Kwaye Nihlale Nilugcinile Uxolelo lweZono Zenu
Ngamandla angcwalisayo oMoya oyiNgcwele njengomlingani wethu warhoqo, sinohlala silugcina uxolelo lwezono zethu.
Ibinzana elinzulu elisetyenziswe nguKumkani uBhenjamin kwiimfundiso zakhe ngoMsindisi kunye neNtlawulelo yaKhe ibe sisihloko esiphindaphindayo sofundo lwam kwaye ndisicingisise iminyaka emininzi.
Kwintshumayelo yakhe yovaleliso evuselelayo ngokwasemoyeni kubantu awayebasebenzele kwaye ebathanda, uKumkani uBhenjamin wachaza ukubaluleka kokwazi ubuqaqawuli bukaThixo nokungcamla uthando lwaKhe, lokufumana uxolelo lwezono, ukuhlala ukhumbula ubukhulu bukaThixo, nokuthandaza yonke imihla kwaye nokuma uzinzile elukholweni.1 Waye wathembisa ukuba ngokwenza ezi zinto, “niya kuhlala nigcobile, kwaye nizaliswe luthando lukaThixo, kwaye nihlale nilugcinile uxolelo lwezono zenu.”2
Umyalezo wam ujolise kumgaqo wokuhlala ugcina uxolelo lwezono zethu. Inyaniso echazwe kweli binzana inokuqinisa ukholo lwethu kwiNkosi uYesu Krestu kwaye yenze nzulu ubufundi bethu. Ndiyathandaza ukuba uMoya oyiNgcwele asikhuthaze kwaye asakhe njengokuba sijonga kunye iinyaniso ezibalulekileyo zokomoya.
Ukuzalwa Kwakhona ngokoMoya
Emhlabeni sinamava okuzalwa komzimba kunye nethuba lokuzalwa kwakhona ngokomoya.3 Siyacetyiswa ngabaprofeti nangabapostile ukuba sivuke siye kuThixo,4 “sizalwe ngokutsha,”5 kwaye sibezizidalwa ezitsha kuKrestu6 ngokufumana ebomini bethu iintsikelelo ezenziwe ukuba zenzeke ngeNtlawulelo kaYesu Krestu. “Ukulunga, nenceba, nobabalo lukaMesiya oyiNgcwele”7 zingasinceda siphumelele kutyekelo lokuzingca kunye nokuzingca komntu wendalo kwaye sizingce ngakumbi, sibe nobubele kwaye sibe ngcwele. Siyakhuthazwa ukuba siphile kangangokuba sikwazi “ukuma singenabala phambi [kweNkosi] ngomhla wokugqibela.”8
UMoya oyiNgcwele kunye neMimiselo yoBubingeleli
Umprofeti uJoseph Smith ushwankathele ngokufutshane indima ebalulekileyo yemimiselo yobubingeleli kwivangeli kaYesu Krestu: “Ukuzalwa ngokutsha, kuza ngoMoya kaThixo ngemimiselo.”9 Le ngxelo ingena nzulu icacisa iindima zoMoya oyiNgcwele kunye nemimiselo engcwele kwinkqubo yokuzalwa kwakhona ngokomoya.
UMoya oyiNgcwele lilungu lesithathu leNtloko yobuThixo. Ungumntu womoya kwaye ungqina ngayo yonke inyaniso. Kwizibhalo, uMoya oyiNgcwele kubhekiswa kuye njengoMonwabisi,10 utitshala,11 nomtyhili.12 Ukongeza, uMoya oyiNgcwele ungumngcwalisi13 ococa kwaye utshisa intlenge kunye nobungendawo kwimiphefumlo yabantu ngokungathi kungomlilo.
Imimiselo engcwele isembindini wevangeli yoMsindisi kwaye kwinkqubo yokuza kuYe kunye nokufuna ukuzalwa kwakhona ngokomoya. Imimiselo yimisebenzi engcwele enenjongo yokomoya, nokubaluleka okungunaphakade, kwaye inxulumene nemithetho nemimiselo kaThixo.14 Yonke imimiselo esindisayo kunye nommiselo womthendeleko kufuneka igunyaziswe ngulowo uphethe izitshixo zobubingeleli ezifunekayo.
