E na Karaoi Kamimi Iehova Ningabong I buakomi

Tariu ao mwaaneu, iai nako ami iango—iai ami koaua ke iangoan te bwai ae koaua ane kam taku bwa mwaitira ara tangira ibukimi? Ibukin 10 te aoa kam mataku, kam teimatoa n taraa te ubu teuana n te tabo n taetae, ma ai aron naba 10 te aoa akanne, ti tekateka iakuun te tabo n taetae ni mamataku, ni kamatoai matara iaomi. Kam kakukureira mai kabin nanora, tao ngkana e reke 21,000 ikai n te Tienta ni Maungatabu ke mwaitiia aomata inanon auti ni bootaki ao auti n taromauri, ke tokina mirion inanon mweenga ni katobibia te aonaaba, tao a kiribobootaki ni katobibia ana kombiuta tikuriin te utu. Kam mena ikai, kam mena ikekei, te aoa imwin te aoa, n ami kunnikai n taromauri, n teimi ae tararaoi. Kam anene ao kam tataro. Kam ongora ao kam kakoaua. Ngkami bon taian kakai inanon te Ekaretia aei. Ao ti tangiri ngkami.

Ai bon tamaroara riki te maungatabu ni kabuta ae ti a manga roko inanona. Ti a tia ni kakabwaiaki n ae onoti n raonakira iroun Beretitenti Thomas S. Monson ao rongorongon ana taetae ni burabeti. Beretitenti, ti tangiriko, ti tataro ibukim, ti karabwako, ao iaon bwaai nako, ti boutokaiko. Ti kakaitau n reiakinara iroum ao irouia am kauntira aika tamaroa ao irouia mwaitiia tabeman ara mwaane aika koro kamimia ao taan kairiiri aine. Ti a tia n ongora n te katangitang aika a koro tamaroaia. Ti a tia ni kaumakaki n tataro ibukin ao ni butiaki bwa ti na kawakin tuua. Ni koauana Tamnein te Uea e a tia ni mena ikai n ae rang korakora. Aio e na kaungaa riki te wiikente inanon waakina nako.

Ngkai, I noori uoua kaangaanga. Teuana bon koauan are I kaotia bwa Ngai te kabanea n aomata n tei imarenami ma te aitikuriim are kam kakatauraoia n taainako ni banen te maungatabu ni kabuta n tekateka ni karokoa banen au taetae imwaain ae kam kona ni kang aitikuriim. Te kauoua ni konabwai n te kaangaanga bon are e reke n te tamnei aio are I nooria n te intanete.

Tamnei

Te Man ae te Taainatioo ae kakioia ataei

I kabwarabure nakoia ataei ni kabane ake a karabaia iaan aia kaintekateka, te bwai ae I tuangkami bwa akea mairoura ae tangiria ni kabuai namakin akana a kakateke akanne ake ti karekei n te wiikente aei, ke te bong are imwiin anne, n uruana kakawakin namakin ake ti karekei n te wiikente aei. Ti tangiria n taui ni kamatoai namakin ake iroura ao reirei aika a kaunganano ake ti ongoraeakin. Ma e kantaningaki bwa imwiin taai aika a kororaoi inanon maiura, ti, riai, n okira te aonaaba, ngaia are n atongnga, ike n tabetai ti na manga kaitara iai ma kaangaanga aika aki tau.

Te tia kororeta nakoia Ebera e kauringiira aio ngke e koroia, “Kam na ururing boong ake rimoa, ake, kam taon nanomi, ni buaka n te buaka ae korakora aika taiani maraki.”¹ Te karawawataaki anne e kona n kaotaki taekana n kawai aika a mwaiti, ao e kona n roko nakoira ni kabane. Ni koauana tiaki n aekakin te tabo ae mwaawa raoi angina n aron te tienta ni kataneiai ibukiia mitinare. Aei e riki nakoira ni kabane imwiin te tetere ae kakukurei inanon te tembora ke imwiin te bootaki n toa ae onoti ae kororaoi.

