Lakapw Kauno Pahn Ketin Wia Manaman Ekei Nanpwungamwail

Riei ohl oh lih akan, kumwail ese ia uwen aht poakpoake kumwail? uwen awa 10 kumwail kilikilang, kadkadehde emen emen irail me padahk, ahpw pil nan awa 10 koaros, se mwohd poweh, kilikilang kumwail. Kumwail kaperenih kiht mehlel, koaros me mih nan Conference Center, de nan wasahn tuhpene kan oh ihmw sarawi kan, de million en aramas kan nan imwarail kan nan sampah, mwein ekei keipene limwahn neirail komputer. Ekei kumwail me, ekei mwo, mwurimwurin awa kei, nan amwail likawih amwail likou keieu mwahu. Kumwail koul oh kapakap. Kumwail rong oh kumwail kamehlele. Kumwail wia manaman kapwuriamwei en Mwomwohdiso. Oh se poakpoake kumwail..

Iawen kaselel en Kapokon Lap wet. Kitail kapaidahr pwehki Presiden Monson ah ket wasaht oh padahkiong kitail dahme pahn wiawi mwohtail. Presiden se poakpoakei komwi, se kalahngan ohng komwi, se kapakapkin komwi, oh se utung komwi. Se inenen kapingki mehlel padahk kan me sang sounkaweid ohl oh lih mwahu kan. Se rongehr koul ngilamwahu kan. Se kin kapakapki oh pekipeki pwe kumwail en kak kolokol sapwellimen Koht kosonned akan. Mehlel ngehn en Kauno ketiket wasaht. Ehu imwin wihk me kitail audaudkihda Ngehn Sarawi met.

Met, I kilang kahpwal te riau me kitail sohsohpaih. Ehu iei ngehi me luhwehdi me kesikesihnen nan pwungen kumwail oh kenemwail ice-cream me kumwail kin kalapw kaunopadahr ong keimwseklahn kapokon lap wet eh pahn imwseklahr et. Kahpwal teio mihmi nan kilel me I ahpwtehn kilang nan internet wet.

Kilel

Dinosaur Pwakih Serihkan

I men wia ahi pek mahk ong serihkan koaros me wie rokrokehr pahn sehr kan, ahpw dahme I men ndahieng kumwail me sohte emen kitail men lakapw en kawehla soangen pepehm kaselel me kitail aledier ni imwin wihkwet. Kitail kolokol tengeteng dahme Ngehn Sarawi ketkiong kitail oh padahk ngenen kan me kitail rongehr. Ahpw e kin wiawi mwurin ansou me Ngehn Sarawi kin audeikitailda, sampah wet kin kihong kitail soahng kei me sohte konehng kitail en wia.

Paul ntingihdi met pwehn keperkin kitail, “ A kumwail tamanda rahn en mahs ako mwurin amwail marainlahr, ahpw dadaurete ni amwail kalokolok laud.”¹Soangen marain wet me kitail kin pelianki kahpwal kan kak kohdo ni soangen wiepe tohto, oh e pil kak kohieng kitail koaros. Mehlel misineri koaros me wie papah kin mwadangete diarada me mour en doadoahk en misineri sohte duwehte ansou me irail mihmi nan misineri training center. Mwein met pil kin wiawi ong kitail koaros me kin pwurasang nan tehnpas sarawi de kanekehla mihting en kamadipw sarawi me Ngehn Sarawi kehlail .

Tamataman ansou me Moses pwuredihdo sang eh aledier soahng laud pohn Nahna Sainai, e diaradahr me aramas akan “sapwungalahr” oh “mwadangete sopeila”² Irail mihmi nan tepin dohlo oh kediropwkilahr arail wiwiahda kou kohl men pwe irail en kaudokiong, ni awahu te me Siohwa mahsanihong Moses, pohn nanahu, “kumwail sohte pahn ahneki emen Koht tohrohr mwohi,” oh “kumwail sohte pahn wiaiong kumwail sansal en mehkot.”³ Moses uhdahn sohte nsenamwahuki dahme irail mehn Israel kan wiahda rahno.

Ni ansou me E wiewia Sapwelime doadoahk pohn sampah, Sises ahpw ketin karehda Piter, Seims, oh Sohn kohla pohn Nahna wasa me E ketin wekila mwohrail, pwuhk sarawi mahsanih me, “Silangih marainla duwehte ketipin, Sapwellime likou pwetepwetlinganla.”⁴Nanleng ahpw ritpeseng, oh soukohp en mahs akan ahpw ketdihdo, oh Sahm Nanleng ahpw ketin mahsen.

