“Ane Mwaneia, Ao e Mwaneai Naba”
Ataei n taai aikai a kaitara ma katein utu aika a kakaokoro ao n iai aia kangaanga. Ti kainnanoia ni karoko nakoia aika a tiku ni maroa, n aki tabeakinaki, ke itinanikun te o.
Te Atua e tangiriia ataei. E tangiriia ataei ni kabane. E taku te Tia Kamaiu, “Kanakomaia [tenaan] ataei aika akana uarereke … nako Iu: ba bon aia b’ai uean te Atua.”1
Ataei n taai aikai a kaitara ma utu aika a rawata aia a kakaokoro ao n iai aia kangaanga.
Te katooto, n te bong aei, uoua te tai mwaitiia ataei aika a maeka n te United States ma ti temanna aia karo 50 te ririki n nako.2 Ao a mwaiti utu ake aki rangin ni katiteuanaaki n aron te kangaanga ae ataaki 50 te ririki n nako n aia tangira iroun te Atua ao nanoia ni kawakin Ana tua.
N rikiraken te mangaongao n tamnei aei, te euangkerio ae kaokaki e na teimatoa ni katauraoa te kabanea n tamaroa, n ana katei te Uea.
“Ataei iai inaomataia ni bungiaki nakoia kaaro aika a tia ni mareaki, ao ni kaikawaaki iroun te karo ao te tina ae a butimwaai ao a karinei aia berita ni mare ma te onimaki ae bwanin. …
“Iai taben te bumwaane ao te buaine ae rangin ni kakawaki n tangira ao n tabeakiniia bon irouia ao ibukin aia ataei. … Iai tabeia kaaro ae tabu ni karikirakeia aia ataei ma te tangira ao te raoiroi, ni katauraoi kainnanoia n rabwata ao n tamnei ao n reireiniia bwa ana bwaina te tangira ao n tabeakiniia bon irouia [ao] ni karinei ana tua te Atua.”3
Ti kinaia kaaro aika tamaroa n aaro ni kabuta te aonaaba, ni kabane onimaki, aika a tabeakinia aia ataei ma te tangira. Ao ti butimwaia ma te kakaitau utu n Ana Ekaretia Iesu Kristo ibukiia Aika Itiaki ni Boong Aika Kaitira aika iai irouia ana tararua te karo ao te tina n rairaki nakon te Tia Kamaiu, aika a kabaeaki man ana kariaia te nakoanibonga, ao aika a reirei inanon aia utu bwa ana tangira ao n onimakina Tamaia are i Karawa ao Natina, Iesu Kristo.
Tataro ibukiia Kairake
Ma au tataro n te bong aei bon ibukiia ataei aika tebubua tengaa, kairake, ao kairake n ikawai aika aki roko man bwaai aikai, ibukin aki taun te taeka ae raoiroi riki, “tamnei-ae kororaoi” ibukin te utu. I taetae tiaki ti ibukiia kairake ake a tia n rinanon te mate, te raure, ke ni kakerikaaki aia onimaki aia karo ma tengaa naba n ataeinimwaane ao ataeinnaine ni kabuta te aonaaba aika a butimwaea te euangkerio n akean te tina ke te karo aika a riki naba bwa kaain te ekaretia ma ngaia. 4
Kairake Aika Itiaki ni Boong Aika Kaitira aikai a kaina te ekaretia ma te onimaki ae korakora. A kantaningaia bwa ana karika aia utu n oin maiuia n te tai ae na roko.5 N te tai, are a riki bwa kaain ara taanga ni mitinare aika a kakawaki, ara kairake n ikawai aika raraoi, ao naake a mare (ke ni kabaeaki) inanon te tembora ni moana oin aia utu.
Te Tangira
Ti na teimatoa n reirei ana katei te Uea ibukin te utu, ma ngkai ma mirion membwa, ao te kaokoro irouia ataein te Ekaretia, ti riai n rangin ni iangoia ao n tangira. Katein ao aron aia taetae kain te Ekaretia n tabetai akea n ai arona. Ataein te Moanrinan ana aki katoka aia anene “A Kona Utu n Ikotaki n Akea Tokina,”6 ma ngkana a anenea, “I’m so glad when daddy comes home”7 ke “ma te tama ao te tina ni kaira te kawai,”8 tiaki ni kabane ataei aika ana anenea oin aia utu.
E tibwaua ana atatai raoraora ae Bette are e karekea n te taromauri ngke 10 ana ririki. E taku “Ara tia reirei e tibwaua te reirei iaon te mare n te tembora. E titirakinai n ae onoti, ‘Bette, aki mare am karo n te tembora, e koaua anne?’ [Au tia reirei ao kaain te kiraati] a ata te kaeka.” E waaki nako ana reirei te tia reirei, ao Bette e iangoia ae akea te kantaninga ibukina ao ana utu. E taku Bette, “A mwaiti tairiki aika I tang (ibukina). Ngke e reke au kanganga uoua te ririki imwiina ao n au iango n nang mate, I maaku, n au iango n nang tiku n ti ngai n aki toki.”