Uringnga bwa ngke e ruorikaaki Mote man te bwai are e rinanona ae kamimi iaon te Maunga are Tinai, e kunea bwa ana aomata a tia ni “kabuakakaia” ao n tia ni “kai rairaki.”² Ana botanaomata a mena iaan te maunga, a tabetabe ni karaoa te kao ae koora bwa a na taromauriia, n te aoa naba are Iehova, e mena i taubukin te maunga, e tuanga Mote, “Ko na tai Atuana te Atua temanna i rarikiu” ao “Ko na tai karaoa am b’ai te boua ae karaki.”³ Mote e bon aki kukurei ma ana nanai ni kakionakoia Iteraera n te bong anne!

N ana Mwakuri iaon te aba, Iesu e kaira Betero, ao Ioane nakon te Maunga n Onikaki, ike, e taku booki aika a tabu, “e ota matana n ai aron taai, ao kunnikaina e mainaina n ai aron te ota.”⁴ Iai te reitaki ma kaain karawa, a kaoti burabeti ake ngkoa, ao e taetae te Tama ae te Atua.

Imwiin te taneiai ae tabu n aron anne, tera ae ruorikaaki iai Iesu man te maunga bwa e na kakaea? Eng, te moan E kuneiia ni kakauntaeka Ana reirei imarenaia ma taan kaitaraia ni kaineti ma bwakaia n te kakabwaia are a angan te ataeinimwaane. Ngkanne e kataia n anai nanoia naake Tengaun ma Uoman—are akea tokanikaina ni karaoia, e bitaki—bwa E na kamaiuaki mairouia taan moti ake a na tiringnga. Ngkanne temanna e kauringnga bwa a koro tain ana angabwai, are E waekoa ni kabooimwiia. Ngkanne E takuia tabeman ibukina a kakauntaeka bwa ai antai ae kakannato riki ni Ueana. Baikai ni kabane e kairia n te kantaninga are e kangai, “O te roro ae aki onimaki, … man ra taotaonakin nanou nako imi?”⁵ Iai nanon titirakinan anne irouna ae riaon tetaina inanon Ana mwakuri. Ngaia ae e tangiria ni kan tataro n tii ngaia iaon te maunga!

N ataakina bwa ngaira ni kabane ti ruo ma taneiai aika rietaata n taobarai taai aika raraoi ao aika bubuaka inanon te maiu, I bia anga te kaunganano aei ikai n tokin te maungatabu ni kabuta.

Te moan ibuakon bwaai ni kabane, ngkana inanon boong akana imwaaim ko aki tii kunei baika a tianaki irouia naake irarikim ma ko noori naba bwaai inanon maium ake a aki boraoi ma rongorongo ake ko ongoraeakin n te wiikente aei, taiaoka e na tai mamaara tamneim ao tai bwarannano. Te euangkerio, te Ekaretia, ao bobootaki aika kakateke aikai n te itera n ririki a baireaki n anga te kantaninga ao ana kairi te tamnei. Akea iangoana bwa a na anganiko te bwarannano. Tii teuare buakaka, ara kairiribai ni kabane, e na kataia n anai nanora bwa kainibaire ake a baireaki n te maungatabu ni kabuta a karawawata ao n aki koaua, are aomata aki nakoraoi, bwa akea ae rikirake. Ao bukin tera Rutibeero e anai nanora n anne? Ibukina e ataia bwa e aki kona n rikirake, e bon aki kona n nakoraoi, n aki toki e na aki kona n rikirake n taai aika a na roko. Bon te mwaane ngaia ae aki kukurei are e kabaeaki man tianaki arona n aki toki, ao e tangiria bwa ko na aki kukurei naba. Eng, tai butimwaea anne. Ibukin te bwaintangira n Ana Mwakuri ni Kamaiu Iesu Kristo ao mwaakan karawa ni buokiira, a na kona n nakoraoi arora, ao te bwai ae kakorakora iai taekan te euangkerio ti kakabwaiaki ngkana ti kataia, e ngae ngke tiaki tokanikai n taainako.

