Tag Kis tus Tswv Yuav Ua tej Txuj Ci Tseem Ceeb rau Nej Pom

Cov kwv tij thiab cov muam, nej puas paub—nej puas xav los sis paub ib qho me ntsis—hais tias peb hlub nej npaum li cas? Tau 10 teev nej saib, tsom ntsoov rau ib lub ntsej muag dhau ib lub ntsej muag, tiam sis tau tib lub sij hawm 10 teev ntawd, peb uas zaum saum sam thiaj no, peb tsom ntsoov rau nej. Nej ua rau peb zoo siab kawg nkaus, txawm hais txog 21,000 tus neeg nyob hauv lub Tsev Rau Rooj Sab Laj no, los sis cov neeg coob nyob hauv tsev sib ntsib thiab chav teev tiam, los sis ntau phlom tus neeg nyob hauv tsev nyob thoob plaws lub ntiaj teb, tej zaum saib ib tsev neeg lub computer xwb. Nej nyob no, nej nyob ntawd, ib teev dhau ib teev, hnav khawb ncaws zoo, thiab ua neeg zoo. Nej hu nkauj thiab nej thov Vajtswv. Nej mloog thiab nej ntseeg. Nej yog qhov txuj ci tseem ceeb ntawm lub Koom Txoos no. Thiab peb hlub nej.

Yeej yog ib lub tuam rooj sab laj zoo heev. Peb tau koob hmoov heev vim Thawj Tswj Hwm Thomas S. Monson nyob no thiab hais lus rau peb. Thawj Tswj Hwm, peb hlub koj, peb thov Vatjswv pab koj, peb ua koj tsaug, thiab qhov tseem ceeb, peb txhawb nqa koj. Peb zoo siab uas koj, koj ob tug pab cuam thiab lwm tus txiv neej thiab poj niam uas yog thawj coj coob tau qhia peb. Peb twb mloog cov nkauj uas zoo nkauj kawg. Muaj neeg uas tau thov Vajtswv pab peb thiab thov kom peb ua ncaj. Muaj tseeb tiag peb twb hnov tus Tswv tus Ntsuj Plig nyob hauv no. Ob hnub no yeej tshoov peb lub siab txhua lub sij hawm.

Tam sim no, kuv pom tias muaj ob qho teeb meem. Qhov thib ib yog qhov uas kuv yog tib tug neeg uas tab kaum nej kom noj tsis tau khoom qab zib uas nej yeej tau npaj thaum muab lub tuam rooj sab laj xaus. Qhov teeb meem thib ob tej zaum yog zoo li daim duab no uas tsis ntev tas los kuv nrhiav tau nyob hauv Internet.

Daim Duab

Dinosaur caum cov me nyuam

Thov txim rau tag nrho cov me nyuam uas tam sim no nkaum nyob hauv qab lub sofa, tiam sis tsis muaj leej twg uas xav kom tag kis, los sis nag kis, ua rau tej yam uas peb tau xav txog ob hnub no ploj mus lawm. Peb xav nco ntsoov peb tej kev tshoov siab ntawm sab ntsuj plig thiab tej lus qhia uas peb tau mloog. Tiam sis txhua zaus tom qab muaj tej lub sij hawm hauv peb lub neej uas zoo li peb nyob saum ntuj ceeb tsheej, peb yeej yuav tsum rov qab los rau lub ntiaj teb, thiab raug tej xwm txheej uas tsis zoo npaum li ntawd.

Povluaj ceeb toom peb thaum nws sau hais tias, “Nej cia li ua tib zoo xav saib yav tas los nej lub neej zoo li cas. Thaum Vajtswv coj nej los nyob hauv qhov kaj lawm, tom qab ntawd txawm yog nej raug ntau yam kev txom nyem los nej tseem ua siab ntev tiv.”¹ Kev raug ntau yam kev txom nyem uas nws hais ntawd los muaj ntau yam, thiab yuav los rau peb txhua tus. Nyaj txhua tus tub txib kawm hais tias kev ua neej ua tub txib yeej tsis zoo li qhov chaw cob qhia cov tub txib. Yog li ntawd peb txhua tus xav zoo ib yam li ntawd tom qab peb tawm lub tuam tsev los yog muab kev sib ntsib txais lub cim nco txog xaus.

