Ia Kihkan oh Manaman en Prihstuhdo?
Manaman oh kihkan en prihstuhd kin kamaurada misihn, langahda ewen kehl en nanleng, kamwakidada manaman en nanleng, oh kin kakainene ahl en inou me pwurala rehn Samatail Nanleng.
Ni en ketipino wie kikihrla ni mwurin souwas kopouo, pal lahsang lapalahn dohl me kidikidkilahr sinohu, angin lomwulomwur iou kin lel mesetka oh tumwetka oh kin eleiong aht men soandiengete nan sidohsahu wasa e kin peipeite ie ni wasahn mwemweit en ohtelo. Wasao, ihte me sonamwahu nan warat sdohsau mehn kakarakar me kin sewese kakarakara pehtka oh nehtka. Ngilen tuhke kin tipwitipw pahn nehtka ni kahk koaros me se kin wia oh met kamehleleiong kiht me uhdahn e kopou mehlel.
E wia rahn kaperen ehu ong aht peneinei ni aht wie mwemweit seli nan wasahn dakadak sino me pahn imwsekla nan kopou wet. Ni aht lela ni warat sdohsahu, I doahkdihla nan pwekid en ahi sekido pwe ien ale kihko pwadik seli nan pekido pil iangahki pwekid teio. “Ia kihko?” Koaros pangalahr kasik ia kihko! Padirio kehlail, oh mehkoaros—iangahki mehn kakarakaro—kak doadoahk, ahpw ma sohte kih, wenihmwko sohte kak ritida, sohte kih misihno sohte kak komourda pwehn katanga sdohsahu.
Niansouo, me keieu kesempwal ong kiht iei ia mwomwen aht pahn kak doulong nan sdohsahu pwe sen kak pitsang aht pou, ahpw ihte me I kak wia medewe—mwein pilehu—e wia mehn kapehm ong ie. Ni eh sohte kih, dipwisou kaselel wet, wialahr mehkot me ekiste mwahu sang mahlen ehu. Mendahte eh kak wia soahng tohto, e sohte kak wia ah pwukoah ma sohte kih.
Ehu ahi medewe dahme wiawiheng kiht, ehu eh wia mehkot laud oh kesempwal ong ie. I kapingahla mehlel laud en Samatail Nanleng limpoak ong Sapwellime seri koaros pohn sampah. I inenen pwuriamweikihla uwen kesempwal oh sarawien dahme Koht ketkihong Joseph Smith en kak kilangada. Ahpw ni mehlel, ahi mohngiong kin direkihla kalahngan pwehki kapwurpwurdohn manaman en prihstuhd oh kihkan me iangedo. Ma sohte kapwurpwurdohu, se sohte pahn kak doulong nan sdohsahu me kak wai kiht nan seiloak wet ong rehn samatail oh inatail nanleng. Wiepen tiahk sarawi en komour koaros me audaudki atail inou en pwurala rehn Samatail Nanleng anahne manaman me kin patohdasang kihkan en prihstuhd.
Nan Mei 1829 ansou me Sohn Soun Pepdais pwaredong Joseph Smith oh Oliver Cowdery, e pwilikidieng ira Prihstuhd en Aron oh iangahki kih koaros me kin patehng prihstuhdo. Mwurinte mwo Piter, Seims oh Sohn pwilikidieng ira Prihstuhd en Melkisedek oh kih koaros me kin patehng prihstuhdo.1
Kerenieng sounpar isuh mwuri ni ehu Rahn Sarawi nan Tehnpas Sarawi en Kirtland, wihk ehute mwurin eh kapidelong, “Kauno Siohwa ketin pwarada ni kilohri” ong Joseph oh Oliver, mwuri Moses, Elias oh Ilaisa pwarada oh pwilikihdi “arail kihkan en mwehi wet.”2 Manaman oh kih en prihstuhd kan me kapwurpwurdohu salongalahr ki sounpar kid kei. Ni soangen mwohmwohte, ngehi oh ahi peneinei solahr kak doulong nan warat sdohsahu pwehki salongalahn kihko, ohpil seri koaros en Sahm Nanleng solahr kak ale tiahk sarawi kan en rongamwahu en Sises Krais—lao ehu kapwurpwurdo sarawi wiawiher sang tohnleng kan. Sohte, sohte pak ehu kitail pahn idek, “Ia kihko?”
