Bwe Ijo Ruo ak Jilu Rej Kweilo̧k ilo Eta

Ro jeiū im jatū jitōn bōro, ij karuwaineneik tok kom̧ n̄an Mōttan eo Kein Karuo an 186th in Kweilo̧k eo Eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ij lan̄lōn̄ ippem̧i, im ij karuwaineneik tok kom̧.

Ko̧m̧ ar itok n̄an kweilo̧k in bwe kom̧win en̄jake jetōb jān lan̄ im n̄an en̄jake ami epaakeļo̧k Jemedwōj Ilan̄ im Irooj Jisōs Kraist.

Kweilo̧k tok in, eo ej ererakļo̧k ipeļaakin laļ in, millien rikaļoor ro an Jisōs Kraist ro rej pād kōn bujen n̄an iien otemjej keememej E im jerbal n̄an E. Jān kabwilōn̄lōn̄ in kein jerbal kein raan kein, jej en̄jake āinwōt n̄e jekar pād ilo kweilo̧k in ippān doon ilo ejja iien in wōt. Jej kweilo̧k āinwōt n̄e jej kuktok ippān doon ilo juon wall eļap.

Ak eļapļo̧k an aorōk ilo ad kuktok ippān ilo etan āinwōt ad kōm̧m̧ane āindein. Irooj ekar kallim̧ur bwe men̄e ilo oran rikaļoor ro An rellōn̄ ioon laļ in rainin, Enaaj epaake kōj kajjojo. Ekar ba n̄an kumi in rikaļoor ro An reiet ilo 1829, “Em̧ool, em̧ool, Ij ba n̄an kom̧iro, … āinwōt Iaar ba n̄an ro rikaļoora, ijo ruo ak jilu rej koba ippān doon ilo Eta, … lo, Inaaj barāinwōt pād ilubwiljier—m̧ool āinwōt Ij pād ilubwiljimiro”(K&B 6:32).

Kiiō bwine elōn̄ jān juon ak ruo, juon jarlepju in rikaļoor ro An rej kuktok ippān doon ilo kweilo̧k in, im āinwōt kar kallim̧ur, Irooj ej pād ilubwilijid. Kōnke E ej juon eo em̧ōj an jerkakpeje im eaiboojoj. Ejjab pād ilo nememein armej aolep jikin Rikwojarjar ro rej pād ie. Ak, jān kajoor in Jetōb eo, jemaron̄ en̄jake bwe Ej pād ijin ippād rainin.

Ia im n̄āāt jej en̄jake ad epaake Rilo̧mo̧o̧r eo ej pedped wōt iood. Ekar letok kōmeļeļe in:

“Im bar juon alen, em̧ool Ij ba n̄an kom̧, ro jera, Ij likūt ennaan kein ippemi n̄an koļmānļo̧kijeņ kaki ilo būruōmi, ippān kien in Ij lewōj n̄an kom̧, bwe kom̧ naaj kūr Ioō ke N̄aij epaak—

“Kom̧in kepaaktok Eō im Inaaj kepaakwaj kom̧; niknik kappukot Eō im kom̧ naaj lo Eō; kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧” (K&B 88:62–63).

Ijeļā bwe men̄e ruo armej rej ron̄jake rainin ro rekōņaan kōjeraam̧m̧an in kōn aolepān būruweer. Rej kajjieon̄ kepaakļo̧k Irooj ilo kweilo̧k in. Er kajjojo rekar jejetok—leta ko aer rekar itaaktok ilo opiij eo aō ejja wiik eo wōt—akweļap kōn ejja kain jipan̄ rot in wōt.

Er jim̧or rej rioktak ro n̄an Kabun̄ in im ej kab mōj aer bōk juon naan in kam̧ool kōn iakwe eo an Anij Jemād im Nejin, Jisōs Kraist, Rilo̧mo̧o̧r eo an laļ in. Er rejeļā bwe Rikanaan Josep Smith ekar ejaake Kabun̄ in kōn revelesōn kajju jān Anij im bwe kii ko an priesthood eo ekwojarjar emōj an jepļaaktok. Kajjojo rekar en̄jake juon kam̧ool bwe kii ko repād ilo Kabun̄ in rainin. Rej kwaļo̧k n̄an naan in kam̧ool eo aer ilo jejej.

Erro jim̧or rej en̄jake buromōj bwe iakwe eo aer n̄an Irooj im An iakwe n̄an er rekar dikļo̧k. Erro jim̧or kōņaan, kōn lukkuun būruweer, n̄an n̄a n̄an jipan̄ er bar bōk lan̄lōn̄ eo im en̄jake ko kōn iakwe in eo ekar aer ke rekar deļo̧n̄e tok aelōn̄ in kiin̄ eo an Anij. Erro jim̧or rekar kwaļo̧k aer mijak bwe eļan̄n̄e reban bar bōk likio in en̄jake in iakwe kein n̄an Rilo̧mo̧o̧r eo im Kabun̄ eo An, kapo ko im mālijjon̄ ko rej jelm̧ai renaaj kalipopoik tōmak ko aer.

