Ananahi ho’i Iehova e rave ai i te mea ta’a ’ē i roto ia ’outou na

Te mau taea’e ’e te mau tuahine, ’ua ’ite ānei ’outou—e mana’o ānei tō ’outou, te mana’o ri’i a’e—nō tō mātou here ia ’outou ? 10 hora ’outou i te māta’ita’ira’a, i te hi’o-noa-ra’a i teie hō’ē i te terono e haere mai i muri i te tahi, e 10 ato’a hora mātou i te pārahira’a i muri mai i teie terono, i te māta’ita’ira’a, i te hi’o-noa-ra’a ia ’outou. ’Ua fa’ahiahia roa ino mātou ia ’outou, mai te hōhonu o tō mātou ’ā’au, nā 21 000 i roto i teie pū ’āmuira’a, ’e ’aore rā te naho’a rahi i roto i te mau fare putuputura’a ’e fare purera’a, ’e tae noa atu nā milioni ’e milioni ta’ata i tō rātou fare nā te ao ato’a nei, penei a’e tē apiapi ra i mua i te mātini rorouira. Tei ’ō nei ’outou, tei ’ō atu, tera hora ’e tera hora, i roto i tō ’outou ’ahu nehenehe nō te sābati, i te rirora’a i tō ’outou maita’i roa a’e. ’Ua hīmene ’outou, ’ua pure. ’Ua fa’aro’o ’outou ’e ’ua ti’aturi. ’O ’outou te semeio o teie ’Ēkālesia. ’E ’ua here mātou ia ’outou.

’Auē ïa ’āmuira’a rahi ta’a ’ē tā tātou i fāna’o fa’ahou. ’Ua ha’amaita’i-ta’a-’ē-hia tātou inaha tei ’ō nei te peresideni Monson ’e ’ua fa’aro’o tātou i tāna mau parau, te mau parau a te peropheta. E te peresideni, ’ua here mātou ia ’oe, tē pure nei mātou nō ’oe, tē ha’amāuruuru nei mātou ia ’oe, ’e nā ni’a roa, tē pāturu nei mātou ia ’oe. ’Ua māuruuru mātou ’ua ha’api’ihia mātou e ’oe ’e tō ’oe nā tauturu fa’ahiahia ’e te mau feiā fa’atere tāne ’e vahine fa’ahiahia e rave rahi. ’Ua fa’aro’o tātou i te pehe navenave ’aita e fa’aaura’a. ’Ua pure-’ū’ana-hia nō tātou ’e ’ua tāparuhia tātou. ’Ua pārahi mau mai te Vārua o te Fatu i ’ō nei ’e ’ua ’ī roa. ’Auē ïa hope’a hepetoma fa’auru mau, i roto i te mau mea ato’a.

I teienei, e piti ’ohipa fa’ataupupū tā’u e ’ite ra. Te hō’ē, ’oia ho’i, ’o vau ana’e e toe ra i te ’amura’a ’outou i tā ’outou ice-cream e tia’i noa mai ra ia ’outou, ’ia oti teie ’āmuira’a rahi. Te piti o te mea e nehenehe e riro mai ’ei fifi, tei ni’a ïa i teie hōho’a tā’u i ’ite ’aita i maoro a’enei i ni’a i te natirara.

Hōho’a

E mo’ohāhano (dinosaure) e a’ua’u ra i te tamari’i

Tē tātarahapa nei au i mua i te mau tamari’i e tāpuni ra paha ia rātou i raro a’e i te pārahira’a, ’ātīrā noa atu, ’aita hō’ē o tātou i hina’aro ’ia mou te mau mana’o au i tupu i teie hope’a hepetoma, ananahi ’e te mahana ato’a nō muri iho. ’Ua hina’aro tātou ’ia mau maite i ni’a i te mau mana’o pae vārua i roa’a mai, nā reira ato’a te mau ha’api’ira’a fa’auru i fa’aro’ohia. E’ita rā e nehenehe e ’ape, ’ia oti te mau taime hanahana o tō tātou orara’a, tītauhia ’ia pou fa’ahou mai tātou i raro nei, ’ei aura’a parau, i reira ho’i, i te tahi taime, e fa’aruru fa’ahou tātou i te huru orara’a i raro mai i te mana’o hau a’e.