Ehu rahn kaselel sounpar nekiero, I mwemweitla wasa meleilei iou me mih nan tuhkehn paliepeng en palimesehn Pennsylvania, me adaneki nan pwuhk sarawi Harmony, wasa Sohn Soun Pepdais pwarohng Joseph Smith oh Oliver Coudery oh kapwurehdo Prihstuhd en Arono. I pil kesihnen pohn keilen pilap Susquehanna wasa Joseph oh Oliver pepdaisla mwurin ara alehier manaman oh kihkan. Limwahn pilapet te iei wasa me Piter, Seims oh Sohn pwarada oh kapwurehdo Prihstuhd en Melkisedek oh kihkan me kin patehng prihstuhd wet.3
Wasahka, me iangahki wasa re kamwomwehda tepin imwen Joseph oh Emma Smith mie, wasa me pali laud en Pwuken Mormon pil kawehwe dieng ie, pil imwen en Emma pahpanohno mihe, oh pil wasahn mwemweit me irail kawekdekilahng en wiahla wasahn kaudek ieu, koaros patpene oh wia wasahn kasansalpen Kapwurpwurdohn manaman en Prihstuhd, mehkoaros wasa kiset kasarawi lahr sang Presiden Russell M. Nelson ni Septempe en sounpar nekiero. I pehm manaman oh kesempwal en doadoahk sarawi kan me wiawiher pohn pwehl en wasao. Mwekid wet kahrehda I douloalih, onopiki, oh kapakapki manaman oh kihkan en prihstuhd, me elehda ahi men ehukiheng mwahnakapwkan oh peinakapwkan en Mwomwohdiso wet mwomwen en manaman oh kihkan en prihstuhd kak kapai irailda.
Keieu kitail anahne ese wehwehn pato pwukat pwehn sewesei kitail. Prihstuhd de manaman en prihstuhd wehwehki “manaman oh mweiwei en Koht”4oh “manaman unseko pohn sampa.”5 Kihkan en prihstuhd pil kawehwehda pwe kitail en wehwehki. “Kihkan en prihstuhd iei mweimwei en Koht me kohieng kaunkan en prihstuhd pwehn kaweid, apwalih oh kakaun doadoahk en Sapwellime prihstuhd pohn sampa.”6Kihkan en prihstuhd me kin apwalih wiepen doadoahngki manaman en prihstuhd. Tiahk sarawi kan me kin kapikada ehu rekohd en Mwomwohdiso kin anahne kihkan oh sohte kak wiawi ma sohte mweiwei en doadoahngki. Elder Oaks padahngki me “ni imwio kih koaros en prihstuhd kin patpato rehn Sises Krais me sapwellimaniki prihstuhdo. Ih me ketin pilada soangen kih da me pahn kohieng aramas oh mwomwen en kihko pahn doadoahk.”7
Met ong kumwail mwahnakapwkan oh peinakapwkan, I medewedahr ire siluh me kumwail kak “diarki kihkan” de doadoahngki kihkan oh manaman en prihstuhd pwehn kapaiada amwail mour oh mour en mehteikan.
Keieu Iei en Onopada wia Doadoahk en Misineri
Riei mwahnakapwkan oh peinakapwkan, kumwail mwein sohte wehwehki, ahpw kihkan en kapwurepene mehn Israel kan me Moses kapwuredohro me elehda doadoahk en misineri nan mwehi wet. Ni imwin 2015, misineri 75,000 me wie doadoahk pahn kaweid en kih pwukat. Ni amwail medemedewe met, tamataman pwe sohte pak ehu dene e nohn mwadang ahmw kaunopeng doadoahk en misineri. Nan For the Strength of Youth,kitail wadek me, “Mwahnakapwkan me kolokol Prihstuhd en Aron, … doadoahk kehlail pwehn kaunopkumwailda en welian Kauno ni amwail wia misineri.”8 Peinakapw kan kak pil kaukaunop ahpw kumwail “sohte ahneki soangen pwukoahute pwe kumwail en papah.”9 Ma kumwail wiahla misineri de soh, ahpw amwail kaunopada koaros pahn wia katingpen amwail mour ni amwail wia tohn Mwomwohdiso misineri kei.
