Lutu Leum El Fah Oruh Kuh Sakihrihk Lal Inmahsrlowos

Tamuhlwel ac tahmtahel, kuh oasr kahlwem lom–kuh oasr kuhtuh nuhnak kuh puhla –nuh ke luhngse lasr nuh suwos? Ke ao 10 kowos ngwetlah, suwohs nuh ke muhtuhn mwet se ke pulpit se inge, tuhsruhk ac ao 10 se pacna, kuht muhta inge ngwetngwet nuh ke motom. Kowos ahkpwacrye kuh nuh ke insiyacn nguhn lasr, finne oasr mwet 21,00 inge ke Conference Center kuh loes ke lohm alu, kuh sahflah in lohm sum fin facluh nohfohn, sahp suc an rauni ke kamputuh lom an. Kowos angwe, kowos angacn, ao nuh ke ao, kom nukum nuknuk in sacnri wo, in oruh wo lom. Kom on ac pruhe. Kom lohng ac luhlahlfongi, kom pa usrnguck luhn Alu uh. Ac kuht luhngse kom..

Sulpac toeni luhlahp na wowo se lasr. Kuht ahkinsewowoyeyuck pwacye sel Prestuhn Thomas S. Monson ac pweng luhn mwet pahluh uh. Prestuhn, kuht luhngse kom, kuht pruhe keim, kuht kuloh nuh sum, ac yohk liki ma nuhkwewa, kuht ahkkweye kom. Kuht tarilacna in lutiyuck sum ac mwet kahsruh sacohk lom, ac sin mukul ac muhtwacn kol wowo pucspucs uh. Kuht lohng on na kahto uh. Kuht pruhe yohk kac ac siyuck nuh kac. Pwacyena Nguhn luhn Leum kuht puhla oasr inge arlac yohk. Ma inge sie kapihn wik na moklweyuck ke inkacnek nuh kwewa.

Ingena, nga liye elyah luo. Sie pa pwacyena nga pa mwet sefanna luhlah tu inmahsrlowos ac aes krihm kowos kwacna ahkolah in eis ke sahflahiyacn toeni luhlahp uh. Elyah se sahyac kuh in sikyak uh sruokyucki ke petsac se nga tuhfahna liye ke Internet uh.

Petsac

Tuhlihk kahing liki Dinosaur se

Tuhlahlah koluk luhk nuh sin tuhlihk srihsrihk nuh kwewa suc ingena wihklac tukun siyah lalos an, tuh ma pwacye uh pa lah wacngihn sesr kena lutu, kuh lwen se tohkoh lah, in kuhnahoslah puhla wolacna lasr ke kapihn wik se inge. Kuht kena in lihksreni na sruokyac ohiyac nguhnnguhn lasr uh ac luti moklweyuck kuht lohng uh. Tuhsruhk kuh in sikyak tuh tukun pacl nguhnnguhn ke moul lasr uh, kuht enenuh in fohlohk nuh ke sie acn facluh ma kuhtuh pacl kuht fah sifilpac sun ohiyac ma tiacna suwohs.

Mwet sihm luhn Hebrew sensenkackihn nuh sesr ke ma inge ke el suhmuhslah, “Esam ouiya ma orek nu suwos in pacl meet ah, ke pacl se kalem lun God tufahna tolkowosyak, kowos tuh keok ke ma puspis.”¹Lainyacn sikyak tukun ahkkweyeyuck an kuh in tuhkuh ke inkacnek puhs, ac kuh in tuhkuh nuh sesr nohfohn. Pwacyena misineri nuh kwewa suc kuhlwacnsap tari fah pacl sa akihlwacnwack lah moul in misineri uh ac fah tiacna oacna acn wowo ke training center luhn misineri uh. Ma inge sikyak nuh sesr nohfohn tukun sie session na wowo ke tempuhl kuh tukun sie miting muhtahl ke kuhfa luhn Leum .

