“Huia we I Akseptem Olgeta, I Akseptem Mi”
Tedei, ol pikinini oli stap long ol defren kaen mo had famli situesen. Yumi nid blong go aot blong helpem olgeta we oli filim se oli stap olgetawan, oli stap biaen, mo stap aotsaed long fanis.
God i lavem ol pikinini. Hem i lavem evri pikinini. Sevya i talem: “!Yufala i no blokem ol pikinini ia! !Yufala i letem olgeta oli kam long mi, from [oli] gat raet wetem ol man we God i King long olgeta.”1
Tedei, ol pikinini oli stap long ol defren kaen mo had famli situesen.
Eksampol. Tedei, i gat dabol namba blong ol pikinini long Amerika we oli stap wetem papa o mama nomo bitim we i bin gat 50 yia i pas.2 Mo i gat plante famli we oli no joenem lav blong olgeta long God mo oli no wantem obei ol komanmen blong Hem.
Long ples we tingting i fasfas moa, gospel we i kambak bae i gohed blong tekem standet, tingting mo fasin blong Lod.
“Ol pikinini oli gat raet blong oli bon insaed long mared laef blong papa mo mama. Oli gat raet tu blong groap long han blong papa mo mama we tufala i agri mo folem ol promes we tufala i bin mekem long mared blong tufala wetem fasin blong stap fetful long tufala oltaem.
“Hasban mo waef, tufala i gat wan strong mo tabu wok blong lavem mo lukaotem gud wanwan long tufala mo ol pikinini blong tufala. … Ol papa mo mama oli gat wan tabu wok blong lukaotem gud pikinini blong olgeta wetem lav mo fasin blong stap stret oltaem, mo blong givim long olgeta ol samting we oli nidim long saed blong spirit mo long saed blong bodi, blong tijim olgeta blong lavem mo givim seves long wanwan long olgeta, blong folem ol komanmen blong God.”3
Yumi luksave se plante gudfala papa mo mama raon long wol blong defren bilif, oli lavem mo kea long ol pikinini blong olgeta. Mo wetem glad mifala i luksave ol famli insaed long Jos blong Jisas Kraes blong Ol Lata-dei Sent we oli stap anda long kea blong wan papa mo mama we oli tanem tufala long Sevya, we oli sil tru long atoriti blong prishud, mo oli stap lanem famli blong olgeta blong lavem mo trastem Papa long Heven mo Pikinini blong Hem, Jisas Kraes.
Wan Singaot From Ol Yut
Be singaot blong mi tedei, i from ol handred blong ol taosen pikinini, yut, mo yang adalt we oli no kamaot long “pikja blong stret famli,” mi talem olsem from i no gat wan nara stret wei blong talem. Mi toktok, i no abaot ol yut ia nomo we oli save wanem ia, ded, divos mo fet blong papa mo mama we i no strong, be tu, mi stap tokbaot ol ten blong ol taosen blong ol yang man mo yang woman we oli blong ol ples raon long wol we oli akseptem gospel be oli no gat mama, papa blong kam long Jos wetem olgeta.4
Olgeta yangfala Lata-dei Sent ia oli kam long Jos wetem bigfala fet. Oli hop blong krietem stret famli ia long laef blong olgetawan long wan fiuja taem.5 Long stret taem, oli kam wan impoten pat blong misinari ami blong yumi, pat blong ol stret mo gud yang adalt blong yumi, mo pat blong olgeta we oli nildaon long wan olta blong statem famli blong olgetawan.
Gat Hat mo Tingting
Bae yumi gohed blong tijim paten blong Lod long saed blong famli, be naoia, wetem ol milian memba, mo ol defren situesen we yumi gat wetem ol pikinini blong jos, yumi nid blong gat moa tingting mo gat moa hat. Kalja blong Jos mo fasin blong toktok blong yumi i spesel samtaem. Ol Praemeri pikinini bae oli no stop blong singsing “ Famli I Save Stap Tugeta Foreva”6 be taem oli singsing “Mi glad tumas taem papa i kambak hom,”7 o “wetem papa mo mama i soem rod,”8 i no evri pikinini we bae oli save singsing abaot famli blong olgeta.
Fren blong mifala, Beti, i serem wan eksperiens we hem i bin gat long Jos taem hem i gat 10 yia. Hem i talem se: “Tija blong mifala i stap tijim wan lesen long saed blong tempol mared. Hem i askem mi stret: ‘Beti, ?Papa mo mama blong yu oli no mared long tempol yet?’ Tija blong mi mo olgeta narawan long klas oli save ansa finis.” Lesen blong tija i gohed mo Beti i stap tingting long samting we i nogud evriwan. Beti i talem: “Plante naet mi krae. Taem mi gat hat problem tu yia afta mo mi ting se bae mi ded, mi sek bigwan from mi tingting se bae mi stap miwan blong oltaem.”