Keriau en Ahl pwehn “Diar Kihkan” Iei en Iang Kohla nan Tehnpas Sarawi
Kihkan en katengteng me Soukohp en Kadehe Mering Ilaisa kapwurehdohr elehda tiahk sarawi kan en kin wiawi nan tehnpas sarawi kan. Tiahk sarawi kan me kin wiawi nan tehnpas sarawi kan kin kahrehda emen emen aramas oh peneinei kan en kak pwurala rehn arail pahpa oh nohno en nanleng kan.
Se kangoange mwahnakapwkan oh peinakapwkan en rop oh diar eden arail pahpa/nohno me melahr kan oh pepdaiskin irail nan tehnpas sarawi. Se wehwehki me doadoahk wet wie kekehlaila oh uwen aramas me pepdaisehr nan sampa tohto sang mahs. Wasahn pepdais kan nan tehnpas sarawi kan kin direkihla mwahnakapw oh peinakapw sang ni menseng lel nihpwong. Kihkan en prihstuhd kin wie doadoahk pwehn mweidehng peneinei kan en katengteng pene oh tiahk sarawi kan kin wiewiawi nan tehnpas sarawi kan.
Kumwail kak kilang ehupene me mie nan pwungen prihstuhd me kapwurpwurdohu oh kapaikan? Ni amwail wiewia doadoahk wet, I lamalam kumwail pahn diar me Kauno inenen pisetik. Ni ahi kasawih, I esehda mekeren me mie lih emen kin wahla nah serihkan nan tehnpas sarawi pwe irail en kin pepdaiski me melahrkan. Ni rahno, ni en peneineio arail kanekehlahr arail pepdais kan oh wie mwesmwesel sang tehnpas saraio, emen ohl pidelong nan wasahn pepdaiso wewa kepen doropwe laud ehu me kolokol eden ah peneinei kan. Ni ah kilang me solahr aramas nan wasahn pepdaiso pwehn pepdaiski eden tohn peneineio, emen tohn doadoahngko supukedi peneinei me mwesmweselo oh peki ma irail kak pwurelong nan wasahn pepdaiso pwehn sewese pepdaiski ahd kau. Ni en nohnou ah wie rongorong ahdakan e mwadangete diarada me eden aramas me ohlo wahdo kan iei eden ah peneinei kan me melahr. Met wia irair kaperen oh kapai ehu sang Kauno.
Wihk riau samwalahro kapidelong en Tehnpas Sarawi en Provo City Center wiawi oh ih me wia150 en tehnpas sarawi en Mwomwohdiso wet nan sampa. Ni ansou me President Monson kasarawihla en wia emen Wahnparon nan 1963 tehnpas sarawi eisek riaute me wie doadoak nan Mwomwohdiso. Tehnpas sarawi kan wie kerekerenla ong kumwail. Ahp kumwail kan wie koukouson wasa doh de kumwail me sohte kak kohdo nan tehnpas sarawi pwehki kahrepe, kumwail anahne kolokol amwail warehng pedelong nan tehnpas sarawi. Kumwail kak wia doadoahk kesempwal pwukat likin tehnpas saraw ni amwail ropada oh kadaredo eden amwail peneinei kan.
Ni imwio, Nempe Kesiluh: Kohla Mwowe ni Pwoson
Soukohp en Kadehde Mering Abraham alehier kapai laud sang Kauno nan ah mwehio me ekei ansou kin kahdanki Inou en Abraham. Sounpar kid kei mwuri, kapaikan en rongamwahu me kohieng Abraham nan ah mwehio pil kapwurpwurdohr. Met wiawi ansou me soukohp Elias pwarehng Joseph Smith oh Oliver Cowdery nan tehnpas sarawi en Kirtland.
