Kon Diin ang Duha ukon Tatlo Nagtililipon

Pinalangga nga kautoran, ginaabiabi ko kamo sa Ika-186 nga Tuigan kag Kabilogan nga Konperensya sang Ang Simbahan ni JesuCristo sang Mga Santos sa Ulihing Mga Adlaw. Malipayon gid ako nga kaupod kamo, kag ginaabiabi ko kamo sang mainabyanon.

Nagapasalamat ako nga kamo nagkari sa konperensya agud makabatyag sang inspirasyon halin sa langit kag mangin mas malapit sa aton Langitnon nga Amay kag sa Ginuong JesuCristo.

Nagtililipon sa sining miting, nga nagalab-ot tabok sa kalibutan, ang minilyon ka mga disipulo ni JesuCristo nga ara sa idalom sang kasugtanan nga dalayon nga magdumdom kag mag-alagad sa Iya. Paagi sa milagro sang moderno nga teknolohiya, ang pagbulagay sa tion kag malayo nga mga distansya nagakadula. Nagamiting kita subong nga kita tanan ara sa isa dakong tiliponan.

Apang mas labing importante sangsa ululupod nga pagtililipon naton amo ang kon kay sin-o ngalan naton ini ginagahimo. Ang Ginuo nagpromisa nga bisan sa dako nga kadamuon sang Iya mga disipulo sa duta karon, Siya mangin malapit sa kada isa sa aton. Siling Niya sa Iya diutay nga hubon sang mga disipulo sang 1829, “Sa pagkamatuod, ginasiling ko sa inyo, … kon diin ang duha ukon tatlo nagtililipon nga ululupod sa akon ngalan, … lantawa, Ako mangin ara sa tunga nila—amo gani nga Ako ara tunga ninyo” (D&C 6:32).

Karon kapin sa isa ukon duha, isa ka guban sang Iya mga disipulo ang nagtililipon sa sining konperensya, kag subong sa ginpromisa, ang Ginuo ara sa tunga naton. Bangud Siya nabanhaw kag mahimayaon nga tinuga, wala Siya sa lawas sa tanan nga lugar kon diin ang mga Santos nagmiting. Apang, sa gahum sang Espiritu, mabatyagan naton nga Siya ari diri kaupod naton karon nga adlaw.

Sa diin kag kon mabatyagan naton ang kalapit sang Manluluwas nagasalig sa kada isa sa aton. Naghatag Siya sining instruksyon:

“Kag liwat, matuod ginasiling ko sa inyo, mga abyan ko, ginabilin ko ining mga pulong sa inyo agud binagbinagon sa inyo mga tagipusuon, upod ining sugo nga ginhatag ko sa inyo, nga kamo magtawag sa akon samtang malapit ako—

“Magpalapit kamo sa akon kag ako magapalapit sa inyo; pangitaa ninyo ako sing maukod kag masapwan ninyo ako; magpangayo, kag magabaton kamo; magpanuktok, kag ini pagabuksan sa inyo” (D&C 88:62–63).

Nabal-an ko ang duha ka tawo nga nagapamati karon nga adlaw nga luyag sina nga bugay sa bug-os nila nga mga tagipusuon. Sila magatinguha sing maukod nga magkadto sang mas malapit sa Ginuo sa sining konperensya. Ang kada isa sa ila nagsulat sa akon—ang mga sulat nila nag-abot sa akon opisina sa magkasubong nga simana—nagapakitluoy sa amo man nga sahi sang tabang.

Sila nga duha mga nahaylo sa Simbahan kag nakabaton sang una sang maathag nga pagpamatuod sang pagpalangga sang Dios nga Amay kag sang Iya Anak, si JesuCristo, ang Manluluwas sang Kalibutan. Nabal-an nila nga ang Propetang si Joseph Smith nag-organisar sang Simbahan paagi sa direkta nga bugna halin sa Dios kag nga ang mga yabi sang balaan nga priesthood ginpanumbalik. Ang kada isa nakabatyag sang saksi nga ang mga yabi husto nga ara sa Simbahan karon nga adlaw. Sila naghatag sa akon sang ila sagradong pagpamatuod paagi sa sulat.

