Qhov Twg Muaj Ob los sis Peb tug Sib Sau Ua Ke

Kuv cov kwv tij thiab cov muam, kuv zoo siab tos txais nej rau lub Tuam Rooj Sab Laj thib 186 ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kuv zoo siab koom nrog nej, thiab kuv zoo siab tos txais nej.

Kuv zoo siab ua nej tau los rau lub rooj sab laj no kom txais Vajtswv tej kev tshoov siab thiab nyob ze dua peb Leej Txiv Saum Ntuj Ceeb Tsheej thiab tus Tswv Yexus Khetos.

Nyob hauv kev sib ntsib no, uas tshaj tawm mus thoob plaws lub ntiaj teb, muaj ntau plhom tus pab coj ntawm Yexus Khetos uas tau khi lus tias lawv yuav nco ntsoov Nws thiab ua hauj lwm rau Nws. Vim peb muaj txuj ci technology niaj hnub no, qhov uas peb tsis saib thaum tib lub sij hawm los yog tsis nyob hauv tib lub qhov chaw tsis ua li cas. Peb sib ntsib zoo li peb sawv daws nyob ua ke hauv tib lub qhov chaw xwb.

Tiam sis tus ua peb hwm nyob hauv kev sib ntsib no yeej tseem ceeb tshaj qhov uas peb sib sau ua ke. Tus Tswv cog lus tias txawm muaj Nws cov pab coj coob nyob hauv lub ntiaj teb niaj hnub no los, Nws yeej yuav nyob ze peb txhua tus. Nws hais rau Nws pawg pab coj thaum xyoo 1829 hais tias, qhov twg muaj ob los yog peb tug sib sau ua ke uas tuav Nws lub npe, … ces saib seb, qhov ntawd Nws yuav los nyob nrog nraim lawv—zoo tib yam li ntawd Nws twb yuav nyob nrog nraim peb (Q&K 6:32).

Peb muaj coob tshaj ib tug los sis ob tug xwb, muaj ib pawg pab coj uas sib sau ua ke nyob hauv lub rooj sab laj, thiab raws li tau cog lus, tus Tswv nyob nrog nraim peb. Vim Nws yog ib tug neeg uas sawv rov los thiab muaj yeeb koob, Nws sab cev nqaij daim tawv tsis nyob txhua qhov chaw uas Haiv Neeg Ntseeg sib sau ua ke. Tiam sis, dhau los ntawm tus Ntsuj Plig lub hwj chim, peb paub tias Nws nrog peb nyob hnub no.

Peb txoj kev txawj hnov tus Cawm Seej nyob ze peb nyob ntawm peb txhua tus. Nws qhia tej lus no hais tias:

“Thiab ntxiv, kuv hais tseeb rau nej, kuv cov phooj ywg, kuv tseg tej lus no cia rau nej xav txog nyob hauv nej lub siab, nrog lo lus txib no uas kuv muab rau nej, hais tias nej yuav tsum thov kuv thaum kuv tseem nyob ze—”

“Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav pom kuv; thov, ces nej yuav tau txais; khob, ces yuav qhib rau nej” (Q&K 88:62–63).

Kuv paub txog ob tug neeg uas mloog hnub no uas xav tau qhov koob hmoov ntawd heev. Nkawd yuav sim txav los nyob ze tus Tswv nyob hauv lub rooj sab laj no. Nkawd ob leeg tau sau ntawv rau kuv—nkawd ob tsab ntawv los txog kuv lub hoob kas thaum tib lub lim tiam—thiab nkawd thov zoo ib yam.