Raoraou Leif e nakon te taromauri n tingaia. N te taina, ngke e mena n te Moanrinan, e tuangaki bwa e na anga ana taetae ae uarereke. Akea tinana ke ana karo n te taromauri n tei irarikina ao ni buokia ngkana e mwaninga ae na taekinna. E rangin ni maaku Leif. Nakon are e na kamamaea bon irouna, e tiku man te taromauri inanon tabeua namwakaina.
“Iesu e wetea te tei temanna ae uarereke, ao E kaki i buakoia …
“Ao E [taku] ao ane e manea te tei temanna ae ai aron aei n akoia, i bukin arau, ao e m’aneai n akoai naba.”9
Kakoaua ao n namakina te Tamnei ao ana Bwaintituaraoi te Tamnei.
Ataei ao kairake aikai a kakabwaiaki ma te konabwai ni kai kakoaua ao n namakina te Tamnei ao ana bwaintituaraoi te tamnei. E tuangai Leif, “I ataia n te kawai ae bebete ae te Atua bon Tamau ao E kinaai ao n tangirai.”
E taku raoraora Veronique, “Ngke I reiakina reirein te euangkerio ao ni kamatebwaia Ana Boki Moomon, ti tebo ma kanga I a uring bwaai ake I a tia ni kaman atai ma I a tia ni mwaninga.”
Raoraora Zuleika e roko mai Alegrete, Brazil. E ngae ngke aki kaina te aro ana utu, ngke 12 ana ririki, e moanna ni wareka te Baibara Zuleika ao ni kawari aaro n te tabo, ni ukoukora ataakin riki te Atua. Ma aia aki kariaia ana karo’e reirei ma mitinare, karekea ana koaua, ao e bwabetitoaki. E tuangai Zuleika: “N tain te maroro, e kaotaki nakoiu tamnein te Tembora i Salt Lake ao n tuangaki taekan otenanti ni kabaebae. Man te tai anne, e reke nanou bwa n na rin ni maneaban Iehova ae tabu ao ni karekea te utu ae akea tokina.”
Ngkai ana kangaanga n te aonaaba te ataei e na aki kona ni kororaoi, rikin te ataei n tamnei e kororaoi bukina bwa teuana kinakiia bwa ngaia bon natin te Atua mwaane ao aine.
E taku Beretitenti Thomas S. Monson: “Buokiia natin te Atua n ata te bwai ae koaua ao ni kakawaki n te maiu aei. Buokiia ni karikirakea te korakora n rinei kawai aika e na kawakiniira iaon kawaia nakon te maiu ae akea tokina.”10 Ti a namakina riki te tangira ao n anga ara ibuobuoki nakoia aomata tabeman. Kairake aikai a kainnanoa ara tai ao ara koaua.
Brandon, are e kaina te Ekaretia i Colorado n te reirei ae rietata, e taetae nakoiu ibukiia ake a nakoina imwain ao imwiin ana bwabetito. E taku, “I mena ni mweengaia utu aika a maiuakina te euangkerio. E kaota nakoiu te kainibaire ae I namakinna bwa I kona ni karekea ni mweengau.”
Veronique, are e bungiaki i Netherlands, e nakon te reirei ma natira te aine Kristen ngke ti maeka i Germany. E noria Veronique, “Ataein te reirei aika kaain te Ekaretia iai aia ota bon ibukiia. I kunea bwa te ota anne e roko man aia onimaki iroun Iesu Kristo ao maiuakinan Ana reirei.”
Raoraou Max e bwabetitoaki ngke waniua ana ririki. Ana karo tiaki kaain te ekaretia, ao e rineia bwa e na nako ke e na aki nako nakon te taromauri.
Ngke e mena ana ririki imarenan 13 nakon 19, imwiin aki rorokona (ni bootakin te aro) inano tabeua te namwakaina, Iai ana namakin Max bwa e riai n oki nakon te aro ao ni moaningabongin te Tabati teuana e iangoia bwa e na oki. Ma e totokoia ana iango ngke e a roko i moan mataroan te umwantabu, ao e a moanna n nako nanona.
Ikekei, n tei n te mataroa, bon te bitiobi ae boou. E aki kina Max, ao e namakinna ae te bitiobi e aki kina Max. Ngke e a roko Max, ao matan te bitiobi e taraa ni kukurei, ao e taakin baina ao e taku, “Max, ti rangin ni kukurei n noriko!”
“Ngke e taekin taeka aikanne,” e taku Max, “e roko namakinan te tangira ao I ataia ae I a tia ni karaoa te bwai ae eti.” 11
Ataakin aran temanna e kona ni karika te bitaki.
“Ao [Iesu] e tuangiia natiia aika a uarereke bwa a na uotaki [nakoina]. …
“Ao … e [anaia], temanna imwiin temanna, ao e kakabwaiaia, ao e tataro nakon te Tama ibukiia.