Apang angay sila nga nagkasubo nga inang mga balatyagon sang pagpalangga para sa Ginuo kag ang Iya pagpalangga sa ila nagakubos. Luyag nila nga duha, sa bug-os nga tagipusuon, nga buligan ko sila nga mabawi inang kasadya kag balatyagon nga ginapalangga nga naangkon nila sang sila nagkari sa ginharian sang Dios. Angay sila nga naghambal sang kulba nga kon indi nila mabawi sang lubos yadtong mga balatyagon sang pagpalangga sa Manluluwas kag sa Iya Simbahan, ang mga kabudlay kag mga pagtilaw nga ginaatubang nila basi sa ulihi maglutos sang ila pagtuo.

Wala sila nagaisahanon sa amo nga kabalaka, ukon ang ila pagtilaw bag-o. Sa pagpangalagad diri sa duta, ang Manluluwas naghatag sa aton sang paanggid sang binhi kag manugsab-og. Ang binhi amo ang pulong sang Dios. Ang manugsab-og amo ang Ginuo. Ang kaluwasan kag paglambo sang binhi nagsalig sa kondisyon sang duta. Madumdoman ninyo ang Iya mga pulong:

“Kag sang siya nagsab-og, ang pila ka mga binhi nagtupa sa kilid sang dalan, kag ang mga pispis nagkari kag gintuka ang mga ini:

“Ang pila nagtupa sa duta nga batuhon, kon diin manabaw ang duta: kag maabtik nga nagtubo ang mga ini, bangud manabaw lang ang duta:

“Kag sang ang adlaw nagbutlak, ang mga ini nainitan; kag bangud ang mga ini manabaw sing gamot, nalayong ang mga ini.

“Kag ang pila nagtupa sa hilamonan nga tunokon; kag sang nagdabong ang mga hilamon, nalumos ang mga ini:

“Apang ang iban nagtupa sa maayo nga duta, kag nagpamunga, ang pila ginatos ka pilo, ang iban saisiyenta ka pilo, kag ang pila trenta ka pilo.

“Kon sin-o ang may mga dalunggan nga makabati, tugoti sila nga makabati” (Matthew 13:4–9).

Liwat, ang binhi amo ang pulong sang Dios. Ang duta amo ang tagipusuon sang tawo nga nagabaton sang binhi.

Ang tanan sa aton may madamo nga pagkasubong sa sining maayo nga katawhan nga nagsulat sa akon nga nagapangayo sang tabang kag pagpasalig. Kita tanan may mga binhi, ukon pulong sang Dios, nga natanom sa aton mga tagipusuon sa isa ka tion. Ang pila, sa pagkabata sang ang mga ginikanan naton nagdapit sa aton nga mabunyagan kag makumpirmahan sang yadtong mga may awtoridad. Ang iban gintudloan sang mga alagad sang Dios. Ang kada isa nakabalo nga ang binhi maayo, nakabatyag gani sang paglambo sa aton mga tagipusuon, kag sang kasadya samtang ang aton mga tagipusuon kag hunahuna daw sa naglapad.

Tanan kita natilawan sa aton pagtuo paagi sa mga bilidhon nga mga bugay nga nadugayan, mabangis nga mga pagsalakay sang yadtong mga luyag maglaglag sang aton pagtuo, mga pagsulay agud makasala, kag maiyaiyahon nga mga huyog nga nagabuhin sang aton mga pagtinguha nga mapaayo kag mapahumok ang kaidadalman sang aton mga tagipusuon.

Yadtong nagkasubo sa pagkadula sang ila kalipay sang una amo ang mga bulahan. Ang pila wala makakita sang pagkalayong sang ila pagtuo sa sulod nila. Si Satanas malimbongon. Ginahambalan niya yadtong luyag niya nga mangin miserable nga ang kalipay nila sang una binatabata nga pagtonto sa kaugalingon.

Karon nga adlaw ang mensahi ko sa aton tanan amo nga may ara kita sang bilidhon nga oportunidad sa masunod nga duha ka adlaw agud magpili sa pagpahumok sang aton mga tagipusuon kag magbaton kag mag-amuma sa binhi. Ang binhi amo ang pulong sang Dios, kag ini igasab-og sa aton tanan nga nagapamati, nagalantaw, kag nagabasa sang mga kahiwatan sining konperensya. Ang musika, mga pamulong, kag ang mga pagpamatuod ginhanda sang mga alagad sang Dios nga nagpangita sing maukod para sa Balaan nga Espiritu nga maggiya sa ila sa ila paghanda. Nagpangamuyo sila sang mas malawig kag may pagpaubos samtang ang mga adlaw sang konperensya nagahilapit.