Nkawd ob leeg tau hloov siab los ntseeg lub Koom Txoos thiab thaum yav tas los tau txais zaj lus tim khawv txog Vajtswv Leej Txiv thiab Nws Leej Tub, Yexus Khetos, tus Cawm Seej ntawm lub ntiaj teb. Nkawd paub tias tus Yaj Saub Yauxej Xamiv txhim tsa lub Koom Txoos raws li Vajtswv tej kev tshwm sim thiab paub tias nws tau muab cov yuam sij ntawm lub pov thawj hwj txum tim qab los. Nkawd ob leeg paub tias muaj cov yuam sij nyob hauv lub Koom Txoos niaj hnub nim no. Nkawd ua tim khawv rau kuv nyob hauv nkawd tsab ntawv.

Tiam sis nkawd ob leeg nyuaj siab vim nkawd txoj kev hlub tus Tswv ploj zuj zus mus thiab tsis tshua hnov Nws txoj kev hlub lawm. Nkawd ob leeg xav kawg siab kawg ntsws, kom kuv pab nkawd rov qab muaj kev xyiv fab thiab txoj kev hlub uas nkawd muaj thaum nkawd nyuam qhuav los rau hauv Vajtswv lub nceeg vaj. Nkawd ob leeg ntshai hais tias yog nkawd tsis rov qab hnov tau nkawd txoj kev hlub tus Cawm Seej thiab Nws lub Koom Txoos, ces tej kev sim siab uas nkawd raug yuav kov yeej nkawd txoj kev ntseeg.

Tsis yog nkawd ob leeg xwb uas txhawj txog qhov no, thiab nkawd txoj kev raug sim siab yeej tsis yog ib qho tshiab. Thaum Nws ua hauj lwm qhuab qhia, tus Cawm Seej hais zaj lus piv txwv txog tus noob nplej thiab tus tseb noob. Lub noob nplej yog Vajtswv txoj lus. Tus tseb noob yog tus Tswv. Qhov uas lub noob nplej tau loj hlob zoo li cas yeej nyob ntawm cov av zoo li cas. Nej yeej nco qab Nws cov lus hais tias:

“Thaum nws tseb cov noob nplej rau hauv daim teb, muaj qee lub poob rau hauv plawv kev, ces noog txawm los khaws noj lawm.

“Muaj qee lub poob rau ntawm qhov av uas hauv muaj pob zeb tiv lawm. Cov noob ntawd tuaj sai sai, vim av tsis tob:

“Thaum tshav ntuj kub, cov kaus ntsws thiab qhuav lawm; vim tus cag ntsia av tsis tob.

“Muaj qee lub poob rau hauv lub hauv paus pos, ces tsob pos hlob tuaj laum cov nplej ntawd tuag tas lawm.

“Muaj qee lub poob rau ntawm qhov av zoo, cov ntawd txhawv taus. Qee hnab txi tau ib puas lub, qee hnab txi tau rau caum lub thiab qee hnab txi tau peb caug lub.

“Yog leej twg muaj pob ntseg cia li mloog” (Mathais 13:4–9).

Cov noob nplej yog Vajtswv txoj lus. Cov av piv txog lub siab ntawm tus neeg uas txais lub noob nplej.

Peb txhua tus yeej zoo li ob tug neeg uas sau ntawv thov kuv pab nplij nkawd lub siab. Yav tas los, peb txhua tus yeej tau muab cov noob nplej, los sis Vajtswv txoj lus, cog rau hauv peb lub siab. Rau ib txhia, lawv yog cov me nyuam thaum peb niam peb txiv caw peb ua kev cai raus dej thiab txias kev pom zoo los ntawm cov uas muaj cai. Vajtswv cov tub qhe twb qhia peb ib txhia thiab. Txhua tus tau xav tias cov noob nplej yeej zoo, ua rau peb lub siab sov so, thiab muaj kev xyiv fab thaum ua rau peb lub siab ntsws loj tuaj.

Peb txhua tus raug kev sim siab thaum peb yuav tsum tos kom txais cov koob hmoov, lwm tus tawm tsam peb xav ua rau peb txoj kev ntseeg puas tsuaj, peb raug ntxias kom ua txhaum, thiab muaj tej kev xav txog peb tus kheej uas ua nyuaj rau peb txais tau tej kev tshoov siab thiab nyuaj ua peb lub siab mos muag.

