Ena Cakacaka Mana na Turaga vei Kemuni ena Mataka

Taciqu kei na ganequ, o ni sa kila tiko beka—o ni sa vakabauta se kidava rawa—na levu ni neimami lomani kemuni? E 10 na auwa nomuni rai tiko mai, ki vua e dua na tamata ena itutu ni vunau oqo ena kena veitarataravi, ia ena loma ni 10 na auwa vata qori, oi keimami ena daku ni itutu ni vunau oqo, keimami rai tiko yani. Ko ni dau vakamarautaki keimami ena uto ni yaloi keimami, oi kemuni na 21,000 ena loma ni Vale ni Koniferedi oqo, se ivavakoso ena veivale ni soqoni se valenilotu, se kemuni na milioni ena veitikotiko e vuravura raraba, ko ni kumuni tiko ena sarasara ena kompiuta ni matavuvale. Oi kemuni oqo, o kemuni qori, auwa veitarataravi ena nomuni isulu ni Sigatabu. Ko ni lagasere ka masu. Ko ni vakarorogo ka vakabauta, ko ni sa cakamana sara ga ni Lotu oqo. Ka keimami lomani kemuni.

Sa totoka dina na noda koniferedi raraba oqo. Eda kalougata ni mai maliwai keda o Peresitedi Thomas S. Monson kei na nona itukutuku vakaparofita. Peresitedi, keimami lomani kemuni, keimami sa masulaki kemuni, vakavinavinaka vei kemuni, ka kena usutu, keimami tokoni kemuni. Keimami vakavinavinaka ni keimami sa vakavulici mai vei kemuni, rau nomuni daunivakasala kei na vuqa na noda iliuliu turaga kei na marama cecere. Eda sa rogoca na sere ivakatagi tawa vakatauvatani rawa. Eda sa mai cabori sara ka vakamasuti. A tiko dina eke na Yalo ni Turaga ena kena cecere sara. Sa qai dua dina na mua ni macawa veivakauqeti ena ituvaki taucoko.

Ia, oqo au raica na leqa e vica sa sotavi keda tiko. Dua ni sai au ga sa tu ena kemuni tadrua kei na aisikirimu sa dau vakarautaki me tini kina na koniferedi raraba. Na ikarua ni leqa e tiko ena itaba oqo au a raica ena siga o ya ena Initaneti.

iVakatakilakila

Na dainaso e cemuria tiko e rua na gone

Kere veivosoti tiko vei ira na gone taucoko era vuni tiko ena ruku ni nodra idabedabe, ia na ka dina ni sega e dua vei keda e vinakata na siga ni mataka se siga e tarava me vakarusa na vakanananu totoka sa yaco vei keda ena mua ni macawa oqo. Eda gadreva meda ququmi matua ki na veivakauqeti vakayalo sa yaco kei na veivakavulici veivakauqeti eda sa rogoca. Ia e sega ni tarovi rawa ni oti noda gauna vakalomalagi oqo, sa gadrevi meda sa lesu tale e vuravura, kena itukutukuni, meda sotava tale na veika e lailai sobu.

A vunauci keda kina o koya a vola na Iperiu, “Ia dou vakananuma na veisiga e liu, dou a vakararamataki kina ka dou a qai vosota na veivala ena rarawa vakaidina.”¹ Na veivala veimuri ena rarama o ya ena rawa ni yaco mai ena vuqa na sala, ka rawa me yaco mai kivei keda kece. E dina o ira kece na daukaulotu era sa kaulotu era kila ni bula ena vanua ni kaulotu e sega ni vaka na ituvaki matata era sotava ena koronivuli ni kaulotu. Vakakina vei keda kece ni oti mai noda soqoni totoka ena valetabu se vakacavari mai na soqoni vakayalo ni sakaramede.