Pwehki kapwurpwurdohu, emen emen kumwail kak ale kapai kan me inoupe wiawihongehr Abraham. Kumwail kak ale kapai pwukat ma kumwail kolokol amwail pwoson oh momourki mour me warehng. Nan kisin pwuhk For the Strength of Youth, kumwail alehier kaweid nin duwen amwail pahn “kohla mwowe ni pwoson.” I oralapih ekei kaweidko: “Pwehn sewesei kumwail en wiahla mehkoaros me Kauno ketin kupwurki kumwail en wiahla, kelepwidi ni menseng oh nihpwong koaros kapakap ong Samatail Nanleng. … Onopiki pwuhk sarawi kan rahn koaros oh wia dahme kumwail wadek nan amwail mour. … Nantiong kumwail en peik rahn koaros. … Nan mehkoaros, idawehn kaweid en soukohp kan. … Karakarahkdi oh kin men rong Ngehn Sarawio.”
Kaweid wet wiawi mwohn inou me kahrehdo inoukan me mie pwehki kapaikan en Abraham. “Ni amwail wia mepwukat, Kauno pahn wiahda wahn amwail mour en laudsang me kumwail kak pein wiahda. E pahn kalaudehla amwail ansou mwahu kan, katehlapahla amwail wehwehkan, oh kakehlakai kumwail. E pahn sewesehkin kumwail dahme kumwail anahne pwehn powehdi amwail kahpwal oh kasongsong kan. Amwail kadehde kan pahn kehlaila oh kumwail pahn ale peren mehlel ni amwail wehwehkihla Samamwail Nanleng oh Sapwellime Ieros Sises Krais ohkin pepehm Arail limpoak ong kumwail.”10
Ni oralap: kohla nan tehnpas sarawi, onopada wia doadoahk en misineri, oh kohwei mwowe ni pwoson.
Kaimwsekala
Met kitail pahn pwurala wasa kitail tepda ieho, tengalahr nan wasahn peidi en sidohsa kepeuo, peipeidek. “Ia kihko?” Maingko, kalahngan I diar kihko, ni soutiko, wasa re pwupwidi sang nan pwekid en ahi sekido pohn dohlo. Kauno kasalehiongehr kitail me E sohte pahn mweidehng kitail en keskesihnan nan wasa kepeu sohte kih de manaman me kak kahluai kitaila Reh ni ihmwo.
Ma kumwail duwehte ngehi, kumwail kak diar amwail wie peipeidek nan mour wet, “Ia kihko?” ong sdohsahu, ohpiso, de ni ihmwo, Ni mewet eh kin wiawihieng ie, loaleiet kin sirei pwe ni ei kin raprapahki kihko, I kin tamanda kapwurpwurdohn kihkan en prihstuhdo oh President Thomas S. Monson, me kitail utungadahr en wia soukohp, ohl sarawi, oh soun kihda kaudiahl”11 oh ih kelehpw pohn sampa me kolokol oh ahneki manaman en doadoahngki kih koaros en prihstuhd.”Ehi, kih pwukat wie neknekla mwahu rehn soukohp kan, ohl sarawi kan, oh soun kihda kaudiahl kan. Kihkan kin kohda, kesepwilla oh kepwukoahieng aramas nin duwen kupwuren Kauno pahn kaweid en President en Mwomwohdiso wet.
I kadehde me manaman en prihstuhd oh kihkan en prihstuhd kin kamaurada misihn, langahda ewen kehl en nanleng, kamwakidada manaman en nanleng, oh kin kakainene ahl en inou me pwurala rehn Samatail Nanleng me limpoako.
I kapakapki kumwail, dih kohkohda en mwahnakapwkan oh peinakapwkan pahn “kohwei mwowe tengetengedi rehn Krais,”12 me kumwail wehwehki me e wia kamwahu sarawi ong kumwail en doadoahngki kaweid sang irail kan me kolokol kihkan en prihstuhd pwehn langahieng kumwail kapaikan, kisakiskan oh manamankan en nanleng.
I kadehdehki Koht Sahm, Sounkomour oh Soundor, Sises Krais, Ngehn Sarawi, oh Kapwurpwurdohn rongamwahuo ni imwin rahn-akan, ni mwaren Sises Krais, amen.