Ia Ruemon are Unumon Ra Mwich Fengen Ia

Pwi me fefinei kana, ai kapwong ngeni kemi ngeni ewe 186th Mwichenapen Mwichefen an Ewe Mwichefenin Jises Kraist ren Aramas mi Pin non Fansoun Soponon. Ua pwapwa ren ai tufichin mwich remi, me ai kapwong ngeni kemi.

Ua kinisou pwe oua fiti ei mwichenap pwe oupwe tufichin angei pwarata seni Kot pwan ren ami oupwe kanengeni Semach won Nang me ewe Samon Jises Kraist.

Non ei mwich, mi fis ekkis meinisin won fonufan, a wor fitu minion an Jises Kraist chon kuno ekkewe ir mi fori pwon mi pin ne chechemeni I fansoun meinisin o repwe pwan angang ngeni I. Pokiten ekkewe minen computer me tifi mi amwarar, sia tongeni mefi pwe meinisin kich mi fiti ei mwich non ew fansoun. Sia chu fengen usun chok kich meinisin mi nom non ew imwan fan.

Nge met mi kan auchea nap seni ach mwich fengen pwe sia chufengen non itan ewe Samon. Ewe Samon a pwon pwe ese nifinifin ika mi chomong Noun kewe chon kuno won ewe fonufan, Epwe kanengeni emon me emon kich, A apasa ngeni Anwe mwichen chon kuno mi chokukkun non 1829 pwe ia a wor ruemon are unumon ra mwichfengen ia non itan, Epwe nom rer—pwe A nom neir non ena fansoun (nengeni D&C 6:32).

Nap seni emon are ruemon, a wor ew pwin aramasen An chon kuno ra mwichfengen non ei mwichenap, me usun a pwon, ewe Samon mi nom rech. Pokiten a emon mi manau sefan non nang, Ese nom non meinisin ekkewe neni an ekkewe Souneng. Nge, me ren ewe manamanen ewe Ngun mi Fel, sia tongeni mefi pwe A nom rech ikenai.

Ia sia nom ia are nupwen sia mefi ach kanengeni ewe Chon Amanau mi anongonong won emon me emon kich. A annuku pwe:

Sipwe ekipwichi An kapas non netipach, me A ngeni ewe annuk pwe sipwe kokkori I non fansoun a kanengeni kich. —

A apasa pwe sipwe arap ngeni I me epwe arap ngeni kich. Sipwe kutta I non nukuchar me sipwe kuna I. Sipwe tingor, me sipwe angei. Sipwe fichifich, me epwe suk ngeni kich (nengeni D&C 88:62–63).

Ua sinei pwe me nein ei mwichen aramas pwe a wor ruemon mi mochen ena feioch ren unusen netiper. Repwe fakkun achocho ne arap ngeni ewe Samon non fansoun ei mwichenap. Ra makk ngeni ei—ar kewe taropwe mi war non ai we ofes non ei wiik—o ra tingor fan itan ena sokkun aninis.

Ir me ruemon ra chok minafo ne choni ewe Mwichefen o ra angei ar pwisin kapasen pwarata mi fatoch usun ewe tongen Kot ewe Sam me Noun we, Jises Kraist, ewe Chon Amanauen ewe fonufan. Ra sinei pwe ewe Soufos Joseph Smith a enukunuku ewe Mwichefen ren emwenian seni Kot me ekkewe kiien ewe pristut mi pin a niwinsefan. Emon me emon neir a angei ewe pwarata pwe ekkewe kii mi nom non ewe Mwichefen ikenai. Ra pwarata pwisin ar kewe kapasen pwarata non ar makk ngeni ei.

Nge ir me ruemon ra netipechou pwe ar kewe memmefen tong ngeni ewe Samon me An tong ngenir mi akukkunetiw. Ir me ruemon ra mochen, ren unusen netiper, pwe upwe anisir ne angei sefan ewe pwapwa me ekkewe memmefen tong ra mefi otun ra fiti ewe muun Kot. Ra awewe ngeni ei usun ar nuwokus ika pwe resap angei sefan unusen ekkana memmefin tong ngeni ewe Chon Amanau me Anwe Mwichefen, ekkewe sossot epwe osukosuka ir epwe pochokununo nap seni ar nuku.

