2010–2019
Ilju Irooj Enaaj Kōm̧m̧an Men in Bwilōn̄ ko Ippāmi.
Eprōļ 2016


Ilju Irooj Enaaj Kōm̧m̧an Men in Bwilōn̄ ko Ippāmi.

Iakwe wōt. Kajieon̄ wōt. Lōke wōt. Tōmak wōt Eddōkļo̧k wōt ilo jetōb. Lan̄ ej pinniki eok rainin, ilju jekļaj, im n̄an indeeo.

Ro jeiū im jatu, ewōr ke am̧ meļeļe—kwoj ke tōmak ak en̄jake jabdewōt—kōn jon̄an am iakwe eok? Ium̧win jon̄oul awa ko kwoj alooj, ak ro jet ejja 10 awa wōt, jej jijjet ilikin lokatok in im alooj. Jān tum̧wilaļ in buruōm kōm lukkuun m̧ōņōņō, men̄e ilo ijin 21,000 armej ilo Jikin kweilo̧k in Eļap, ak elōn̄ ilo im̧ōn jar ko ak jikin kweilo̧k ko jet, ak āliktata milien ilo mōko ipeļakin laļin, bolen rej jepool āinwōt juon baam̧le iturin kamputōr eo. Kom̧ ijin, ijōņ kom̧ ie, awa ālkin awa, ilo nuknuk in Jabōt ko ami, ilo ami ilo em̧m̧an tata. Kom̧ij al im kom̧ij jar. Kom̧ij ron̄jake im kom̧ij tōmak. Kom̧ij kajoor eo an Kabun̄ in. Im kōmij iakwe kom̧.

Ekanooj in aiboojoj kweilo̧k in eļap ad. Jej jeram̧m̧an kōn Būreejtōn Thomas S. Monson ilo an pād ippād im kōn enaan in rikanaan ko an. Būreejtōn, kōmij iakwe eok, kam̧m̧olool eok, jar kōn eok, im ilubwiljin men kein, kōmij rejtake eok. Jej kam̧oolol kōn ad kar katakin jān kwe im rikakpilōklōk ro am̧ rekabwilōn̄lōn̄ im ekanooj lōn̄ iaan ritōl m̧aan im kōrā ro ad rem̧m̧an. Jaar ron̄jaki al ko raiboojoj. Kōm ar m̧ōkaj im jar im kajjitōk ippān. Em̧ool Jetōb eo an Irooj ekar kobrak ijin. Ej juon wiikān eo ekōketak kōj ilo jabdewōt wāween.

Kiiō, Ij lo jet iaan jorrāān ko. Juon ej ilo m̧ool bw n̄a wōt armej ikōtaami im ice cream eo kijemi kom̧wij iien otemjej pojak ilo jem̧ļo̧k in kweilo̧k eo eļap. Jorrāān eo emaron̄ bar juon ej waļo̧k ilo pija in, iaar lo raan ko ļo̧k ilo Internet.

Pija
Dinosaur ej kōpōļ ajri ro

Ij joļo̧k aō bōd ippān ajri ro me rej em̧m̧ooj iumin jea ko, ak m̧ool eo in kōn jekjekin ejjeļo̧k iaad ekōņaan bwe ilju en ko̧kkure en̄jake kein ad rem̧m̧an me jaar en̄jaki ilo weekend in. Jekōņaan dim im pen ilo men ko an jetōb me jaar en̄jaki im katak ko raar im̧we kōj me jaar ron̄jaki. Ak eban jem̧ļo̧k bwe ālkin iien kein rekar im̧we mour kein ad, jej aikuj jepļaak n̄an jukjukin pād eo eobrak kōn men ko an laļ in ijo jenaaj ioon jekjek ko me em̧ool rejjab aorōk.

Rijeje eo an bok in Hibru eaar kakkōl kōj ilo an kar je menin: “A kom̧win keememej raan ko re m̧ootļo̧k, ke em̧ōj kōmeram̧ļo̧k kom̧, kom̧ ar kijenmej ilo en̄taan ko reļap.”1 Kijenmej ilo en̄taan me ej waļo̧k ālkin an meram̧ļo̧k būruōmi ilo elōn̄ kain wāween ko, im emaron̄ itok n̄an kōj aolep. Em̧ool aolep mijinede ro rej jerbal aolep raan ilo jikin jerbal eo aer tokālik raar kile bwe mejatoto ilo jikin jerbal eo aer eaar oktak jān mejatoto eo ilo jikin kaminene eo an mijinede. Kōn menin ejjeļo̧k oktak jān mejatoto eo n̄e jej riwōjtok jān tampeļ ak ālkin kweilo̧k in kwojkwoj eo.