Esam ma ingacn ke Moses el tuhkuh liki puhlakihnyuck usrnguck lal fin Finohl Sinai, el sokwack lah mwet lal uh “sifacna ahkkolukyaclos” ac “sa in eklac.”²Mwet lal ingacn oasr ke niyacn finohl uh, kahfofo ke muhsahiyen kaho kol srihsrihk soko in alu nuh se, ke ao se na Jehovah, ke inmahngon finohl uh, fahk nuh sel Moses, “Nik kom eis siena god sayuk” ac “Nik kom oru nu sum kutena ma sruloala.”³Moses el tiacna engan ke un mwet foroht forma luhn mwet Israel lal ke lwen sac!

Ke El moul luti facluh ah, Jisus El usaclos Peter, James, ac John nuh Finohl in Eklac soko ma, ma suhmuhslah uh fahk, “Saromrom mutal oana faht uh, ac nuknuk lal arulana fasrfasr pikapakla.”⁴ Inkuhsrao ikacklah, mwet pahluh mahtuh uh tuhkuh, ac God Pahpah El sramsram.

Tukun sie ohiyacn wolacna, meac Jisus El sokwack ke El fani liki finohl ah? Ma se met, El sokwack sie akuhkuhin inmahsrlon mwet tuhma lutlut Lal ac lainyaclos ke sie mwe insewowo ma oreklac nuh sin sie tuhlihk mukul srihsrihk ma tiacna orekma. Na El srihke in ahkwoye Mwet Singucul Luo ah, suc koluk ohiyac el koflah orwaclah, lah El fah pacl sa usack nuh yurin mwet kol fin acn sac suc fah unilyac. Na mwet se fahk lah tax lal enenuh in moullac, ma molweacng na. Na El enenuh in kalyei kuhtuh tamuhlwel uh ke srihpen elos akuhkuhin lah suc fuhlwact emet in tohkohsrahi luhn kuhsrao. Ma inge nohfohn oruh El fahk ke sie pacl ah, “Fuka lupan selulalfongi lowos uh, … Nga ac muteng kowos nwe ngac?”⁵Oasr srihpac Lal in siyuck kihsen siyuck ingacn ke pacl in luti Lal an. Tiacna mwe lut se lah El kena muhkwenamuhta fin finohl uh in pruhe!

Ke srihpen nga akihlen lah kuht nohfohn enenuh in fohlohk nuh ke moul fal in mukwikwi ke kain ma wo ac koluk pacl nuh kwewa ke moul uh, nga kena usot mwe ahkkweye inge ke sahflahiyacn toeni luhlahp uh.

Ma se met, fin ke lwen met liki kom tiac liye muhkwena ahkkohs raunikomlac tuhsruhk konwacack pac ma ke moul lom sifacna ma soenna fwellac nuh ke pweng kom lohng ke kapihn wik se inge, nuhnak muhnahs nimet suhpwacrlac in nguhn ac fuhlweack. Wosasuc uh, Alu uh, ac toeni wolacna orek pacl luo ke yac inge oreklac in sang finsrak ac moklweyuck. Elos tiac sang in ahksuhpwacrye kowos. Setuhn muhkwena, suc mwet lokoalok lasr nohfohn, fah srihke in pahtok kuht lah nuhnak tahklac ke toeni luhlahp uh mwe ahsor ac in tiacna pwacye, lah mwet uh tiacna insese nuh kac, lah wacngihn mwet orwaclah wo. Ac efuh Lucifer el srihke in pahtok kuht ke ma ingacn? Ke srihpen el etuh el koflah orwaclah wo, el tiac kuh in orwaclah, lah ke ma pahtpaht nuh kwewa e fah wacngihn pacl fahsruh wowo lal tok. El pa sie mwet kweok kapihri ke ahkkohs ma pahtpaht, ac el kena kowos in kweok pac. Na, nimet na sruhflah kac. Ke srihpen mwe sang luhn Iwaclah Lal Jisus Kraist ac ke kuh luhn inkuhsrao in kahsrwe kuht, kuht kuh in orwaclah wo, ac ma wowo ke wosasuc uh pa kuht ac eis opi ke srihke,finne kuht tiac orwaclah wo lwen nuh kwewa.

