“Tus uas Txais Yuav Lawv, Txais Yuav Kuv”
Niaj hnub nim no cov me nyuam nyias muaj nyias tsev neeg txawv. Peb yuav tsum pab cov uas xav tias lawv nyob lawv ib leeg, lawv raug tso tseg, los sis lawv nyob txoj laj kab sab nraud.
Vajtswv hlub cov me nyuam. Nws hlub txhua tus me nyuam. Tus Cawm Seej hais tias, “Cia li coj cov me nyuam los cuag kuv: … rau qhov Ntuj Ceeb Tsheej yog cov neeg uas [zoo] ib yam li cov me nyuam yaus no tug.”1
Niaj hnub nim no cov me nyuam nyias muaj nyias tsev neeg txawv.
Piv txwv hais tias, niaj hnub no, cov me nyuam uas nrog leej txiv los sis leej niam nyob ib tug xwb los muaj ob npaug ntau dua li 50 xyoo dhau los nyob hauv lub Teb Chaws Amelikas.2 Thiab muaj ntau tsev neeg uas tsis koom siab hlub Vajtswv thiab tis txaus siab ua raws li Nws cov lus txib.
Nyob hauv kev kub ntxhov ntawm sab ntsuj plig uas loj tuaj zuj zus, txoj moo zoo uas tau muab txum tim rov qab los tseem yog tus Tswv txoj kev cai, lub hom phiaj, thiab txoj hau kev.
“Tej me nyuam tsim nyog yug los raws li txoj kev sib khi ntawm txoj kev sib yuav, thiab tsim nyog muaj niam muaj txiv, uas ua ib siab hawm tej lus cog tseg ntawm txoj kev sib yuav, cob lawv loj hlob. …
“Ob niam txiv twg muaj ib txoj kev lav ris tseem ceeb kom ib tug hlub thiab saib xyuas ib tug thiab kom hlub thiab saib xyuas nkawd cov me nyuam. … Niam txiv muaj ib lub luag hauj lwm tseem ceeb dawb ceev kom cob nkawd cov me nyuam raws li kev hlub thiab kev ncaj ncees, kom npaj muab raws li lawv toob kas ntawm sab nqaij daim tawv thiab sab ntsuj plig, [thiab] kom qhia lawv sib hlub thiab sib pab.”3
Peb paub tias muaj ntau tus niam tsev txiv tsev, uas koom txhua txoj kev teev ntuj, nyob thoob plaws lub ntiaj teb uas muaj siab hlub lawv cov me nyuam. Thiab peb zoo siab uas muaj tej tsev neeg nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg uas muaj niam thiab muaj txiv uas tau hloov siab los ntseeg tus Cawm Seej, uas tau ua kev sib khi los ntawm txoj cai pov thawj hwj, thiab kawm nyob hauv lawv tsev neeg kom hlub thiab tso siab rau lawv Leej Txiv Saum Ntuj Ceeb Tsheej thiab Nws Leej Tub, Yexus Khetos.
Kev Thov cov Tub Hluas Ntxhais Hluas
Hnub no kuv thov kom pab cov me nyuam thiab cov tub hluas ntxhais hluas uas tsis los ntawm tej tsev neeg zoo li no. Tsis yog kuv hais txog cov tub hluas ntxhais hluas uas lawv niam lawv txiv xiam, sib nrauj, los sis tso kev ntseeg tseg xwb tiam sis kuv kuj hais txog cov tub hluas ntxhais hluas nyob thoob plaws lub ntiaj teb uas los ntseeg txoj moo zoo tiam sis tsis muaj niam tsis muaj txiv los koom lub Koom Txoos nrog lawv.4
Cov Neeg Ntseeg hauv Hnub Nyoog Kawg hluas no muaj kev ntseeg heev thaum lawv koom lub Koom Txoos. Lawv cia siab tias lawv yuav muaj ib tsev neeg zoo tag nrho thaum yav tom ntej.5 Thaum sij hawm dhau mus, lawv yeej yog ib feem tseem ceeb ntawm peb pawg tub txib, peb cov tub hluas ntxhais hluas ncaj ncees, thiab cov uas txhob caug ntawm ib lub thaj thaum pib lawv tsev neeg.