Cov uas tu siab vim lawv txoj kev xyiv fab twb ploj mus yeej yuav tau koob hmoov. Ib txhia tsis pom lawv txoj kev ntseeg ploj zuj zus. Dab Ntxwg Nyoog ntse heev. Nws qhia cov uas nws xav kom lawv nyuaj siab hais tias lawv txoj kev xyiv fab tas los yeej yog vim lawv ntxias lawv tus kheej xwb.

Hnub no kuv qhia rau peb txhua tus hais tias yuav muaj cib fim ob peb hnub tom ntej no kom xaiv muaj lub siab mos siab muag thiab txais thiab saib xyuas lub noob nplej. Lub noob nplej yog Vajtswv txoj lus, thiab yuav muab qhov no rau peb txhua tus uas mloog, saib, thiab nyeem tej yam uas peb hais hauv lub tuam rooj sab laj. Cov nkauj, cov lus, thiab zaj lus tim khawv yog tej uas Vajtswv cov tub qhe tau npaj thaum lawv rau siab thov kom txais tus Vaj Ntsuj Plig Dawb Huv coj lawv npaj zoo. Lawv twb thov ntev dua thiab txo hwj chim ntxiv thaum yuav luag txog lub sij hawm rau lub rooj sab laj no.

Lawv twb thov Vajtswv kom muaj hwj chim yaum nej xaiv qhov zoo nej thiaj yuav npaj ib qho chaw hauv nej lub siab kom txais tau Vajtswv txoj lus. Yog nej mloog tus Ntsuj Plig, nej yuav muaj lub siab mos siab muag, nej txoj kev ntseeg yuav muaj zog, thiab nej txoj kev hlub tus Tswv yuav loj tuaj.

Qhov uas nej thov Vajtswv kawg siab kawg ntsws yuav hloov lub sij hawm uas nej koom lub rooj sab laj no tau ob hnub no thiab ntau lub hlis tom qab ntawd.

Nej feem coob twb pib lawm. Thaum tuas no qhib, nej tsis tau mloog kev thov Vajtswv xwb; nej twb ntxiv nej txoj kev ntseeg rau tej lus thov kom peb yuav muaj tus Vaj Ntsuj Plig Dawb Huv los nrog nraim peb nyob. Thaum nej tau thov Vajtswv los ntawm Yexus Khetos lub npe, nej tau txav los nyob ze Nws. Nov yog Nws lub rooj sab laj. Tsuas yog tus Vaj Ntsuj Plig Dawb Huv yuav coj tau cov koob hmoov uas tus Tswv xav kom peb muaj. Vim Nws hlub peb, Nws tau cog lus rau peb tias:

Txhua yam uas lawv hais thaum tus Vaj Ntsuj Plig Dawb Huv tshoov lawv lub siab ces yuav yog vaj lug kub, yuav yog tus Tswv lub siab xav, yuav yog qhov tus Tswv xav, yuav yog tus Tswv txoj lus, yuav yog tus Tswv lub suab, thiab Vajtswv lub hwj chim rau kev cawm seej.

“Saib seb, qhov no yog tus Tswv txoj kev cog lus rau nej, auj nej cov uas yog kuv cov tub qhe.

Yog li ntawd, cia li zoo siab, thiab tsis txhob ntshai, vim kuv uas yog tus Tswv twb nyob nrog nej, thiab yuav sawv ntawm nej ib sab; thiab nej yuav ua pov thawj txog kuv, uas twb yog Yexus Khetos, hais tias kuv yog tus Vajtswv muaj sia zees nyob Leej Tub, hais tias yeej muaj kuv, hais tias tseem muaj kuv, thiab hais tias kuv tseem yuav los” (Q&K 68:4–6).

