Dahme Kitail Pahn Wia?
Kitail kauwadahr wehin Koht sang ni atail kin sewese meteikan. Kitail pil kawada wehio sang ni atail kin kosoiahda oh kadehde me mehlelo.
Mwurinte en Sihses Iasada oh Ketdahla Nanlengo, Wahnpoaren Peter padahngki, “Mweidehng koaros …en ese ni mehlel, me Koht ketin wiadahr Sihses ohte, me kumwail kalohpwualahr, en wia Kaun oh Krais.” Irailokoa me wie rongorong ahpw mengimengiloaliki oh kalelapak rehn Peter oh mehteikoa, “Maingko, a dahme se pahn wia?”1 Oh irail ahpw perenda oh kapwaiada en Peter padahng kan.
Lakapw iei Rahn Sarawi en Easter, oh I koapworopwoarki me kitail pahn pil ahniki pepehm laud nan atail mohngiong en alehda Sounkomouro, koluhla, oh kapwaiada ni peren unsek.
Nan kapokon lap wet, kitail pahn rong kaweid kaselel kan sang rehn ohl oh lih me wia atail kaun nan mwomwohdiso wet. Pwehki atail ese me arail padahngkan pahn sair atail mohngiong kan, I kalelapak rehmwail pwongpwong wet, “Lih akan oh riei kan, dahme kitail pahn wia?”
Presiden lap en Pwihn en Sawas en Lih, Eliza R. Snow kamehlelehiengehr rie lih akan kerenieng pahr 150 samwalahro me, “Koht ketin ketkiheng kitailehr pwukoah kei me laud mehlel.”2 I kadehde me dahme e kamehlelehieng irailehr e mehlel lel rahnwet.
Sapwellimen Koht Mwomwohdiso anahne lih me direkihlahr Ngehn me kin doadoahngki arail kisakis kan en apwalih, utungada ni koasoai, oh uhki rongamwahu mehlel wet. Atail kamarain oh pepehm udahn kesemwpwal ohng kauwada wein Koht, me wehwehki wiewia atail pwukoahn komourla sapwellimen Koht serih kan.
Kauwada Wehio sang ni Epwel Mwahu
Kitail kauwadahr wehio ni ansou me kitail kin apwalih mehteikan. Ahpw, keioun seri en Koht me kitail anahne apwalihada nan rongamwahu kopwurpwurdo wet iei pein kitail. Emma Smith patowan, “I inangih alehdi Ngehn en Koht pwe I en ese oh wehwehki pein ngehi, pwe I en kak powehdi kasongosong me pahn kahrehda ahi sohte alehdi mour soutuk.”3 Kitial anahne kakairada pwoson nan sapwellimen Soundor rongamwahu, wenla mwowe, sang ni manaman en inou kan en nan tehnpas sarawi pwehn iang ale mour soutuk.
Ia duwen ma ekei atail tiahk sohte pahrekiong kopwurupwurdohn rongamwahu en Sises Krais? Pwe kumwail mweidala tiahk pwukat, kumwail pahn anahne utuht oh sawas sang meteikan, duwehte dahme I wia.
Ansou me I ipwidi, ai pahpa oh nohno poadokedi tuhke ehu likinimwato pwehn kak mie wahntuhke wet ni rahn en ahi kapwopwoud, me pahn wiawi nan ihmw sarawi en Protestant me ai papahn kawahkoa kin sarawi ie. Ahpw ni rahn en ai kapwopwoudo, ai pahpa oh nohno sohte iang oh sohte wahnrohsen tuhkehu, pweki ai wialahr emen tohn Mwomwohdiso wet erein sounparehr ehu, I pahn seiloaklahngehr Salt Lake City, Utah, pwe I en ale ai inou kan en nan tehnpas sarawi oh katengtengehng ai inou en pwopwoud David.
Ni ahi mwesel sang Louisiana oh kerenlahngehr Utah, I ahnikihdi pepehm ehu me lelehng ie me duwehte aramas emen me sohte wasahn ah kousoan. Mwohn kapwopwoudo, I pahn mihmi mahs rehn en David nohno kahlap, me wia lih kadek limpoak men me adaniki Nohno Carol.
Iet ngehi, me wia aramas en likih men nan Utah, me pahn kousoan nan imwen aramas emen me I sohte wewehki mwohnte ai pahn katengeteng ehng—nan mour soutuk—peneinei ehu me I sohte nohn ese. (Mwahute pwehki I poakoahng oh koapwoaroapwoarki ai pwoud oh Kauno!)