Kev Txawj Xav
Peb tseem yuav qhia tus Tswv txoj kev rau tsev neeg, tiam sis vim peb muaj ntau plhom tus mej zeej, thiab vim muaj ntau tus me nyuam hauv lub Koom Txoos uas nyias txawv nyias, peb yuav tsum ua tib zoo xav txog lawv. Tej lub sij hawm peb txoj kab lig kev cai thiab tej lus nyob hauv lub Koom Txoos yeej txawv heev. Cov me nyuam hauv lub Koom Haum Me Nyuam Yaus yeej yuav hu nkauj “Tsev Neeg Nyob Tau Ua Ke Mus Tas Ib Txhis”6 tiam sis thaum lawv hu nkauj, “Kuv zoo siab thaum txiv los tsev”7 los yog “niam thiab txiv coj peb txoj kev,”8 tsis yog txhua tus me nyuam hu nkauj txog lawv tsev neeg.
Wb tus phooj ywg Bette hais txog ib lub sij hawm nyob hauv lub koom txoos thaum nws muaj 10 xyoo. Nws hais tias, “Peb tus xib hwb tab tom qhia ib zaj txog kev sib yuav hauv lub tuam tsev. Nws nug kuv hais tias, ‘Bette, koj niam koj txiv tsis tau sib yuav hauv lub tuam tsev, puas yog?’ [Kuv tus nais khus thiab cov nyob hauv hoob kawm] paub lo lus teb lawm.” Tus nais khus qhia ntxiv, thiab Bette xav tias nws yuav raug qhov phem tshaj plaws. Bette hais tias, “Kuv twb quaj txhua hmo. Thaum kuv lub plawv muaj teeb meem ob xyoos tom qab ntawd kuv tau xav tias kuv yuav tuag, kuv ntshai, vim kuv xav tias kuv yuav nyob kuv ib leeg tas mus li.”
Kuv tus phooj ywg tau koom lub koom txoos nws tus kheej xwb. Muaj ib zaug, thaum nws nyob hauv lub Koom Haum Me Nyuam Yaus, lawv thov kom nws hais ib zaj lus. Nws tsis tau muaj niam muaj txiv nyob hauv lub koom txoos kom sawv ntawm nws ib sab thiab pab nws yog nws tsis nco qab nws yuav tsum hais dab tsi. Leif ntshai heev. Nws tsis xav txaj muag, nws thiaj li tsis tau mus rau lub koom txoos tau ob peb hlis.
“Yexus hu ib tug me nyuam yaus los sawv ntawm lawv xub ntiag …
“Tus uas lees yuav tus me nyuam yaus no ntawm kuv lub npe, kuj yog tus ntawd lees yuav kuv.”9
Tej Siab uas Ntseeg thiab tej Txiaj Ntsim ntawm Sab Ntsuj Plig
Cov me nyuam thiab cov tub hluas ntxhais hluas no tau koob hmoov kom muaj tej siab uas ntseeg thiab tej txiaj ntsim ntawm sab ntsuj plig. Leif qhia kuv tias, “Kuv paub kawg siab kawg ntsws hais tias Vajtswv yog kuv Leej Txiv thiab Nws paub kuv thiab hlub kuv.”
Peb tus phooj ywg Veronique hais tias, “Thaum kuv kawm txog tej ntsiab cai ntawm txoj moo zoo thiab kawm Phau Ntawv Maumoos, ua rau kuv nco txog tej yam uas kuv twb paub lawm tiam sis tsis nco qab.”
Peb tus phooj ywg Zuleika los ntawm Alegrete, Brazil. Txawm nws tsev neeg tsis teev ntuj, thaum nws muaj 12 xyoos, Zuleika pib nyeem phau Npainpaum thiab mus xyuas cov koom txoos hauv zej zog, vim nws xav paub ntxiv txog Vajtswv. Nws niam nws txiv tsis tshua txaus siab, tiam sis nkawd tso cai rau nws kawm nrog ob tug tub txib, es nws tau ib zaj lus tim khawv thiab ua kev cai raus dej. Zuleika qhia kuv tias: “Thaum nkawd qhia kuv, nkawd muab ib daim duab txog lub Tuam Tsev Salt Lake thiab qhia kuv txog cov kab ke uas kev cai sib khi. Txij thaum ntawd, ua rau kuv xav mus rau hauv tus Tswv lub tsev thiab muaj ib tsev neeg uas nyob mus ib txhis.”
Txawm ib tug me nyuam lub neej tsis yog ib qho uas zoo tag nrho nyob hauv lub ntiaj teb no los, ib tug me nyuam sab ntsuj plig yeej zoo tag nrho, vim nws yog Vajtswv ib tug tub los sis ib tug ntxhais.