Imimiselo yosindiso kunye nokuphakanyiswa eqhutywa kwiBandla leNkosi ebuyiselweyo ingaphezulu kunamasiko okanye imisebenzi yokomfuziselo. Endaweni yoko, yenza iindlela ezigunyazisiweyo ezinokuthi iintsikelelo kunye namandla ezulu zingene ebomini bethu.
“Kwaye obu bubingeleli bukhulu ngakumbi busebenza ivangeli nokuphatha isitshixo seemfihlelo zobukumkani, nkqu isitshixo solwazi lukaThixo.
“Ke ngoko, kwimimiselo yabo, amandla obuthixo ayabonakaliswa.
“Kwaye ngaphandle kwemimiselo yabo, kwaye negunya lobubingeleli, amandla obuthixo akabonakaliswa ebantwini enyameni.”15
Imimiselo eyamkelweyo nehlonitshwayo ngentembeko ibalulekile ekufumaneni amandla okuhlonela uThixo kunye nazo zonke iintsikelelo ezenziwe zifumaneke ngeNtlawulelo yoMsindisi.
Ukufumana nokuGcina uXolelo lweZono ngokweMimiselo
Ukuqonda ngokupheleleyo inkqubo apho sinokufumana kwaye sihlale sigcina uxolelo lwezono zethu, kufuneka kuqala siqonde ubudlelwane obungenakwahlulwa phakathi kwemimiselo emithathu engcwele enikezela ukufikelela kumandla ezulu: ubhaptizo ngokuntywiliselwa, nokubekelwa izandla isipho soMoya oyiNgcwele, kunye nomthendeleko.
Ukubhaptizwa ngokuntywiliselwa uxolelo lwezono “ngummiselo wentshayelelo yevangeli”16 kaYesu Krestu kwaye kufuneka wandulelwe lukholo kuMsindisi kunye nenguquko enyanisekileyo. Lo mmiselo “ngumqondiso nomyalelo omiselwe nguThixo ukuba [abantwana baKhe] bangene ebukumkanini baKhe.”17 Ubhaptizo lwenziwa ngegunya loBubingeleli buka-Aron. Kwinkqubo yokuza kuMsindisi nokuzalwa kwakhona ngokwasemoyeni, ubhaptizo lubonelela ngentlambululo eyimfuneko yomphefumlo wethu esonweni.
Umnqophiso wobhaptizo uquka izibophelelo ezintathu ezisisiseko: (1) ukulungela ukuthabathela kuthi igama likaYesu Krestu, (2) ukusoloko simkhumbula Yena, (3) nokugcina imiyalelo yaKhe. Intsikelelo ethenjisiweyo yokuhlonipha lo mnqophiso “kukuba [sihlale] siba noMoya wakhe ukuba abe [nathi].”18 Njalo, ubhaptizo lulungiselelo lokufumana ithuba eligunyazisiweyo lobudlelwane obuqhubekayo belungu lesithathu lobuThixo.
“Ubhaptizo [ngamanzi] … kufuneka lulandelwe lubhaptizo loMoya ukuze lugqibelele.”19 Njengokuba uMsindisi wafundisa uNikodemo, “ukuba umntu akathange azalwe ngamanzi nanguMoya, akanakungena ebukumkanini bukaThixo.”20
Iingxelo ezintathu zoMprofeti uJoseph Smith zigxininisa unxibelelwano olubalulekileyo phakathi kwemimiselo yobhaptizo ngokuntywiliselwa uxolelo lwezono kunye nokubekelwa izandla isipho soMoya oyiNgcwele.
Ingxelo 1: “Ubhaptizo ngummiselo ongcwele ukulungiselela ulwamkelo loMoya oyiNgcwele; lijelo kunye nesitshixo oya kuthi usebenze ngaso uMoya oyiNgcwele.”21
Ingxelo 2: “Ungabhaptiza ingxowa yesanti njengendoda, ukuba alwrnzelwanga ngenjongo yokuxolelwa kwezono nokufumana uMoya oyiNgcwele. Ubhaptizo ngamanzi sisiqingatha nje sobhaptizo, kwaye alulungelanga nto ngaphandle kwesinye isiqingatha—oko kukuthi, ubhaptizo loMoya oyiNgcwele”.22
Ingxelo 3: “Ukubhaptizwa kwamanzi, ngaphandle kobhaptizo lomlilo kunye noMoya oyiNgcwele, akuncedi nto. Ziqhagamshelene ngokungenakwahlulwa.”23
Ukuqhagamshela kokuhambelana phakathi komgaqo wenguquko, nemimiselo yobhaptizo kunye nokwamkela isipho soMoya oyiNgcwele, kunye nentsikelelo ezukileyo yoxolelo lwezono kugxininiswa kaninzi kwizibhalo.
