“Me kin Kasamwoh Irail, kin Kasamwoh Ie”
Sang Elder Neil L. Andersen
Pwihn en Wahnparon Ehk-Riemeno
Kitail anahne tehkada me pwulepwul kan me kelkelehpw, lekidekla oh mihmi likin kehlo.
Koht poakong seri. E poakpoake seri koaros. Sounkomouro masanih, “Mweidohng kisin serih kan … en kohdo rehi: pwe irail me wia towe mehlel en wein nanleng.”1
Serih kan rahn pwukat diaradahr me re mihmi nan soangsoangen koasoandien peneinei tohto.
Karasepe, rahnwet, nan United States seri me mihmi rehn arail nohno de pahpahte tohtosangehr sounpar limeisek samwalahroko.2 Oh pil mie peneinei tohto me solahr mihmi pene ni limpoak en Koht oh kolokol Sapwelime kosoned akan.
Nan soangen ansou apwal wet, rongamwahu kopwurpwurdohu pahn wenlahte mwowe padpadahngki koasoandi kan, soahng koaros me mwahu me koasoandi sang rehn Kauno.
“Serih kan udahn pahn ipwidihsang nohno oh pahpa me inou sarawi, oh pahn kekeirda sang pahpa oh nohno me wauniki ara inou sarawi ni pwoson mehlel. …
Ohl pwopwoud oh lih pwopwoud ahniki pwukoah sarawi en poakong oh epwelpene nan pwungara oh neira serih kan. … Pahpa oh nohno ahniki pwukoah sarawi en kakairada neirail seri kan ni limpoak oh pwung, en kakairada anahn en palinwararail oh palingenirail oh padahkiong irail en poakong oh papah emen emenirail [oh] padahkiong irail kosoned en Koht.”3
Se pohnese peneinei mwahu tohto en mwomwohdiso koaros nan sampa me kin poakpoake oh apwali neirail serih kan. Se pil men pohnese peneinei kan me mihmi nan Mwomwohdiso en Sises Krais en Souleng en Imwin-rahn akan me epwelda rehn pahpa oh nohno me wekiong Sounkomouro, oh katengteng ki pene manman oh mweimwei en prihsduhd, oh esiesehla nan arail peneinei kan limpoak oh koapworopworki Sahm Nanleng oh Sapwelime Iehros, Sises Krais.
Ahi kapakap rahnwet iei ong irail serih kan, oh pwihn pwulopwul kid samwa me sohte iang kohsang nan soangen peneinei mwahu pwukat, sang ni souitar en ansou mwahu, I sohte koasokoasoaiahte seri pwulopwul kan me arail pahpa nohno mehla, mweipeseng, de sohla pwoson en arail nohno pahpa, ahpw pil irail pwutak oh serepein pwulepwul kid kei sang wasa koaros nan smapa me alehda rongamwahuo ahpw arail nohno de pahpa sohte iangala Mwomwohdiso wet.4
Pwihn en Souleng en Imwin-rahn pwulopwul pwukat iangala Mwomwohdiso wet sang ni arail ahniki pwoson laud. Irail koapworopworki me re pahn pein wiahda arail peneinei mwahu ehu rahn.5 Ni ansouo, irail kin wiahla kisehn neitail pwihn en misineri kan, neitail pwihn pwulopwul kan oh kopwopwoud nan tehpas sarawi pwe irail en tapiada pein arail peneinei.
Se pahn nantihlahte oh padahkiong peneinei kan Sapwelimen Kauno koasoandi, ahpw met towe mehier rar samwa, oh pil wekpeseng en serih kan me mie nan Mwomwohdiso wet, kitail anahne medemedewe mwahu oh kanaieng. Tiahk en atail Mwomwohdiso oh mwoamwen atail koasoi weksang mehteikan. Serihn praimeri kan sohte pahn tokedihsang arail kokoulki “Peneinei kan Kak Mihmipene Kokolahte,”6ahpw ansou me irail kin koulki, “I kin peren ansou me pahpa kin kohdo nihmwo”7de “de pahpa oh nohno kin kaweid,”8kaidehn serih koaros me pahn kin kokoulki pein arail peneinei.
Kempoakepaht Bette ehukiong kitehr dahme e aledihsang mwomwohdiso ansou me e sounpar 10: E nda, “aht sounpadahko padpadahngki duwen pwopwoud nan tehpas sarawi. E idek rehi, ‘Bette, ahmw nohno pahpa saik kopwopwoud nan tehnpas sarawi, ira kopwopwoudehr?’ [Ahi sounpadahko oh koaros tohn ahi perehu] esehier pasapengo.” Ahn sounpadahko padahk nek, oh Bette medewe me e pahn apwal. Bette nda, “Pwohng tohto Ikin sengiseng. Mwurin sounpar riau I soumwahu en mohngiongda oh kin medewe, I pahn mehla, I masepwehk, oh kin medemedewe me I pahn kelekelehpw erein.”