Nanuma nona siro sobu duadua mai o Mosese mai na Ulunivanua o Saineai, a raici ira na tamata ni ra sa “vakasisilataki ira” ka ra sa “lako tani vakatotolo.”² Ena ruku ni ulunivanua era sa maqusa ena saunaka e dua na bulumakau koula mera qarava, ena gauna sara ga sa tukuna tiko kina o Jiova ena ulunivanua vei Mosese, “Me kakua vei iko na kalou tani koi au duadua ga” ka “Mo kakua ni cakava vei iko e dua na matakau ceuceu.”³ A sega ni marautaka o Mosese na nodra veilecakayaki tiko na nona tamata na Isireli ena siga o ya!

Ena Nona cakacaka vakalotu e vuravura, a kauti Pita, Jemesa, kei Joni o Jisu ki na Ulunivanua ni Mataliataki, ka tukuni ena ivolanikalou ni “sa serau na matana me vaka na matanisiga, ka sa vulavula mai na nona isulu me vaka na rarama.”⁴ Sa tadola ko lomalagi, era tadu mai na parofita makawa, ka vosa mai na Kalou na Tamada.

Ni oti na kena vakilai o silesitieli, na cava e lakova ena ruku ni ulunivanua o Jisu me kunea? Ia, na imatai a raica na nodratou veileti na Nona tisaipeli kei ira na vosakudrukudru ni a sega ni vakabulai rawa e dua na cauravou lailai. A qai saga me vakauqeti iratou na Tinikarua—a sega ni rawa, a yaco ga—ni na soli yani vei ira na iliuliu ni vanua mera na qai vakamatei Koya. E dua a qai kaya ni dua na ivakacavacava e dodonu me saumi, ka sa mani saumi sara vakadodonu. Sa qai vunauci ira vakaukauwa eso na veitacini baleta ni ra sa veiletitaka tiko o cei me iliuliu ena Nona matanitu. A ka oqo sa mani vosa kina o Koya, “Ai tabatamata sega ni vakabauta, … a cava na kena dede meu vosoti kemudou?”⁵ A rawa Vua me dau taroga wasoma ena gauna ni Nona cakacaka vakalotu. Sega ni kurabuitaki ni gadreva me masu vakatikitiki ena veiulunivanua!

Au raica vei kedakece meda lako sobu mai na noda veigauna cecere meda na sotava na veituvaki taucoko ni bula, kau sa vakayaloqaqataki kemuni kina ni mai tini tiko na koniferedi raraba oqo.

iMatai taumada, ke o raica nomu veisiga ni mataka na veivakataotaki vei ira era tiko voliti iko ia ka raica talega na veigacagaca ena nomu bula e sega ni veiraurau ki na itukutuku o sa rogoca ena macawa oqo, kakua ni ko yalolailai ka kakua ni soro. Na kosipeli, na Lotu, kei na soqoni vulaono totoka vakaoqo sa nakiti me soli inuinui kei na veivakauqeti. E sega ni caka me vakayalolailaitaki kemuni. Na tevoro duadua ga, na keda meca taucoko, ena saga me vakauqeti keda ni ituvatuva sa mai tukuni ena koniferedi raraba e veivakayalolailaitaki ka sega ni dodonu, ni tamata era sega tu ni torocake, ka sega ni dua e tubu dina tiko. Qai cava na vuna e vosa kina vaqori o Lusefa? Baleta ni kila ni sega ni rawa vua me torocake, ni sega ni rawa vua me tubu, ni vuravura sega ni yalani oqo ena sega ni rawa vua me dua nona mataka rarama. Sa tamata rarawa sara sa kovuti tu ena yalani tawamudu, ka gadreva meda rarawa talega vakataki koya. Kakua ni coko kina. Ena isolisoli ni Veisorovaki i Jisu Karisito kei na kaukauwa ni lomalagi ena vukei keda, sa rawa meda torocake, kei na ka e cecere kina na kosipeli o ya ni da na saumi ni datovolea tiko, gauna mada ga eda sega ni rawata kina.