Cia li nco ntsoov tias thaum Mauxes rov qab los ntawm lub Roob Xinais, nws tau pom tia nws cov neeg tau “ua txhaum lawm” thiab tau “tso txoj kev tseg [sai heev].”² Lawv nyob ntawm taw roob, puab ib tug mlom nyuj muab kub ua rau lawv teev tiam, thaum tib lub sij hawm uas Yehauvas, tus uas nyob puag pem ncov roob, tau qhia Mauxes, “Tsis txhob pe lwm tus vaj tswv, tiam sis pe kuv tib leeg xwb,” thiab “Tsis txhob puab tej mlom.”³ Mauxes yeej tsis zoo siab rau nws pawg neeg Ixayees thaum hnub ntawd!

Nyob hauv nws txoj hauj lwm qhuab qhia hauv lub ntiaj teb, Yexus coj Petus, Yakaunpaus, thiab Yauhas mus pem lub Roob Hloov Hlo, nyob ntawd, cov vaj lug kub hais tias, “nws lub ntsej muag ci ib yam li lub hnub, thiab nws cev ris tsho ci ntsa iab dawb paug.”⁴ Lub ntuj qhib, cov yaj saub thaum ub los, thiab Vajtswv Leej Txiv hais lus.

Tom qab ib lub sij hawm xilethi-aus zoo li no, Yexus rov qab los rau hauv qab roob es Nws nrhiav tau dab tsi? Qhov thib ib, Nws pom Nws cov thwj tim thiab cov yeeb ncuab sib cav sib ceg vim cov thwj tim tau foom koob hmoov rau ib tug tub hluas tiam sis tsis tau kho nws zoo. Ces Nws hais kom Kaum Ob tug Thwj Tim ntseeg—ntshe lawv tsis tau ntseeg—hais tias tsis ntev cov neeg yuav los muab nws ntes coj mus rau cov nom tswv hauv zej zog uas yuav muab Nws tua tuag. Ces muaj neeg qhia Nws hais tias yuav tsum them se, es cia li them tam sim ntawd. Ces Nws yuav tsum cem ib txhia ntawm cov kwv tij vim lawv sib cav txog qhov uas leej twg yuav ua tus zoo dua ntais nyob hauv Nws lub nceeg vaj. Txhua yam ua rau Nws hais tias, “Ua li cas nej cov neeg tiam no pheej tsis ntseeg li, …kuv tseem yuav ua siab ntev rau nej mus txog thaum twg?”⁵ Nws twb nug lo lus ntawd ob peb zaug nyob hauv Nws txoj hauj lwm qhuab qhia. Peb yeej paub vim li cas Nws xav nyob Nws ib leeg thov Vajtswv pem roob!

Vim kuv paub tias peb txhua tus yuav tsum rov qab ua neej zoo li qub tom qab muaj tej kev tshoov siab, kuv xav hais lus txhawb nqa nej thaum peb muab lub tuam rooj sab laj xaus.

Qhov thib ib, yog tias yav tom ntej nej pom tej kev txhaum ntawm cov nyob ib puag ncig nej thiab nrhiav tau tej yam hauv nej lub neej thiab uas tsis yog raws li tej lus uas tau hais tau ob hnub no, thov nej kom tsis txhob nyuaj siab thiab tsis txhob tso tseg. Txoj moo zoo, lub Koom Txoos, thiab lub tuam rooj sab laj no yeej ua rau peb cia siab thiab txais kev tshoov siab. Peb tsis ua kom nej poob siab. Tsuas yog tus yeeb ncuab ntawm peb txhua tus yuav xav ntxias peb tias peb yeej ua tsis tau raws li tej ntsiab cai uas hais nyob hauv lub tuam rooj sab laj, tib neeg yeej ua tsis tau tej yam zoo dua li qub, thiab tsis muaj leej twg vam meej. Vim li cas Dab Ntxwg Nyoog yuav hais li ntawd? Vim rau qhov nws paub tias nws ua tsis taus zoo, nws paub tias nws yeej yuav tsis vam meej, nws paub tias cov ntiaj teb suav tsis txheeb uas nws yeej yuav tsis muaj yav tom ntej yeej ci ntsa iab. Nws yog ib tug neeg tu siab kawg nkaus uas yeej vam meej tsis tau mus ib txhis, thiab nws xav kom nej tu siab thiab. Tsis txhob ua raws li nws tej kev ntxias. Vim muaj lub txiaj ntsim Kev Theej Txhoj thiab Vajtswv lub dag zog kom pab peb, peb yeej ua tau zoo dua ntais, thiab qhov zoo txog txoj moo zoo yog qhov uas peb tau nqi zog yog peb sim ua, txawm tej lub sij hawm peb ua tsis yog los.

