2010–2019
Likih Ngehn Sarawio Me kin Kahluwa ken Wia Me Mwahu
April 2016


Likih Ngehn Sarawio Me kin Kahluwa ken Wia Me Mwahu

Kitail kin keila karaniala Sounkomouro sang ni limpoak mehlel oh wiliandi Ih papah mehteikan.

I kalahnganki ahi kak iang kumwail ni soutik en kaudok, madamadau, oh sarawi wet. Kitail kapakapenehr. Samatail Nanleng ketin karongeikitailehr. Kitail pil tamandahr atail Sounkomour, Kaun Sises Krais, ni atail kamarainkidahr koulen kaping kan ong Ih. Kitail pil kamarainkidahr kitial en wia me laudsang sowese atail Kaun nan Sapwellime doadoahk en kakehlahda oh koaloalomwahuwih sapwellimen Samatail Nanleng serikan.

Atail ineng en papah mehteikan pil laudlahr sang ni atail kaping ong dahme Sounkomouro ketkiheng kitailehr. Ihme kahrehda ni ansou me kitail rong lepin lokaiahkan me koulehr loaletail inenen perenda kowahlap. Pwehki ahi alehdi laud, I pil anahne kihla.1 Nanmwarki Benjamin, nan sapwellime padahk me kileldier nan Pwuken Mormon, inoukidahr pepehm en kaping en pweida (TehkMosiah 2: 17–19).

Ni ansou me atail pwoson Sises Krais kin kahrehiong kitail en warohng ni popohl en Sapwellime mahk, kitail pehm ineng en papah mehteikan pwehki Ih. Nanmwarki Benjamin padahkiher me mahk sohte kin wiahkintehieu wiawi.

E mahsanih nin duwe met: “Oh met, pwehki sang mepwukat me I padahkihong kumwailehr—me pwehki sang kolokol pen lapwapen dipamwail akan nan ehu ehu rahn akan, pwe kumwail en kin kak kekeid ni amwail mwakelekel mwohn Koht—I men kumwail en kin kihla amwail dipwisou kan ong me semwehmwe kan, aramas koaros nin duwen me irail anahne, me rasehng kamwenge me semwehmwe kan, kalikouwiada me kilisou kan, pwaralahng me soumwahu kan oh kihla sawas en pali ngehn oh paliwar, nin duwen arail anahn akan” (Mosiah 4:26).

Iengen Alma, Amulek, pil padahki me mehlel me kitail anahne wenlahte nan atail papah ong Ih pwe kitail en kolokolete mahk: “Oh met kilang, riei kempoak kan, I indahiong kumwail, dehr leme me iei koaros met; pwe mwurin amwail wiahier mepwukat koaros, ma kumwail soikala me semwehmwe kan, oh me kilisou kan, oh sohte pwarek me soumwahu kan oh me apwal akan, oh kihwei amwail dipwisou kan ong irail me mihmi nan anahn—I indaiong kumwail, ma kumwail sohte kapwaiada mepwukat koaros, kilang, amwail kapakap kin sohte katepe, oh sohte pahn wiahiong kumwail mehkot, oh kumwail iei duwehte mwalaun akan me kin kasohwe pwosono (Alma 34:28).

I medewehda soutiket lih kei nan ahi mour. Mie lih oh serepein 31 nan aht peneinei, tepisang ahi pwoud oh kohdi iangahki nein nait seri meh silimen me apwtehn ipwidi. Ekei iang kitail soutiket. Meh limen mi pahnangin sounpar 12. Ele ehdin arail patehng rierail lih teikan mihting nan Conference Center en sapwellimen Sounkomour Mwomwohdiso. Emen emen pahn pein ahneki ah iren ketemen sang nan mihting wet oh wiahda pein ah inou sang dahme e kehn soutiket.

I kopworopworki me mie iren ketemen siluh oh inou siluh me re pahn tamataman nan arail mour oh pil mour kokohdo. Iren ketemen pwukat iei pepehm kan. Oh inou kan iei soahngkan me anahnepe en wiawi.

Pepehm me keieu kesempwal iei limpoak. Kumwail pehmadahr limpoak nan mahsen en riomwail kaun en lih akan. Oh kumwail pehm sang Ngehn Sarawi me re poakohng kumwail mendahte arail sehse kumwail pwe re pehm Samatail Koht Nanleng oh sapwellimen Sounkomouro limpoak ong kumwail. Ihme kahrehda re inenen men papah kumwail pwe kumwail en alehdi kapai kan me Koht kupwurki ong kumwail

Kumwail pehm limpoak ong mehteikan soutiket—ong kempoakepahmwail kan, mehn mpemwail kan, oh me pil apwtehn kohdo nan amwail mour. Iren pepehm en limpoak wet iei kisakis ehu sang Koht. “Ahpw limpoak unsek iei limpoak mehlel en Krais, oh e kin mihmi kohkohlahte: Oh mehmen me kin kolokol lao lel ni imwin rahno, e pahn kin mwahu ong ih” (Moroni 7:47). Kumwail pehm limpoako soutiket, oh kumwail kak alehdi ansou koaros me kumwail rapahki.