Na gauna a yaco kina e dua na veileti ena Lotu taumada me baleta o cei me nona na veivakalougatataki vakalomalagi kei cei me kua, a vakaraitaka kina na Turaga vei Parofita Josefa Simici, “Raica au sa kaya vakaidina vei kemudou, sa soli [na isolisoli ni Kalou] me yaga vei ira sa lomani au ka muria … na noqu vunau, ia [vei ira] sa segata sara me vakayacora.” ⁶ Totoka, eda sa qai sega beka ni vakavinavinaka taucoko ki na ikuri ni veika vinaka o ya “ka … segata sara meda vakayacora”! Sa veivakabulai dina oqo baleta so na gauna, oqori ga na ka eda rawa ni solia! Eda kune vakacegu ni da kila tiko ke me cakavinaka na Kalou vei ira ga sa yalodina sara, ena vica wale sara era na ciqoma.

Yalovinaka nanuma tiko na mataka, kei na veisiga kece e tarava mai, ni Turaga ena vakalougatataki ira era vinakata mera torocake, era ciqoma na gadrevi ni ivakaro ka tovolea mera muria tiko, era vakamareqeta na dodonu Vakarisito ka sagamera rawata ena nodra gugumatua qaqa. Ke o sikalutu ena sasaga oqo, ni yaco vei keda kece; sa tiko na iVakabula me vukei iko mo toso ki liu. Ke o sa lutu, kerea na Nona kaukauwa. Mo kaci vakataki Alama, “Oi kemuni Jisu. … ni lomani au mai.”⁷ Ena vukei iko mo laveti cake. Ena vukei iko mo veivutuni, vakatudonutaka, ka vakavinakataka na veika me vinaka, ka toso ki liu. Sega ni bera ko na rawata na ka o a saga tiko.

“A ka kecega ko sa kerea vei au, ena soli vei iko,” oqo na vosa ni Turaga.

“…Mo vakarorogo vua na Yalo Tabu ni na tuberi iko ena sala dodonu—mo kitaka na veika vinaka, mo yalomalumalumu ka lewa vakadodonu. …

[Kei na] veika kece ga ko sa kerea [ena] vakabauta, … ni na soli vei iko. ”⁸

Au taleitaka na vunau o ya! E tukuni tale kina ni da na vakalougatataki ni da sa gadreva meda caka vinaka, ena gauna mada ga eda sasagataka tiko kina. Ka vakavotui keda ke gadrevi meda rawata na veivakalougatataki oqori, meda sa qai raica meda kakua ni cakitaka vei ira na tamata: meda sa cakacaka vakadodonu, sega ni veidabui; sega ena veitotaki, meda sa lako ena yalomalumalumu, sega ena dokadoka; sega ena viavialevu, meda lewa vakadodonu, sega ni vakadonui keda ga, sega ena ivalavala ca.

Taciqu kei na ganequ, na imatai ni vunaulevu duadua ni veigauna tawamudu o ya meda lomana na Kalou ena yaloda, igu, nanuma, kei na kaukauwa kecega—oqori na imatai ni vunau levu duadua. Ia na imatai ni dinacecere ni veigauna tawamudu o ya ni Kalou sa lomani kedaena Yalona igu, vakasama, kei na kaukauwa. Na loloma o ya sa vatu ivakadei ni veigauna tawamudu, ka dodonu me vatu ivakadei ni noda bula ena veisiga. E dina ni veivakadeitaki ga oqo sa katakata vinaka kina na lomada meda sa qai yalonuidei meda saga na torocake, saga meda vosoti ena noda ivalavala ca, ka dedeka tikoga yani na loloma soliwale oqo vei ira na noda neiba.