’Ua fa’aara mai te ta’ata pāpa’i i tō Hebera ’a nā ’ō ai ’oia ē, « ’A ha’amana’o na rā i tei mūta’a ihora anotau, ’a ha’amāramaramahia ai ’outou na, i tauto’o ai ’outou, i fa’a’oroma’i ai i taua mau pohe rarahi ra ».¹ E tae mai te reira ’ati nā roto e rave rahi rāve’a i muri mai i te ha’amāramaramara’ahia tātou, ’e e tae mai i ni’a ia tātou pā’āto’a. ’Ua ’ite pāpū ’e ’ua ’ite ’oi’oi te mau misiōnare ato’a tei haere e tāvini ē, e’ita te orara’a i roto i te ’āua misiōni mai te huru au ’e te ta’a ’ē i te pū ha’api’ipi’ira’a misiōnare. Mai te reira ato’a nō tātou pā’āto’a, ’ia fa’aoti ana’e te tahi ’ōro’a au roa i te hiero ’e ’aore rā te tahi purera’a ’ōro’a au roa i te pae vārua.

’A ha’amana’o ē, i te taime ’a pou mai ai Mose mai ni’a mai i te mou’a Sinai ra ’e te ’ohipa ta’a ’ē i tupu i reira, ’ua ’ite ’oia i tōna mau ta’ata tei « ’ino » ’e tei « fa’aru’e vave roa iho nei… i te ’e’ā ».² Tei raro mai rātou i te mou’a i te hāmanira’a i te tahi kafa ’auro ’ia ha’amori, i terā iho hora ’a parau ai Iehova ia Mose i ni’a i te mou’a ē, « ’Eiaha roa tō ’oe ’ei Atua ’ē atu, iā’u nei » ’e « ’Eiaha roa ’oe e hāmani i te ’īdolo tarai nō ’oe, ’e te hōho’a nō te hō’ē mea ».³’Aita Mose i ’oa’oa i teie nana ’Īserā’ela haere ’ē i terā mahana !

I roto i Tāna tāvinira’a i te fenua nei, ’ua rave Iesu ia Petero, Iakobo ’e Ioane i ni’a i te mou’a nō te fa’ahuru-’ē-ra’a, ’e mai te mau ’īrava e parau nei, i reira « ’ana’ana atu ra tāna mata mai te mahana ra, ’e teatea atu ra tōna ’ahu mai te māramarama ra ».⁴ ’Ua ’īritihia te ra’i ’e ’ua pou mai te mau peropheta tahito ’e ’ua parau te reo o te Atua te Metua.

I muri mai i teie ’ohipa nō te ra’i mai, e aha tā Iesu i ’ite i te poura’a mai ’Oia i raro i te mou’a ? ’A tahi, tē mārō ra Tāna mau pipi ’e te tahi ta’ata fa’atītīāhemo nō ni’a i te hō’ē ha’amaita’ira’a i ni’a i te hō’ē tamaroa tei ’ore i manuia. I muri mai ’ua tāmata ’Oia i te ha’apāpū i te mana’o o te Tino ’Ahuru Ma Piti ē—’aita rā i manuia—e riro ’Oia i te ho’ohia i te mau ta’ata fa’atere ’o te riro i te ha’apohe Iāna. I muri iho ’ua parauhia mai ē, e tute e ti’a ’ia ’aufauhia, ’e ’ua ’aufau-ti’a-hia atu. I muri iho ’ua fa’ahapa ’Oia i te tahi mau taea’e nō tā rātou mārōra’a ’o vai te rahi a’e i roto i Tōna basileiā. ’E nō te reira mau mea ato’a i parau ai ’Oia ē, « ’Auē ïa u’i fa’aro’o ’ore ē, mai te aha ra te maoro o tō’u pārahira’a i ’ō ’outou nei ? »⁵ Pinepine ’Oia i te ani i teie uira’a, hau i te hō’ē taime, i roto i Tāna tau tāvinira’a. E’ita ihoa ïa e māere ē, ’ua mihi ’Oia i te fa’aea-’ōtahi-ra’a i roto i te pure i ni’a i te mou’a !

Nō te mea ’ua ’ite au ē, e riro tātou pā’āto’a i te pou mai i raro i te mau tupua’i hanahana nō te fa’aruru i te mau ha’afifira’a o te orara’a, teie tā’u fa’aitoitora’a ’a hope ai teie ’āmuira’a rahi.

