2010–2019
“Bisan Kinsa nga Magadawat Kanila, Magadawat Kanako”
Abril 2016


“Bisan Kinsa nga Magadawat Kanila, Magadawat Kanako”

Ang mga bata karon anaa nagkalain-lain ug komplikado nga mga kahimtang sa pamilya. Kinahanglan kitang motabang sa mga batan-on nga mibati nga nag-inusara, napasagdan, o wala mahisakop.

Gihigugma sa Dios ang mga bata. Gihigugma Niya ang tanang mga bata. Miingon ang Manluluwas, “Paduola kanako ang gagmayng kabataan … kay ang gingharian sa langit ila sa mga sama kanila.”1

Ang mga bata karon anaa sa nagkalain-lain ug komplikado nga mga kahimtang sa pamilya.

Sama pananglit, karon, kaduhaon ang mga bata sa Estados Unidos nga nagpuyo uban sa usa lang ka ginikanan kay sa 50 ka tuig ang milabay.2 Ug daghang mga pamilya karon ang wala kaayo magkahiusa sa ilang gugma sa Dios ug kaandam sa pagsunod sa Iyang mga sugo.

Niining nagkadako nga espirituhanong kalibug, ang gipahiuli nga ebanghelyo magpadayon sa paghatag sa sukaranan, sa ideyal, sa sumbanan sa Ginoo.

“Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtahud sa mga panaad sa kaminyoon uban sa hingpit nga pagkamaunungon. …

“Ang bana ug asawa adunay ligdong nga kapangakohan sa paghigugma ug pag-amuma sa usag usa ug alang sa ilang mga anak. … Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung, sa pagsangkap alang sa ilang pisikal ug espirituhanon nga mga panginahanglan, ug sa pagtudlo kanila sa paghigugma ug pag-alagad sa usag usa [ug] pagsunod sa mga sugo sa Dios.”3

Atong giila ang daghang maayo nga mga ginikanan sa tibuok kalibutan, sa tanang tinuohan, nga mahigugmaong nag-atiman sa ilang mga anak. Ug mapasalamaton natong giila ang mga pamilya sa Ang Simbahan ni Jesukristo sa mga Santos sa Ulahing mga Adlaw kinsa giatiman sa usa ka amahan ug inahan nga nakabig ngadto sa Manluluwas, nga na-sealed pinaagi sa awtoridad sa priesthood, ug nagkat-on diha sa ilang pamilya sa paghigugma ug pagsalig sa ilang Langitnong Amahan ug sa Iyang Anak, si Jesukristo.

Pangamuyo alang sa Kabatan-onan

Apan ang akong pangamuyo karon alang sa gatusan ka libo ka mga bata, mga batan-on, ug mga young adult nga wala magagikan niini, tungod sa kakulang sa mas maayong termino, nga “picture-perfect” nga mga pamilya. Namulong ko dili lamang sa kabatan-onan nga nakasinati og kamatayon, diborsyo, o nagkakunhod nga pagtuo sa ilang mga ginikanan apan sa liboan usab ka mga batan-ong lalaki ug babaye sa tibuok kalibutan nga mihangup sa ebanghelyo nga walay inahan o amahan nga mosimba kuyog nila.4

Kining batan-ong mga Santos sa Ulahing mga Adlaw misulod sa Simbahan uban sa dakong pagtuo. Nanghinaut sila nga makamugna og ideyal nga pamilya sa ilang kinabuhi sa umaabut nga adlaw.5 Sa katapusan, mahimo silang importante nga bahin sa atong misyonaryo nga pwersa, ang atong matarung nga mga young adult, ug kadtong magminyo sa templo aron sugdan ang kaugalingon nilang pamilya.

Pagkasensitibo

Magpadayon kita sa pagtudlo sa sumbanan sa Ginoo alang sa mga pamilya, apan karon nga adunay minilyon nga mga miyembro ug ang panaglahi sa atong mga bata sa Simbahan, kinahanglan pa kitang mas manggihunahunaon ug sensitibo. Ang atong kultura ug sinultihan sa Simbahan usahay talagsaon kaayo. Ang mga bata sa Primary dili mohunong sa pagkanta sa “Mga Pamilya Mahimong Manag-uban sa Kahangturan,”6 apan kon manganta sila sa, “Lipay ko kaayo kon si papa moabut”7 o “si papa ug mama nagagiya,”8 dili tanang mga bata ang manganta bahin sa ilang pamilya.