Ni ansou me I keskesihnen ni wenihmw en imwen Nohno Carol, I mentehnoh rukula sang mwo. Wenihmwo ritida—I kesihker mwo likamw rapit masepwehk men—oh Nohno Carol, ni ah sohte lokaia, doahkoadohng ie oh pwoleiehdi. Lih menet, me sohte pein nah seri, e ese—ah mohngiong kadek wewehki—me I anahne wasahn kousoan. Au, soangen insenamwau oh pepehm mwahu me I ahnikihdi ansouo! Ai masepwehk koaros sohrala oh I ahpw ahnikihdi pepehm ehu me I milahr wasa ehu me onopek mwahu pwehki Ngehn Sarawi.
Limpoak iei en kaunopada wasa nan ahmw mour ohng emen aramas, iei me duwehte dahme Nohno Carol wiahieng ie.
Nohno kan kin kaunopada wasa nan paliwararail pwehn kakairada seri me saik ipwidi,--oh koapwoaroapwoar me mie wasa nan arail mongiong kan ni ansou me irail pahn apwalirailda-- ahpw kairada wet sohte irairdihengete kaipwihdi serih kan. Ihp kahdanki “nohno” mwohn ah nainiki serihkan.4 Oh I kamehlele me “pwukoahn nohno” wewehki “en kiheng mour.” Medewe soangen wiepe tohto kan me kumwail kin wia pwehn kak mie mour. Met kak duwehte koaloalamwahu ohng me solahr arail koapworoapwoar de kakehlailih me ahneki peikasal en pali ngehn. Sang ni sawas en Ngehn Sarawi, kitail kak wiahda wasahn koaloalamwahu ohng irail me aramas kin uhwong, me aramas soikalahr kan, oh mehn likih kan. Ni mwohmw en kadek oh manaman pwukat, kitail kauwadahr tehnpas en Koht. Riei lihoko, kitail koaros kohdo sampaht oh wa kisakis pwukat me kin kihwei oh apwalih mour pwehki ih Sapwellimen Koht pilahn.
Kitail anahne ahniki tohnmetei mehlel pwe kitail en kak idawehn Sapwellime pilahn oh wiahla soun kawada Sapwellime wehi. Elder Orson F. Whitney intingihdi: “Soahng koaros me kitail lokolongki oh soahng koaros me kitail powehdi, mehlel ansou me kitail powehdi ni kanengamah, … kin kamwakelehda atail mohngiong kan … oh kin kalaudehla atail kadek oh limpoak mehlel. … oh sang ni … doadoahk laud oh kahpwal akan, me kitail alehdier kaskuhlpe … me pahn wiahieng kitail en duwehla atail Pahpa oh Nohno nanleng.”5 Kahpwal pwukat kin waikitaildo rehn Krais, me kakkamwauih kitaila oh wiahkin kitail Sapwellime tohn doadoahk kelik kei nan doadoahk en kemour.
Kauwada Wehio sang ni Koaskoasoi oh Kadehde
Kitail pil kin kauwada wehio ansou me kitail kin koasoaia oh kadehdehki me mehlelo. Kitail kin idawehn koasondi en Kauno. E kin padahngki manaman oh mweimwei en Koht. Riei lihoko, kitail pil kak wia met. Lih kin perenki koasoi oh patpene! Ni atail pahn kin doadoahngki mwemwei en priesthood me kodohng kitail nan pwukoa, koasoakoasoi oh patpatpene pahn wiahla padapadahk oh weweid nan rongamwahu.
Riatail lih Julie B. Beck, me wiahier president lap en Pwihn en Sawas en Lih, padahngki: “Kitail en kak warehng, alehdi, oh kapwaiada pein atail kaudiahl iei ehu koahiek kesemwpwal me kak alahldi nan mour wet. … E anahne en mie kahrepen nanati en doadoahng kan.”6
Pein atail kaudiahl sang rehn Ngehn Sarawi pahn kaweid kitail en esehla, kosoaia oh doadoahngki me mehlelo—Sapwellimen Soundoro me mehlelo. Ni ansou me kitail pahn kin nantiheng idawehn Krais, kitail pahn ansou koaros kehn Sapwellime limpoak oh kaweid; sang ni atail pahn kekehn Sapwellime limpoak oh kaweid, e pahn laudla atail men padahk ki me mehlelo me E wiahier, itarete ma kitail sohpai kailok.