Kempoakepahi Leif ih kelehpw me iangala Mwomwohdiso. Ehu rahn nan praimeri e pilpilda en wia ekis kisin padahk. Sohte ah nohno de pahpa me pahn kesihnenda limwah oh sewese ansou me e pahn manokehla dahme e pahn nda. Leif udahn masepwehk. Ma e pahn wia met e pahn namenekla, eri e sohla kohdo sarawi sounpwong kei.
“Sises ahpw lukweriodo kisin seri kis, oh kihdiong nan pwungarail …
“Oh [masanih] ihs me pahn kasamwoh kisin seri menet ni edei ngehi me e kasamwoh.”9
Kisin seri pwukat oh me pwulopwul kan kapaikihda mohngiong en kamehlele oh kisakis en ngehn sarawi. Leif ndahngie, “I ese mehlel sang nan ahi madamadau me Koht iei semei oh me E ese ihs ngehi oh poakpoakei ie.”
Kempoakepaht Veronique koasoaia, ansou me I esehla padahk en rongamwahu wet oh onopki Pwuken Mormon, likamwete ahi kin tamataman mehkot me I esehier ahpw I manokehla.
Kempoakepaht Zuleika kohsang Alegrete, Brazil. Mehndahte ah peneieni sohte souleng, ni ah sounpar 12, Zuleika tapiadahr wadek pwuhk sarawi oh pwarek seli mwomwohdiso kan pwehn esehla laud duwen Koht. Ah pahpa nohno, sohte mweidehng, ahpw e tepda ale padahk sang misineri kan, alehdi ah kadedeh, e ahpw papdaisla. Zuleika ndahngie me, “ni ansou me e rongorong padahk, e ahpw kilang kilel en tehnpas sarawi en Salt Lake oh rong duwen tiahk sarawi en katengetengpenehn. Sang mwo kohla I ahneki ineng me ehu rahn I pahn pidelong nan tehnpas en Kauno oh ahneki peneinei soutuk.”
Mehndahte ma serih men sohte nsenamwahu pohn sampa, ahpw ahn serio sohso pahn mwahu, pwehki serio udahn Sapwelimen Koht pwutak de serepein.
Presiden Thomas S. Monson masanih: “Sewese sapwelimen Koht serih kan en esehla dahme mehlel oh kesempwal nan arail mour. Seweseirail pwe en kak mie arail kehl en pilada ahl ehu me pahn kak kolokol irail lel ong mour soutuk,”10Kitail poakong mehtei kan oh men seweseirailda. Pwihn pwulopwul pwukat anahne atail ansou oh atail kadedeh.
Brandon, iangala Mwomwohdiso wet nan Colorado ni ansou me e mihmi nan high skuhl, koasoiaiong ie irail akan me kin sewese mwowe oh mwurin ah papdaiso. E koasoia, “I kin mihmi nan imwen peneinei ehu me kin momourki rongamwahuo, e kasalehiong ie soangen koasoandih kei me I men wia nan pein ahi kisin peneinei.
Veronique, ipwidi nan Netherlands, ih oh nait kisin serepein Kristen skuhl pene, ni ansou me se kin mihmi nan Germany. Veronique ntingihdi, “Tohn skuhl kan me wia tohn Mwowmwohdiso irail kin ahniki marain. I diarada me marain wet kohsang ni arail pwoson Sises Krais oh momourki Sapwelime padahk kan.”
Kempoakepahi Max pepdais ni ansou me e sounpar waluh. Ah pahpahu sohte mwomwohdiso me e iang, eri Max kin pilada ma e pahn kin iang sarawi de soh.
Ansou me e pwulopwulo, e solahr sarawihki sounpwong kei, Max medewedahr me e anahne pwurala iang sarawi, e koasoanedier ehu menseng en Rahnsarawio en pwurala. Ahpw e luwetala ni ansou me e lel mwohn wenihmw en nimwen sarawio, e ahpw salohda.
Ni wenihmwo, iei pisop kapw men me keskesihnenie. Max sehse ihs ih, oh e pil medemedewe me pisopo sehse ihs ih, ansou me e pidelongala, pisopo mas peren e ahpw kapahla pehu oh nda, “Max udahn mwahu ahi kilang uhk!”
“Ni ansou me e koasoia mepwukat,” Max nda, “pepehm mwahu ieu kodohngie oh I ese me dahme I wiahu e pwung.”11
Ese eden aramas kak wekidala mehkot.
“Oh [Sises] masanihier me neirail serih ko en wisikdohng [re]. …
“Oh … e ale [irail], wad emen, oh kapairailda, oh kapakap kiong Sahmo emen emen irail.