Ang among higala nga si Bette mipakigbahin sa iyang kasinatian sa simbahan sa dihang 10 anyos pa siya. Siya miingon: “Ang among teacher mipakigbahin og leksyon bahin sa kaminyoon diha sa templo. Piho siya nga nangutana nako, ‘Bette, ang imong mga ginikanan wala maminyo sa templo, dili ba?’ [Ang akong teacher ug ang tibuok klase] nahibalo sa tubag.” Ang leksyon sa teacher misunod, ug gihunahuna ni Bette nga wala nay paglaum ang iyang pamilya. Miingon si Bette, “Daghang gabii nga naghilak ko. Sa dihang duna koy problema sa kasingkasing duha ka tuig human niana ug nagtuo nga mamatay na ko, nakuyawan ko, naghunahuna nga mag-inusara ko sa kahangturan.”

Ang akong higala nga si Leif mao ra ang magsimbahan. Kausa, samtang diha sa Primary, gihangyo siya nga mohatag og mubo nga pakigpulong. Wala siyay mama o papa nga motupad niya diha sa simbahan ug motabang niya kon makalimot siya kon unsay isulti. Nahadlok si Leif. Imbis nga maulawan, mipalayo siya sa simbahan og pipila ka bulan.

“Gitawag ni Jesus ang usa ka gamayng bata ngadto kaniya, ug iyang gipatindog kini sa ilang taliwala …

“Bisan kinsa nga tungod sa akong ngalan magadawat sa usa ka gamayng bata nga sama niini, magadawat kanako.”9

Matuohon nga mga Kasingkasing ug Espirituhaong mga Gasa

Kini nga mga bata ug kabatan-onan gipanalanginan og matuohon nga mga kasingkasing ug espirituhanong mga gasa. Gisultihan ko ni Leif, “Akong nasabtan sa yano nga paagi nga ang Dios mao ang akong Amahan ug nga Siya nakaila ug nahigugma nako.”

Ang among higala nga si Veronique miingon, “Samtang nakat-unan nako ang mga baruganan sa ebanghelyo ug natun-an ang Basahon ni Mormon, morag nahinumduman nako ang mga butang nga ako nang nahibaloan apan nakalimtan.”

Ang among higala nga si Zuleika gikan sa Alegrete, Brazil. Bisan tuod nga ang iyang pamilya dili relihiyuso, sa edad nga 12, nagsugod na si Zuleika sa pagbasa sa Biblia ug nagbisitahan sa lokal nga mga simbahan, nangita nga masayud pa bahin sa Dios. Uban sa pagtugot sa iyang ginikanan nga nagpanagana, nagtuon siya kauban sa mga misyonaryo, nakabaton og pagpamatuod, ug nabunyagan. Si Zuleika miingon kanako: “Atol sa panaghisgot, gipakita ko og hulagway sa Templo sa Salt Lake ug gisultihan bahin sa mga ordinansa sa sealing. Gikan nianang higayuna, duna koy tinguha nga usa ka adlaw mosulod ko sa balay sa Ginoo ug makabaton og mahangturong pamilya.”

Samtang ang sitwasyon sa bata dinhi sa yuta mahimong dili ideyal, ang espirituhanong panulundon sa bata hingpit tungod kay ang tinuod nga pagkatawo niini mao ang iyang pagkaanak sa Dios.

Si Presidente Thomas S. Monson miingon: “Tabangi ang mga anak sa Dios nga makasabut unsa ang tinuod ug importante niini nga kinabuhi. Tabangi sila sa pagpalambo sa kalig-on sa pagpili sa dalan nga magpabilin kanila nga luwas diha sa dalan padulong sa kinabuhing dayon.”10 Mas magmaloloy-on kita ug motanyag og tabang sa ubang tawo. Kining kabatan-onan nagkinahanglan sa atong panahon ug atong mga pagpamatuod.