Mwurin Sahm Nanleng mahsaniengehr, dahme Sises diarada mwurin ah pwuredihdo sang pohn nahnahu? Keieu E diarada me Sapwellime tohnpadahk kan akakamaiong sounkaweweh kosonnedo kei pwehki arail sohte kak kapai kisin pwutak pwulopwulo. Eri Sises ahpw padahkiong ehk riemeno, met kakete sohte pweida, pwe kerenieng E pahn wisiklahng irail lapalap en wehi kan me pahn kemehla ih. Mie me pil katamaniki me lelehr ansoun ah pwain tax, me E udahn pwainlahr. E pil kidahweirailda pwehki arail akakamaiki ihs me pahn lapalap nan wein Koht. Mepwukat koaros me karehda E mahsanih met, “O dih wet me soupwoson, … iawen reirein ahi pahn lokolok kin kumwail?”⁵ Pak tohto e kin kalelapaki kalelapak wet ni ah wiwia sapwellime doadoahk. E sohte kopwuriamwei ah kin inengieng en kelehpwla pohn nahna kan oh wia sapwellime kasakas.

I wewehki mehlel me kitail koaros pahn pwurlahsang wasaht pwehn soupahi ansou mwahu oh pil ansou apwal en mour, I men kihda iren sawas wet kitail en rong ni keimwseklahn kapokon lap wet.

Mwohn mehkoaros, mwurin rahnwet ma kumwail kilangada mehkan me pahn song en irehdi kaidehn mehteikante ahpw pil kumwail ma mie mehkot me sohte duwehte padahk me kumwail rongehr ni wihkendet, kumwail dehr luwetala ni palingehn oh kumwail dehr pwangada. Rongamwahu wet, Mwomwohdiso, oh koaros me iang patehng kapokon en rahnwet anahne ahniki koapworopwor oh men wia mehkot, kaidehn luwetkihla. Ihte sehdan, me wia atail imwintihti, me pahn song pwe kitail en wiahki me padahk me kitail rongorong nan kapokon lap wet sohte mehlel, soangen aramas sohte kin pweida, sohte emen pil kin keirda. Dahme karehda Lucifer wiakieng kitail met? Pwehki e ese me e sohte kak pweida, e sohte pil kak keirda, lau lel ni imwin sampah, sohte pahn ah mour mwuhr. E sohte kin peren Kauno me iredihsang, oh e pil men kitail en nsensuwed. Dehr pwupwidiong pahn ah kasongsong kan. Pwehki kisakis en tomwo oh Kauno pahn kakehlailih kitailda oh sewesei kitail, kitail kak pweida, oh dahme keieu kesemwpwal pen rongamwahu wet kitail kapaida sang ni atail kin nannanti, mendahte kitail sohte kin pweida ahnsou koaros.

Ma mie akamai nan Mwomwohdiso mahs nanpwungen irail me Kauno kapaiada kan oh irail me sohte kapaida kan. Kauno mahsanihong Soukohp Joseph Smith, Mehlel I ndahieng uhk, [Sapwelimen Koht kisakis] kin kohieng irail kan me kin poakohngie oh kolokol … ahi kosonned kan, oh [ong irail] me pil kin raparapahki pil pahn duwehte.”⁶Kitail koaros sou kaping kalahnganki pwehki ire wet “[oh] me raparapahki pil pahn duwehte”! Kauno pahn kapaida irail kan me kin nannantiong poakohng ih oh kolokol sapwellime kosonned akan met wia doarepatail pwehki ekei pak ih soahng pwukat me kitail kin peki! Kitail ahneki nsenamwahu pwe ma Koht pahn kapaiadahte irail me pwoson akan, malaulau me pahn ntinting nan pwuhko.

Eri menlau tamataman lakapw oh rahn akan me pahn kohdo mwuri me Kauno kin kapaida irail kan me kin men keirda, irail kan me kin anahne kosonned kan oh song wie kolokol, poakohng Sapwellimen Krais wiewia mwakelekel kan oh nantiong pwe ken wia soang pwukat. Ma ke pwupwidi nan soang pwukat, aramas koaros pil kin pwupwidi; pekpeki rehn sounkomouro pwe en sewesei iuk pwe ken kak pil wonla mwowe. Ma ke pwupwidi, peki Sapwellime kakehlail. Eker duwehte Alma me patowan, Maing Sises, … komw keting kupwureie.⁷ E pahn soweseiukada. E soweseiuk koluhla oh kamwahuiala dahme anahnepe kamwaula, oh kohkohwei. Mwurin ansou kis kumwail pahn alehdi dahme kumwail raparapahki.

“ Dahme ke peki koaros e pahn pweida rehm,” Kauno ketin mahsanih.

“… Kiong ahmw likilik ohng Ngehno me kin kahlwaiuk ken wia me mwahu—ehi, ken wia me pwung, ken alu ni aktikitik, ken kapwung ni pwungih. …

“…[Eri] dahme kumwail inangih sangie me mwahu, … kumwail pahn alehdi.”⁸

I kaselelki padahk wet! E pwurehng mahsanih me kitail pahn kapaida ma kitail inengieng wia dahme mwahu, kitail anahne nannantiong wia me mwahu. Oh e pil kataman kin kitail ma kitail men iang alehdi kapai pwukat, kitail pahn kanaieng pwe mehtei kan de sohte iang alehdi. kitail pahn wia dahme pwung, oh epwel pahrekih mehteikan, ; kitail pahn aktikitikla, ieremen medewe te kesemwpwal sang mehteikan; kitail pahn kadeik ni pwung, dehr medewe ke mwahusang mehteikan.

