Wasa Kis me Riemen de Silimen kin Kohpene ie

Riei ko, I kasamwo kumwail ong ni Kapokon Lap en 186 en Mwomwohdiso en Sises Krais en Souleng en Imwin Rahn-akan. I pereniki ei kak patehng kumwail, oh I kasamwo kumwail ni mehlel.

Kumwail patodohr ni kapokon lap wet pwehn alehda kamarain sang nanleng oh ahniki pepehm en karanih Samatail Koht Nanleng oh atail Kaun Sises Krais.

Me pokonpenehr nan tiepene wet, me lelehngehr wasa koaros nin sampah, iei irail tounpadahk rar en Sises Krais me wiadahr inou sarawi en tamataman Ih ansou koaros oh papah Ih. Sang ni kopwuriamwei en misihn kan, atail dohpeseng oh kulok sohrala. Kitail tuhpene rasehng me kitail koaros patohpene ni wasahtehkis.

Ahpw me kesempwal sang atail pokonpene iei mwaren Ih me kitail pokonkihpene. Mendahte sapwellime tounpadahk ngedehrie pohn sampah rahnwet Kauno ketin inoukihong kitail me E pahn karanih emenemen kitail. Ong Sapwellime kisin pwihn en tounpadahk nan pahr 1829, E ketin mahsanih, “Mehlel, mehlel, I ndahiong kumwail, … wasa kis me riemen de silimen kohpene ie ni edei, … nahn, I pahn mih nanpwungarail—iei duwen me I mih nanpwungamwail” (D&C 6:32).

Ni atail solahr wad emen de riemen, ahpw kitail lelehr pokon ehu en Sapwellime tounpadahk kei me kohpene nan kapokon lap wet, oh nin duwen inouo, Kauno ketiket nanpwungatail. Pwehki Ih me ketin iasadahr, paliwere sohte kak ketiket wasa koaros me Souleng kan kohpene ie. Ahpw, sang ni manaman en Ngehn en Koht, kitail kak pehm me E ketiket rehtail rahnwet.

Iahd oh iawasa me kitail kak pehm karanih Sounkomouro me nsenatail. E ketin mahsanih:

“I pil pahn kapwurehiong, mehlel I ndahiong kumwail, kempoakepai kan, I kihong kumwail kaweid wet pwe kumwail en medemedewe nan mohngiongamwail kan, kosonned wet me I kihong kumwail, me kumwail pahn lukweri ie ni ahnsou me I karanih kumwail—

Kumwail kohdo rehi oh I ahpw pahn keieng mpwomwail; ngoangki rapahkin ie, oh kumwail ahpw pahn diar ie; peki oh kumwail ahpw pahn ale; letelet, oh e pahn ritadahng kumwail” (D&C 88:62–63).

I ese duwen aramas riemen me wie rongorong rahnwet, me men alle kapahi wet sang ara mohngiong unsek. Ira pahn nantieng en karanih Kauno nan kapokon lap wet. Ira koaros ntingdo rehi—neira kisin likou kan leledo nan ahi ohpis nan wihkohte—ira koaros pekipeki soangen sawas ehu te.

Ira koaros pepdaisla nanMwomwohdiso wet oh alehdier kadehde duwen limpoak en Koht Sahm oh Sapwellime Iehros, Sises Krais, Sounkomourpen sampah. Ira esehier me Soukohp Joseph Smith koasoanehdi Mwomwohdiso wet sang ni kaudiahl en Koht oh kih kan en priesthood kopwurpwurdohr. Emenemen ira pehmehr me kih kan miehier nan Mwomwohdiso wet rahnwet. Ihme ira kadehdehki nan neira kisinlikou ko.