Er rej jab make iaer ilo inepata in, barāinwōt ilo mālijjon̄ in aer ekāāl. Ilo iien kwaļo̧k eo An ioon laļ in, Rilo̧mo̧o̧r eo ekar letok n̄an kōj būrabōļ in ine im rikallib eo. Ine eo ekar naan eo an Anij. Rikallib eo ekar Irooj. An mour ine eo im an eddōkļo̧k ekar pedped wōt ioon jekjek eo an bwidej eo. Kwoj ke keememej naan ko An:

“Im ke ej kallib jet ine re bun̄ut ņa iturin iaļ, im bao ko rej kātem kan̄i:

“Jet re būnut ijo ko re dekāke, ijo e dik bwidej ie, im e m̧ōkaj aer eddek, bwe e pejpej bwidej:

“Im ke lukkuun raelep, e kōjeje, im rej aemedļo̧k, bwe ejjeļo̧k okraer, rej makūnļo̧k.

“Im jet re bun̄ut ilo kālōklōk ko, im kālōklōk rej eddek, im koutam̧weiki:

“Im je re bun̄ut ņa ion bwidej em̧m̧an, im jebar leir, jet jibukwi kōn juon, jet jiljinon̄oul kōn juon, jet jiln̄uul kōn juon.

“Eo ewōr lo̧jiln̄in en ron̄jake” (Matu 13:4–9).

Bar juon alen, ine eo ej naan ko an Anij. Bwidej eo ej būruwōn armej eo ej bōk ine eo.

Kōj aolep jej āinwōt juon ippān armej ro rem̧m̧an ro rekar jejetok n̄an n̄a kōn jipan̄ im kam̧ool. Kōj aolep im wōr ad ine, ak naan ko an Anij, kar kalbwin ilo būruweer ilo juon iien. N̄an jet, ekar iien eo rekar dik ke jineer im jemāer rekar kajjitōk ippāer n̄an peptaij im kapen jān ro im elōn̄ mālim ippāer. Ro jet iaad rekar ekkatak jān ro rikarejaran Anij. Kajjojo rekar en̄jake bwe ine in ekar em̧m̧an, aaet jekar en̄jake an ļapļo̧k ilo būruwōd, im kar en̄jake lan̄lōn̄ ilo an būruwōd im ļōmņak ko ad reļļapļo̧k.

Kōj aolep emōj mālijjon̄e tōmak eo ad ilo wāween karum̧wijļo̧ki kōjeram̧m̧an ko rem̧m̧an, kar jum̧ae jān ro rekar kōņaan in kakkure tōmak eo ad, kapo ko n̄an jerawiwi, im kōņaan ko ad make me rekar kadikļo̧k kijejeto ko ad n̄an ejaake im kōmeraik ļo̧k m̧wilaļ in jetōb an būruwōd.

Ro rekar būrōmōj itok jān an jako lan̄lōn̄ eo kar ippāer juon iien rekar jeraam̧m̧an kake. Jet rejjab loe tōmak eo emōjņo̧ ilo er. Setan emāletlet. Ej jiron̄ ro rekōņaan jebwābwe jān lan̄lōn̄ eo rekar en̄jake moņ eo aer make.

Rainin ennaan eo aō n̄an kōj aolep ej bwe enaaj wōr juon iien em̧m̧an im aiboojoj ilo raan kane rej itok n̄an kālet bwe būruwōd en meraļo̧k im bwe en bōk im naajdik ine eo. Ine eo ej naan ko an Anij, im enaaj lutōkļo̧k ioon aolep ro rej ron̄jake, alooje, im riiti kadiwōjļo̧k kein an kweilo̧k in. Al, kōnono ko, im naan in kam̧ool ko rekar pojak jān ro rikarejaran Anij ro rekar pukōt ilo tiljek Jetōb Kwojarjar eo n̄an tōl er ilo aer m̧aanjabpopo. Rekar jar eaitokļo̧k im ettā ļo̧k ilo an raan in kweilo̧k kein rej epaaktok.

Rekar jar bwe en wōr kajoor ippāer n̄an rōjan̄ kom̧ n̄an ami kōm̧m̧ani kālet ko me renaaj ejaake ilo būruwōm̧i juon bwidej ekōņ n̄an naan ko rem̧m̧an an Anij bwe en eddōkļo̧k im jebar leer. N̄e kwoj ron̄jake ilo Jetōb, kwonaaj lo an būruwōm̧ meraļo̧k, tōmak eo am̧ kajoorļo̧k, im am̧ maron̄ n̄an iakwe Irooj ej ļapļo̧k.