UNifayi wabhengeza, “Kuba isango eninokungena ngalo yinguquko nobhaptizo ngamanzi; kwaye ke kuze uxolelo lwezono zenu ngomlilo nangoMoya oyiNgcwele.”24
UMsindisi ngokwaKhe wavakalisa, “Ngoku lo ngumyalelo: Guqukani, nonke nina ziphelo zomhlaba, kwaye nize kum kwaye nibhaptizwe egameni lam, ukuze nibe nokungcwaliswa ngolwamkelo loMoya oyiNgcwele, ukuze nibe nokuma ningenachaphaza phambi kwam ngomhla wokugqibela.”25
Ukubekela izandla isipho soMoya oyiNgcwele ngummiselo owenzwa ngegunya lobubingeleli bukaMelkitsedeke. Kwinkqubo yokuza kuMsindisi nokuzalwa kwakhona ngokwasemoyeni, ukufumana amandla angcwalisayo woMoya oyiNgcwele ebomini bethu kudala ukubakho kokuqhubeka kokuhlanjuluwa komphefumlo wethu esonweni. Le ntsikelelo yovuyo ibalulekile kuba “ayikho into engacocekanga enokuhlala noThixo.”26
Njengamalungu eBandla leNkosi elibuyisiweyo, sisikelelwe ngokuhlanjululwa kwethu okokuqala esonweni okunxulunyaniswa nobhaptizo kunye namandla okucocwa okuqhubekayo esonweni okwenziwe ngobudlelwane nangamandla oMoya oyiNgcwele—nkqu nelungu lesithathu lobuThixo.
Cinga ngendlela umlimi axhomekeke ngayo kwindlela engatshintshiyo yokutyala nokuvuna. Ukuqonda unxibelelwano phakathi kokuhlwayela kunye nokuvuna yinto ehlala ihleli yenjongo kwaye inefuthe kuzo zonke izigqibo nezenzo ezenziwa ngumlimi kuwo onke amaxesha onyaka. Kwangokunjalo, unxibelelwano olungenakwahlulwa phakathi kwemimiselo yobhaptizo ngokuntywiliselelwa uxolelo lwezono kunye nokubekelwa izandla isipho soMoya oyiNgcwele kufanele ukuba kube nefuthe kuzo zonke iinkalo zobufundi bethu ngawo onke amaxesha obomi bethu.
Umthendeleko ngummiselo wesithathu oyimfuneko ekufikeleleni kumandla obuthixo. Nokokuba size sizigcine ngokupheleleyo ngakumbi singenachaphaza ehlabathini, siyalelwa ukube siye endlwini yokuthandaza size sinyusele imithendeleko yethu ngomhla ongcwele weNkosi.27 Nceda qaphela ukuba imifuziselo yomzimba negazi leNkosi, isonka kunye namanzi, zisikelelwe kwaye zangcwaliswa. “Owu Thixo, Bawo onguNaphakade, siyakucela egameni loNyana wakho, uYesu Krestu, ukuba usikelele kwaye ungcwalise esi sonka [okanye la manzi] kuyo imiphefumlo yabo bonke abathi bathabathe [okanye basele] kuso.”28 Ukungcwalisa kukucoca nokwenza ngcwele. Imifuziselo yomthendeleko ingcwalisiwe ukukhumbula ubunyulu bukaKrestu, nokuxhomekeka kwethu ngokupheleleyo kwiNtlawulelo yaKhe, kunye noxanduva lwethu lokuhlonipha imimiselo neminqophiso yethu ukuze “sime singenabala phambi [kwaKhe] ngomhla wokugqibela.”29
Ummiselo womthendeleko sisimemo esingcwele nesiphindaphindwayo sokuguquka ngokunyanisekileyo kunye nokuhlaziywa ngokomoya. Isenzo sokuthabatha umthendeleko, ngaphakathi nangokwaso, asizixoleli izono. Kodwa xa silungiselela ngononophelo kwaye sithatha inxaxheba kulo mmiselo ungcwele ngentliziyo eyaphukileyo kunye nomoya otyumkileyo, isithembiso sokokuba singasoloko sinoMoya weNkosi ukuba ube nathi. Kwaye ngamandla angcwalisayo woMoya oyiNgcwele njengeqabane lethu rhoqo singakwazi sisoloko sinokuhlala silugcina uxolelo lwezono zethu.