Sila nagpangamuyo agud makaangkon sang gahum sa pagpadasig sa inyo nga maghimo sang mga pagpili nga makapaayo sa duta sang inyo tagipusuon para ang maayong pulong sang Dios maglambo kag mamunga. Kon magpamati kamo sa Espiritu, matukiban ninyo ang inyo tagipusuon nga naghumok, ang inyo pagtuo ginpabakud, kag ang inyo kapasidad sa pagpalangga sa Ginuo nagdugang.

Ang pagpili ninyo nga magpangamuyo sa lubos nga tagipusuon magapabaylo sang inagihan ninyo sa mga sesyon sang konperensya kag sa mga adlaw kag binulan nga masunod.

Madamo sa inyo ang nagsugod na. Sa pagsugod sining sesyon, kamo kapin sa nagpamati sa pangamuyo; gindugang ninyo ang inyo pagtuo sa pagpangayo nga maangkon naton ang Balaan nga Espiritu. Samtang gindugang ninyo ang inyo mahipos nga pangabay sa ngalan ni JesuCristo, nangin malapit kamo sa Iya. Iya ini konperensya. Ang Balaan nga Espiritu lamang ang makahatag sang mga bugay nga luyag sang Ginuo para sa aton. Sa pagpalangga Niya sa aton, ginpromisa Niya nga kita makabatyag nga:

“Kon ano man ang igahambal nila kon sila ginpabatyag sang Balaan nga Espiritu mangin kasulatan, mangin pagbuot sang Ginuo, mangin hunahuna sang Ginuo, mangin pulong sang Ginuo, mangin tingog sang Ginuo, kag ang gahum sang Dios padulong sa kaluwasan.

“Yari karon, ini ang promisa sang Ginuo sa inyo, O mga alagad ko.

“Gani, mangin masadya, kag indi magkahadluk, kay Ako ang Ginuo kaupod ninyo, kag magatindog sa inyo luyo; kag kamo magasaksi sa Akon, nga amo si JesuCristo, nga Ako amo ang Anak sang buhi nga Dios, nga Ako ara kahapon, karon, kag sa maabot” (D&C 68:4–6).

Makapangamuyo kamo kag magdugang sang inyo pagtuo sa kada tion nga ang alagad sang Dios nagapalapit sa pulpito nga ang promisa sang Ginuo sa Doctrine and Covenants section 50 matuman:

“Matuod ginasiling ko sa inyo, siya nga gin-ordinan ko kag ginpadala agud magwali sang kamatuoran paagi sa Manugpasulhay, sa Espiritu sang kamatuoran, ginawali bala niya ini paagi sa Espiritu sang kamatuoran ukon sa iban nga paagi?

“Kag kon ini sa iban nga paagi ini indi iya sang Dios.

“Kag liwat, siya nga nagabaton sa pulong sang kamatuoran, ginabaton bala niya ini paagi sa Espiritu sang kamatuoran ukon sa iban nga paagi?

“Kon ini sa iban nga paagi ini indi iya sang Dios.

“Gani, ngaa nga indi ninyo mahangpan kag mabal-an, nga siya nga nagabaton sa pulong paagi sa Espiritu sang kamatuoran nagabaton sini samtang ini ginwali paagi sa Espiritu sang kamatuoran?

“Gani, siya nga nagawali kag siya nga nagabaton, naghangpanay sa kada isa, kag angay sila nga ginpabakud kag ululupod nga nagkinasadya” (D&C 50:17–22).

Makapangamuyo kamo samtang nagahana ang choir sa pag-amba. Ang choir director, ang mga miyembro sang choir nagpangamuyo kag naghanas nga may pangamuyo sa ila mga tagipusuon kag may pagtuo nga ang musika kag ang mga tinaga magapahumok sang mga tagipusuon kag magpadako sang ila gahum sa pagtukod sang pagtuo sang iban. Sila magaamba para sa Ginuo subong nga sila ara sa Iya atubang, kag sila makabalo nga ang aton Langitnon nga Amay nagapamati sa ila pat-ud nga subong Siya nagapamati sa ila kaugalingon nga pangamuyo. Ululupod sila nagbuhat nga may gugma agud himuon ang promisa sang Manluluwas kay Emma Smith nga mangin matuod: “Kay ang akon kalag nagakahamuot sa ambahanon sang tagipusuon; huo, ang ambahanon sang matarong isa ka pangamuyo sa akon, kag ini pagasabton sang mga bugay sa ila mga ulo” (D&C 25:12).