“Ao ngke e a tia ni karaoa aio e a manga tang riki.” 12
Kairake Aika Tuai Bwabetitoaki
Man aia kariaia kaaro, a mwaiti kairake aika a tangira te euangkerio n tataninga inanon ririki bwa ana bwabetitoaki.
A raure ana karo Emily ngke te ataei ngaia, ao e aki karekea te kariaia ni bwabetitoaki ni karokoa e koro 15. Raoraora ae Emily e taetae ma te tangira iaon te tia kairiiri irouia Ataeinnaine ae “e aki toki ni karoko ao ni buokia ni kakorakora [ana] koaua.”13
Colten ao Preston bon kairake aika a maeka i Utah. A raure aia karo, ao a tuai kariaiakaki bwa ana bwabetitoaki. E ngae ngke aki kona ni kabuta te toa, a uota te kariki ni katoa wiiki. Ao e ngae ngke aki kona n rin n te tembora ni karaoi bwabetito ma kairake ngkana e nakon te tembora aia uoote, taari aika uoman a kunei araia aia utu man kawaran te tienta n rongorongon te utu. Te anainano ae nakoraoi ni buokiia ara kairake n namakinna ae bon raoia bon kairake ake tabeman.
Unimwaane Joseph Ssengooba
I kainna ma ana katooto te rao ae boou, temanna ae ti kaitibo ma ngaia tabeua te wiiki n nako ngke ti kawara te Zambia Lusaka Mition.
Unimwaane Joseph Ssengooba bon mai i Uganda. E mate ana karo ngke itiua ana ririki. Ngke ruaiwa ana ririki, ma tinana ao ana koraki aki kona n tabe ibukina, e na bon tararuaia. Ngke 12 ana ririki, e kaitibo ma mitinare ao e bwabetitoaki.
E tuangai Iotebwa n ana moan ni bong n te taromauri: “Imwiin te bootaki n toa, I taku bwa e a bo te tai n okiri mweenga, ma mitinare a kabwarabwaraai nakon Joshua Walusimbi. E tuangai Joshua are e na riki bwa raoraou, ao e anganai Aia Boki n Anene Ataei bwa i aonga n nakon te Moanrinan ao iai te bwai ae I uotia. N te moanrinan, Joshua e katuka te kaintekateka teuana irarikina. Te beretitenti n te Moanrinan e kaoai nako mooa ao e tuangiia kaain te Moanrinan ni kabane bwa ana anene ibukiu ‘Ngai Natin te Atua.’ I namakinna ae I rangin n onoti.”
Te beretitenti n te mwaanga e uota Joseph nakon ana utu Pierre Mungoza, ao anne e riki bwa mweengana ibukin aua te ririki are imwiina.
Waniua te ririki imwiina ngke e moana ana mition Unimwaane Joseph Ssengooba, e miimi bwa ana tia reirei bon Unimwaane Joshua Walusimbi, te teei ni mwaane are e butimwaaia raoi n ana moan ni bong n te Moanrinan. Ao ana beretitenti n te mition? Bon Beretitenti Leif Erickson, te teei ni mwaane ae e kerikaaki man te Moanrinan bukina bwa e maaku n anga ana taetae. E tangiriia Ana ataei te Atua.
A Biri Ataei n Roko
Ngke kainnabau, Kathy ao ngai ti mena i Africa tabeua te wiiki n nako, ti kawara Mubji-Mayi, te Tautaeka n Nanoa i Congo. Bukina bwa e aki tau te umwantabu ibukiia 2,000 membwa, ti kaitibo itinaniku iaan te tabo ni katantan ae te buratitiki ae bubura ni kamatoaki ma boua aika bamboo. Ngke e a waaki te bootaki, ti na noriia tatin n ataei n tarataraira, ni kaninganinga mai itinanikun te o te biti are e katobibia te tabo. E wirikiriki ni karaurau Kathy, “Neil, n am iango ko na tangiria ni kaoia ataei n rinnako?” I kawara Kalonii te Beretitenti n te Mwakoro n te tabo ni kamataku ao n tuangnga ngkana e na butimwaia ataei ake i tinanikun te o bwa ana rin n raoniira.
Ni mimiiu, ma ana kakao Beretitenti Kalonji, aki ti rin ataei ma a biri n rin—e raka iaon 50, tao 100 mwaitiia ataei aikai—tabeman ma aia kunnikai aika a raemengamenga ao n akea aia kau ma ni kabane a rin ma moangareia aika tikiraoi ao moaia aika miimi
I rangin n rootaki ma te nanokawaki n te bwai ae riki ao n iangoia bwa kanikinaean kainnanoara ni karoko irouia kairake aika a tiku ni maroa, ni katukaki, ke itinanikun te o. Ti a iangoi taekaia, butimwaia, rabwatia, ao ni karaoa te bwai ae ti kona ni kakorakora aia tangira ibukin te Tia Kamaiu. E taku Iesu, “Ao ane m’anea te tei temanna ae ai aron … ibukin arau, ao e m’aneai naba.”14 N aran Iesu Kristo, amen.