Thawj Tswj Hwm Thomas S. Monson tau hais tias: “Cia li peb Vajtswv cov me nyuam to taub tias tej yam twg tseem ceeb nyob hauv lub neej no. Cia li pab lawv muaj zog xaiv tej kev uas yuav pab lawv nyob nyab xeeb thaum lawv taug kev mus rau txoj sia nyob mus ib txhis.”10 Cia peb qhib peb lub siab thiab ncav tes me ntsis ntxiv. Cov no xav tau peb lub sij hawm thiab peb zaj lus tim khawv.
Brandon, uas koom lub Koom Txoos nyob hauv Colorado thaum nws kawm high school, hais rau kuv txog cov uas pab nws ua ntej thiab tom qab nws ua kev cai raus dej. Nws hais tias: “Kuv nyob hauv cov tsev neeg uas ua raws li txoj moo zoo tej tsev. Ua rau kuv xav tias kuv muaj tau li ntawd nyob hauv kuv tsev neeg.”
Veronique, uas yug los nyob hauv Netherlands, tau nrog kuv tus ntxhais Kristen kawm ntawv thaum peb nyob hauv Yelemes Teb. Veronique hais tias: “Cov tub ntxhais kawm ntawv uas yog cov mej zeej ntawm lub Koom Txoos ci ntsa iab heev. Kuv tau kawm hais tias qhov ci ntsa iab ntawd yog los ntawm lawv txoj kev ntseeg Yexus Khetos thiab kev ua raws li Nws tej lus qhia.”
Kuv tus phooj ywg Max tau ua kev cai raus dej thaum nws muaj yim xyoo. Nws txiv tsis yog ib tug mej zeej ntawm ib lub koom txoos, es nws cia Max xaiv nws tus kheej xwb.
Thaum nws yog ib tug tub hluas, tom qab nws tsis tau mus tau ob peb lub hlis, Max xav tias nws yuav tsum rov qab mus thiab muaj ib hnub Sunday nws txiav txim siab tias nws yuav mus. Tiam sis thaum nws tab tom los txog lub qhov rooj ntawm lub tsev koom txoos; ua rau nws ntshai heev.
Tus npisov tshiab nyob ntawm lub qhov rooj. Max tsis tau paub nws, thiab nws xav tias tus npisov tsis tau paub Max. Thaum Max los zuj zus, tus npisov luag nyav, nws ncav tes thiab hais tias, “Max, zoo siab pom koj!”
Max hais tias, “Thaum nws hais li ntawd, ua rau kuv lub siab sov so thiab kuv paub tias kuv tau ua qhov yog.”11
Qhov uas yus paub ib tug neeg lub npe yuav pab heev.
“Thiab [Yexus] tau txib kom lawv yuav tsum coj lawv tej me nyuam yaus tuaj [rau nws]. …
“Thiab nws tau muab lawv …, ib tug dhau ib tug, thiab tau foom koob hmoov rau lawv, thiab tau thov Leej Txiv rau lawv.
“Thiab thaum nws tau ua li no tas lawm nws tau … quaj.”12
Cov Tub Hluas Ntxhais Hluas uas Tseem Tsis Tau Ua Kev Cai Raus Dej
Raws li niam tsev txiv tsev hais, ntau tus tub hluas ntxhais hluas uas nyiam txoj moo zoo, lawv tos ntau xyoo kom ua kev cai raus dej.
Emily niam thiab txiv sib nrauj thaum nws yog ib tug me nyuam, thiab nws tsis tau kev tso cai ua kev cai raus dej mus txog thaum nws muaj 15 xyoos. Peb tus phooj ywg Emily hais lus zoo txog ib tug thawj coj hauv Koom Haum Ntxhais Hluas uas “pheej ncav tes thiab pab txhawb nqa [nws] zaj lus tim khawv.”13
Colton thiab Preston yog ob tug tub hluas nyob hauv Utah. Nkawd niam thiab txiv sib nrauj, thiab nkawd tsis tau kev tso cai ua kev cai raus dej. Txawm nkawd tsis muaj cai muab lub cim nco txog, nkawd nqa cov mov mog txhua lub lim tiam. Thiab txawm nkawd mus tsis tau rau hauv lub tuam tsev ua kev cai raus dej nrog cov tub hluas ntxhais hluas thaum nkawd pawg ntseeg mus rau lub tuam tsev los, nkawd ob leeg nrhiav tsev neeg tej lub npe nyob hauv qhov chaw nrhiav tsev neeg zaj keeb kwm. Qhov uas yuav pab cov tub hluas ntxhais hluas txaus siab yog lwm tus tub hluas ntxhais hluas ncaj ncees.
Txwj Laug Joseph Ssengooba
Kuv kaw kuv zaj lus nrog ib tug phooj ywg tshiab tus yam ntxwv, ib tug uas peb ntsib ob peb lim tiam tas los thaum wb mus xyuas Qhov Chaw Tshaj Tawm txoj Moo Zoo Zambia Lusaka.