Keriaun pepehm me kumwail ahneki soutiket iei lipwen Ngehn Sarawi. Riei lihoko I inoukiheng kumwail rahnwet me Ngehn Sarawi pahn kaweid kumwail en diar doahk en papah me Kauno kupwurki kumwail en wawehng mehteikan. Kumwail pehm sang Ngehn Sarawi me ara inou iei sang Kauno oh e mehlel.

Kauno mahsanih: “Oh, mehlel, mehlel, I indahiong kumwail, likih Ngehno me kin kahluwa ken wia me mwahu—ehi, en wia ni pwung, ni karakarahk, en kadeik pwung; oh iei ih wahn Ngehni met.” (D&C 11:12).

Mwein kumwail alehdier kapaio soutiket. Ni karasepe, mwein ahd ehu de mas ehu en me anahn, kohdo nan amwail madamadau kan nan mihting wet. Mwein e pwarada kisin ahnsou kis, ahpw pwehki dahme kumwail rongehr soutiket, kumwail pahn kapakapki, ni amwail kin kopworopworki me Koht pahn ketin kahluwa kumwail en wia me mwahu duwen me e kupwurkiong irail. Ansou me kumwail kin poaden wie soangen kapakap kat nan amwail mour, kumwail oh mehteikan pahn wekideklahng me mwahu.

Kesiluh en pepehm me kumwail ahneki soutiket iei kumwail men karanih Sounkomouro. Lella serepein me keieu pwulopwul wasaht pahn pehm mehlel en luhk en nan koulo:“Sounkomouro mahsanih, Kohdo, idawehn ie. Eri kitail ahpw alasang.”2

Eri, iren pepehm kan, keieun inou me kumwail anahne wia iei kohla oh papah ni amwail ese me kumwail sohte kohla kelehpw. Ansou kumwail kohla koaloalamwahuwih oh papah emen pwehki Sounkomouro, E ketin kaunopadahr ahlo mwohmwail. Met, me irail me neksangehr arail misin kan wasaht soutiket pahn ndahieng kumwail, me e sohte wehwehki me aramas koaros mwurin wenihmwko onopadahr en kasamwoh kumwail de koaros me kumwail songen papah pahn kalahngan ong kumwail. Ahpw Kauno pahn ketla mwohn mesemwailkan pwehn kaunopada ahlo.

I pahn kapwurehiong me Presiden Thomas S. Monson mahsaniher me mehlel en sapwellimen Kauno inou: “Oh mehmen me pahn kasamwo ih uhk, I pahn ket limwahmw, pwe I pahn tiheng mwohn mesomwen. I pahn mih ni palimaun oh palimeing, oh Ngehniet pahn audehda mongiongomwail kan, oh nei tohnleng kan pahn kapiluhkpene, pwehn utunguhkada.” (D&C 84:88).

Ehu wiepen ah kin tihengmwohn mesemwailkan iei pwehn kaunopada mohngiong en aramas me E kupwurki kumwail en papah. E pahn pil ketin kaunopada amwail mohngiongkan.

Kumwail pahn pil diar me Kauno kihda sawaspamwail—ni palimaun, ni amwail pali meing, oh kapilkumwailpene. Kumwail sohte kohla papah kelehpw mehteikan ong Ih.

E ketikihongie soutiket. Kauno ketin kaunopadahr “sounkadehde kan” (Ipru 12:1), nan lepin lokaia kan oh koul, pwehn kapatapene oh kalaudehla manaman me E kupwurki ien nda. I men kamehlelehte me ahi pali kak itar iren mahsen me E kupwurki ien ehukihda. I koapworopworki oh kapakapki me kumwail pahn pehm kaping oh peren ni ansou me Kauno pahn ketkipene iangahki mehteikan en papah ong Ih.

Ni amwail kehnehr met ansou koaros, kumwail pahn sirei ni popohl, duweie, ansou koaros me kitail koulki, “Sweet is the work.”3

Kumwail pahn pil sirei ansou kumwail tamanda iretikitik wet: Nanmwarkio ahpw pahn ketin sapeng irail, mahsanih, “Kumwail en ese pwe soahng koaros me kumwail wiahiong emen riei me tikitik pwukat, ngehi me kumwail wiahiong” (Madiu 25:40).

Keriaun ire me kumwail anahne wia iei tamataman Kauno nan amwail wiliandi Ih wia papah. Kauno sohte kohlahte mwohn mesetailka oh kadar tohnleng kan en iang kitail papah, ahpw E pil pehm koaloalamwahu me kitail walahng mehteikan mwomwen me kitail kiheng Ih.