Nā mua roa, ’ia ’ite noa atu ’outou i roto i te mau mahana i muri nei ē, e paruparu e vai ra i roto i te feiā ’ati a’e ia ’outou, ’e nā ni’a iho, e tuha’a i roto i tō ’outou iho orara’a ’aita ā i ’aifāito i te mau poro’i i fa’aro’ohia i teie hope’a hepetoma, ’eiaha e ha’amaemae i tō ’outou vārua i raro ’e ’eiaha e fa’aru’e. ’Ua ’ōpuahia te ’evanelia, te ’Ēkālesia ’e teie mau putuputura’a rahi ’āfa matahiti ’ei fa’atupura’a i te tia’ira’a ’e te fa’aurura’a. ’Aita i ’ōpuahia nō te fa’atupu i te fiu o te ’ā’au. Nā te ’enemi noa, tō tātou pā’āto’a ’enemi, e tāmata i te ha’apāpū i te māna’o ē, e ’ohipa fa’aturuma te reira ’e e’ita roa atu e haere teie mau mana’o hau a’e i vauvauhia i roto i te ’āmuira’a rahi, ’e e’ita te ta’ata e ha’amaita’i mau iāna ’e e’ita hō’ē ta’ata e haere mau i mua. ’E nō te aha Lucifero e hōro’a nei i teie a’ora’a ? Nō te mea ’ua ’ite ’oia ē, e’ita tāna e nehenehe e ha’amaita’i iāna, e’ita ’oia e nehenehe e haere i mua, ’e hope noa atu te mau ao, e’ita roa atu ’oia e ’ite mai i te po’ipo’i ’ana’ana. E ta’ata ahoaho tei ru’uru’uhia e te mau tā’ōti’ara’a mure ’ore, ’e ’ua hina’aro ato’a ’oia i te ahoaho nō ’outou. Nō reira, ’eiaha e hi’a nō te reira. Nā roto i te hōro’a nō te Tāra’ehara a Iesu Mesia ’e te pūai o te ra’i nō te tauturu mai, e nehenehe tā tātou e ha’amaita’i ia tātou, ’e te mea maita’i i roto i te ’evanelia, ’oia ho’i, e tāpa’opa’ohia tā tātou mau tāmatara’a ’ia rave, noa atu ā ’aita tātou e manuia noa nei.

I te tupura’a te mārōra’a i te ’ōmuara’a o te ’Ēkālesia nō ni’a i te ta’ata e fāri’i i te mau ha’amaita’ira’a o te ra’i ’e te ta’ata e’ita e fāri’i, ’ua parau te Fatu i te peropheta Iosepha Semita ē, « ’Oia mau tā’u e parau atu nei, ’ua hōro’ahia mai [te mau hōro’a a te Atua] ’ei maita’i nō ratou o tei here mai iā’u nei ’e ’o tei ha’apa’o noa i ta’u mau fa’auera’a… e ’o [rātou] ato’a ’o te ’imi noa i te rāve’a ’ia nā reira ».⁶ ’Aua’a a’e teie parau nō tātou pā’āto’a, « ’oia ato’a ’o te ’imi noa i te rāve’a ’ia nā reira », e ’ere ānei ! E fa’aora ta’ata te reira, inaha i te tahi taime, ’o te reira ana’e tā tātou e nehenehe e pūpū atu ! E tāmāhanahanara’a te reira i te mea ē, ’āhani te Atua e hōro’a noa i te utu’a maita’i i tei ha’apa’o maita’i ’e te hope roa, ’aore paha ïa Tāna tāpura ’ōperera’a.

Nō reira ’a ha’amana’o ananahi, ’e te mau mahana ato’a i muri mai, e ha’amaita’i te Fatu i te ta’ata tei hina’aro i te ha’amaita’i iāna, ’o te fāri’i i te tītaura’a nō te mau fa’auera’a ’e ’o te tāmata i te ha’apa’o i te reira, ’o te poihere i te mau viretu huru Mesia ’e ’o te tūtava ’ia ’apo mai i te reira, i te maita’i roa a’e e noa’a ia rātou. Mai te peu e turori ’outou i roto i teie tāpapara’a, mai te mau ta’ata ato’a ; tē vai ra te Fa’aora nō te tauturu ia ’outou ’ia haere noa i mua. Mai te peu e marua ’outou, ’a ti’aoro i Tōna pūai. ’A ti’aoro mai ia Alama te huru, « E Iesu ē… aroha mai ’oe iā’u nei ».⁷ E tauturu mai ’Oia ia ’outou ’ia ti’a fa’ahou mai. E tauturu ’Oia ia ’outou ’ia tātarahapa, ’ia tātā’i i tei tītauhia e tātā’i ’e ’a haere i mua. E’ita e maoro roa e ’ite mai outou i te manuiara’a tā ’outou e ’imi ra.