Fren blong mi, Lif, i stap go long Jos hemwan. Wan taem, long Praemeri, oli askem hem blong givim wan sot toktok. Hem i no gat mama o papa long Jos blong stanap long saed blong hem mo helpem hem sapos hem i fogetem wanem blong talem. Lif i fraet bigwan. Hem i no wantem sem nao, hem i stap longwe long Jos blong plante manis.
“Nao Jisas i singaot wan pikinini i kam long hem, mo i putum hem i stanap long medel blong olgeta …
“Mo [talem se:] Sapos yufala i no jenisim fasin blong yufala blong kam olsem pikinini, bambae yufala i no save kam samtaem we God i King blong yufala.”9
Ol Hat we Oli Biliv mo Ol Presen long Saed blong Spirit
Ol pikinini mo yut ia oli gat blesing blong gat hat we i biliv mo ol presen long saed blong spirit. Lif i talem long mi: “Mi bin save dip insaed long maen blong mi se God i Papa blong mi, mo Hem i save mi, mo Hem i lavem mi.”
Fren blong mifala, Veronik, i talem se: “Taem mi stap lanem ol prinsipol blong gospel mo stap stadi long Buk blong Momon, i olsem se mi stap tingbaot ol samting we mi bin save finis, be mi bin fogetem.”
Fen blong mitufala, Suleka, blong Alegraji, Brasil. Nomata famli blong hem i no stap go long Jos, taem hem i gat 12 yia, Suleka i stat blong ridim Baebol mo visitim ol lokol jos, i lukaotem blong save moa abaot God. Papa mo mama, tufala i no glad, be tufala i letem ol misinari oli tijim Suleka, nao Suleka i kasem wan testemoni, mo i kasem baptaes. Suleka i talem: “Long taem blong lesen, oli soem wan pikja blong Sol Lek Tempol mo oli tokbaot ol siling odinens. Stat long tetaem ia, mi wantem blong wan dei, mi mas go insaed long haos blong Lod mo gat wan famli we i no save finis.”
Nomata situesen blong wan pikinini long wol ia i no stret tumas, DNA blong spirit blong wan pikinini i stret evriwan, from se tru aedentiti blong wanwan i we, hem i wan boe o gel blong God.
Presiden Tomas S. Monson i talem: “Helpem ol pikinini blong God blong andastanem wanem i tru mo impoten long laef ia. Helpem olgeta blong developem paoa blong jusum ol rod we bae oli stap sef long olgeta blong go kasem laef we i no save finis.”10 Bae yumi openem han mo hat blong yumi i bigwan moa. Ol yut ia oli nidim taem mo testemoni blong yumi.
Brandon, we i joenem Jos long Kolorado long hae skul, i toktok long mi abaot olgeta we oli go helpem hem bifo mo afta long baptaes blong hem. Hem i talem: “Mi bin stap long hom blong ol famli we oli stap laef folem gospel ia. Hemia i soem mi wan standet we mi filim se mi save gat long famli blong mi.”
Veronik, we i bon long Nedelan, i go long skul wetem gel blong mitufala, Kristen, taem mifala i stap long Jemani. Veronik i talem: “Ol studen we oli memba blong Jos oli gat wan laet long olgeta. Mi kam blong luksave se, laet ia, i kam from fet blong olgeta long Jisas Kraes mo fasin blong laef folem ol tijing blong Hem.”
Fren blong mi, Maks, i baptaes taem i gat eit yia. Papa blong hem i no memba blong eni jos, mo Maks i save go, o no go long Jos.
Taem hem i yangfala, afta we hem i nomo go long jos blong plante manis, Maks i filim se hem i nid blong gobak long Jos mo jusum wan Sandei moning blong gobak. Be strong tingting blong hem i kam slak taem hem i stap kam kolosap long doa blong Jos; kat blong hem i fas from i fraet.
Long doa, man we i stanap long doa, hem i niufala bisop. Maks i no save hem, mo hem i filim se bisop tu i no save hem. Taem Maks i kam kolosap, fes blong bisop i saen wantaem, mo hem i stretem han blong hem blong sekhan mo talem: “Maks, !i gud tumas blong luk yu!”
Maks i talem: “Taem hem i talem ol toktok ia, wan wom filing i kavremap mi, mo mi save we mi bin mekem stret samting.”11
Blong save nem blong wan i save mekem samting i defren.
“Mo i bin hapen se [Jisas] i bin givim oda se oli mas karem ol smol pikinini blong olgeta oli kam.