Kon kamo indi lamang magpamati apang magpangamuyo man samtang sila nagakanta, ang ila pangamuyo kag ang inyo mga pangamuyo pagasabton sang isa ka bugay para sa inyo kag sa ila. Mabatyagan ninyo ang bugay sang pagpalangga kag pagbaton sang Manluluwas. Ang tanan nga nagabuylog sa sinang pagdayaw magabatyag nga ang pagpalangga nila sa Iya nagalambo.

Makapili kamo nga magpangamuyo samtang ang manugpamulong daw malapit na matapos. Siya magapangamuyo sa balatyagon sa Amay nga ang Balaan nga Espiritu magahatag sa iya sang mga tinaga sang pagpamatuod nga magtib-ong sa mga tagipususon, mga paglaum, kag determinasyon sang manugpalamati sa dalayon nga pagdumdom sa Manluluwas kag magtuman sang mga sugo nga ginhatag niya sa aton.

Ang pagpamatuod indi mangin pagsulit sang mensahi. Ini mangin pagpamatuod sang pila ka kamatuoran nga mapaambit sang Espiritu sa mga tagipusuon sang yadtong nagapangayo sang tabang, para sa diosnon nga direksyon, kag sa pagbaton sang putli nga gugma ni Cristo.

Ang matuod nga saksi igahatag sa mga manugpamulong. Malip-ut ang ila mga pulong, apang ang mga ini pagadalhon sa tagipusuon sang mapainubuson nga nagapamati nga nagtambong sa konperensya nga may luyag gid sa pulong sang Dios.

Nabal-an ko paagi sa inagihan kon ano ang mahimo sang pagtuo sang maayo nga katawhan sa pagdala sang mga pulong halin sa Espiritu sa katapusan sang isa ka sermon. Kapin sa isa, may nagsiling sa akon pagkatapos sang akon saksi, “Paano mo nabal-an ang kinahanglan ko gid nga mabatian?” Natun-an ko nga di-makibot kon indi ko madumdoman ang paghambal sang mga pulong. Ginhambal ko ang pulong sang pagpamatuod, apang ang Ginuo didto, nga naghatag sang mga ini sa akon sa gilayon. Ang promisa nga ang Ginuo magahatag sa aton sang mga pulong sa amo gid nga tion pinasahing nagakadapat sa pagsaksi (lantawa D&C 24:6). Magpamati sing maayo sa mga saksi nga ginahambal sa sining konperensya—mangin mas malapit kamo sa Ginuo.

Mabatyagan ninyo nga malapit na ako magtapos kag pagatakpan ko ang mensahi nga gintinguhaan ko nga ipaabot sa inyo sa isa ka pagpamatuod sang kamatuoran. Ang mga pangamuyo ninyo magatabang sa akon nga hatagan sang mga pulong sang pagsaksi nga makabulig sa tawo nga nagapaabot sa isa ka sabat para sa iya mga problema.

Ginabilin ko sa inyo ang pat-ud ko nga saksi, ang aton Langitnon nga Amay, ang dakong si Elohim, nagapalangga kag nakakilala sa aton, kada isa. Sa idalom sang Iya direksyon, ang Iya Anak, si Jehovah, amo ang Manunuga. Nagasaksi ako nga si Jesus sang Nazareth nabun-ag nga Anak sang Dios. Ginpaayo Niya ang masakiton, naghimo sa bulag nga makakita, kag nagpabangon sang patay. Ginbayaran niya ang tanan nga kasal-anan sang kada anak sang Langitnon nga Amay nga mabun-ag sa mortalidad. Gin-utod Niya ang gapus sang kamatayon para sa tanan samtang Siya nagbangon sa lulubngan sinang Adlaw sang Pagkabanhaw. Nagakabuhi Siya karon nga adlaw, isa ka Dios—nabanhaw kag mahimayaon.

Amo lamang ini ang matuod nga Simbahan, kag Siya ang pamusod nga bato. Si Thomas S. Monson amo ang Iya propeta sa bug-os nga kalibutan. Ang mga propeta kag apostoles nga mabatian ninyo sa sining konperensya magapamulong para sa Ginuo. Mga alagad Niya sila, may awtoridad nga magbuhat para sa Iya. Nagauna Siya sa Iya mga alagad sa kalibutan. Nabal-an ko ini. Gani ako nagasaksi gid sa Iya ngalan, nga amo ang sagradong ngalan ni JesuCristo, amen.