Si Brandon, kinsa mipasakop sa Simbahan didto sa Colorado sa high school pa, nakig-istorya nako bahin niadtong mitabang niya sa wala pa ug human sa iyang bunyag. Miingon Siya: “Didto ko sa mga panimalay sa mga pamilya nga nagsunod sa ebanghelyo. Napakita niini nako ang usa ka sumbanan nga akong gibati nga akong mabatunan sa kaugalingon nakong pamilya.”

Si Veronique, nga natawo sa Netherlands, mieskwela uban sa among anak nga babaye nga si Kristen samtang nagpuyo mi didto sa Germany. Nakahinumdom si Veronique: “Ang mga estudyante nga mga miyembro sa Simbahan daw hayag tan-awon. Naamguhan nako nga kana nga kahayag nagagikan sa ilang pagtuo ni Jesukristo ug sa pagsunod sa Iyang mga pagtulun-an.”

Ang akong higala nga si Max nabunyagan dihang otso anyos pa. Ang iyang amahan wala mahisakop og bisan unsa nga simbahan, ug si Max mahimong mosimba o dili mosimba.

Isip usa ka tin-edyer, human wala makasimba og pipila ka bulan, gibati ni Max nga kinahanglan siyang mobalik og simba ug determinado nga usa ka Dominggo sa buntag mobalik siya. Apan ang iyang tinguha mihuyang samtang nagkaduol siya sa atubangan nga pultahan sa simbahan; ug nakuyawan siya.

Didto, nagbarug sa may pultahan, mao ang bag-ong bishop. Wala makaila niya si Max, ug sigurado siya nga ang bishop wala makaila ni Max. Sa pagkaduol ni Max, nalipay ang bishop, ug gituyhad ang iyang kamot ug miingon, “Max, nalipay kong nakakita nimo!”

“Sa iyang pagsulti niadtong mga pulonga,” miingon si Max, “usa ka mainitong pagbati ang milukop nako ug nasayud ko nga husto ang akong gibuhat.”11

Ang pagkaila sa ngalan sa usa ka tawo makahimo og kalainan.

“Ug [si Jesus] misugo nga ang ilang gagmay nga mga bata kinahanglan dad-on ngadto kaniya. …

“Ug … siya mikuha [kanila], sa tinagsa, ug mipanalangin kanila, ug nag-ampo ngadto sa Amahan alang kanila.

“Ug sa diha nga siya nakahimo na niini siya mihilak.”12

Kabatan-onan nga Wala Pa Mabunyagi

Tungod sa hangyo sa mga ginikanan, daghang batan-on nga ganahan sa ebanghelyo maghulat og katuigan aron mabunyagan.

Ang mga ginikanan ni Emily nagdiborsyo samtang bata pa siya, ug wala siya makadawat og pagtugot nga mabunyagan hangtud nag-15 anyos siya. Ang among higala nga si Emily positibong naghisgot bahin sa usa ka lider sa Young Women nga “kanunayng mitabang sa paglig-on sa [iyang] pagpamatuod.”13

Si Colten ug Preston mga tin-edyer nga nagpuyo sa Utah. Ang ilang ginikanan nagdiborsyo, ug wala sila makadawat og pagtugot nga mabunyagan. Bisan tuod nga dili sila makapaambit sa sakrament, sila ang magdala og pan matag semana. Ug bisan tuod nga dili sila makasulod sa templo aron makahimo og mga pagbunyag uban sa mga batan-on kon ang ilang ward moadto sa templo, ang duha ka managsoon nangita og mga ngalan sa pamilya pinaagi sa pagbisita sa duol nga family history center. Ang labing dakong impluwensya sa pagtabang sa atong mga batan-on nga mobati nga nalakip mao ang ubang matarung nga mga batan-on.

Elder Joseph Ssengooba

Tapuson nako pinaagi sa ehemplo sa bag-ong higala, usa ka tawo nga among nahimamat pipila ka semana ang milabay samtang nagbisita mi sa Zambia Lusaka Mission.