“Oh ni ansou me e wiaier met e ahpw ketin tentenihr.”12
Sang ni koasoandien nohno pahpa kan, me pwulopwul tohto me poakong rongamwahuwet kin awihki wen sounpar ieu irail ahpw kin pepdais.
Ahn Emily nohno pahpa mweipeseng ni ah tikitik, oh e sohte ale mweimwei en pepdais lau ih sounpar 15. Kempoakepaht Emily kin kalap koasoia kaun en peinakapw men me kin “kalap pereniki sewese ih oh kakehlailih [ah] kadedeh.”13
Colten oh Preston pwutak pwulopwul riemen oh ira kin mihmi nan Utah. Ara nohno pahpa mweipeseng oh ira sohte ale mweimwei en pepdais. Met karehda ira sohte kak iang wa kamadipw sarawi, ira kin wahdo pilawa ehuehu wihk. Oh ira pil sohte kak iang pwihn pwulopwul kan kohla nan tehnpas sarawi wia pepdais ansou me arail wardo kin kohla nan tehnpas sarawi, pirieno kin uhd rapahki eden peneinei ni ehu family history centero. Mehn sawas keieu mwahu ong neitail me pwulopwul kan iei pil irail me pwulopwul mwahu kan.
I pahn kaimwsengkihla karasaras en kempoakepahi men, me I ahpwtehn tuhwong wihk kei samwalahro ni ansou me I kohla nan Zambia Lusaka Misin.
Elder Joseph Ssengooba sang Uganda. Ah pahpahu mehla ni ah sounpar isuh. Ni ah sounpar duwau, ah nohno oh ah peneinei kan solahr apwalih, e wiwiahier pein ih. Ni ah sounpar eisekriau, e tuhwong misineri kan oh pepdaisla
Joseph koasoiaiongie tepin rahn me e kohla iang sarawio. “Mwurin mihting en kamadipw sarawio, I leme me I pahn samwalahr ni imweio, ahpw misineri ko kapehsehiengie Joshua Walusimbi. Joshua ndahngie me e pahn wia kempoakepahi, e ahpw kidohngie Pwuken Koul en Seri ehu pwe I sohte pahn kahip kohla nan praimeri. Nan praimeri, Joshuo kihdi ehu sehr limwahn ahu. Praimeri presideno nda ien kohla mwowehu, oh peki rehn serihko koaros en koul kiongie: ‘Ngehi me Seri en Koht.’ I pehm me I wia aramas kesemwpwal.”
Branch presideno wahla Joseph rehn peneinei en Pierre Mungoza, oh wasahu wiahla ah wasahn kousoan erein sounpar pahieu.
Mwurin sounpar waluh ni ansou me Elder Joseph Ssengoopa wia ah misin, e pwuriamwei pwe Elder Joshua Walusimbi me wia a soun kaiahn, pwutak me kasamwoh ni ah tepin kohla iang praimerio. Oh ah misin presiden iei Presiden Leif Erickson, kisin pwutak me sohla iang praimeri pwehki ah sohte men padahko. Koht poakong Sapwelime serih kan.
Ni ansou me ngehi Kathy kohla Africa wihk samwalahroko, Se pwarek Mubji-Mayi, Democratic Republic en Congo. Pwehki imwen sarawio e sohte itar ong towe 2,000, se tuhpenen likio pahn lapalahn plastik ieu me wiawikihda pehri. Ni ansou me mihtingo tep, se kak kilang me diren seri kilkilangkit, irail mihmi mas likin kehl metehu me kelehdi wasahu. Kathy ahpw mwenginingin dohngie nda, Neil, ke leme kitail pahn kak lukehlongodo seri kau loaleh? I ahpw ndalahng District Presiden Kalonji ni wasahn padahko ma e kak lukehdo serih me mihmi likiohko pwe irail en patehng kit.
Dahme I pwuriamweikihla ansou me presiden Kalonji lukeirailo, serihko sohte kohdohte ahpw irail tang kohdo—irail tohtosang meh 50 de 100—ekei irail arail likou kan tei oh adasi ahpw irail koaros sinsirei oh mesen peren.
Udahn loaleiet mwekidkihda sang ni dahme I kehn oh kilang met kasalehiong kitail me kitail udahn anahne sewese irail me pwulopwul kan me sangat pwehki arail kelekelehpw, me lekdeklah kan, de me mihmi mas likin kehlo. Kitail medeweirail, kasamwoh irail, pwoaleiraildi, oh wia soahng koaros me kitail kak wia pwehn kakehlailihala arail poakong Sounkomouro. Sises masanih, “Ihs me pahn kasamwoh kisin … seri tikitik pwukat ni edei kasamwoh ie.”14 Ni mwaren Sises Krais, amen.