Ke oasr akuhkuhin ke muhtwacwacyacn Alu uh ke suc in eis mwe insewowo inkuhsrao uh ac suc fah tiac, Leum El fahkwack nuh sel Mwet Pahluh Joseph Smith lah mwe sang luhn God ituckyang nuh ke ma wo luhn mwet suc luhngse El ac liyacacng… masap Lal uh, ac mwet ma suk in oruh oacna.”⁶ Kuht nuhkwewa tarilacna pwacye lah El sang pac mwet suc suk in oruh oacna uh”! Ma ingacn mwe ahkkweye pwacye ke srihpen kuhtuh pacl uh pa ingacn muhkwena ma kuht kuh in sang! Kuht puhla kuhtuh ahkkweye ke srihpen ma pwacye lah fin God El ac opii muhkwena mwet luhlahlfongi suwohs uh, ac fah tiac arlac puhs ine ke lihs in opi mwet Lal uh.

Nuhnak muhnahs esam lutu ac lwen nuh kwewa tohkoh an lah Leum El ahkinsewowoye mwet suc kena in wolac, suc eis enenuh nuh ke masap ac srihke in liyacacng, suc luhngse mukwikwi oacna Kraist ac kwacfweacng in oruh wo ke kuh lalos in etwaclah. Kom fin tihkuclkucl ke ma ingacn, mwet nuh kwewa oacpacna; Mwet Lahngo El oasr in kahsrwe kom fahsr na nuh met. Kom fin ikori, siyuck Sel ke kahsruh. Wowoyak oacna Alma, “O Jisus, … pahkomuhtuhk.”⁷ El fah kahsruh kom in sifil tuyak. El ac kahsruh kom in auliyak, ahkwoyelah, orwaclah oacna sie ma kom enenuh in ahkwoyelah, ac fahsr na nuh met. Ke pacl fal kom fah eis orwaclah wo kom suk an.

Leum El fahkwack lah El fah oruh nuh sesr ma kuht kena nuh Sel.

“… El sapkihn nuh sesr in sang luhlahlfongi lasr nuh ke Nguhn se ma kol mwet uh in oruh ma wo, in oruh suwohs, in fahsr puhsisacl, ac in nuhnuhnkuh suwohs. …

“… Na kuht fah eis oacna sie ma kuht suwohswohs, … in kena Sel.”⁸

Nga luhngse mwe luti ingacn! Sulpac fahk ac fahk pac lah kuht ac ahkinsewowoyeyuck nuh ke kena lasr in oruh wo, finne ke kuht kampare srihke uh. Ac ma ingacn ahkacsmakihnye kuht lah in fal nuh ke mwe insewowo ingacn, kuht enenuh in liye ahkwoyac lah kuht tiac srohwohsrkihn mwet sahyac uh in eis: kuht enenuh in oruh suwohs, tiac ahkkoluk, tiac kuhtasrihk; kuht enenuh in puhsisacl in mukwikwi, tiac oruh koluk tiac ahkfuhlwactye; kuht enenuh in nuhnuhnkuh in suwohs, tiac facrisi, tiac sesuwohs.

Tamuhlwel ac tahmtahel luhk, masap yohk se emet ke ma pahtpaht nuh kwewa pa in luhngse God ke insiyom kwewa, nguhnum kwewa, nuhnkom kwewa, ac kuh lom kwewa, pa inge masap yohk. Tuhsruhktuh pwacye se emet ke ma pahtpaht nuh kwewa pa lah God El luhngse kuht ke Insiyacl kwewa, Nguhnal kwewa, Nuhnkwacl kwewa, ac Kuhiyacl kwewa. Luhngse se ingacn pa ip yohk fihsrwacsr ke ma pahtpaht, ac enenuh in pa yot pwelucng ke moul lasr uh. Pwacyena pa kain mwe ahkpwacye fokoko in nguhnasr muhkwena ma kuht kuh in eis nuhnak, in liyacng na in orwaclah wo, in liyacng na in suk nuhnak muhnahs nuh ke ma koluk lasr, ac in liyacng tahfwelah kuhlwacng nuh sin mwet tuhlan lasr uh.