Ahpw ira koaros mwuhr nsensuwedki me pepehm en limpoak ong Kauno oh Sapwellime limpoak ong ira wie tikitikala. Ira koaros mwahuki, sang nan mohngiongara unsek, I en sewesei ira en pwurehng ahneki popohl oh pepehm en limpoak me ira ahneki ahnsou me ira iangala Mwomwohdiso wet. Ira koaros masak ma re sohte pahn kapwurehdo pepehm en limpoak ong Sounkomouro oh Sapwellime Mwomwohdiso, me kasongosong kan me ira pahn sohpai ih pahn kalowehdi ara pwoson.

Kaidehn ira kelehpw me ahneki iren pwunod wet, songoasong wet sohte kapw. Nan Sapwellime mwehi, Sounkomouro kihong kitail karasaras en werentuhke oh soun kamwarak. Weren tuhkehu me mahsen en Koht. Mourlahn werentuhkeh ko oh keirdahn tuhkehko, pwehlo me wiewia. Kumwail tamataman Sapwellime mahsen ko:

“A ni eh kamwkamwar, ekei werentuhke ko pwupwidiong pohn kisin ahl akan en nan mwahto, oh menpihr kei ahpw pihrdo kangala.

“A ekei mwerediong pohn wasa takai kan, wasa me sohte nohn mie pwehl ie. Re wosada mwadang, pwehki pwehlo sohte loal.

“A ni ketipin eh kin dakerada kisin werentuhke ko me apwtehn wos, re ahpw mwoatoredi oh mengila, pwehki kalewerail sohte lel wasa loal.

“Ekei pwupwudiong nanpwungen tuhke tekatek; oh re ahpw osada oh kemehla kisin tuhke ko:

“Apw ekei mwerediong nan wasa pwehl mwahu, oh wosada oh mie wah ekei wah kan meh epwiki, ekei meh weneisek, ekei meh silihsek.”

“Mehmen me mie salenge pwe en kak rong, mweidehng en rong” (Madiu 13:4–9).

I pahn pil kapwurehiong me werentuhke me iei mahsen en Koht. Pwehlo iei mohngiong en aramaso me alehda mahsen en Koht o.

Kitail koaros duwehte aramas kaselel riemenet me ntingdo rehi, pekipeki sawas oh koaloalomwahu. Kitail koaros ahnekier weren tuhke pwukat, de mahsen en Koht, poadidi nan mohngiongatail. Ohng ekei, e wiawi ni arail seri oh arail nohno pahpa lukei irail en papidaisla oh kasarawiala sang rehn emen me kolokol manaman. A ekei kitail padahngki sang rehn sounpapah en Koht. Emenemen pehm me weren tuhkeo e mwahu, oh me e tepier wos nan mohngiong atail, oh kehn peren ni atail maramarainla.

Kitail koaros lelehngehr songpen atail pwoson sang ni kapai kan ah kin keremwpwahla, wiewia sued akan en irail akan me kin men kawehla atail pwoson, kasongosong en wia dihp, oh liaktohrohr me kin katikala atail ineng en koadoahke palingenatail.

Irail akan me nsensuwedki arail solahr ahniki peren duwehte mwowe me meid pai. Ekei sohte kasawiada tikitiklahn pwoson loalerail. Sedan kin loalokong. E kin ndahiong irail akan me e mwahuki en lokolok, me popohl me irail ahnekier mwoweo likamw tohr.

Rahn wet ei iren kaweid ong kitail me erein rahn kei kitail ahneki ahnsou mwahu en pilada en mweidohng mohngiongatail kan en ritpeseng oh alehdi oh apwaliada weren tuhkeo. Ih me mahsen en Koht, oh e pahn wudekdiong koaros me men rong, kilang oh wadek kemwekid en kapokon lap wet. Koul kan, padahng kan, oh kadehdeh kan me sounpapah en Koht kan kaunopadahr oh ngoangki ale kaweid en Ngehn Sarawi. Arail kapakap kan wie reireila oh irail karakarahkala ni atail ansouhn kapokon lap kerendohr.