Txwj Laug Joseph Ssengooba nyob hauv Uganda. Nws txiv xiam thaum nws muaj xya xyoo. Thaum nws muaj cuaj xyoos, nws niam thiab cov txheeb ze tsis muaj txaus tu nws, es cia nws nyob nws ib leeg. Thaum nws muaj 12 xyoos, nws ntsib cov tub txib thiab tau ua kev cai raus dej.
Joseph qhia kuv txog thawj hnub uas nws mus rau lub tsev koom txoos: “Tom qab kev sib ntsib txais lub cim nco txog, kuv xav tias yog lub sij hawm rov qab mus tsev, tiam sis cov tub txib cia kuv ntsib Joshua Walusimbi. Joshua qhia kuv tias nws yuav nrog kuv ua phooj ywg, thiab nws muab ib phau Children’s Songbook rau kuv, kuv thiaj muaj ib yam khoom nqa mus rau hauv lub Koom Haum Me Nyuam Yaus. Nyob hauv lub Koom Haum Me Nyuam Yaus, Joshua zaum ntawm kuv ib sab. Tus thawj tswj hwm ntawm lub Koom Haum Me Nyuam Yaus caw kuv tuaj tom hauv ntej thiab thov kom tag nrho lub Koom Haum Me Nyuam Yaus hu nkauj zaj ‘Kuv Yog Vajtswv Me Nyuam’ rau kuv. Ua rau kuv xav tias kuv tshwj xeeb heev.”
Ceg ntseeg tus thawj tswj hwm coj Joseph rau Pierre Mungoza tsev neeg, thiab nws nyob ntawd tau plaub xyoos tom qab ntawd.
Yim xyoo tom qab ntawd thaum Txwj Laug Joseph Ssengooba pib ua tub txib, ua rau nws xav tsis thoob vim tus uas qhia nws yog Txwj Laug Joshua Walusimbi, tus tub uas tau nrog nws ua phooj ywg thawj hnub nws mus rau lub Koom Haum Me Nyuam Yaus. Thiab nws qhov chaw tshaj tawm txoj moo zoo tus thawj tswj hwm nev? Nws yog Thawj Tswj Hwm Leif Erickson, tus me nyuam tub uas tsis mus rau lub Koom Haum Me Nyuam Yaus vim nws ntshai hais lus. Vajtswv hlub Nws cov me nyuam.
Cov Me Nyuam Khiav Los
Thaum kuv tus poj niam, Kathy, thiab kuv wb nyob hauv Africa ob peb lim tiam tas los, wb tau mus xyuas Mubji-Mayi, hauv lub teb chaws Democratic Republic of the Congo. Vim lub tsev koom txoos tsis txaus rau 2,000 tus mej zeej, peb tau sib ntsib nyob nraum zoov hauv qab tej daim yas loj uas cov ncej xyoob txhawb tau. Thaum pib kev sib ntsib, peb tau pom ntau tus me nyuam ntsia peb, tuav nkaus txoj laj kab hlau uas nyob ib ncig thaj av. Kathy ntxhi lus rau kuv hais tias, “Neil, koj puas xav caw cov me nyuam tuaj?” Kuv hais rau koog chaw tus thawj tswj hwm Kalonji ntawm lub sam thiaj thiab nug nws seb nws puas kam caw cov me nyuam nyob txoj laj kab sab nraud kom tuaj koom nrog peb.
Ua rau kuv xav tsis thoob, tom qab Thawj Tswj Hwm Kalonji caw lawv, cov me nyuam khiav tuaj—muaj tshaj 50 tus me nyuam, tej zaum muaj 100 tus me nyuam—ib txhia hnav khaub hlab thiab tuaj ko taw liab tiam sis lawv puav leej luag nyav thiab zoo siab kawg.
Ua rau kuv txais kev tshoov siab thiab kuv pom tias yog ib lub cim uas qhia tias peb yuav tsum pab cov tub hluas ntxhais hluas uas xav tias lawv nyob lawv ib leeg, lawv raug tso tseg, los sis lawv nyob txoj laj kab sab nraud. Cia peb xav txog lawv, tos txais lawv, khawm lawv, thiab ua txhua yam peb ua tau kom txhawb nqa lawv txoj kev hlub tus Cawm Seej. Yexus hais tias, “Tus uas lees yuav tus me nyuam yaus no, … kuj yog tus ntawd lees yuav kuv.”14 Los ntawm Yexus Khetos lub npe, amees.