Kālet eo am̧ n̄an jar kōn unleplep in bōro enaaj ukōt en̄jake eo am̧ ilo m̧wen̄an ko an kweilo̧k in im ilo raan ko im allōn̄ ko rej itok.

Elōn̄ iami emōj aer jinoe. Ilo jinoin m̧wen̄an in, eļapļo̧k ami ron̄jake jar ko; ami kobaik tōmak eo ami n̄an kajjitōk eo me jenaaj lan̄lōn̄ kōn kōjeraam̧m̧an eo ilo an Jetōb Kwojarjar eo itok iood. Ilo ami kobaik akweļap eo ami ilo etan Jisōs Kraist, kom̧ij kepaakļo̧k E. En̄in ej kweilo̧k eo An. Jetōb Kwojarjar wōt emaron̄ bōktok kōjeraam̧m̧an ko Irooj ekōņaan litok n̄an kōj. Ilo An iakwe kōj, Ekar kallim̧ur bwe jemaron̄ en̄jake menin:

“Jabdewōt renaaj kōnono n̄e kōm̧akūtkūt er jān Jetōb Kwōjarjar enaaj jeje ekwōjarjar, enaaj ankilaan Irooj, naaj ļōmņak eo an Irooj, naaj naan eo an Irooj, naaj ainikien Irooj, im kajoor eo an Anij n̄an lo̧mo̧o̧r.

“Lo, en̄in ej kallim̧ur eo an Irooj n̄an kom̧, O kom̧ ro rikarejera.

“Kōn menin, kom̧in m̧ōņōņō, im jab mijak, bwe N̄a Irooj Ij pād ippemi, im naaj jutak ippemi; im kom̧ naaj jeje kam̧ool kōn Eō, em̧ool Jisōs Kraist, bwe N̄aij eo Nejin Anij emour, bwe N̄a iaar, bwe N̄aij, im bwe N̄a inaaj itok” (K&B 68:4–6).

Kom̧ maron̄ jar im kobaik tōmak eo ami kajjojo iien n̄e rikarejar an Anij ej kepaak kom̧ ilo lokatok eo bwe kallim̧ur eo an Irooj ilo Katak im Bujen ko jekjān 50 enaaj kūrm̧ool:

“Em̧ool Ij ba n̄an kom̧, e eo ekkapit jān Eō im kar jilkinļo̧k n̄an kwaļo̧k naan in m̧ool eo jān Rikaenōm̧m̧an, ilo Jetōb in m̧ool eo, e ej ke kwaļo̧k naan eo jān Jetōb in m̧ool eo ak bar jet iaļ?

“Im eļan̄n̄e ej jān bar jet iaļ ej jab jān Anij.

“Im bar juon alen, e eo ej bōk naan in m̧ool eo, e ej ke bōke e jān Jetōb in m̧ool ak bar jet iaļ?

“Im eļan̄n̄e ej jān bar jet iaļ ej jab jān Anij.

“Kōn menin, etke e pen bwe kom̧in jab meļeļe im jeļā, ke e eo ej bōk naan eo jān Jetōb in m̧ool ej bōke āinwōt ej kwaļo̧ke jān Jetōb in m̧ool?

“Kōn menin, eo ej kwaļo̧k naan im eo ej bōke, remeļeļe doon, im jim̧or rej ketak im lan̄lōn̄ ippān doon” (K&B 50:17–22).

Kom̧ maron̄ jar ilo an kuwaer eo al. Ritōl al eo, rikōjan̄jan̄ ro, im membōr ro uwaan kuwaer eo rekar jar im ekkatak kōn juon jar ilo būruweer im kōn tōmak bwe al ko im naan ko renaaj kōmeraikļo̧k bōro ko im kōļapļo̧k kajoor eo aer n̄an kalōk tōmak ko an ro jet. Renaaj kōjan̄jan̄ n̄an Irooj āinwōt n̄e rekar pād im̧aan Mejān, jeļā bwe Jemedwōj Ilan̄ ej ron̄jake er āinwōt em̧ool āinwōt Ej ron̄jake jar ko aer make. Ippān doon, jekar jerbal kōn iakwe n̄an kōm̧m̧an bwe kallim̧ur eo an Rilo̧mo̧o̧r eo n̄an Emma Smith en kūrm̧ool: “Bwe Aō ej lan̄lōn̄ ilo al ko an bōro; aaet, al eo an ro rejim̧we ej juon jar n̄an Eō, im enaaj uwaak kōn juon kōjeraam̧m̧an ioon bōraer” (K&B 25:12).