Irail kapakapki manaman en kakehlailih kumwail en wiahda pilipil mwahu me pahn kahrehiong nan amwail monhgiong kan en pwelimwauhla pwe mahsen en Koht en kak wosada oh wa. Ma kumwail pahn rongorong ki Ngehno, mohngiongamwail kan pahn mwuterekala, amwail pwoson pahn kehlailda, oh ahmw pahn poakohng Kauno pahn laudla.

Amwail pilipil en kapakapki mohngiong mehlel pahn wekidala dahme pahn wiawiong kumwail erein kapokon lap wet oh ni rahn oh sounpwong kan kokohdo.

Tohto kumwail me tepier. Ni tepin tiepene wet, kumwail sohte rongorong te kapakapo; kumwail kapatahiong amwail pwoson ni pekpeko pwe kitail en paikihla kapai en Ngehn Sarawi en ieiang kitail. Ni amwail kin kapatahiong amwail pekpek ni mwaren Sises Krais, kumwail pahn karanihla Kauno. Iei Sapwellime kapokon met. Ngehn Sarawi te me kak wahdo kapahi kan me Kauno kupwurkihong kitail. Pwehki sapwellime limpoak ong kitail, E ketin inou kiong kitail me kitail kak kehn:

“Dahme irail pahn koasoia pahn kamwekid Ngehn Sarawien wiahla audepen pwuhk sarawi, wiahla kupwur en Kauno, pahn wiahla mahsen en Kauno, pahn wiahla kapitien Kauno, oh wiahla manaman en Koht ohng ni komouralahn aramas.

“Kilang, ih met me Kauno inoukihong kumwail, nei ladu kan.

“Eri, ken perenda, oh dehr masak, pwe Ngehi Kauno pahn ieiang uhk, oh pahn uh limwahmw; oh kumwail pahn kadehdehkin ie, iei Sises Krais, me Ngehi me Iehros en Koht ieias, me Ngehi ohte, me ie Ngehi me,, oh me I pahn kohdo” (D&C 68:4–6).

Ahnsou koaros me emen sounpapah en Koht pahn kesihnenda kapahrek kumwail kak kapatahiong amwail pwoson oh kapakapki me inou en Kauno nan Doctrine oh Coventants irelaud 50 pahn pweida:

Mehlel I ndahiong kumwail, mehmen me I kasarawialahr oh pekederlahr pwehn kalohki mahsen mehlel sang ni Sounsawaso, ni Ngehn mehlelo, e kin kalohngki ni Ngehn en mehlelo de ehu wiepe tohrohr?

“Oh ma e sang ni ehu soangen wiepe tohrohr e sohte pwilisang rehn Koht.

“Oh, ih me kin alehdi mahsen mehlelo, e kin alehdi sang ni Ngehn mehlelo de ni ehu wiepe tohrohr?

“Ma ehu wiepe tohrohr e sohte pwilisang rehn Koht.

“Eri, dahme karehda me ke sohte kak wehwehki oh ese, me mehmen me alehdi mahseno sang ni Ngehn mehlelo kin alehdi nin duwen eh kin kalohki sang Ngehn mehlelo?

“Eri, ih me kalohki mahseno oh ih me alehdi, kin wehwehpene, oh koaros kin marainkihla oh perenpene” (D&C 50:17–22).

Ke kak kapakap ansou me choir-o pahn tepda koul. Kaun en pwihn e koul, sounkeseng kan oh tohn pwihn en koulo koaros kapakapkier oh kaunopadahr kapakap nan mohngiongarail kan oh pwoson me arail koul kan pahn saihr mohngiong kan oh kalaudehla arail manaman en kakehlakahda pwoson en metei kan. Irail kin koulieng Kauno duwehte me irail kokoul mwohn Silangih, ni arail esehier me Samatail Koht karonge irail duwehte ah kin karonge arail kapakap. Irail doadoahkpene ni limpoak pwehn kapwaiada inou en Kauno ohng Emma Smith: “Pwe ngehniet kin pereniki koul sang nan omw mohngiong; iei, koul en me pwung me duwehte kapakap ong ie, oh e pahn pasapengkihla kapahi ehu me pahn tih pohrail” (D&C 25:12).