Esap ir chok mi afanni usun ekkei, o esap minafo ar kewe sossot. Non An afanafan fetan won fonufan, ewe Chon Amanau a awora ewe kapas monomon usun ewe foun ira me ewe chon amora. Ewe foun ira mi wewe ngeni ewe kapasen Kot. Ewe chon amora mi wewe ngeni ewe Samon, Pochokunen ewe foun ira me an marita mi anongonong won ochun ewe pwun. Oua chechemeni An kapas:

“Nupwen a amora feini ekkewe foun ira non ewe maneman, ekkoch ra mworetiw won aan, iwe ekkewe mansusu ra assito or ra ani:

“Ekkoch ekkewe foun ira ra mworetiw won pwun mi terefoufou, ikewe ekis chok pwunun ie. Ekkewe foun ira ra muttir chok pukuta, pun ewe pwun mi chok chachchak:

“Nge nupwen ewe akkar a tota, ekkewe kukkun ira ra pwaseno, pokiten warer rese nom non pwun mi manun, iwe ra, iwe ra chok muttir pwaseno.

“Ekkoch ekkewe foun ira ra mworetiw nein ira fonufon, iwe ekkewe ira fonufon ra marita o ra pwonuono ekkewe ira:

“Nge ekkoch ekkewe foun ira ra mworetiw non pwun murinno, iwe ekkewe ira ra uwa: ekkoch ra uwani akka-ipuku, ekkoch wone o pwan ekkoch inik.

“Iwe, oupwe ausening ika mi wor seningemi” (Matthew 13:4–9).

Ua apasa sefan, ewe foun ira mi wewe ngeni ewe kapasen Kot. Ewe pwun mi wewe ngeni netipan ewe emon mi angei ewe foun ira.

Kich meinisin mi nonno fengen ren ekkei aramas mi makk ngeni ei o sia mochen aninis me kinamwe. Meinisin kich a wor ach foun ira, are ewe kapasen Kot, mi nom non netipach non ew fansoun a no. Ngeni ekkoch, mi nom seni nekukkunuch nupwen semach me inach ra pesei kich ach sipwe papatais o ach epinipin ngeni ewe Ngun mi Fel me ren emon a wor an mumuta. Ekkoch neich mi kaeo seni an Kot kewe chon angang. Emon me emon kich sia mefi pwe ewe foun ira mi murinno, sia mefi ewe wattenon netipach, o sia mefi tong pwe ach tong me ach weweiti a marita.

Ach nuku mi nom non sosot ren mangen ach kewe feioch, ekkewe ekkoch mi mochen ataieno ach nuku, me ren sossot pwe sipwe tipis, me ach maicha mi apwangapwangeno ach kewe foffor ne apweteteno netipach pwe sisapw tufichin mefi ewe Ngun mi Fel.

Ekkewe ir mi netipechou pokiten ar pwapwa mi feino seni ir ra feioch. Ekkoch rese tongeni kuna pwe ar nuku mi apwangapwangeno. Setan mi tipachem. A ereni ekkewe ir ra mochen repwe netipechou pwe ewe pwapwa ra mefi me nom ese pung are ennet.

Ai poruas ikenai ngeni kich meinisin epwe usun ach tufich mi auchea pwe non ekkei ran epwe feito sipwe tongeni fini ne apweteteno netipach pwe sipwe tongeni angei me tumunu ewe foun ira. Ewe foun ira mi chok wewe ngeni pwe ewe kapasen Kot, me epwe tori meinisin kich mi ausening, katon, me anneani uruon ei mwichenap. Ekkewe kon, ekkewe afanafan, me ekkewe kapasen pwarata mi ammonata me ren an Kot kewe chon angang ekkewe ir mi tingor ewe Ngun mi Fel an epwe emweni ir. Ra iotek non fansoun tam fiti ar tipetekison pokiten muttirin ei mwichenap.

