong sugo. Apan ang unang dako nga kamatuoran sa tanang kahangturan mao nga ang Dios nahigugma kanato sa tibuok Niyang kasingkasing, gahum, hunahuna, ug kusog. Kana nga gugma mao ang pundasyon nga bato sa kahangturan, ug kini maanaa sa tukuranan nga bato sa atong inadlaw-adlaw nga kinabuhi. Sa pagkatinuod kini lamang inubanan nianang kasigurohan nga nagdilaab sa atong kalag, nga kita makaangkon sa pagsalig aron magpadayon sa pagpaningkamot nga molambo, padayon sa pagpangita og kapasayloan sa atong mga sala, ug pagpadayon sa pagtugyan niana nga grasya sa atong silingan.

Si presidente George Q. Cannon makausa mitudlo: “Bisan unsa kabug-at ang pagsulay, unsa kalawom sa kasubo, unsa kadako sa kasakit, [ang Dios] dili gayud motalikod kanato. Wala gayud Siya mibuhat niini, ug dili gayud Niya buhaton. Siya dili makahimo niini. Dili Iyang kinaiya [ang pagbuhat sa ingon]. … [Kanunay] modapig siya kanato. Mahimong moagi kita sa nagdilaab nga kalayo; sa halawom nga katubigan; apan dili kita maugdaw o malupig. Makalingkawas kita sa tanan niining pagsulay ug kalisud sa mas maayo ug putli alang kanila.”9

Kon kanang harianong debosyon gikan sa langit sama ka makanunayon sa atong kinabuhi, nga gipakita sa labing lunsay ug hingpit nga kaayo sa kinabuhi, kamatayon, ug Pag-ula ni Ginoong Jesukristo, kita makalingkawas sa mga sangputanan sa sala ug pagkahanggaw—sa atong kaugalingon o sa uban—sa bisan unsang paagi kini moabut kanato sa inadlaw-adlaw nga panginabuhi. Kon atong ipahinungod ang atong kasingkasing ngadto sa Dios ug mobuhat kutob sa atong mahimo sa pagsunod sa ebanghelyo, dayon ang ugma—ug ang ubang adlaw—mahimong talagsaon, bisan og dili nato kini mailhan sa kanunay nga ingon niini. Ngano man? Tungod kay ang atong Langitnong Amahan gusto nga mahimo kini! Gusto Niyang mopanalangin kanato. Ang magantihon, buhong, ug walay katapusan nga kinabuhi mao gayud ang tumong sa Iyang plano nga puno sa kalooy alang sa Iyang mga anak! Mao kini ang plano nga gipasikad sa kamatuoran “nga tanan nga mga butang nagabuhat og maayo ngadto kanila nga nahigugma sa Dios.”10 Busa ipadayon ang pagpaningkamot. Padayon sa pagpaningkamot. Padayon sa pagsalig. Pagdayon sa pagtuo. Padayon sa paglambo. Ang langit moabiba kaninyo karon, ugma, ug sa kahangturan.

“Wala ba ikaw makaila? wala ba ikaw makadungog?” Si Isaias mituaw.

“Ang [Dios] nagahatag ug gahum niadtong maluya; ug kaniya nga walay kabaskug nagadugang siya ug kusog. …

“… Kadtong nagahulat [Kaniya] magabag-o sa ilang kusog; sila manlupad pinaagi sa mga pako ingon sa mga agila. …

“Kay … ang Ginoo … nga imong Dios mokupot sa [ilang] kamot nga tuo, nga magaingon [kanila], Ayaw kahadlok; ako magatabang kanimo.”11

Mga kaigsoonan, hinaut ang mahigugmaong Amahan sa Langit mopanalangin kanato ugma nga mahinumdom kon unsay atong nabati karon. Hinaut mopanalangin Siya kanato aron matagamtam ug maningkamot uban sa pailub ug pagkamakanunayon ngadto sa mga sumbanan nga atong nadungog nga gitudlo niining komperensya sa pagtapos sa semana, nasayud nga ang Iyang balaanon nga gugma ug walay kapakyasan nga tabang maanaa kanato bisan kon manlimbasog kita—dili, maanaa kanato ilabi na kon kita manlimbasug.

Kon ang sumbanan ingon og taas ug ang personal nga kalamboan nga kinahanglan natong makab-ot ingon og dili maabut, hinumdumi ang pag-awhag ni Josue sa iyang mga katawhan kon sila mag-atubang og usa ka makahadlok nga kaugmaon. “Magputli kamo,” miingon siya, “kay ugma si Jehova magbuhat ug mga katingalahan sa inyong taliwala.”12 Akong ipahayag kanang sama nga saad. Mao kana ang saad niini nga komperensya. Mao kana ang saad niini nga Simbahan. Mao kana ang saad Kaniya kinsa mihimo niini nga mga katingalahan, kinsa Siya Mismo mao ang “Kahibulongan, Magtatambag, Dios nga Makagagahum, … Ang Principe sa Pakigdait.”13 Pinaagi Kaniya ako mosaksi. Pinaagi Kaniya usa ako ka saksi. Ug ngadto Kaniya kini nga komperensya nagbarug isip usa ka testamento sa Iyang padayon nga buhat niining talagsaon nga ulahing mga adlaw. Sa pangalan ni Jesukristo, amen.