Thaum muaj kev sib cav nyob hauv lub Koom Txoos seb leej twg tsim nyog tau Vajtswv cov koob hmoov thiab leej twg tsis tsim nyog, tus Tswv hais rau tus Yaj Saub Yauxej Xamiv hais tias, Vajtswv tej txiaj ntsim yog pub rau cov uas hlub Vajtswv thiab ua raws li Nws cov lus txib, thiab rau cov uas xav ua li ntawd.⁶ Tiag tiag, peb txhua leej txhua tus zoo siab uas tau hais cov lus “thiab rau cov uas xav ua li ntawd” puas yog! Cov lus ntawd yeej pab peb vim tej lub sij hawm peb muaj peev xwm ua li ntawd xwb! Qhov uas nplij peb lub siab yog qhov uas yog Vajtswv muab nqi zog rau cov uas ncaj ncees hlo li xwb, Nws yeej yuav tsis muaj leej twg uas tsim nyog txais tau Nws cov koob hmoov.

Thov kom nej nco ntsoov tias tag kis, thiab txhua hnub tom qab ntawd, hais tias tus Tswv foom koob hmoov rau cov uas xav ua zoo dua, cov uas lees hais tias lawv yuav tsum muaj cov lus txib thiab sim ua raws li cov lus txib ntawd, cov uas saib tej cwj pwm Khetos rau nqi thiab sim ua raws li tej ntawd. Yog tias nej ua yuam kev thaum nej ua li ntawd, txhua leej txhua tus yeej zoo ib yam; tus Cawm Seej nrog nraim nej nyob kom pab nej. Yog tias nej poob, thov kom txais tau Nws lub dag zog. Cia li hu zoo li Amas hais tias, “Auj Yexus, … thov zam txim rau kuv.”⁷ Nws yuav pab nej rov qab sawv. Nws yuav pab nej hloov siab lees txim, kho txhua yam nej yuav tsum kho, thiab mus tom ntej ntxiv. Tsis ntev nej yuav muaj kev vam meej uas nej xav tau.

Tus Tswv hais tias qhov uas peb xav tau los ntawm Nws yuav muab qhov ntawd rau peb.

Nws hais kom peb tso siab rau tus Ntsuj Plig uas coj peb ua zoo—ua ncaj ncees, txo hwj chim, thiab txiav txim raws li kev ncaj ncees; Nws tus Ntsuj Plig yeej zoo li no. …

Txhua tsav txhua yam uas koj xav tau los ntawm Nws, uas ncaj ncees, peb yeej yuav tau tej ntawd.⁸

Kuv yeej nyiam cov lus qhuab qhia ntawd! Cov lus qhuab qhia no hais tias peb yuav tau koob hmoov yog peb xav ua zoo, thaum peb sim ua ncaj ncees. Thiab cov lus no ua rau peb nco ntsoov tias yog peb xav tsim nyog txais tau cov koob hmoov no, peb yuav tsum tsis txhob ua kom lwm tus txais tsis tau: peb yuav tsum ua ncaj, tsis txhob ua tsis ncaj ib zaug li; peb yuav tsum txo hwj chim, tsis txhob khav theeb; peb yuav tsum txiav txim raws li kev ncaj ncees, tsis saib peb tus kheej zoo dua li lwm tus.

Cov kwv tij thiab cov muam, lo lus txib thib ib uas nyob mus ib txhis yog kom peb hlub Vajtswv kawg peb lub siab ntsws thiab lub dag zog—nov yog lo lus txib thib ib. Tiam sis qhov tseeb thib ib uas nyob mus ib txhis yog qhov uas Vajtswv hlub peb kawg Nws lub siab ntsws thiab lub dag zog. Txoj kev hlub ntawd yog lub hauv paus uas nyob mus ib txhis, thiab tsim nyog uas peb ua kom txoj kev hlub ntawd ua lub hauv paus ntawm peb lub neej. Muaj tseeb tiag tsuas yog peb nco ntsoov txog txoj kev nplij siab no xwb peb thiaj li yuav ua siab loj sim ua zoo dua mus ntxiv, nrhiav kev zam txim rau peb tej kev txhaum ntxiv, thiab muab kev tshav ntuj rau peb tus neeg zej zog mus ntxiv.