Keememej ke Moses eaar wanlaļtak kōn en̄jake eo an ekabwilōn̄lōn̄ ioon toļ Sinai, eaar lo bwe armej ro an raar “kattoon er” im kar “jeorļo̧k mōkaj jān iaļ eo.”2 Armej ro an raar pād ilo toļ eo, raar boub in kōm̧m̧an juon koon in kau gold n̄an kabun̄ n̄an e, ilo tōre eo āliktata Irooj, ilo toļ eo eaar ba Moses, “En ejjelo̧k bar anij raņ ippam̧ ijjeļo̧kō” im “kwon jab kōm̧anm̧an im jekjek ekjab n̄an eok.”3Moses eaarjab m̧ōņōņō ippān riIsrael ro kōn aer jab kabun̄ wōt n̄an Anij ak bar ekjab ilo tōre eo!

Ilo iien kwaļo̧k eo ioon laļ in, Jisōs eaar bōk Pita, Jemes, im Jon n̄an ioon juon toļ eutiej, ijo, jeje ko rekwojarjar rej ba, “turun mejān e rabōlbōl āinwōt al, im nuknuk ko An re mouj im āinwōt meram.”4 Lan̄ ko raar pelļo̧k, im rikanaan ro etto raar jepļaaktok, im Anij Jemād eaar kōnono.

Ālkin juon en̄jake eo ekwojarjar, ta eo Jisōs eaar lo ke ej walaļtak jān toļ eo? Aaet, eaar lo an rikaļoor ro An akweel ippān im aer jum̧ae doon kōn juon kōjeram̧m̧an ekar likjab aer kōm̧m̧ane n̄an juon laddik edik. Innām E eaar kajjieon̄ wiin i buruōn Rijilōk ro, eo me eaar jab maron̄ tōprak, bwe ejjab to enkar bōke e n̄an rikien ro ilo jikin eo bwe ren bōk mour eo an. Innām juon armej eaar kakeememej E bwe tax ko An raar aikuj kōļļā im Eaar kajju kōļļāiki. Innām eaar kōbojrak jet iaan em̧m̧aan ro kōnke raar akweel kōn wōn eo eļaptata ilo aelōn̄ in lan̄? Menin eaar kōm̧m̧an menin an ba ilo juon tōre, “O epepen e jab tōmak, …ewi toun Aō naaj kijenmej kake kom̧?”5 Eaar wōr unin an āliji kajjitōk in ilo tōre ko ej kwaļo̧k naan. Unin an lukkuun kar jolo̧k iien n̄an jar make iaan ioon toļ eo.

Kile bwe jaar aolep aikuj wanlaļtak jān toļ eo kōn en̄jake ko n̄an jelm̧ae iien ko rem̧m̧an im ko renana ilo mour in, imaron̄ ke ba kapilōk āinwōt juon jem̧ļo̧k ilo kweilo̧k in eļap.

M̧oktata, eļan̄n̄e ilo raan ko rej itok kwoj loi jon̄an ko ippān ro ipeļaakim ak barāinwōt lo men dikdik ko ilo mour ko ami me rej iookļo̧k ennaan ko me kwaar ron̄ ilo weekend in, jab ebweer ilo jetōb, jab ebweer. Gospel eo, kabun̄ eo, im kweilo̧k kein reļļap ruo alen ilo juon iiō, un ko aer ej n̄an letok kōjatdikdik im im̧we kōj. Ejjab kōņaan eo aer in n̄an kabweer eok. Rijum̧ae eo wōt, ad rikōjrat eo adwōj aolep, enaaj kajieon̄ kareel kōj bwe ļōmņak ko kwaļo̧ki ilo kweilo̧ eo eļap rej kaen̄taanan im jab mo̧o̧ļ, jon̄an armej rejjab lukkuun eddōkļo̧k, bwe ejjeļo̧k juon ej lukkuun eddōkļo̧k. Im etke Setan eaar wiin i kōj kōn ļōmņak in? Kōnk ejeļā e ejjab maron̄ eddōkļo̧k, e ejjab maron̄ eddōkļo̧k, bwe laļ ko ejjeļo̧k jem̧ļo̧kiere ejjamin naaj ewōr an ilju jekļaj eo eromaak. E ej juon em̧m̧aan enanan lukōje kōn maron̄ ko indeeo, im ekōņaan kom̧in nana barāinwōt. Ekwe, jab eoron̄ katak kein an. Kōn menin letok eo an Pinmuur im kōn kajoor in lan̄ n̄an jipan̄ kōj, jejmaron̄ em̧m̧an ļo̧k im men eo em̧m̧an kōn gospel in ej bwe jenaaj bōk nōbar kōn ad kajjieon̄, men̄e jejjab aolep iien tōprak.