Ma kumwail sohte pahn rongete apw pil kapakapki ni arail wie kokoul, amwail kapakap oh arail kapakap pahn pasepengkihla ehu kapai ohng kumwail oh irail. Kumwail ahpw pahn pehm kapahi en Sapwellimen Sounkomouro limpoak oh kupwurperen. Koaros me pahn patehng kaping pahn pehmada arail limpoak ohng Ih pahn laudla.

Ele mweihn ke pahn pilada en kapakap ni ansou me emen soun kapahrek pahn kairala eh padahk. Sounkapahreko pahn wia kapakap loale peki rehn Sahmo me Ngehn Sarawio pahn sewesehki eh kadehdeh pwehn kak kakehlaka mohngiong, koapwoaroapwoar, oh ngoang en irail me rongorong kan en tamataman Sounkomouro ansou koaros oh kapwaiada kosonned kan me E ketkihda.

Kadehde-o pahn weksang oaroalap en eh padahko. E pahn pid mehlel ehu me Ngehno kak kihlongala nan mohngiong en irail ako me kapakapki sawas, kaweid sarawi, oh pekpek en alehdi limpoak mehlel en Krais.

Kadehde mehlel pahn kohieng sounkapahreng kan. Arail mahsen kan pahn malaulau, ahpw mahseno pahn kohlongala nan mohngiongarail kan me karakarahk me kodohr ni kapokon lap wet ni arail ahneki ineng laud en alehdi mahsen en Koht.

I peihn ese dahme pwoson en aramas mwahu kei kak wia pwehn kahrehdo mahsen en Ngehno ni kairalahn padahk. Pak tohto, mwurin ai kadehde mie aramas me kin kohdo ndahiong ie, “Dahme ke esehki dahme I anahne rong? I solahr kin pwuriamweiki ei sohte kak tamantaman dahme I ndahu. I lokaiahki mahsen en kadehde, ahpw Kauno ketkihong ie dahme I pahn nda ahnsowohte. Inouwo sang rehn Kauno me E pahn ketkihong kitail lepin mahsen kan ni ahnsowohte me kitail anahne kin mehlel ahnsoun kadehde (tehk D&C 24:6). Rong mwahu kadehdeh kan en kapokon lap wet—kumwail pahn pehm me kumwail karanih Kauno.

Kumwail kakehr kehn me I pahn kaimwisehngkihla padahk wet ahi kadehde. Amwail kapakap kan pahn sewesekiniehda audepen kadehde ehu me kak sewese emen aramas me ngidingidki pasapengpen eh kalelepeng kan.

I kihong kumwail ai kadehde mehlel me Samatail Koht, Elohim Lapalap, poakoahng oh mwahngih kitail koaros. Pahn Kupwure, Sapwellime Iehros, Siohwa, me Soun kapikipik. I kadehdehiong kumwail me Sises mehn Nasared, ipwidi Iehros en Koht. E kamwahuiala me soumwahu, kamwahuiala me maskun en kak kilang wasa, kamourada me melahr akan. E pwainlahr dipen emenemen Sapwellimen Samatail Koht serikan me ipwidi sampah. E kamweidpeseng selin mehla ohng koaros ni ah ketin iasada keieun Rahn Sarawi en Ihster-o. E ketin ieias, Ih me Koht—me iasadahr oh lingaling.

Mwomwohdiso wet te me mehlel, oh Ih me takain pwukakeimw. Thomas S. Monson me Sapwellime soukohp pohn sampah. Soukohp akan oh wahnpoaron kan me kumwail pahn rongasang nan kapokon lap wet, pahn kapahrengki mahsen en Kauno. Irail me Sapwellime soun papah kei, me ahneki mweimwei en wiliandi Kauno. Ih me kin ketla mwohn Sapwellime sounpapah kan nin sampah. Ih meh kat me I ese. Oh I kadehde ni lengileng sarawi, iei Sises Krais, ahmen.