Imahe
Si Joseph Sengooba isip usa ka batang lalaki

Si Elder Joseph Ssengooba gikan sa Uganda. Namatay ang iyang amahan sa dihang siyete anyos pa siya. Sa edad nga nuybe, kay ang iyang inahan ug mga paryente dili makahimo sa pag-atiman niya, kinahanglan niyang atimanon ang iyang kaugalingon. Sa edad nga 12, nahimamat niya ang mga misyonaryo ug nabunyagan.

Gisultihan ko ni Joseph bahin sa iyang unang adlaw sa simbahan: “Human sa sakrament miting, naghunahuna ko nga panahon na para mouli, apan ang mga misyonaryo mipaila-ila nako kang Joshua Walusimbi. Gisultihan ko ni Joshua nga mamahimo nako siya nga higala, ug gihatagan ko niya og Songbook sa mga Bata aron dili ko moadto sa Primary nga walay dala. Sa Primary, mibutang si Joshua og ekstra nga lingkuranan tupad niya. Ang Primary president midapit nako nga moadto sa atubangan ug mihangyo sa tibuok Primary nga kantahan ko og ‘Ako Anak sa Dios.’ Espesyal kaayo ang akong gibati.”

Ang branch president midala ni Joseph ngadto sa pamilyang Pierre Mungoza, ug kana ang nahimo niyang panimalay sa misunod nga upat ka tuig.

Imahe
Sila ElderJoshua Walusimbi ug Elder Joseph Sengooba

Paglabay sa walo ka tuig sa dihang si Elder Joseph Ssengooba nagsugod na sa iyang misyon, sa iyang dakong kasurprisa ang iyang trainer mao si Elder Joshua Walusimbi, ang bata nga mipabati niya nga gi-welcome pag-ayo sa iyang unang adlaw sa Primary. Ug ang iyang mission president? Siya si President Leif Erickson, ang bata nga mipalayo sa Primary tungod kay nahadlok sa paghatag og pakigpulong. Ang Dios nahigugma sa Iyang mga anak.

Imahe
Si Elder Joseph Sengooba ug Presidente Leif Erickson
Imahe
Si Elder Andersen sa Democratic Republic of the Congo

Ang mga Bata Nagdagan

Sa dihang ang akong asawa, si Kathy, ug ako didto sa Africa pipila ka semana ang milabay, mibisita mi sa Mbuji-Mayi, Democratic Republic of the Congo. Tungod kay ang chapel dili kaayo dako alang sa 2,000 ka mga miyembro, didto mi sa gawas nagtigum ubos sa dagkong mga tabon nga plastik nga gisuportahan og mga tukod nga kawayan. Sa pagsugod sa miting, among makita ang dinosena nga mga bata nga nagtan-aw namo, nagkapyot sa puthaw nga koral nga naglibut sa dapit. Si Kathy hilum nga mihunghong, “Neil, basin ganahan kang modapit sa mga bata nga mosulod?” Giduol nako si District President Kalonji sa podyum ug gihangyo siya nga pasudlon ang mga bata nga naa sa gawas sa koral nga moapil namo sa sulod.

Imahe
Mga bata sa gawas sa koral
Imahe
Mga bata nga gidapit nga mosulod

Sa akong kasurprisa, tungod sa pagdapit ni President Kalonji, ang mga bata wala lamang mosulod apan misulod nga nagdagan—sobra sa 50, siguro mga 100—ang uban dunay gisi-gisi nga sinina ug nagtiniil apan dunay matahum nga mga pahiyum ug madasigon nga mga nawong.

Natandog gyud ko niini nga kasinatian ug nakita ang pagkasimbolikanhon niini sa atong panginahanglan nga motabang sa kabatan-onan nga mibati nga nag-inusara, napasagdan, o naa sa gawas sa koral. Hunahunaon nato sila, abi-abihon sila, hangupon sila, ug buhaton ang tanan kutob sa atong mahimo aron sa paglig-on sa ilang gugma alang sa atong Manluluwas. Miingon si Jesus, “Bisan kinsa nga tungod sa akong ngalan magadawat sa usa ka … bata nga sama niini, magadawat kanako.”14 Sa pangalan ni Jesukristo, amen.