Ngke iai te kakauntaeka ni waakin te Ekaretia ngkoa ni kaineti bwa antai ae tau ni kakabwaia mai karawa ao ae e aki tau, e kabwarabwara te Uea nakon te Burabeti Iotebwa, “E koaua I taku nakoimi, [ana bwaintangira te Atua] e anga ibukin kakabwaiakiia naake a tangira ni kawakin … ana tua, ao [ibukiia] ake a ukoukora karaoakina”⁶ Mwaane, ti aki bane ni kakaitau ibukin kairakiia “ao … a ukoukora karaoakina”! E a riki anne bwa te kamaiu ibukina n tabetai bwa anne ae ti kona n anga! Ti namakina te karaunano n te koaua are ngkana te Atua e kaniwanganiia tii naake a kakaonimaki n ae tau, ao a na karako aara ake iaon ana beebwa.

Taiaoka uringa ningabong, ao boong ni kabane ake imwiina, bwa te Uea e na kakabwaiaiia naake a tangiria ni kan kanakoraoi aroia, naake a butimwaea ni kainnanoi tuua ao ni kataia ni kawakin, ni kawakina raoiroin Kristo ao ni keiakina aia kabanea n tamaroa n aron are a na karekei. Ngkana ko bwaka, bubuti ibukin Ana buoka. Weteia n aron ana wewete Aramwa, “O Iesu, … nanoangaai.”⁷ E na buokiko ni kateirakeko. E na buokiko n raira nanom, ni kanakoraoiko, barongai baike ko riai ni barongai, ao reitia nako. N te tai ae waekoa n aron ae bon tau ko na karekea te tokanikai are ko ukoukoria.

“Bwa e na karaoa are ti tangiria mairouna.” e kabwarabwara te Uea.

“… Ti na onimakina te Tamnei ae e kairiia aomata ni karaoan ae raoiroi, n te aro ae riai, n nakonako n nanorinano, ao ni motikitaeka n te raoiroi. …

“… [Ngkanne] baike ti tangiri mairouna [inanon] te raoiroi, … a na reke.”⁸

I tangira te tua anne! E a manga taekinaki riki n kaokiokaki bwa ti na kakabwaiaki ibukin nanora ni karaoa ae raoiroi, e ngae ngke ti keiaki raoi ni karikiira iai. Ao e kauringiira aron taura ni karekei kakabwaia akanne, ti riai ni kakoaua bwa ti aki kaakeai nakoia aomata: ti na taobarai n te aro ae riai, tiaki n te aro ae aki riai, n ae e na booraoi; ti na nakonako n nanorinano, n aki kamoamoa, n aki kainikatonga; ti na motikitaeka n te raoiroi, ti na aki motibuaka, ti na aki atongiira bwa ti raoiroi riki nakoia tabeman, ti na aki baka ni kan raoiroi.

Tariu ao mwaaneu, te moan korakora n tua n akea tokina bon tangiran te Atua ma ara iango, nanora, kantaninga, ao korakorara—anne moan tua aika korakora. Ma te moan korakora n tua n akea tokina bwa te Atua e tangirira ma Ana iango, nanona, kantaninga, ao korakorara. Te tangira anne bon aan te atibu ae akea tokina, ao e riai n riki bwa aan atibun maiura ni katoa bong. Ni koauana bon tii man te kakoaua anne are e mena inanora bwa ti kona ni karekea te onimaki, n kateimatoaira ni kanakoraoi arora, ni kateimatoaira ni ukoukora kabwaraan ara bure, ao ni kateimatoaira n reita nako te akoi anne nakoia kaain rarikira.