Ra iotek pwe epwe wor ar manaman ne pesei kemi pwe oupwe fini mine met epwe apweteteno netipemi pwe ewe kapasen Kot epwe tufichin marita me uwa. Ika oua ausening ngeni ewe Ngun mi Fel, oupwe kuna pwe netipemi mi pweteteno, pwe ami nuku mi pochokununo, me ami tufichin tongei ewe Samon mi napano.

Finiemi ne iotek ren unusen netipemi epwe siwini ami kewe memmef non fansoun ei mwichenap pwan non ekkewe ran me maram repwe feito.

Chommong neimi oua fen poputa. Nepoputan ei mwich, ouse chok ausening ngeni ewe iotek; oua pwan kapachenong ami nuku ngeni ewe tingor pwe oupwe pwapwaiti ewe feiochun ewe Ngun mi Fel pwe epwe kawor ngeni kich. Non ami kapachenong ami kewe tingor non itan Jises Kraist, oua arap ngeni I. Iei An we mwichenap. Ewe Ngun mi Fel chok a tongeni wato rech ekkewe feioch ewe Samon a mochen fan itach. Non An tong ngeni kich, A pwon pwe sipwe mefi pwe:

“Met An kewe chon angang ra apasa fan emwenien ewe Ngun mi Fen epwe winiti usun ekkewe pukfel, epwe pwari mochenin ewe Samon, tipachem an ewe Samon, kapasen ewe Samon, epwe mongungun ewe Samon, me ewe pochokunen ewe Samon ne amanaua.

Iei pwonen ewe Samon ngeni kich.

Ina minne sipwe apinukunuk, o sisap nuokus, pun ewe Samon mi nom rech o epwe uta rech. Me sipwe pwarata pwe Jises Kraist mi wesewesen Noun ewe Kot mi manau, me a chok nonno me nom, ikenai, tori feinfeino (nengeni D&C 68: :4–6).

Iteiten fansoun emon an Kot chon angang mi uta won ewe rong, oua tongeni iotek me kapachenong ami nuku pwe pwonen ewe Samon non Doctrine and Covenants sopun 50 epwe pwonueta:

Non an poraus usun ena pwon, ewe Samon a kapas eis pwe ika emon mi kefinata me ren I me a tinau ewe emon an epwe afanafana ekkewe kapas mi ennet me ren ewe Chon Aururu Netip, non ewe napanapen ewe Ngun mi Ennet, a afanafan me ren ewe Ngunun ennet are a fos non pwan non ew napanap?

Ika a fos non pwan ew sokkun napanap an kapas ese feito ren Kot.

“A pwan kapas eis pwe ika ewe chon ausening mi angei ewe kapas ennet, a angei me ren ewe Ngun mi Fel ika me ren pwan ew napanap?

Ika a feito me ren pwan ew napanap, iwe esap meren Kot.

Ekkewe ir mi angei ewe kapas me ren ewe Ngun mi Fel a angei non ew sokkun napanap pwe mi afanafan me ren ewe Ngun mi ennet?

Ina minne, ekkewe ir mi afanafan me ekkewe ir mi ausening ra wewe fengen ir, me ir me ruemon repwe kaeo fengen o repwe pwapwa fengen (nengeni D&C 50:17–22).

Oua tongeni iotek nupwen ekkewe chon kon repwe kon. Ewe chon emweni ekkewe chon kon, ekkewe chon tiki organ, me ekkewe chon kon ra iotek o ra practice ren ew iotek non netiper fiti ar nuku pwe ekkewe kon me kapasen ekkewe kon epwe apwetetenoi ekkewe netip me apochokununo ar manaman ne awora nuku non ekkoch. Repwe kon ngeni ewe Samon usun ra pwisin uta mwen I, o repwe sinei pwe Semach won Nang a ausening ngeni ir usun a ausening ngeni pwisin ar kewe iotek. Ra kan angang non tong pwe pwonen ewe Chon Amanau ngeni Emma Smith epwe pwonueta nupwen A ereni pwe Ngunun a pwapwaiti ew konun ewe netip, pwe ewe konun ekkewe chon pung mi usun ew iotek ngeni I, o Epwe ponueni ar iotek ren ew feioch won mokurer (nengeni D&C 25:12).