Sisikelelekile ngokwenene veki nganye ngethuba lokuvavanya ubomi bethu ngommiselo womthendeleko, nokuvuselela iminqophiso yethu, kunye nokufumana esi sithembiso somnqophiso.30
Ukubhaptizwa Kwakhona
Ngamanye amaxesha abaNgcwele beMihla yokuGqibela bavakalisa umnqweno wokuba bangabhaptizwa kwakhona—kwaye ngaloo ndlela bacoceke kwaye bafaneleke njengalo mhla bafumana ngawo umthetho wabo wokuqala osindisayo weendaba ezilungileyo. Ndicela ngentlonipho ukuba ndicebise ukuba uBawo wethu waseZulwini kunye noNyana waKhe oyiNtanda abafuni ukuba nathi sive ngolu hlobo lokuvuselelwa ngokwasemoyeni, nokuhlaziyeka, kunye nokubuyiselwa kanye kubomi bethu. Iintsikelelo zokufumana kunye nokuhlala sigcina uxolelo lwezono zethu ngemimiselo yevangeli zisinceda ukuba siqonde ukuba ubhaptizo luyindawo yokunduluka kuhambo lwethu lwasemhlabeni lokomoya; aluyiyo indawo ekufanele ukuba silangazelele ukuyityelela ngokuyiphinda-phinda.
Imimiselo yokubhaptizwa ngokuntywiliselwa, nokubekelwa izandla isipho soMoya oyiNgcwele, kunye nomthendeleko ayizizo iziganeko eziqeleleneyo kunye nezahlukeneyo; endaweni yoko, zizinto ezikumzekelo wokunxibelelana kunye nokongezwa kwenkqubo yokuhlangula. Ummiselo ngamnye olandelelanayo uphakamisa kwaye wandisa injongo yethu yokomoya, nomnqweno, kunye nokusebenza. Icebo likaBawo, neNtlawulelo yoMsindisi, kunye nemimiselo yevangeli inika ubabalo esiludingayo lokuqhubekeka phambili nenkqubela phambili umgca phezu komgca kunye nomthetho phezu komthetho oya kwikamva lethu lanaphakade.
ISithembiso noBungqina
Singabantu abangagqibelekanga abazabalazela ukuhlala emhlabeni omagad’ ahlabayo ngokwecebo eligqibeleleyo likaBawo waseZulwini lokuqhubela phambili ngonaphakade. Izinto ezifunekayo kwicebo laKhe zinobuqaqawuli, zinenceba, kwaye zingqongqo. Ngamanye amaxesha singazaliswa kukuzimisela kwaye ngamanye amaxesha siziva singonelisekanga kwaphela. Singazibuza ukuba ingaba ngokwasemoyeni siyokuze siwuzalisekise umyalelo wokuba sime singenabala phambi kwaKhe ngomhla wokugqibela.
Ngoncedo lweNkosi kwaye nangamandla oMoya waKhe wokuba “asifundise [thina] zonke izinto,”31 eneneni singasikelelwa ngokuqonda amathuba ethu okomoya. Imimiselo imema injongo yokomoya kunye namandla ebomini bethu njengoko sizama ukuzalwa ngokutsha kwaye sibe ngamadoda nabafazi bakaKrestu.32 Ubuthathaka bethu bunokomelezwa, kwaye ukusikelwa kwethu imida kunokoyiswa.
Nangona kungekho namnye kuthi onokufikelela kwingqibelelo kobu bomi, sinako ukuba sifaneleke ngakumbi kwaye singabinabala njengoko “sicocwa ngegazi leMvana.”33 Ndiyathembisa kwaye ndiyangqina siya kusikelelwa ngokholo olwandisiweyo kuMsindisi kunye nesiqinisekiso esikhulu somoya njengoko sizama ukugcina uxolelo lwezono zethu, kwaye ekugqibeleni, sime singenabala phambi kweNkosi ngomhla wokugqibela. Ndiyangqina ngokunjalo egameni elingcwele likaYesu Krestu, amen.