Nej thov tau thiab muaj kev ntseeg ntxiv txhua lub sij hawm Vajtswv ib tug tub qhe los hais lus saum sam thiaj no hais tias yuav muaj raws li tus Tswv cov lus cog tseg nyob hauv phau Lus Qhuab Qhia thiab Kev Khi Lus tshooj 50:

“Kuv hais tseeb rau nej tias, tus uas kuv tsa los thiab txib mus tshaj tawm txoj lus tseeb los ntawm tus Nplij Siab, los ntawm tus Ntsuj Plig ntawm kev tseeb, nws puas tshaj tawm txoj lus los ntawm tus Ntsuj Plig ntawm kev tseeb los yog lwm txoj kev?

“Thiab yog hais tias los ntawm lwm txoj kev los ces txoj kev ntawd tsis yog Vajtswv li.

“Thiab ntxiv, tus uas txais txoj lus tseeb, nws puas txais los ntawm tus Ntsuj Plig ntawm kev tseeb los yog txais los ntawm lwm txoj kev?

“Yog hais tias los ntawm lwm txoj kev los ces txoj kev ntawd tsis yog Vajtswv li.

“Yog li ntawd, vim li cas nej thiaj tsis muaj peev xwm to taub thiab paub, hais tias tus uas txais txoj lus los ntawm tus Ntsuj Plig ntawm kev tseeb ces twb yog nws txais raws li tus Ntsuj Plig ntawm kev tseeb tshaj tawm rau nws?

“Yog li ntawd, tus uas tshaj tawm thiab tus uas txais, ib leeg to taub ib leeg, thiab puav leej txais kev txhawb nqa thiab xyiv fab ua ke” (Q&K 50:17–22).

Nej thov tau ua ntej pawg hu nkauj yuav pib hu nkauj. Tus coj nkauj, cov ntaus organ, thiab cov nyob hauv pawg hu nkauj tau thov Vajtswv thiab xyaum hu nkauj thaum lawv thov Vajtswv hauv lawv lub siab thiab nrog txoj kev ntseeg tias cov nkauj thiab cov lus yuav ua rau neeg lub siab mos thiab ua rau lawv muaj hwj chim txhawb nqa lwm tus txoj kev ntseeg. Lawv yuav hu nkauj zoo li tus Tswv nyob nrog nraim lawv, thiab lawv yuav paub tias Leej Txiv Saum Ntuj Ceeb Tsheej hnov tau lawv ib yam li Nws hnov lawv tej lus thov. Nyob ua ke lawv muaj kev hlub ua hauj lwm kom muaj raws li tus Cawm Seej cog lus rau Emma Smith hais tias: “Vim kuv tus ntsuj plig zoo siab rau zaj nkauj uas tawm hauv nruab siab los; muaj tseeb tiag, zaj nkauj ntawm cov ncaj ncees yog ib txoj kev thov rau kuv, thiab tus Tswv yuav teb nrog ib qho koob hmoov los rau saum lawv taub hau” (Q&K 25:12).

Yog nej mloog thiab thov Vajtswv thaum lawv hu nkauj, tus Tswv yuav teb nej thiab lawv txoj kev thov nrog ib qho koob hmoov los rau saum nej thiab lawv lub taub hau. Nej yuav paub tus Cawm Seej txoj kev hlub thiab txoj kev pom zoo. Txhua tus uas koom siab yuav hnov tias lawv txoj kev hlub Nws yeej loj tuaj.

Tej zaum nej yuav xav thov Vajtswv thaum ib tug hais lus pib xaus nws zaj lus. Nws yeej yuav thov Leej Txiv hauv nws lub siab kom tus Vaj Ntsuj Plig Dawb Huv qhia nws txog tej lus tim khawv uas yuav txhawb nqa cov neeg uas mloog lub siab, kev cia siab, thiab kev rau siab nco ntsoov tus Cawm Seej thiab ua raws li cov lus txib uas Nws tau qhia rau peb.