Riei ohl oh lihoko, kosonned me keieu laud en mour soutuk iei kitail en poakohng Koht ki atail mohngiong, kak, madmadau, oh kehl unsek. Ahpw padahk me keieu mehlel iei Koht poakohng kitail sang nan Ah mohngiong, roson, lamalam oh kehl unsek. Limpoako me wia poahsoan en padahk en mour soutuk, oh ihme pil pahn wia poahsoan en padahk en atail mour rahn koaros. Mehlel dahme mihmi loalatail ansou wet me kak karehiong kitail en kamkamehlele, oh nannantiong en keirda, en rapahki mahkepen dipatail kan, oh sohte tokedihsang atail kadekong mehn mpatail kan.

Presiden George Q. Cannon padahngki: “ Sohte katepen ia wen mehlel en kasongsong, ia wen loal en medek, ia wen laud en kahpwal, [Koht] sohte pahn kesei kitaila. E sohte pahn, oh E sohte kak. E sohte kak wia met. E sohte [kak wia] soangen mwekid wet. … Ansou koaros E pahn ieiang kitail. Kitail pahn kotehla kisiniei mwehl, kitail pahn pil kotehla pihl loal akan; ahpw kitail sohte pahn mwasikala de duhla. Kitail pahn pitsang pahn kasongsong oh kahpwal pwukat ni atail sohte pahn okihla mepwukat.”⁹

Ma manaman en limpoak wet sang nanleng pahn mihmi rehtail erein atail mour, e pahn kasalehiong kitail dahme keieu mwakelekel oh pwung en mour, oh mehla, oh Tomwpen Kaun Sises Krais, kitail kak pitsang nan kahpwal en dihp oh mwekid en pweipwei kan—pein atail de en mehteikan—sohte lipilipil soahngen mwohmw da me re pahn kokihdo nan ehueheu rahn akan. Ma kitail pahn kihong Koht, oh wia wen atail kak koaros en momourki rongamwahu eri lakapw oh rahn koaros pahn mwahu douluhl, mehndahte atail sohte kalapw pohnese ia wen laud. Dahme karehda? Ahki ih kupwuren Samatail Nanleng! E men kapai kitailda. E kupwurki kitail en ahniki peren laud. E pahn katingih kin kitail soahng laud, oh iei mour soutuk me wia poahsoan en Sapwellime plahn en mahk ong Sapwellime serih kan. Wia plahn ehu me poahsoankihda mehlel “soahng koaros pahn doadoahk pene oh mwahu ong irail kan me poakohng Koht.”¹⁰ Eri nanantihlahte. Koapworopworki. Kamkamehlele. Nanantihlahte. Nanleng pahn sewesei iuk rahn wet, lakapw, oh pil pahn kohkohlahte.

Aiseia mahsanih, ”Ke sehse? Ke sohte kin rong,”

“[Koht] kin ketkihong manaman irail me kin luwet akan; oh ong irail me sohte arail kehl [E] kin kalaudehla ar kehlail. …

“… Irail me kin koapworopworki [Ih] pahn onehda sapahl ar kehl ; re pahn kin kehlail, rasehng ikel kan. …

“Pwehki … Kauno … Koht pahn kol palimaunen pehrail kan, mahsanih ong [irail], Dehr masak; I pahn sewesei kumwail.”¹¹

Riei ohl oh lihoko, I koapworopworki me Samatail Nanleng poakohng kitail oh pahn kapai kitailda lakapw pwe kitail en tamataman dahme kitail kehn rahnwet. En ketin kapai kin kitailda Sapwellime limpoak pwe kitail nantihlahte mwowe kanengamah oh tengetengediong nan dahme mwahu kitail rongehr padahk kan nan kapokon wet ni imwin wihkwet, eselahr me Sapwellime limpoak oh sawas pahn ieiang kitail mehlel ansou en atail kahpwal akan—so, pahn ieiang kitail ahpw mehlel ansoun atail apwal akan.

Ma koasoandih kan me nohn ileile oh kitail sohte kak alehdi dahme kitail anahne nan ehu ehu rahn akan, tamanda Sosua ah kakehlailih nah aramas ako ansou me irail sohpai kahpwal me irail lelohng. E koasoia, “Kumwail pein kasarawihkumwailla,” “pwehki lakapw Kauno pahn ketin wia manaman ekei nanpwungamwail.”¹²I pil inoukihong kumwail songen inou. Iei inou en kapokon wet, Iei inou en Mwomwohdiso. Iei inou en Ih me wiadahr doadoahk kapwuriamwei kan, me iei “Sounkaweid Kupwurokong, Koht, Wasa Lapalahpie, Sahm Poatopoat, Nanmwarkien Popohl.”¹³ Ih me I kadehdehki. Ih me I wiahki soun kadehde. Oh Ih me kapokon wet kadehdehki me kasalehda Sapwellime doadoahk e mwomwokidwei nan imwin rahn akan. Ni mwaren Sises Krais, amen.