Prestuhn George Q. Cannon el luti sie pacl ah: “Finne fuhkah upaciyen mwe sruhf uh, fuhkah loaliyacn kweok, ac yohkiyacn ma upac uh, [God] El fah tiacna siskuhtlac. El soenna, ac El fah tiac. El koflahna oruh. Tiacna ma ohiyac Lal [in oruh]. … El fah [pacl nuh kwewa] muhtana yohrohsr. Kuht ac kuh in ahluhkwelah e fihrihr, kuht kuh in ahluhkwelah kof loal uh; tuhsruhk kuht fah tiac kuhnausyucklac kuh fwefwelac pac. Kuht fah som liki mwe kweok ac upac nuh kwewa inge ac in wo ac nwacsnwacs likina ma sikyak kwaclos.⁹

Ingena, fin luhngse usrnguck wowoyak sin God uh yohk likina moul lasr lwen nuh kwewa uh, fahkwack ma nwacsnwacs emet ac suwohs ke moul, misac, ac Iwaclah luhn Leum Jisus Kraist, kuht kuh in kahingkuhnlah mwacta ke kwewana ma koluk ac lahlfon—lasr sifacna kuh luhn mwet sahyac—ke kuhtwena ohiyac elos kuh in tuhkuh nuh sesr ke inkacnek ke moul lasr lwen nuh kwewa. Kuht fin eiskuhtyang sifacna nuh sin God, kuht fin luhngse Leum Jisus Kraist, kuht fin oruh kuhiyacsr in moulkihn wosasuc uh, na lutu ac lwen nuh kwewa sahyac uh sahflahiyac uh ac wo na pwacye, finne kuht tiac akihlen lwen nuh kwewa ma ingacn. Efuh? Ke srihpen Pahpah tuhmasr inkuhsrao El kena in ohingacn! El kena in ahkinsewowoye kuht. Sie moul opiiyucki, loes, ac ma pahtpaht pa srihpac sefanna ke plwacn in pahkotwen Lal nuh sin tuhlihk Nahtuhl! Pa sie plwacn sruhmuhnyuck ke ma pwacye “lah ma nukewa God El oru tuh in oasr wo tuku kac nu selos su lungse El.”¹⁰Na srihke luhngse. Srihke na. Luhlahlfongi na. Kapwack na ke nguhn. Inkuhsrao pa ahkkweye kom mihsenge, lutu, ac ma pahtpaht.

“Ya kom tia etu? Kom tiana lohng?,” Isaiah el fahkwack.

“[God] El akkeyalos su munas ac totola; ac nuh selos suc wacngihn kuh la [El] ahkfokokoye. …

“… Ac elos su filiya lulalfongi lalos in Leum God, ac fah aksasuyeyuk ke lalos, elos fah sohkak ke posohksok oana eagle uh. …

“Tuh … Leum … God lowos fah akkeye kowos ac fahk nu suwos, Nik kom sangeng; nga fah kahsrekowos.”¹¹

Tamuhlwel ac tahmtahel, lwelah luhngse luhn Pahpah Lucng uh in ahkinsewowoye kowos lutu in esam ohiyacn puhla lasr mihsenge uh. Lwelah Elan ahkinsewowoye kuht in kwacfweacng ke mongfihsrwacsr ac kampare nuh ke ip yohk kuht lohng tari ahkkahlwemyeyuck ke kapihn wik in toeni se inge, ke etuh lah luhngse wolacna Lal ac kahsruh tiac tui Lal fah wi kuht ke kuht tikuclkucl—moh, fah wi kuht yohkna ke kuht muhnahs uh.

Fin ohiyac fal luhn wosasuc uh oacna in fuhlwactlacna ac ahkwoye luhn kais sie enenuh ke lwen met an oacna in koflah oreklac, esam puhlaik lal Joshua nuh sin mwet lal ke elos lain sie pacl upac ah. “Kowos in akmutalye kowos,” el fahk, “lutu Leum God El fah oru ku sakirik lal inmahsrlowos.”¹² Nga fahkwack olwelah se pacna. Pa inge olwelah luhn toeni luhlahp uh. Pa inge olwelah luhn Alu uh. Pa inge olwelah luhn El suc orek usrnguck, suc El sifacna “Wolacna, Mwet Kahsruh, God Kuh, … Tohkohsrah luhn Mihs.”¹³ Ke El nga fwackwack loh. Ke El nga pa mwet loh. Ac nuh Sel toeni luhlahp se inge tu in mwe loh ke orekma tiac tui Lal ke lwen yohk sahflah se inge. Ke inen Jisus Kraist, amen.