Mubo nga mga Sulat

  1. Mateo 19:14.

  2. Tan-awa sa “Family Structure,” Child Trends DataBank (Dec. 2015), appendix 1, page 9, childtrends.org/databank.

  3. “Ang Pamilya: Usa ka Pamahayag ngadto sa Kalibutan,” Liahona, Nob. 2010, 129, mga paragraph 7 ug 6.

  4. Gusto kong personal nga moila sa liboan ka matarung nga mga inahan, kadaghanan nila mga single parent, kinsa maisugong midawat sa nag-unang responsibilidad sa espirituhanong paglig-on sa ilang mga anak. Ang among higala nga si Shelly gikan sa Canada misulti bahin sa iyang inahan:

    “Ang mga misyonaryo nanuktok sa pultahan sa akong mga ginikanan lima ka tuig sa wala pa ko matawo. Midawat ang akong mga ginikanan og pipila ka mga leksyon, ug dayon nawad-an na og interes ang akong amahan. Nagpadayon ang akong inahan sa pagdawat og mga leksyon ug nagtinguha nga magpabunyag. Sulod sa lima ka tuig nagsimbahan ang akong inahan isip nonmember, ug tulo ka bulan human sa akong pagkatawo, nabunyagan siya.

    “Ang akong inahan dili daghan og istorya o walay dagkong katungdanan. Duna siyay yano ra kaayo, malumo, lig-on nga pagpamatuod, … ug nagpakabuhi siya sa matag adlaw nga matinuoron sa unsay iyang gituohan. Kanang hilum, yano nga ehemplo kanunay nga nagpabilin nako nga suod ngadto sa Ginoo ug sa Simbahan.”

  5. Ang among higala nga si Randall miingon kanako: “Gitudloan ko ug nasayud nga usa ko ka anak sa langitnong ginikanan, ug ang pagkasayud sa tinuod nakong pagkatawo ug kahimtang naghatag nako og paglaum nga dili kinahanglang sundon nako ang samang giagian sa akong ginikanan, kinsa akong gidayeg apan dili gustong kopyahon. Misalig ko sa unsay gitudlo ngari nako sa Primary, Sunday School, ug Young Men ug sa uban pang mga magtutudlo. Nakakita ko og mga ehemplo diha sa ward ug sa akong mga paryente sa matinud-anon, malipayong mga pamilya, ug misalig ko sa Langitnong Amahan, kay nasayud nga kon magpabilin kong matinud-anon, motabang Siya nako nga makabaton og sama nga pamilya.”

  6. “Mga Pamilya Mahimong Manag-uban sa Kahangturan,” Songbook sa mga Bata, 98.

  7. “Pag-abut ni Papa,” Songbook sa mga Bata, 110.

  8. “Ang Gugma Gipamulong Dinhi,” Songbook sa mga Bata, 102–103.

  9. Mateo 18:2, 5.

  10. Thomas S. Monson, “Pagtuon Kamo Gikan Kanako,” Liahona, Mar. 2016, 6.

  11. Tan-awa sa Max H. Molgard, Inviting the Spirit into Our Lives (1993), 99.

  12. 3 Nephi 17:11, 21–22.

  13. Si Emily, bisan kon walay aktibo nga ginikanan, mahigugmaong naghisgot bahin sa mga apohan, mga tiyo ug tiya, ug sa uban pa kinsa “maoy mibarug” alang sa iyang ginikanan. Naghisgut bahin sa usa ka lider sa Young Women sa Michigan, siya miingon: “Dagko na ang iyang mga anak, ug iyang gisiguro nga ang matag batan-ong babaye mobati nga morag iyang kaugalingong anak. … Ang iyang pahiyum makapadasig sa imong kasingkasing panahon sa kalisdanan. … Akong gihimong tumong nga sundon siya ug mahimong usa ka Sister Molnar alang niadtong mga bata kinsa mahimong mobati nga ‘lahi,’ ‘napasagdan,’ o ‘wala mahisakop.’”

  14. Mateo 18:5.