“Mo hem i tekem [ olgeta] wan afta narawan, mo i blesem olgeta, mo i prea long Papa from olgeta.
“Mo afta we hem i bin mekem samting ia, hem i krae bakegen”12
Yut we I No Baptaes Yet
Folem wanem papa mo mama i askem, plante yut we oli lavem gospel oli wet plante yia bifo oli kasem baptaes.
Papa mo mama blong Emili, tufala i divos taem hem i smol, o hem i no kasem raet blong kasem baptaes taem hem i kasem 15 yia nomo. Fren blong mifala, Emili i tokbaot wetem glad abaot wan Yang Woman lida we “oltaem i stap helpem hem mo mekem testemoni blong hem i kam strong moa.”13
Kolten mo Preston, tufala i tu yangfala we tufala i stap long Yuta. Papa mo mama i divos, mo tufala i no kasem raet blong kasem baptaes. Nomata tufala i no save pasem sakramen, tufala i tekem bred i kam evri wik. Mo nomata tufala i no save go insaed long tempol blong mekem ol baptaes wetem ol yut, taem wod blong olgeta i go long tempol, tufala brata i faenem ol nem blong famli blong tufala long famli histri senta we i stap narasaed long tempol. Bigfala paoa blong helpem ol yut blong yumi blong filim se oli pat blong yumi, hem i blong gat ol nara yut we oli stret mo gud.
Elda Josef Senguba
Mi endem toktok blong mi wetem eksampol blong wan niu fren, wan we mi jes mitim sam wik i pas taem mi stap visitim Sambia Lusaka Misin.
Elda Josef Senguba i blong Yuganda. Papa blong hem i ded taem hem i gat seven yia. Taem i kasem naen yia, mama mo sam famli oli no save lukaot long hem, nao hem i stap hemwan. Taem hem i kasem 12 yia, hem i mitim ol misinari mo kasem baptaes.
Josef i tokbaot fas dei blong hem long Jos. “Afta long sakramen miting, mi ting se i taem blong gohom, be ol misinari oli presentem Josua Walusimbi. Josua i talem long mi se bae hem i fren blong mi, mo i givim Hymbuk blong ol Pikinini blong mi gat samting blong holem blong go long Praemeri. Long Praemeri, Josua i putum wan moa jea long saed jea blong hem. Praemeri presiden i invaetem mi long fored blong askem ful Praemeri blong singsing long mi, ‘Mi Pikinini blong God.’ Mi filim spesel tumas.”
Branj presiden i tekem Josef i go long Pier Mungosa famli, mo hemia i kam hom blong hem blong ol fo yia we oli kam afta.
Eit yia afta, taem Elda Josef Senguba i statem misin blong hem, long sapraes blong hem, trena blong hem i Elda Josua Walusimbi, boe ia we i mekem hem i harem gud long fas dei blong Praemeri. Mo ?misin presiden blong hem? Hem i Presiden Lif Erikson, smol boe ia we i ronwe long Praemeri from se hem i fraet tumas blong givim toktok. God i lavem ol pikinini blong Hem.
Ol Pikinini Oli Ron I Kam
Taem waef blong mi, Keti mo mi i bin stap long Afrika sam wik i pas, mifala i visitim Muji- Mayi, Demokratik Ripablik blong Kongo. From se japel i no bigwan naf blong 2000 memba, mifala i mit aotsaed andanit long ol bigfala plastik we bambu i holem. Taem miting i stat, mifala i save luk plante pikinini oli stap lukluk mifala, oli hang long ol aean fanis aotsaed we i raonem propeti. Keti i toktok kwaet: “Nil, ?yu no ting se yu wantem invaetem ol pikinini ia blong kam insaed? Mi go kolosap long Distrik Presiden Kalonji long pulpit mo askem hem sapos hem i save welkamem ol pikinini aotsaed long fanis blong kam joenem mifala insaed.
Mi sapraes. Taem Presiden Kalonji i mekem invitesen, ol pikinini oli kam, be oli ron i kam—olgeta ova 50, ating 100 olsem—sam wetem klos we i brokbrok mo draeleg, be wetem ol naesfala smael mo fes we i saen.
Eksperiens ia i tajem mi mo mi luk olsem wan saen se yumi nidim blong go aot blong helpem ol yut we oli filim se oli stap olgetawan, oli stap biaen i stap, mo stap aotsaed long fanis. Bae yumi mas tingting long olgeta, welkamem olgeta, akseptem olgeta, mo mekem evri samting yumi save mekem blong mekem lav ia we oli gat long Sevya i kam strong moa. Jisas i talem se huia bae i akseptem wan pikinini long nem blong Hem, i stap akseptem Hem.14 Long nem blong Jisas Kraes, amen.