« Mai te au i tā ’oe i hina’aro iā’u nei e nā-reira-hia ïa ia ’oe na », ’ua parau te Fatu.

« ’A fa’atae atu i tō ’oe ti’aturira’a i te reira Vārua ’o te fa’aarata’i atu ’ia rave i te ’ohipa maita’i—’oia ïa, ’ia rave i te parau ti’a, ’ia haere noa ma te ha’eha’a, ’ia ha’avā mai te parau ti’a ra …

« [’Ei reira] te mau mea ato’a ra tā ’oe e hina’aro iā’u nei… e roa’a te reira ia ’oe na ».⁸

E mea au roa nā’u teie ha’api’ira’a tumu ! Tē parau fa’ahou nei te reira ē, e ha’amaita’ihia tātou mai te au i tō tātou hina’aro ’ia rave i te ’ohipa maita’i, noa atu ā tei roto noa tātou i te tūtavara’a. ’E tē fa’aha’amana’o nei te reira ia tātou ē, nō te fa’aineine nō teie mau ha’amaita’ira’a, ’ei ha’apāpū maita’i tātou ē, ’aita tātou e ’ōpani ra i te reira ia vetahi ’ē : tītauhia tā tātou ’ohipa ’ia ti’a noa, ’eiaha te ti’a ’ore, ’eiaha te tano ’ore ; tītauhia ’ia haere tātou ma te ha’eha’a, ’eiaha te fa’aahaaha, ’eiaha te te’ote’o ; tītauhia ’ia ha’avā ti’a tātou, ’eiaha roa atu mai tei ti’a noa nō tātou iho, ’eiaha te parau ti’a ’ore.

Te mau taea’e ’e te mau tuahine, te fa’auera’a rahi mātāmua o te mure ’ore, ’o te herera’a ïa i te Atua ma tō tātou ’ā’au ato’a ’e te pūai ’e te mana’o ’e te itoito—’o te fa’auera’a rahi mātāmua ïa teie. Te parau mau rahi mātāmua rā o te mure ’ore, ’o te herera’a ïa te Atua ia tātou ma Tōna ’ā’au ato’a ’e te pūai ’e te mana’o ’e te itoito. ’O te reira here te ’ōfa’i niu o te mure ’ore, e ti’a ato’a ho’i te reira ’ia riro ’ei ’ōfa’i niu nō tō tātou orara’a tāmahana. Inaha ho’i, e mea nā roto ana’e i teie tāmarūra’a ’ā’au e ura ra i roto i tō tātou vārua e roa’a ai ia tātou te ti’aturira’a ē, e tāmau noa i te tāmata i te ha’amaita’i, e tāmau noa i te ’imi i te fa’a’orera’a hara nō tātou ’e e tāmau noa i te reira aroha nō tō tātou ta’ata tupu.

’Ua ha’api’i te peresideni George Q. Cannon i te hō’ē taime : « Noa atu te teimaha o te tāmatara’a, noa atu te hōhonu o te pe’ape’a, noa atu te rahi o te ’ati, e ’ore roa te [Atua] e fa’aru’e ia tātou. ’Aore ā ’Oia i nā reira a’enei ’e e’ita roa atu ’Oia e nā reira. E’ita Tāna e nehenehe e nā reira. E ’ere Tōna huru [’ia nā reira]… E ti’a [noa] ’Oia i pīha’i iho ia tātou. E topa paha tātou i roto i te auahi ’ama ra ; e topa paha tātou i roto i te pape hōhonu ; e’ita rā tātou e ’ama, e’ita ato’a e pau. E ti’a mai tātou i rāpae i teie mau fifi ato’a ’ei mau ta’ata maita’i a’e ’e te mā a’e ».⁹