Sapwellimen Koht seri koaros me rong oh kamehlele padahk kan en mihting wet pahn idek, “Dahme Kauno pahn kupwurki ien wia pwehn sewese Ih kiheng sawas ong irail me anahne?” Ahn emen emen lih ah ire weksang ahn emen. Mwo mehlel ong nei kisin pwihn en lihakan, nein nei serihkat, peneinei en nei serihkat, nein nei serihkat seri. Ong irail, oh koaros sapwellimen Samatail Nanleng serepein kan, I kapwurehiong kaweid eripit sang Sister Linda K. Burton.

E peki kumwail en kapakap ni pwoson oh esehda dahme Kauno kupwurki kumwail en wia nan amwail irair kan. Oh E kosoiadahr inou en koaloalamwahu kaselel me Pein Kauno ketkiheng lih me re uhwengada pwehki ah keiehkihdi Sapwellime tahpw leh pweilaud nan ah kak netla pwehn sewese me semwehmwe.

A Sises ketin mahsanih, “Kumwail piseksang! Kumwail dehr kedirepwki lihet! Tiahk kaselel ehu me e wiahiong ie.

“Me paisuwedlahr akan kin mihmihte rehmwail ahnsou koaros; eri, ahnsou koaros me kumwail mwahuki, kumwail kak sewese irail; a ngehi, I sohte pahn ieiang kumwail ahnsou koaros.

“E wiadahr uwen me e kak: e wiadahr marekeiso wet ong paliwereiet pwe en kaunopada me pahn seridi.

“Eri, kumwail en ese pwe wasa koaros nin sampah me rongamwahu pahn lohkseli ie, pwe en kin wiewia katamanpe” (Mark 14:6–9).

Kisin iren pwuhk sarawio udahn ngilamwahu oh wia iren kaweid kesempwal ong lih akan me pwoson nan sapwellimen Kauno wehi nan ansou kan me katairong laud. Kumwail pahn kapakap pwe kumwail en ese ih me Samatailo kupwurki kumwail en papah sang ni limpoak ong Ih oh atail Sounkomour. Oh kumwail sohte pahn kasik kapokon en ketemen ehu, idawehnlahte karasepen liho nan iren pwuhk sarawi en Mark, me pwehki ah wiewia me sarawi en wauneki Sounkomouro en sampahwet me kitail tamataman ahpw kaidehn edehu.

I koapworopworki me lih akan nan aht peneinei pahn wia wen arail kak pwehki arail limpoak ong Koht en papah irailko me mie arail anahn. Oh kesiluh en mehkot I koapworopworki me re pahn pein wia arail doadoahk mwahu kan. Ahpw I pahn kapakapki me re pahn ale kaweid en Kauno, ni ansou E masanih—me I ese me kitail koaros anahne rong:

“Kaleke pwe kumwail dehr kin wia amwail wiewia mwahu kan en souleng mwohn mesen aramas akan pwe re en kin kilang. Pwe ma kumwail wia met, kumwail sohte pahn ale ketingpamwail sang rehn Samamwail me ketiket nanleng.”

Oh Ih eri masanih:

“Eri, ni amwail pahn kin sewese me paisued men, kumwail dehr pil kin kehsehki kompoakepahmwail kan.

“Pwe amwail sawas en rir. Oh Samamwail me kin mwahngih amwail wiewia rir kan, en ketin katingihkin kumwail” (Madiu 6:1,3–4).

I kapakapki lih souleng kan en Mwomwohdiso, wasa re mih oh dahme re mih loale, me arail pwoson Sounkomouro oh kapingki Sapwellime Tomw pahn kaweid irail en wia uwen me re kak ong irailko me Koht kupwurki ren papah. Ni arail wia mwo, I inoukihda me re pahn pweida nan ar doahk en wiahla lih sarawi kei, me Sounkomouro oh Samatail Nanleng pahn ketin kasamwoh oh katingih.

I kadehde me ih Mwomwohdiso en Sises Krais me iasadahro met. E ketin iasadahr. E ketin pwainlahr dipatailkan. I ese me pwehki Ih kitail pahn pil iasada oh kak ahneki mour soutuk. Presiden Thomas S. Monson iei Sapwellime soukohp me ieias. Samatail Nanleng mwahngih oh kin sapeng atail kapakap kan. I kadehde me kitail kin karaniala Sounkomouro ni atail, sang ni limpoak mehlel, papah mehteikan ong Ih I pwilikihdi kadehdehu ni mwaren Sises Krais, amen.

Irehkan

  1. “Because I Have Been Given Much,” Hymns, no. 219.

  2. “Come, Follow Me,” Hymns, no. 116.

  3. “Sweet Is the Work,” Hymns, no. 147.