Pahr kei samwalahro, I kapakapki I en alehdi kaweid en doarehla pwukoahn nohno kan ni ehu ansou me I alehdi kair ehu nan delepwohn sang aramas emen me I sehse.
Aramas me delepwohno idek, “Komwi me Neill Marriot, nohnohn peneinei me laudo?
I sapeng ni ei peren, “Ei!” kasik I en rong me e pahn inda, “Udahn mwahu!”
Ahpw soh! I sohte pahn manokehla ah pasapengehng ie oh ngilen ah kosoai pohn delepwohno: “Udahn I sohte pwungki omw kak wahdo serih kei pohn sampah me inenen diralahr.”
“Oh,” I mwur pweiek, “I ese ia omw pepehm.”
E mwehl ahpw sapeng, “Soh—ke sehse!”
I sapeng ni ngihl tikitik, “Eri, mwein I sehse.”
E tepkihda ni ah ngilen mwehl oh weringkin ie ahi pweipwei oh pilada I en wia nohno men. Nan erein ansou me e koaskoasoi, I tepda kapakap peksawas oh madmadau meleilei ehu ahpw kodohng ie: “Dahme Kauno pahn mahsaniheng?” Iahpw kehnda me ih keskesihn pohn wasa kekeliwak ehu oh alehdier pepehm kehlail sang ni ei medemedewehier Sises Krais.
I sapengki, “I pereniki ei wia nohno men, oh I inoukiheng uhk me I pahn wia ei kak koaros en kakairada nei serih kat nan ahl ehu me irail pahn wiahda sampah wet wasa mwahu ehu.”
E sapengki, “Na, I koapwoaroapwoarki ken wia!” oh pwilikihdi delepwohno.
E sohte wia mehkot laud ehu—pwehki I wie keskesihnen nan onopek mwahu en pein ahi imwen kuk! Ahpw sang ni kisin koahiek me I ahniki, I kak wia ei koasoi ni ei pahn uhki peneinei, nohno kan, oh soun apwahpwali kan pwehki sang ni soahng riau: (1) I wewehki oh kamehlele sapwellimen Koht padahk en peneinei, oh (2) I kapakapki lepin koasoai kan me pahn kasalehda mehlel pwukat.
Pwehki atail weksang oh sohte duwehte sampah pahn kahrehda ekis kailok, ahpw kitail anahne katengehdieng kitail iren padahk poatoapoat kan oh kadehdehki oh mendahkihla pasapeng en sampah wet.
Ni ansou kitail kin peidekieng pein kitail, “Dahme kitail pahn wia?” kitail song medewe mahs peidek wet: “Dahme Sounkomouro kin ketin wiewia erein?” E kairada. E kapikada. E koangoangoa keirda oh me pwung. Lih akan oh riei lih souleng kan, kitail kak wia mepwukat! Serepein en primary kan, mie aramas nan amwail peneinei kan me anahne amwail limpoak oh kadek? Kumwail kin kawada wehio sang amwail apwalih mehtei kan.
En Sounkomouro pwukoahn kapikada sampaht, me mih pahn kaweid pen Seme, wia doadoahk manaman en kairada ehu. E ketkiheng kitail wasa me kitail pahn keirda ie oh kalaudehla atail pwoson Sapwellime manaman. Pwoson Sises Krais oh Sapwellime Tomwo me keieu kesemwpwal ong kamwahula oh koapwoaroapwor, keirda oh kahrepe. Kitail koaros anahne wasa ehu me pali ngehn oh paliwar en kak ehupene ie.. Kitail, lih nan dih koaros, kak kaunopada wasa wet, me wia wasa sarawi ehu.
Atail pwukoah me keieu laud iei kitail en wia lih ekei me kin idawehn Soundoro, kakairada ni epwel pwung, oh momourki me mehlelo ni soupeikasal. Ni atail pahn kin peki rehn Samatail Nanleng en mweidohng kitail en iang wia soun kawada Sapwellime wehi, Sapwellime manaman pahn audeikitailda oh kitail pahn ese ia mwomwen atail pahn kin apwalih mehtei kan, oh duwehla samatail oh inetail nanleng. Ni mwaren Sises Krais, amen.