Ika oua ausening fiti ami iotek fansoun ra kon, ami iotek me ar kewe iotek repwe ponueni ren ew iotek won mokuremi pwan won mokurer. Oupwe mefi ekkewe feiochun an ewe Chon Amanau tong me etiwa. Meinisin mi fori iei usun repwe mefi ar tong ngeni I epwe anapano.

Menni oua finata ne iotek nupwen emon chon afanafan a tori nesoponon an poraus. Epwe iotek non pwisin netipan ngeni ewe Sam pwe ewe Ngun mi Fel epwe ngeni i ekkewe kapas an kapasen pwarata epwe echipa ekkewe netip, me apochokunata apinukunukun me mochenin ekkewe chon ausening pwe repwe chechemeni ewe Chon Amanau fansoun meinisin me fori an kewe annuk A ngeni kich,

Ewe kapasen pwarata esap chok kapasen eniwini usun an poraus. Epwe apungano ennetin ekkewe mettoch a poraus usun me ewe Ngun mi Fel epwe tongeni uweirenong non netipan ekkewe ir mi iotek ar repwe angei aninis, are iotek fan itan kapasen emwen, are pwe repwe angei nimenimochun ewe tongen Kraist.

Ennetin kapasen pwarata epwe kawor ngeni ekkewe chon afanafan. Esap chommong ar fos, nge ar kewe kapas epwe uwei ngeni netipan ekkewe chon ausening mi tipetekison, ekkewe ir mi feito ngeni ei mwichenap o a wor ar ennetin mochen ne angei ekkewe kapasen Kot.

Ua pwisin sinei pwe ewe nuku an aramas mi murinno mi tongeni awora ekkewe kapas an ewe Ngun mi Fel non nesoponon an emon afanafan. Fan chommong, emon a apasa ngeni ei mwirin ua apasa ai kapasen pwarata, “Ifa usun ka sinei met epwe ku netipei?” Ua kaeo pwe usap chiwen mairu nupwen use tongeni chemeni ekkewe kapas ua apasa. Ua apasa ekkewe kapas an kapasen pwarata, nge ewe Samon a nom non ekkana fansoun, o a ngeniei ekkewe kapas nupwen mi namwot ai upwe apasa ir. Ewe pwon pwe ewe Samon epwe ngeni kich ekkewe kapas non ewe fansoun epwe namwot mi pwan tori ach kapasen pwarata (nengeni D&C 24:6). Ika oua ausening ngeni ekkewe kapasen pwarata non ei mwichenap—oupwe arap ngeni ewe Samon.

Oua tongeni mefi pwe ekkiseno chok upwe tori nesoponon ai afanafan me upwe osupwano ai poraus ren ai ennetin kapasen pwarata. Ami kewe iotek epwe anisi ei pwe upwe angei ekkewe kapas an ai kapasen pwarata epwe anisi emon neimi mi mochen ponuen an kapas eis.

Ua pwarata pwe Semach won Nang, ewe Elohim mi nap, a tongei o a sinei kich, emon me emon neich. Fan emwenien, Noun we, Jehovah, mi ewe Chon Fori. Ua pwarata pwe Jises seni Nazareth a uputiw ikkei me chok wesen Noun Kot we At. A echikarata ekkewe mi samau, a anennenoi ekkewe mi mesechuun, o a amanaua ekkewe mi mano. A riaffou fan itan tipisin meinisin noun Semach won Nang kewe mi uputiw won fonufan. A muti ekkewe senin mano fan itan meinisin non fansoun A manausefan seni peiasan non ewe aewin Raninfel an Easter. A manau ikenai, emon Kot—mi manausefan me ningoch.

Iei chok ewe ennetin Mwichefen, me I chok ewe foun nongonong mi Nap. Thomas S. Monson neun Soufos ngeni ewe fonufan. Ekkewe soufos me aposel oupwe ausening ngeni non ei mwichenap ra fos fan itan ewe Samon. Ir Noun chon angang, o ra mutata ne tupuni I. A emweni Noun kewe chon angang won fonufan. Ua sinei ekkei mettoch. Me ua pwarata ekkei non it mi pin an Jises Kraist, amen.