Eļan̄n̄e kwojjab ron̄jake ak kwoj jar ilo aer al, jar eo am̧ im jar ko aer enaaj uwaak kōn juon kōjeraam̧m̧an ioon bōram̧ barāinwōt būruweer. Kwonaaj en̄jake kōjeraam̧m̧an in iakwe eo an Irooj im kōmālim eo An. Aolep ro rej kobatok ilo nōbar in renaaj en̄jake an eddōkļo̧k iakwe eo aer n̄an E.

Komaron̄ in kālet n̄an jar āinwōt juon rikōnono eo ilo kalimjōkļo̧k epaak an jem̧ļo̧kin ennaan eo an. Eo enaaj jar ippān make n̄an Jemed bwe Jetōb Kwojarjar enaaj leļo̧k n̄an e naan in kam̧ool ko renaaj un̄ur būruwōn riron̄jake ro, im ikdeleel n̄an iien otemjej keememej Rilo̧mo̧o̧r eo im kōjparok kien ko Ekar letok n̄an kōj.

Naan in kam̧ool eo eban juon enaan eo kwoj āliji. Enaaj juon naan in kapen kōn jet iaan m̧ool ko me Jetōb eo ej būkļo̧k iburuwōn ro renaaj jar kōn jipan̄, kōn tōl eo ekwojarjar, im n̄an bōk iakwe eo erreo an Kraist.

Naan in kam̧ool eo em̧ool enaaj ilo̧k n̄an rikōnono ro. Naan ko aer remaron̄ jet wōt, ak renaaj ilo̧k n̄an ibūruwōn riron̄jake ro ettā būruweer ro rekar itok ilo aer kwōle kōn naan ko rem̧m̧an an Anij.

Ijeļā itok jān en̄jake tōmak eo an armej ro rem̧m̧an emaron̄ kōm̧m̧ane n̄an bōktok naan ko jān Jetōb eo ilo jemļo̧kin kōnono eo. Elōn̄ļo̧k jān juon, juon armej ekar ba n̄an n̄a ālkin naan in kam̧ool eo aō, “Elmen am̧ kar jeļā ke menin ikar aikuj in ron̄jake?” Ikar ekkatak bwe in jab ilbōk n̄e ijjab maron̄ keememej aō ba naan ko. Ikar kōnono naan in kam̧ool ko, ak Irooj ekar pād ijeņ, im kar letok n̄an eō ilo iien eo wōt. Kallim̧ur in me Irooj enaaj letok n̄an kōj naan ko ilo iien eo jej aikuj in kōjerbali eļaptata n̄an naan in kam̧ool ko (lale K&B 24:6). Ron̄jake naan in kam̧ool ko kar kwaļo̧k ilo kweilo̧k in—kwonaaj en̄jake am̧ epaakeļo̧k Irooj.

Komaron̄ en̄jake bwe itōbar iien eo inaaj kajem̧ļo̧k ennaan in ikar kajjieon̄ kwaļo̧k ippān juon naan in kam̧ool kōn m̧ool eo. Jar ko am̧ renaaj jipan̄ eō kwaļo̧k naan in kam̧ool ko me renaaj jipan̄ juon eo etto an pukōt juon uwaan n̄an kajjitōk ko an.

Ij likūti aō naan in kam̧ool bwe Jemedwōj Ilan̄, Elohim Ekajoor Pōtata, ej iakwe im jeļā kajjeed, kōj aolep. Ium̧win tōl eo An, Eo Nejin, Jeova, kar rikōm̧anm̧an eo. Ij kam̧ool bwe Jisōs Rinazareth eo ekar ļotak bwe e eo ej Nejin Anij. Ekar kōmour rinan̄inmej ro, kaloļo̧kjeņ ripilo, im kōjerkak ro remej. Ekar kōļļāik wōnāān aolep jerawiwi ko an aolep ajri ro nejin Jemedwōj Ilan̄ ro rekar ļo̧taktok ilo mour in. Ekar rube tomede ko an mej bwe aolep āinwōt E ekar jerkak jān lōb eo ilo Jabōt in Ijtō eo kein kajuon. Ej mour rainin, juon Anij—ekar jerkakpeje im aiboojoj.

En̄in ej Kabun̄ eo wōt em̧ool, im E ej Jabōn Dekā in Jabōn Em̧. Thomas S. Monson ej Rikanaan eo An n̄an aolepān laļ in. Kom̧ naaj ron̄jake an rikanaan ro im rijilōk ro kōnono ilo kweilo̧k rej kōnono kōn Irooj. Er rej Rikarejaran, ro remālim n̄an m̧akūtkūt n̄an E. Ej etal im̧aan Rikarejaran ilo laļ in. En̄in men eo Ijeļā. Im ij kamool ilo Etan, aaet etan ekwojarjar Jisōs Kraist, amen.