Lawv zaj lus tim khawv tsis yog tej lus xwb. Yog kev pom zoo rau qhov tseeb uas tus Ntsuj Plig yuav coj mus rau cov uas thov Vajtswv pab lub siab, kom coj lawv txoj hau kev, thiab kom txais Yexus Khetos txoj kev hlub dawb paug.

Vajtswv yuav pub ib zaj lus tim khawv tseeb rau cov uas hais lus. Tej zaum lawv hais tej lus tsawg xwb, tiam sis tus Ntsuj Plig yuav coj lawv tej lus rau cov uas txo hwj chim lub siab, tus uas tau tuaj rau lub rooj sab laj vim nws xav hnov Vajtswv txoj lus.

Kuv paub los ntawm dhau los hais tias cov neeg zoo txoj kev ntseeg yuav ua li cas kom tus Ntsuj Plig coj tau neeg thaum lawv xaus lawv zaj lus hais. Muaj ntau zaus uas ib tug neeg hais lus rau kuv tom qab kuv ua tim khawv hais tias, “Ua cas koj ho paub tias kuv xav tau qhov uas koj hais ko?” Tsis ua rau kuv xav tsis thoob thaum kuv tsis nco qab hais tej lus ntawd. Kuv twb hais lus tim khawv, tiam sis tus Tswv nrog kuv nyob, qhia kuv paub hais li cas thaum tib lub sij hawm ntawd. Qhov uas tus Tswv cog lus tias nws yuav qhia rau peb paub hais li cas thaum tib lub sij hawm yeej muaj tseeb thaum hais lus tim khawv (saib Q&K 24:6). Cia li ua tib zoo mloog tej zaj lus tim khawv uas tib neeg yuav hais nyob hauv lub rooj sab laj no—nej thiaj yuav txav los nyob ze tus Tswv.

Nej yeej paub tias yuav luag txog lub sij hawm uas kuv yuav hais lub tim khawv tseeb kom xaus kuv zaj lus. Nej txoj kev thov Vajtswv yuav pab kuv txais tau lus tim khawv uas tej zaum yuav pab ib tug neeg uas xav tau lus teb rau nws tej lus nug.

Kuv ua tim khawv rau nej hais tias peb Leej Txiv Saum Ntuj Ceeb Tsheej, tus Elauhis, hlub peb thiab paub peb txhua leej txhua tus. Raws li Nws coj, Nws Leej Tub, Yehauvas, yog tus uas Tsim lub Ntiaj Teb. Kuv ua tim khawv tias Yexus los ntawm Naxales yog Vajtswv Leej Tub. Nws kho neeg mob, ua rau cov dig muag pom kev, thiab tsa cov neeg uas tuag lawm sawv hauv qhov tuag rov qab los. Nws tau them tus nqi kev txhaum ntawm Leej Txiv Saum Ntuj Ceeb Tsheej cov me nyuam txhua tus uas yug los rau hauv lub ntiaj teb no. Nws tu cov hlua ntawm kev tuag rau txhua tus thaum Nws sawv rov tawm lub ntxa los thaum thawj Hnub Easter Sunday. Nws muaj txoj sia nyob niaj hnub no, yog ib tug Vajtswv—uas sawv rov los thiab muaj yeeb koob.

Nov yog tib lub Koom Txoos tseeb, thiab Nws yog tus Tuam Ncej Tag. Thomas S. Monson yog Nws tus yaj saub rau txhua tus hauv lub ntiaj teb no. Cov yaj saub thiab cov thwj tim uas nej yuav mloog nyob hauv lub tuam rooj sab laj hais tus Tswv tej lus. Lawv yog Nws cov tub qhe, uas Nws tso cai rau lawv sawv Nws cev. Nws yeej mus ua Nws cov tub qhe tom hauv ntej. Kuv paub li no. Thiab kuv ua tim khawv li no los ntawm Nws lub npe, uas yog Yexus Khetos lub npe dawb ceev, amees.