N̄e eaar wōr tarpok ilo Kabun̄ in jem̧aan ikijeen wōn ro remaron̄ bōk kōjeram̧m̧an ko jān lan̄ im wōn ro reban. Irooj eaar kwaļo̧k n̄an Rikanaan Josep Smith, “Bwe em̧ool Ij ba n̄an kom̧, rekar liwōji [menin letok ko an Anij] n̄an jeraam̧m̧an eo an ro rej iakwe eō im kōjparok … kein ko Aō, im [n̄an er] eo ej kappukōt e āindein n̄an kōm̧m̧an.”6 Ļaddik raņ, jej ke aolep kam̧olool kōn “im … kappukōt āindein n̄an kōm̧m̧an e”! Kōjeraam̧m̧an in an Irooj eaar juon kein kainem̧m̧an kōnke jet iien jemaron̄ lukkuun kajjieon̄. Jej en̄jake kainem̧m̧an ilo menin kōnke eļan̄n̄e Anij en kar nōbar kōj ro retiljek, en kar jab lukkuun obrak laajrak eo an kōn etan armej ro rej bōk nōbar.

Jouj kememej ilju jekļaj, im aolep raan ālkin, bwe Irooj ej kōjeram̧m̧an ro me rekōņaan em̧m̧anļo̧k, ro rej bōk aikuj eo n̄an wōr kien ko im kajjieon̄ kōjparoki, ro rej karōk wānōk ko āinwōt an Kraist im kajjieon̄ n̄an ijo em̧m̧an tata ilo maron̄ eo aer n̄an būki. Eļan̄n̄e kwoj likjab ilo kijejeto in, āinwōt kōj aolep, kūr n̄an Rilo̧mo̧o̧r eo n̄an jipan̄ eok kajjieon̄ wōt wōnm̧aanļo̧k. Eļan̄n̄e kwoj likjab, kajjitōk n̄an E n̄an bar jipan̄ eok kajjieon̄. Lam̧ōj āinwōt Alma, “O Jisōs, … kwon tūriamo̧ kake eō.”7 Enaaj jipan̄ eok im lo̧mo̧o̧ren eok. N̄e kwolikjab, kajjitōk jipan̄ jān E n̄an bar kajjieon̄. Innām ukweļo̧k, kōm̧m̧ane, kōkm̧anm̧an e ta eo kwolikjab kake, im wōnm̧aanļo̧k wōt. Innām ejjab to kwonaaj lo am tōprak.

“Āinwōt kwaar kōņaan jān Eō āindein enaaj kōm̧m̧an n̄an eok,” Irooj eaar ba.

“… likūt am lōke ilo Jetōb eo ej tōlļo̧k n̄an kōm̧m̧an em̧m̧an—aaet, n̄an kōm̧m̧an jim̧we, n̄an etetal ettā, n̄an ekajet jim̧we; im en̄in ej Aō Jetōb. …

“… [Innām] aolep men ko otemjeļo̧k kwōj kōņaan jān Eō [ilo] jim̧we, … kwo naaj bōk.”8

Eļap aō iakwe katak in! Ej bar ba bwe jenaaj jeraam̧m̧an kōn ad ikdelel n̄an kōm̧m̧an em̧m̧an, men̄e ilo ad lukkuun kajjieon̄ n̄an kōm̧m̧an em̧m̧an. Im ej kakeememej kōj bwe n̄an ad maron̄ bōk kōjeraam̧m̧an ko jet, jej aikuj kōm̧m̧an ilo tiljek jejjab dāpij ro jet n̄an kōm̧m̧an āindein: jej aikuj kōm̧m̧ani ilo jim̧we, jab kalijekļo̧k; jej aikuj ettā, jab utiej bōro, ekajet ilo jim̧we, im jab lōmņak wānōk jān ro jet.

Ro jeiū im jatū, kien eo m̧oktata im ļap tata an aolep indeeo ej n̄an iakwe Anij kōn aolepānburuōd, ļōmņak, im kajoor—ej kien eo m̧oktaa im ļap tata. Ak m̧ool eo m̧oktata eļap an aolep indeeo ej bwe Anij ej iakwe kōj kōnaolepān buruōn, maron̄, ļōmņak im kajoor. Iakwe in ej juon pedped eo epen kōn mour indeeo, im ej aikuj juon pedped in mour ko ad kajjojo raan. Ilo m̧ool ej kōn kam̧ool in me ej un̄ur buruōd bwe en maron̄ wōr lōke ippād n̄an tōmak, kajjieon̄ wōt n̄an wōnm̧aanļo̧k, n̄an pukōt jeorļo̧k in jerawiwi ko ad, im kwaļo̧k aiboojoj in tūriamo in n̄an ro rūtūrūd.