A vakavulica oqo o Peresitedi George Q. Cannon: “Se cava na dredre ni veivakatovolei, se titobu ni lomaocaoca, se vakaitamera ni rarawa, ena sega vakadua ni laivi keda na [Kalou]. A sega ni cakava, ka na sega ni cakava. Ena sega ni rawa Vua. E sega ni Nona ivakarau [me cakava o ya]. … Ena [dau] totaki keda. Eda na curuma beka na lovo bukawaqa; eda na ovaca beka na wasawasa titobu; ia eda na sega ni rawai se vakadrukai. Eda na lamata mai na veivakatovolei kei na dredre kece oqo ka yaco meda qaqa ka savasava cake mai kina.”⁹

Ia, mai na dina cecere vakalomalagi o ya sa mai veivakadeitaki tikoga ena noda bula, vakayaco-ka ena savasava kei na vinaka taucoko ni bula, mate, kei na Veisorovaki ni Turaga o Jisu Karisito, sa qai rawa meda dro mai na revurevu ni ivalavala ca kei na yalolialia—na noda kei na nodra eso—ena ituvaki cava ga ena yaco mai vei keda ena noda bula ena veisiga. Ni da solia na yaloda vua na Kalou, ke da lomana na Turaga o Jisu Karisito, keda cakava noda vinaka taucoko meda bulataka na kosipeli, sa qai yaco na mataka—kei na veisiga kece me ra sa qai ka cecere, ena gauna mada ga ni da sega ni kidava rawa kina. Na vuna? Baleta ni vinakata na Tamada Vakalomalagi me vakaoqo! E vinakata me vakalougatataki keda. Na bula saumi mai, e cecere, ka tawamudu sa ikoya na usutu ni Nona ituvatuva loloma vei ira na Luvena! Oqo na ituvatuva sa umanaki ena dina ni “sa veivuke na ka kecega mera vinaka kina era sa lomana na Kalou.” ¹⁰ Mo sasaga tikoga. Mo vakabauta tiko. Mo vakadinata tikoga. Tubu tikoga. Ena vakayaloqaqataki iko tiko mai o lomalagi e nikua, ni mataka, ka tawamudu.

“Ko sa sega beka ni kila? ko sa sega ni rogoca?” a kaya o Aisea.

“[Na Kalou] sa dausolia na kaukauwa vei ira era sa malumalumu; ena vakalevutaka na kaukauwa vei ira sa sega ni gumatua rawa. …

“… Ko ira era sa waraki [Koya] era na vakaukauwataki, era na cabe cake me vaka era vakatabana vakaikeli. …

“Ni … ko Jiova … na Kalou ena taura na [ligadra] imatau, ka kaya vei [ira], Kakua ni ko rere; kau na vukei iko.”¹¹

Taciqu kei na ganequ, me sa qai vakalougatataki keda ni mataka na Tamada Vakalomalagi dauloloma ka nanuma tiko na veika eda a vakila nikua. Me vakalougatataki keda o Koya meda sasagataka tikoga na veika vinaka eda sa mai rogoca ena macawa ni koniferedi oqo, ka kila ni Nona loloma vakalou kei na veivuke gugumatua ena tiko kei keda ni da sasaga bula tiko mada ga—ena tiko kei keda vakabibini da sasaga bula tiko.

Ke sa cecere beka na ivakatagedegede ni Kosipeli kei na torocake yadudua e gadrevi ena veisiga ni mataka sa vaka me cawadru laivi, nanuma nona vakayaloqaqataki ira nona tamata o Josua ni sa tu e matadra na veisiga veicavilaki. “Ni vakasavasavataki kemuni,” a kaya, “ni na kitaka na cakacaka mana eso ko Jiova ena kemuni maliwa ena mataka.”¹² Au sa yalataka na yalayala vata ga o ya. Sa yalayala ni koniferedi oqo. Sa yalayala ni Lotu. Sa Nona yalayala o Koya sa dau cakava na veika mana oqori, ni o Koya sara ga, o “Veivakurabuitaki, na iVakavuvuli, na Kalou Kaukauwa, … Na Tui ni Sautu.”¹³ Ena Vukuna au vakadinadinataki Koya. Ena Vukuna au sa ivakadinadina. Kivei Koya sa yaco na koniferedi oqo me sa ivakadinadina ni Nona cakacaka ni veisiga cecere nikua. Ena yaca i Jisu Karisito, emeni.