Teie te pūpūra’a hanahana ari’i e ta’i mai nō te ra’i mai nō te riro ’ei ’ohipa rahi tāmau i roto i tō tātou orara’a, ’o tei fa’a’itehia i roto i te orara’a, te pohe ’e te Tāra’ehara a te Fatu ra Iesu Mesia ma te mā ’e te maita’i-roa-ra’a, i teienei rā e ti’a ia tātou ’ia horo ’ē i te mau fa’ahope’ara’a o nā mea to’opiti, te hara ’e te ma’ama’a—tō tātou iho ’e tō vetahi ’ē—noa atu te huru hōho’a e tae mai i ni’a ia tātou i roto i te tere nō te orara’a tāmahana. Mai te peu e hōro’a tātou i tō tātou ’ā’au i te Atua, mai te peu e here tātou i te Fatu ra Iesu Mesia, mai te peu e rave tātou i te maita’i roa a’e e noa’a ia tātou nō te ora i te ’evanelia, ’ei reira te ananahi—’e te mau mahana ato’a i muri mai— e ’ana’ana mai ai i te hope’a, noa atu ā ’aita tō tātou mata e ’ite tāmau nei i te reira. Nō te aha ? Nō te mea ’o te hina’aro o tō tātou Metua i te Ao ra ’ia riro mai te reira ! ’Ua hina’aro ’Oia i te ha’amaita’i ia tātou. ’O te ora utu’a maita’i ’e te ’auhune ’e te mure ’ore te tumu mau o Tāna ’ōpuara’a aroha nō Tāna mau tamari’i ! E ’ōpuara’a tei fa’atumuhia i ni’a i te parau mau « tē fa’atupu nei te mau mea ato’a i te maita’i nō te feiā hina’aro i te Atua ».¹⁰ Nō reira, ’a tāmau noa i te here. ’A tāmau noa i te tāmata. Tāmau noa i te hōro’a i te ti’aturi. Tāmau noa i te ti’aturi. Tāmau noa i te tupu. E ha’apoupou te ra’i ia ’outou i teie mahana, ananahi ē a muri noa atu.

« ’Aita ā ’oe i ’ite, ’aita ā ’oe i fa’aro’o ? » ’Ua auē Isaia.

« Tē hōro’a nei [te Atua] i te itoito nō te matapouri ; ’e tē fa’arahi nei ’oia i te ’eta’eta nō tei paruparu ra… 

« ’O te feiā… e ti’aturi ia Iehova, e noa’a ïa te ’eta’eta ’āpī ; e pe’e rātou i ni’a mai tei ni’a i te pererau o te ’aeto… 

« ’O vau ho’i tō Atua ra, ’o Iehova, ’o tei mau ia [rātou] i tō rima ’atau ra ; ’o tei parau atu ia rātou ē, ’Eiaha e mata’u ; ’o vau ho’i tō ’oe tauturu ».¹¹

Te mau taea’e ’e te mau tuahine, ’ia ha’amaita’i mai te Metua here i te Ao ra ia tātou ananahi nō te ha’amana’o i tā tātou i putapū i teie mahana. ’Ia ha’amaita’i mai ’Oia ia tātou nō te tūtava ma te fa’a’oroma’i ’e te onoono ’ia tae i te mau mana’o hau a’e i fa’aro’ohia ’e i porohia i roto i teie ’āmuira’a hope’a hepetoma, ma te ’ite ē e vai noa Tōna here hanahana ’e te tauturu ’āueue ’ore noa atu tē tāfifi ra tātou—’aita, i terā taime ta’a ’ē e tāfifi tātou.

Mai te mea e au ē, ’ua teitei roa te mau fa’aturera’a o te ’evanelia ’e e’ita e ra’ehia te ha’amaita’ira’a tei tītauhia i te mau mahana i muri nei, ’a ha’amana’o i te fa’aitoitora’a a Iosua i tōna mau ta’ata i te fa’arurura’a rātou i te ananahi ri’ari’a. ’Ua parau ’oia, « ’A ha’amo’a na ia ’outou ; ananahi ho’i Iehova e rave ai i te mea ta’a ’ē i roto ia ’outou na ».¹² ’O ta’u ato’a ïa parau fafau. ’O te parau fafau o teie ’āmuira’a. ’O te parau fafau o teie ’Ēkālesia. ’O teie te parau fafau Nōna tei rave i terā mau ’ohipa māere, ’o ’Oia iho ho’i te « Hau, [te] A’o, te Atua Pūai… te Ari’i nō te Hau ».¹³ Tē fa’a’ite pāpū nei au Nōna. E ’ite au Nōna. ’E Nōna teie ’āmuira’a e fa’atupuhia nei ’ei ’itera’a pāpū nō te haere-noa-ra’a Tāna ’ohipa i mua i roto i teie mahana rahi ’e te hope’a. Nā roto i te i’oa o Iesu Mesia ra, ’āmene.