President George Q. Cannon eaar katakin: “Jekdoon ewi jon̄an mālijjon̄ eo, jon̄an m̧wilaļin am inepata, ak jon̄an am en̄taan, [Anij] ejamin katajinemjaik kōj. Ejjan̄in kar, im Ejamin. Ejjab maron̄ kōmm̧ane. Ejjab m̧wil eo An in [n̄an kōm̧m̧an āindein]. … Enaaj [aolep iien ] jutak iturid. Jemaron̄ depļo̧ke juon upaj in kijeek e bwil; jemaron̄ depļo̧ke dān ko rem̧ulaļ; ak jeban jorreen ak lokjenad. Jenaaj anjo ioon aolep mālijjon̄ kein im apan̄ kein im jenaaj em̧m̧anļo̧k im erreo ļo̧k itok jān men kein.”9

Eļan̄n̄e wūjļepļo̧k in ekwojarjar jān Anij jej mour kake raan otemjej, ej waļo̧k kōn erreo im wānōk eo ilo mour, mej, im Pinmuur eo an Irooj Jisōs Kraist, jemaron̄ eļļā ioon likjab in jerawiwi im jajeļo̧kjeņ ko ad—ad make ak ro jet—ilo jabdewōt wāween remaron̄ itok n̄an kōj ilo ad mour kajjojo raan. Eļan̄n̄e jej kōpeļļo̧k buruōd n̄an Anij im kōm̧m̧ane jon̄an wōt ad maron̄ ta ko jemaron̄ n̄an mour kōn gospel eo, innām ilju im aolep raan ej em̧m̧anļo̧k, men̄e jej ļōmņak ejjab em̧m̧an. Etke? Kōnke Jemewōj Ilan̄ ekōņaan bwe en āindein! Ekōņaan kōjeraam̧m̧an kōj. Mour indeeo eo ej menin nōbar ko reļļap eo ej un eo eļap ilo karōk in lo̧mo̧o̧r eo An n̄an tūriamo kōn ro Nejin! Ej juon karōk pedped ioon m̧ool eo “bwe aolep men otemjej rej jim̧or jerbale em̧m̧an n̄an ro rej yokwe Anij.”10 Kwon iakwe. Kajieon̄ wōt. Lōke wōt. Tōmak wōt Eddōkļo̧k wōt ilo jetōb. Lan̄ ej pinniki eok rainin, ilju jekļaj, im n̄an indeeo.

“Kwaar jab jeļā ke? Kwaar jab ron̄ ke? Aisea eaar kwaļo̧k. Aiseia eaar kōmjalal.

“[Anij] eo ej leļo̧k kajoor n̄an eo ej parōk; im n̄an eo ejjeļo̧k an maron̄, ej korļo̧k an kajoor …

“… A ro rej kattare Irooj renaaj kōkāāl aer kajoor; renaaj jepeļālōn̄ļo̧k kōn peir āinwōt igōl ko …

“Bwe … N̄a Irooj … am̧ Anij, Inaaj jibwe peim̧ anmooņ im ba n̄ān eok, “Kwōn jab mijak; Inaaj jipan̄ eok.”11

Ro jeiū im jatū, Jemedwōj Ilan̄ eobrak kōn iakwe en kōjeraam̧m̧an kōj ilju n̄an keememej en̄jake ko ad rainin. Enaaj kōjeraam̧m̧an kōj n̄an iakwe im kajeon̄ kōn kijenmej im jab ebweer jān men ko raorōk me jaar ron̄jaki kweilo̧k in ilo wiikeen in, ilo ad jeļā bwe Iakwe eo An ekwojarjar im an jab likjab ilo jipan̄ renaaj pād wōt ippād men̄e epen n̄an kōj—ejjab, enaaj pād ippād eļaptata n̄e epen n̄an kōj.

Eļan̄n̄e jon̄ak ko an Gospel ilo kalimjōki relukkuun pen n̄an ļoori im n̄an kōwōnmaanļo̧k kōj ilo raan kane m̧aan, innām keememej kapilōk eo an Joshua n̄an armej ro an ke rej jelm̧ae juon ilju eo ekamijak n̄an er. ““Kokwōjarjar kom̧,” ekar ba, “bwe ilju Irooj enaaj kōm̧m̧an men in bwilōn̄ ko ippemi.”12 Ij kwaļo̧k ejja kallimūr in wōt. Ej kallim̧ur eo an kweilo̧k in. Ej kallimūr eo an Kabun̄ in. Ej kallim̧ur eo kōn E eo ekar kōm̧m̧ane menin bwilōn̄ ko, eo E Make “Em̧m̧an, Rikakpilōklōk, Anij Ekajoor Pōtata, … Irooj in Aenōm̧m̧an.” Irooj in Aenōm̧m̧an.” 13Kōn E ij kwaļo̧k aō kam̧ool. Kōn E ij kwaļo̧k aō kam̧ool. Im n̄an E kweilo̧k in eļap ej jutak āinwōt juon kallim̧ur kōn jerbal eo An ej wōnmaanļo̧k wōt ilo raan kein āliktata. Ilo etan Jisōs Kraist, amen.