Beretitenti George Q. Cannon e reirei tetaina: “E aki kakawaki bwa korakorara te kakatai, korakorara te rawawata, korakorara te maraki, te [Atua] e na aki kitaniira. E bon aki kona, ao E na bon aki. E aki kona ni karaoia. Bwa tiaki kateina bwa e na [karaoia]. … E na memena irarikira n [taainako]. Ti na waaki nako n rinanon te nnenikanaiai ae ura mwaaka; ti na waaki n rinanon raan aika a nano; ma ti na aki kamaunaaki ke ni konaaki aora. Ti na otinako man kakatai ao kaangaanga aikai a na katamaroira ao n itiaki riki mai iai.”⁹

Ngkai, ma te anganano ane kamimi anne bon mairoun te Atua n aron ae teimatoa inanon maiura, ae kaotaki n ae itiaki ao n tau n te maiu aei, te mate, ao ana Mwakuri ni Kamaiu te Uea Iesu Kristo, ti kona ni birinako man te bure ao te aro n nanobaba—bon mairoura ke mairouia tabeman—n aekakin nako waaki ake a kaoti nakoira inanon waakin maiura. Ngkana ti anga nanora nakon te Atua, ngkana ti tangira te Uea Iesu Kristo, ngkana ti karaoa ara kabanea n tamaroa ni maiuakina te euangkerio, ngkanne ningabong—ao ni katoa boong akea tabeua—n te kabane e na riki bwa te bwai ae kamimi, e ngae ngke ti aki kinaa n arona anne. Bukin tera? Ibukina Tamara are i Karawa e tangiria bwa ti na riki iai! E tangiria ni kan kakabwaiaira. Te maiu ae akea tokina, ae kaniwanganaki, bon oin raoi Ana babaire n nanoanga ibukiia natina! Bon te babaire are e boboto iaon te koaua “b’ai a bane n i buobuoki ni karika te raoiroi i bukia akana tangira te Atua.”¹⁰ Ngaia are reitinako n tangira. Reitinako ni kataia. Reitinako n onimaki. Reitinako ni kakoaua. Reitinako n rikirake n te tamnei. Naake a maeka i karawa a na kaungako n te bong aei, ningabong, ao n aki toki.

“Ko aki ataia? ko aki ongo?” e tang Itaia.

“[Te Atua] e angangania akana nimamate te ko na; ao E kabatiai korakoraia akana aki konamaki. …

“… E na manga reke te korakora irouia akana kantaninga [Iehova]; a na mwemwe rake ni baia ni kiba n ai aroia ikare. …

“Bwa … te Uea … te Atua e na e na taua [baiia] te atai, ni kangai nako [imi], Tai maku; I a buokiko Ngai.”¹¹

Tariu ao mwaaneu, au kantaninga te Tama are i Karawa e na kakabwaiaira ningabong n uring baike ti namakin n te bong aei. E bia kakabwaiaira ni keiaki ma te taotaonannano ao te nanomatoa nakon kainibaire ake ti ongoraeakin ake a taekinaki n te maungatabu n te wiikente aei, n ataakina bwa Ana tangira ao ana ibuobuoki ae aki bwaka e na raoniira e ngae ngke ti korakai—tiaki, e na bon raoniira ai moarara riki ngkana ti korakai.

Ngkana a taraa n rietata ana kainibaire te euangkerio ao nakoraoin temanna n onoti a kainnanoaki ni boong aika imwaaira ma a taraa n aki kona n reke, uringa ana kaunganano Iotua nakoia ana aomata ngke a kaitara ma taai aika kakamaaku n taai aika a na roko. “Kam na tabuingkami,” e taku, “ba e na karaoi kamimi Iehova ningabong i buakomi.”¹² I katanoata te berita naba anne. Bon te berita ibukin te maungatabu aei. Bon te berita ibukin te Ekaretia aei. Bon ana berita Teuare e karaoi kakai akanne, are boni Ngaia “Te Tia Reirei ae Kamimi, Te Kauntira, Te Atua ae Mwaaka, … Te Uea n Raoi.”¹³ I kaota au koaua Ibukina. Ngai te tia kakoaua Ibukina. Ao Nakoina te maungatabu aei e tei bwa kakoauan Ana mwakuri ae reitinako ni boong aika kakannato aikai. N aran Iesu Kristo, amen.