Thawj Tswj Hwm George Q. Cannon qhia hais tias, “Qhov kev sim siab nyuaj npaum li cas los, kev ntxhov siab loj npaum li cas, kev tsim txom phem npaum li cas los, [Vajtswv yeej yuav tsis tso peb tseg. Nws yeej tsis tau ua li ntawd, thiab nws yeej yuav tsis ua. Nws ua tsis tau. Tsis yog Nws tus cwj pwm [ua li ntawd]. … Nws [yee] yuav nrog nraim peb nyob. Tej zaum peb yuav tiv kom dhau kev raug kub hnyiab; tej zaum peb yuav hla tej dej hiav txwv tob tob; tiam sis tej ntawd yeej yuav kov tsis yeej peb. Peb yuav tawm ntawm tej kev sim siab thiab kev nyuaj siab es peb yuav rais los ua neeg zoo thiab dawb huv ntxiv.”⁹

Thaum peb nco ntsoov tias yuav muaj Vajtswv txoj kev pab nyob hauv peb lub neej txhua lub sij hawm, uas peb pom tias muaj tseeb los ntawm tus Tswv Yexus Khetos lub neej, kev tuag, thiab txoj Kev Theej Txhoj, peb yuav dim tej yam uas peb raug los ntawm kev txhaum thiab kev ua ruam—uas peb ua los sis lwm tus ua—txawm zoo li cas nyob hauv peb lub neej niaj hnub los yog. Yog peb tso siab rau Vajtswv, yog peb hlub tus Tswv Yexus Khetos, yog peb ua zoo npaum li peb ua tau kom ua raws li txoj moo zoo, ces tag kis—thiab txhua hnub—los yeej yuav zoo heev, txawm peb tsis pom tias zoo li ntawd. Vim li cas? Vim peb Leej Txiv Saum Ntuj Ceeb Tsheej xav kom muaj li ntawd! Nws xav foom koob hmoov rau peb. Ib txoj sia nyob mus ib txhis uas muaj nqi zog ntau nplua mias yeej yog lub hom phiaj ntawm Nws txoj hau kev hlub tshua rau Nws cov me nyuam! Yeej yog ib txoj hau kev uas lub hauv paus yog qhov tseeb no hais tias txhua yam tsav yuav pab sawv daws tau qhov zoo yog tias lawv muaj lub siab hlub Vajtswv.¹⁰ Yog li ntawd cia li hlub mus ntxiv. Cia li sim mus ntxiv. Tso siab mus ntxiv. Ntseeg mus ntxiv. Loj hlob mus ntxiv. Vajtswv yuav txhawb nqa nej hnub no, tag kis, thiab tas mus li.

“Nej tsis tau paub dua li los? Nej tsis tau hnov dua li los?” Yaxayas hais.

“[Vajtswv] ntxiv zog rau tus uas qaug zog thiab tus tsaug leeg kom tus ntawd rov muaj zog tuaj. …

“… Cov neeg uas cia siab ntsoov rau [Nws] yuav muaj zog, lawv yuav nthuav tis ya ib yam li tus dav. …

“Tus Tswv … Vajtswv … yeej tuav rawv [lawv] sab tes xis, thiab … hais rau [lawv] hais tias, Tsis txhob ntshai kuv yuav pab nej.”¹¹

Cov kwv tij thiab cov muam, kuv thov Leej Txiv Saum Ntuj Ceeb Tsheej foom koob hmoov rau peb tag kis kom peb nco txog qhov uas peb lub siab xav li cas hnub no. Thov kom Nws foom koob hmoov rau peb pab peb sim ua siab ntev thiab thawb mus lawm tom hauv ntej kom ua raws li tej ntsiab cai uas peb tau mloog ob hnub no hauv lub tuam rooj sab laj, vim peb paub tias peb yuav muaj Nws txoj kev hlub thiab txoj kev pab tsis tu tsis tseg txawm peb raug kev sim siab los—haj yam yuav muaj Nws txoj kev hlub thaum peb raug kev sim siab.

Yog nej xav tias nyuaj heev kom ua raws li txoj moo zoo thiab nyuaj ua ib tug neeg zoo dua ntais thaum yav tom ntej, cia li nco txog Yausuas tej lus txhawb nqa nws cov neeg thaum yav tom ntej yeej nyuaj heev. Nws hais tias, “Nej cia li tu nej lub siab, rau qhov tag kis tus Tswv yuav ua tej txuj ci tseem ceeb rau nej pom.”¹² Kuv kuj cog lus zoo ib yam. Nov yog kev cog lus ntawm lub rooj sab laj no. Nov yog kev cog lus ntawm lub Koom Txoos no. Nov yog kev cog lus ntawm tus uas ua txuj ci tseem ceeb no, tus uas yog tus “Zoo Kawg Nkaus, tus Coj Kev, tus Vajtswv uas muaj hwj chim tag nrho, … Tus Tub Vaj Ntxwv ntawm Kev Thaj Yeeb.”¹³ Kuv ua tim khawv txog qhov no. Kuv yog Nws ib tug tim khawv. Thiab lub rooj sab laj no ua tim khawv txog Nws txoj hauj lwm nyob hauv lub caij nyoog kawg no. Los ntawm Yexus Khetos lub npe, amees.